احد ................. يقدر يوضح

[خشم الحصان]

اخواني الغالين
السلام عليكم
اخواني في الله عندي سؤال صغير ابي احد ان كان يقدر يوضح لي وهو وش الفرق بين السياحه اقصد السياحه الداخليه والكشتات هل فيه فرق بينهم ام كلهم مثل مثل يعني ماكو فرق سوا سياحه مع رفقه طيبه مثلكم وشرواكم او سياحه مع الاهل الله يخليهم لكم امين
اخوكم
خشم الحصان

[حد السيف]

السلام عليكم ورحمة الله وبركاته
الحمد لله على السلامة ابو محمد
الظاهر من كثر الدوجان بها الصيف الله يثيبك صرت ما تفرق بين الكشتة الداخلية والسياحة الداخلية
عندي لك خل اسود على كيف كيفك باروشك بة من كمخات الشمس لا وتلقى اللون قلب برونزي من كثر حمامات الشمس يتبطح بين ها الرمال ويحسبة شواطي كان الله مير يثيبك يالغالي
ياخوي ابطيت حييل علينا وش اخبار الفقع والبسباس والجراد والطيور يذكرون اراضيكم ان السيل ما وقف عنة
بشر عسى القميري واجد ويذكرون انة مساهم بمكافحة الجراد يوم انة قاعد يطاردة وياكلة
وينك :D :D :D :D :love2::love2: تصدق اني محرر اعلان ابي انزلة اليوم على شانك تاخرت نخبر الموضوع اسبوع ويزيد علية شهر صار ربع سنة
هلابك وغلا ومرحبتين بكبر الديار التي زرتة الله الله بالصور حتى لوهي عكوس شغل فانوس شارع الوزير راضين بة
الحمد لله على السلامة ومكانك محفوظ يالغالي

محبك اخيك حد السيف

[حفرلوجيا]

هلا , وأسفرت وأنورت يابو محمد , وحمدا لله على السلامة..

اختلط علي الفهم حول سؤالك فهل تقصد الفرق بين السياحة مع الأهل وبين الكشتات مع الأصحاب ?
أو تقصد الفرق بين السياحة بمصايفنا الجميلة( وحالها اللي يسر العدو ) :( وبين السياحة البرية ( الكشتات ) سواء مع الأهل أو الأصحاب :good:

وعلى أي حال سوف ( أسيح في الأجابة على الوجهين ) :

1- إذا نويت السياحة في مصايفنا الجميلة فأول مايصفقك هم رصد مبلغ وقدره , تطفي فيه ( الجشع والغلاء) وتصرف وأنت تحس بالغبن , بينما الكشتة تكون متلهف له , وأكلف ماعليك البنزين وتغيير الزيت , وباقي الصرف تصرفه وأنت تضحك:)

2- في مشوارك للسياحة الداخلية تصدمك الحجوزات والزحمات وموظفين كأنهم مغصوبين يكدون عليك وعلى حمولتك :mad: بينما في الكشتات أنت مختار الشلة اللي ماتمل منهم. او عييلك اللي بحاجة لانك تونسهم.

3- في مصايفنا الجميلة أول ماتقبل على ما يسمى ( ظلما وبهتانا ) الشقق المفروشة يتلقاك كشنة طبخ عمال ويطلع لك الحارس ( المكشن المكشر المشوش الطمل ) اللي هو موظف الاستقبال والمحاسب والمدير العام :, ولو كنت في فنادق ابشر بالدلع بس هات اللي بمخباتك ورح تسلف قبل تحط رجلك بالسويت .. أما في الكشتة فتبي تلاحظ إن وجع وهموم العام الأول انزاحت يوم حدرت للشعبان والفياض اللي ترد الروح .. فإن كنت مع الأصحاب ابشر بمن يوسع صدرك , وإن كنت مع عيالك أول ماتنزل للمكشات يتطشرون الصغار والكبار مستانسين وتقول لك ام العيال :
عسى ماشر احد ملزق صوابرك بإذانك ( مستغربة ماتعودت على ابتسامتك اللي صارت من الأذن للاذن طول هالساعات ) ..... بنفس الوقت هي تبي تلاحظ إن القرامة بدت تطلع منك وصرت انت اللي مكفيهم .. وايضا خذ منها ( لزقة الصوابر بالأذان ) , بهالحالة تبدأ اعراض التفاهم والنفس الزينة ... بينما لو كانت سايح بمصايفنا الجميلة ستكتشف أنك صرت سواق بس بدون إقامة ( هات ,, جب ,, ودنا ,, انتظرنا ):mad: , عاد انت لاشعوريا ودك تنتقم من هاللطعات وآخر النهار تبدأ توجه سهامك ( ليش سويتوا كذا , ليش تأخرتوا هناك , ليش ,, ليش.... وآخر فرد عضلاتك عليهم ( قم هات لنا عشاء يابو فلان ):(
طبعا تبي تطلع حنيتك فـ ياتعشيهم بالمطاعم او تجيب العشاء , وتكتشف آخر النهار إن عضلاتك اللي فردتها منهدة , ووينك يالسرير ( شخري ):( .. وتقوم الصبح متعقدة عصبك ,,, بينما في الكشتات ترجع آخر النهار للبيت والعييل مايصدق واحدهم يوصل السرير : تعال للعشى ياوليدى ,, وهو ( شخري ) :bounce:, عاد إنت تبي تأكل احسن عشاء من أم العيال وبعدها ( شخري ) :rolleyes:,, وتقوم الصبح عروق راسك تطقطق.

والله ودي استمر يابو محمد لكن خل نهلي بك والسوالف لاحقين عليه ..

هلا ومرحبا , ولا انا قايل لك مثل الطبيب وشقردي : ياشايبنا .. ( هم اللي يقولون ماهو أنا ).:D

[المترو]

والله يا حبيبنا نرحب فيك اولا ًمرحبا وعودا حميدا من الاجازه
الفرق الثاني طال عمرك السياحه خساير ومشاوير عوائل على الفاضي والمليان وغثى وراعين
ولن ازيد عن ابو سليمان كفى ووفى فيما يخص السياحه
اما الكشتات فهي وناسه واستجمام طبعا بالنسبه لي على الاقل وفكه من الديره واهلها فور اوايل وخصوصا اذا صحبه طيبه وامطار وربيع طيب ولا خساير اللهم البنزين والقطه وارض الله واسعه

وسلامتكم الرحال2003

[خشم الحصان]

اخواني الغالين
السلام عليكم
الاخ المتميز حد السيف
خل اسود الحين قاعد افرك روحي بصنفرة جدران ابي البياض يضهر وانت بتروشني بخل اسود اي برونزي الله يثيبك ياخيي لو اتفصخ غديت كني مطب صناعي كلن بيدعس(ن) ياخيي لو تمشي حافي خطوه فاح دماغك من الاوهيب شمس اللهم ياكافي و المده ياعميم مهيب في يدي ولا لو الود ودي حطينها كبسه مقلوبه بس ماش مقيد
ولكن الحمد الله قضينا فقع الحين منهو الي يبي خل اسود انا ولا انت احد يدور فقع ولا بسباس
وجراد اما الطيور او حلاله بس ياخيي لو تكح مسكوك يقلون انت مثور وهي كحه قمنا نحك سكاتي مغير تناتق العيون اذا كح الواحد من الروعه اما السيل يالله لك الخمد والمنه سