دعوة للحوار في الغش التجاري اللحم المندي والمضبي

[ssss2]

جاني ضيوف يباركون لي بالعيد ،
فلبد من اكرام الضيف وهم اعزائي على
فذهبت لمندي مشهور لدينا في الروضة وبالتحديد في شارع خالد بن الوليد ، فسألت الموظف عن حجم التيس فقال التيس وسط وحجمه طيب ويكفي لعشرين شخص
فقالت أن اغلبت مطاعم المندي يذبحون تيوس ابو شهرين وحجمها صغير جداً ولايكفي لخمسة ويجلدون الناس بسعر غالي الثمن فقال لا التيس كبير وبكيفي فطلبت نصف تيس واجتهد بتقديم السلطات وزيادة الرز فاستغربت هذه الخدمة المميزة وسررت منها وقصدر الصحن وذهبت للبيت وتم تقديمه للضويف وقالت ماورا هذا قصور وعند فتحي للقصدير شممت رائحة كريهة والحمد لله على النعمة و بعد التمحيص في الامرذهبت لحوش المندي وقالت بشتري تيس للثلاجة وابغي اشوفة حي فوجدت أن هذا المندي يقدم تيوس تركية يتم استيرادها حيه وهي متوفره بكثرة في سوق الاغنام في العزيزية واسعارها مابين 450 و500 في الوقت الحالي ويتم خلطها مع التيوس العارضية وهي تمتاز باللون الاسود في اللحم والرائحة الكريهة
فقالت لاصحاب المندي ياخي حرام عليك تغش الناس وتقول لهم هذا بلدي قال ياخي البلدي سعره 600 ريال ولايوجد بكثرة وانا كل يوم اذبح 30 تيس تقريبا
قالت بنفسي انا هربت من مندي سابق يقدم تيوس صغيرة وغالية وطحت في مندي يقدم تيوس كبيرة ولاتوكل احترنا فيكم مع العلم أنكم نخبة المطاعم في الرياض
فالنفر في مندي يتم تقديم بان يوخذ جزء من رجل التيس واليد والظهر والرقبة والضلوع
وسعر 43 ريال لماذا لايتم القياس في النفر على الكيلو
الموضوع للنقاش ياخوان

[رعد الصحراء]

السلام عليكم ورحمة الله وبركاته
كل عام وانت بخير
أكبر خطأ حصل منك ما ذكرت إسم المطعم ليتفادى الاخوان من هذا النصاب
اللهم لك الحمد والشكر شي إسمه مطعم ما أعرفه ولو تقول وش إسم المطعم اللي شغله زين ما أقدر أفيدك لعدة اسباب
السبب الاول مافيه نظافه
السبب الثاني مافي شي إسمه لحم طازج
السبب الثالث عندي إستطاعه بالطبخ وبدون أي تردد
والمصيبه عندنا حماية المستهلك حدث ولا حرج ولا حياة لمن تنادي ولو عندك الدليل القاطع على شكواك ولا راح يفيدونك بشي
المفروض يوم رجعت للمطعم ماخذ حقك منه لو بالقوه الاشكال هذي مفروض ما تعطيه أي فرصه للعب على حلال المسلمين
حسبي الله عليهم
المعذره أخي الكريم إذا حصل في ردي كلام ما أعجبك
يعلم الله ان اللي حصل معاك كأنه حاصل معاي وشي يقهر
’’تـقبل مروري’’

[faiz-111]

من امن العقوبه اساء الادب لو فيه جهه رقابيه تشرف على المطاعم ووضع اعلانات وتوجيه لكيفية الشكوى كان ماوجدنا هذا الغش والتلاعب

[s3ads]

اولا :

طالما المساله فيها ضيوف اجل لازم انك تروح محل معروف ومجرب يعني مو تروح لمحل اول مره تجربه وتتوهق مع ضيوفك

ثانيا :

المفروض تقول اسم المكان عشان لايتوهقون الاخوان مثلك


والله يعوضك

[كموص]

لاتشكيلي حتى لا أبكيلك !!!
أنا أشريت في يوم من الأيام رز ولحم مضغوط وفي علب مقسطرة , ولما بدأنا الأكل !!! أظن أو أعتقد أنه كان لحم خرتيت , والبقية يعرف بعض الأخوة اللي سويته ..!!؟؟
رجعتلهم وسويت فضيحة ولميت أمة محمد عليهم .

[صدى العارض]

السلام عليكم ورحمة الله وبركاته
الغش ها اليومين وارد وبكثره حتى انك تشوف أكثر اللي يشترون من الشركه العالمية هم من مطاعم المندي يشتروم التيس الهندي على 180 ريال ويبيعونه عليك بـ 500 ريال وأذا سألته قال بلدي الله يرحم الحال بس .

[الرأي الآخر]

كم من مرة فشلتني تيوس المطاعم ، ليتنا نصير قنوعين سواء الضيوف او المضيف
نقتنع ونعمل بالقاعدة التي تقول (الجود من الموجود) اقصد
مافيه الثلاجة والبيت من زاد يقدم
ووالله لسوف تغلق كثير من الملاطع آآسف المطاعم

[ابن جزيرة عرب]

والله نفس التجربة مريت بها مع مطعم الذهبي بالدمام جوني ضيفين مع اهلهم ورحت لهم وطلبت نص تيس وعلى بالي قلت لهم صحنين ومثلوثه الله يعميهم والله اني يوم كشفت القسطير على الصحن ان وجهي صار احمر والله انها عظام يا دوب تشوف اللحم عليها واما الرز ماشاء الله على الكرم رحت لهم والله اني محترق وابو يمن الله لا يربحه رد علي يقول طيب ياخي انت طلبت تيس والتيس صقير ( صغير ) وبعدها حرمت طال عمركم الله يخليلي كهلتي وطبخها ما فيه الا كبسة حاشي تبيض الوجه والله حتى لحم الخرفان اني ما يجبرني عليه الا الضحيه والحمد لله على كل حال

[ابن جزيرة عرب]

اضافة الى ما سبق يا اخوان
سمعت هالايام فيه حريم اخواتنا وفي مقام امهاتنا من بلدنا يترزقون الله بداو يطبخون للعزايم والمناسبات في بيوتهم ليش نتركهم ونروح للمطاعم الحراميه انت دور في قوقل عنهم وعن ارقامهم وتوفرلك لو تبي مفطح حاشي وتوصله لبيتك

[ssss2]

اشكر الجميع على ماذكر من مداخلات
اخواني المندي معروف في شارع خالد بن الوليد باسم مندي الكندي وهو مشهور جدا ولكن الطمع في طلب المكسب الكبير
أما عن الطبخ فجميع التجهيزات لدي في البيت واجيد الطبخ ولكن الوقت لم يسمح لي ولكن بعدها اتوب والضيف رزقه معه .

[فارس البيد]

موضوع قيم وهادف يعطيك الف عافية

من امن العقوبة اساء الأدب

لان حماية المستهلك مدري وينها ووش دورها وهل اصلا عندنا شيئ اسمه مؤسسة حماية مستهلك !!!!!!!!!!!!!!!

اذا ما كنت مزنوق في الوقت

احسن شيئ تروح وتختار التيس او الخروف الي يناسبك

هذا اذا ما بدله >>>> اشك انهم يبدلون

لاني مرة جاني ضيف عزيز

ولفيت لف الى ان لقيت خروف وش زينه وقلت هذا الي يبيض الوجه

ويوم كشفت عن القصدير قسم بالله وجهي قلب لونه

المفطح طلع صغير مو مثل الخروف الي اخترته

قلت لاصحابي والله الي الخروف الي وديته المندي اكبر من هذا

قال بعضهم يمكن عشان سويته مندي >>> وصار عندي شك انهم يبدلون او على اقل تقدير يصير لخبطه ويعطونك شيئ مو لك لواحد ثاني

المهم

مثل ما تفضلوا الاخوان

الي يطبخون في البيت من اخواتنا الي يطلبون الرزق الحلال ما يقصرون لو نتعامل معهم افضل

اما اذا كنت مزنوق في الوقت ومستعجل

تفحص التيس او الخروف تفحص مزبوط

لا تتورط يوم تكشف القصدير

واسف على الاطالة

[صقرحايل]

الله يعطيك الف عافيه على الموضوع القيم ونقدر نتكاتف واذا حصل احد نفس اشى ان نذكر اسم المطعم ونحدد مكانه ونسوى مقاطعه له والله ان ها العمال تاتئدب ولاكناا لازم نبدا فى هذا شى واكبت لنا اسم المطعم ومكانه
وشكر

[ابوفهيدان]

اذ التيس البلدي ب 600 ريال وخلنا نقول نفر اللحم مندي ب 30 ريال
والتيس يكفي 20 شخص
الناتج 30 في 20 =600 ريال من غير حساب الرز
بالعقل هل انت تصدق ان المطاعم تبيع تيوس بلدي ؟؟؟؟؟؟؟؟

[رعد الصحراء]

اشكر الجميع على ماذكر من مداخلات
اخواني المندي معروف في شارع خالد بن الوليد باسم مندي الكندي وهو مشهور جدا ولكن الطمع في طلب المكسب الكبير
أما عن الطبخ فجميع التجهيزات لدي في البيت واجيد الطبخ ولكن الوقت لم يسمح لي ولكن بعدها اتوب والضيف رزقه معه .

كان عندي إحساس انه الكندي
أخي الكريم أتوقع ان صاحب المطعم ما عنده خبر بالشي هذا والله أعلم
ليش ما تبلغه باللي صار ؟؟؟
يمكن واثق فيهم ويا غافل لك الله

[الــفــيــصــــل]

اضافة الى ما سبق يا اخوان

سمعت هالايام فيه حريم اخواتنا وفي مقام امهاتنا من بلدنا يترزقون الله بداو يطبخون للعزايم والمناسبات في بيوتهم ليش نتركهم ونروح للمطاعم الحراميه انت دور في قوقل عنهم وعن ارقامهم وتوفرلك لو تبي مفطح حاشي وتوصله لبيتك

فعلا كلام سليم جدا والله يرزق جميع المسلمين

[راعي جيوب]

أشهد بالله أن هالمطاعم لاعبه لعب فينا يحطون لك من هاللحوم المبرده ويحطون عليها من هالبهارات وهالماجي لين تزبط وأنا مغير سحب منهم ليت الواحد يحط لها مكان في بيته يطبخ فيه وربعه جالسين معه منها سوالف وأنت تطبخ على الأقل تاكل وأنت عارف وش اللي قدامك والله الموفق

[تهوي]

- الحقيقة هذي المطابخ وابو يمن اكبر نصابين وانتبهو لهم .
- لكن من قرائتي للردود اعلاه اشوف بعض الناس لما يشتري يطلب ويشيل الصحون عليها القصدير ولا حتى يفكر يفتحه او يشوف اش فيه الا في البيت .
- ياخوي والله اذا ما دخلت عنده وشفت اللحم قبل ما يحظه في الصحن ما ارتاح .
- فيه مطابخ تجيب التيوس الباكستانية والهندية من الثلاجة العالمية ويقولون لك هذا تيس بلدي وهم كذابين ، ونصيحة اذا اخذت لك لحم مندي وشفت اللحم كله بهارات ومصفر من كثر اللون الاصفر اللي يحطونه ولا تطعم الا بهارات بالكيلو يحطونها فاعرف انهم نصابين وحرامية وجايبين من الثلاجات واعطوها من ها البهارات علشان يغيرون الطعم ويشيلون زفرة اللحم .

[itti77]

ياأخوان وش بقي في بلدنا ماأنغش،

[ناصرالفهد]

بسم الله الرحمن الرحيم

[ناصرالفهد]

بسم الله الرحمن الرحيم
كل عام ونتم بالف خير يعود عليكم بي الصحه والعافية
اخواني انا اقول لكم ان السبب الرائسي هو مناء لو كل واحد اذا وجد شي مو زين في الي مكان ذكر اسمه كان تغيرت المور كلها وبعدين ليش ما نرجع لي ايام اول رح السوق من بعد الفجر وختر الي يعجبك من الذبايح وبسعر مرة مناسب لي ان الجلبه من كل مكان ولد الديرة اولاء من غيرة بس الكسل
والله اعرف واحد يتاجر بي الغنم من غير حوش على الطلب بعد الفجر يروح وياخذ احلاء ذبيحه ويرجع وتشرط بعد بس شغل عدل وانا ايد ذكر المطعم عشان مايصير لي واحد في الموقف هذا
وتقبلومروري

[zoom10]

أنا أقلك وش دور حماية المستهلك . دورها إذا مات واحد متسمم أو عائلة لا سمح الله تتحرك .


أما صاحب الموضوع فبصراحة التيس مايجمل ونادرا تحصل المطعم إلي يقدم التيوس العارضية وإذا قدمها راح تكون بالفعل صغيرة .

عليك بالحري وبس . طبعا أنا من الغربية ومدري عن الحري عندكم .

[ebn-aljazerh]

أنا أقول مافي غير طباخ البيت

[شمالات نجد]

الله يكفينا الشر

يعني ما نعزم

سؤال يا أخوان هل الطبخ صعب لدرجة الاعتماد على المطابخ؟

وين حريم الأولين؟؟؟؟؟

دنيا دلع

سلام

[aljanah]

لأن البدية نايمة وووزارة التجارة تشاخر وحماية المستهلك في عداد الاموات

[ملف علاقي]

يااخوان انا حصل معي نفس الشي وتفشلت مع الضيوف ونزلت نفس الموضوع من فتر بس المطعم يختلف وهوجمب الي ذكرتو ه وله فروع منتشره علي مستوي الرياض ولاكن للأسف قائمين علي الغش والتلاعب بالأسعار ولاكن لا حسيب ولا رقيب وبعدها والله يااخوان قررت مااطبخ إلا في بيتي صحيح حريم هاالوقت فيهن الكسل وقل السنع لاكن حليناها شريت برميل مندي كهربائي ياخذ ذبيحتين سوا ودربنا الطباخه عليه والله يااخوان تشوف مندي صح نظافه وطعم حتي من اكل عندي يسأل عن المطعم الي طابخ وإذا قلتله عن الفرن قال ورينياه حتي اني بايع عن طريقي علي الربع اكثر من 12فرن لوني اخذ عموله كان طلع فرني بلاش وياليت كلن يسوي سواتي ونقاطع هاالمطاعم لين يتعدلون ومشكورين00

[الطرشي]

اللي يقول لحم بلدي
كبده طازجه

كذااااااااااااابين
وللأسف زي ماتفضلو الاخوان مصدرها معروف : الثلاجة العالمية
تيوس وخرفان وحشوان (( هندية باكستانية رومانية تركية ))
يحلف بالله لي صاحب محل كبده أن 90% من محلات الكبده اللي فالرياض
يكتب عالباب طازجه ويقولها للزبائن وهي تشرى بالكيلو من الثلاجة العالمية
يقول تخيل كبده حاشي باكستاني مذبوح قبل 3 سنوات
أو لحمة خروف روماني مذبوح قبل سنتين

الحل الوحيد لهذة المشكلة:
الطبخ المنزلي لان اغلب الناس أصبحت حياته مطاعم فطور غداء عشاء يمكن لو يسوي أحصائية لعدد مرات الطبخ في منزله اسبوعياً ماتتعدى 4 أو 5 مرات
نقطة ثانية اللي هي اذا جاك ضيوف يمونون يعني مهوب لازم ذبيحة ليش ترووح تطلب نص تيس وانت خابر انه لحم اي كلام وسعر غالي أقل شي نص تيس يمكن تلقاه بـــ 280 ريال
ليش مايروح الواحد منا لأقرب ملحمة ويأخذ لحمه حاشي قدام عينه أو دجاج مبرد مثلا
بس للأسف نحن كسعوديين ذبحتنا العادات السيئة والمطاعم أستغلت هذة العادات أيما استغلال

شكر لصاحب الموضوع على طرح الفكرة

[فتى التويم]

مشكلتنا في السنوات الاخيره تعودنا اننا اذا جانا ضيف جبنا له من المطعم وحطينا له ذبيحه

ولو طبخت له في البيت قال هذا مقتر على عمره وكارف اهله

يعني حالنا تبدل


المفروض نرجع على ماكنا عليه تنشرى الذبيحه من السوق وتنذبح وتنطبخ في البيت

بس هالايام معد فيه حريم سنعات

[زعفرانه]

ذبحنا العجز والكسل
والمطاعم ذبحتنا بالغش والخداع لان ماحولك احد عارفين ان احنا راح ندفع؟
ياليت بوقفه حازمه

[ابورايف]

السلام عليكم/الي صار لي شي ثاني مرة بيجون عندي ضيوف فقلت عندي في الاستراحة طلي نجدي راهي اخذتة ووديتة للطباخ ووعد على انة يكون عشاء يوم اجتمعو ضيوفي دقيت علية جاب العشاء الين ا لمفطع ماهو ركزة قلت لة قبل مادخل العشاء وانا عندسيارتة الذبيحة هذي ماهي تبعي وتصير مشكلة عندالباب وهو يحلف المهم اتصلت بالشرطة وجو وفي الاخير طلع يبغى يغشني الذبيحة حقت الطباخ سعرها 600وذبيحتي تقريبا1100المهم في النهاية جاب الطلي حقي من حوشة وعشيت ضيوفي من ذبيحتة والاخذ والاريال بس احراج عند الرجاجيل عزيمه وهواش وهذة بتاريخ 3-7-1429 ماعليش على الاطالة وتقبلو مروري

[محب الرمنغتون]

مطعم الناضج وبس 0000

[asd_asd]

كل عام وأنتم بخير

الاخ من فتح الموضوع والاخوان اللي يردون بالحديث ذو شجون ...

كل واحد يذكر تجربته..

والبعض يضع اللوم على الرقابة..

وين كلام العقل ..

راعي الضوف واحتداده انه يشتري اكل من مطعم لم يكرم ضيفه ....ليش مانقدم ما تيسر من استطاعة اوانه يكون جاهز بعض الشي في منزله والله البيوت فيها نعايم تبارك الله .. وكذلك ادوات تسرع وتساعد في الاعداد والطبخ افضل من المطاعم ولاننسى البركة من الله في كل مانقدم اونطبخ .. ونقول تفضلو بسم الله

المطاعم صارت اكثر من الازم ولو يفتح كثرها برضه السوق يستوعب..انا اتوقع لو ربعهم يذبحون بلدي لانقرضت التويس والذبائح


كاني أفهم من النقاش انكم تدورون حل للرقابةاو البحث عن مطاعم جيدةلاتشترو من هذا اشتروا من ذاك ....اصحاب المطاعم يسمعونك ياللي تقول ما يدرون عن شي... هم ...
الان احسن مطعم ....
احسن شي ياخذ ضيفه ويروح للمطعم واذاخلصو للكافية يتقهون تدري من الباب خذه وقله مشينا قووووووه لل.....
الاخ اللي يقول الحريم السنعااااااات منهو عودهن

لاننسى البركة الله يطرح البركة في كل شي


عذرا للاطالة وتحياتي للجميع

[عاشق ماجدونا]

الحمدلله

من فترة طويلة جدا

ما قربت المندي

والفضل يعود للأفران الموجودة في الاسواق

اقولك شئ من الاخير

لاتصدق اي بائع مو مندي اي شئ تشتريه لو حلف على مصحف قدامك

كلهم يبحثون عن طريق الثراء السريع

وهو شئ مو اصلي تقول عنه اصلي وتاخذ منه مبلغ افضل عندهم من الاعتراف

قبل مدة في اواخر رمضان دخلت محل نعول الله يكرمكم وكان البائع من جنسية عربية

ولا ازيد غير ان هالجنسية معروفة بالكذب والنصب وكثرة الكلام تفاجاءت

انه لم يضع اسعار على بضاعته وكل ما سألته عن شئ لا ينزل عن المائة ريال

بصراحة عصبت لان فية اشياء موجودة في مجمعات ومسعره بثلاثين ريال

ولكن مو راضي يتكلم ليش ما يحط اسعار وتكون واضحة للزبون من دخوله المحل

اذا اردت ان اتكلم عن الغش فلا حرج لا تتعب نفسك التفت يمين او شمال وسوف ترى

الغش

الاهتمام بالجودة لم يعد يعني الشركات العالمية بالعكس الاستهلاك في نظرهم افضل

حتى السبارة الان تقاس على حسب الاستهلاك عكس الموديلات القديمة

كان من السهل استهلاكها دون النظر الى اي عواقب الاستهلاك لان السيارات

كانت تهتم في الجودة الان موديل سنتها وتلقاه موقف في الصيانة

وسلامتكم

[الستانس]

الله يعين

ولا وازيدكم من الشعر بيت

مر سوق الغنم العصر وشف حقين المصالخ يالله لك الحمد دوران على المؤسسات

ولا يدورون إلا الطيح ابو 1000 يباع على 200 ويالله جابها

انا لي علاقه بالمواضيع هذي

واقسم بالله ان الملاحم وبعض المطاعم يشتري الطيح وهي بتموت

ويذبح عن باب الحوش ويروح المصلخ عشان الفحص ويختمها

وعلى الملحمه هذا ان اجتازت الفحص بدون وسيط

والله يا اخوان لو تشوفون الخرفان تحوم كبودكم

كل لأمراض مجتمعه فيها

فنصيحه لوجه لله ابعدو عن المطاعم والملاحم


وموفقين خير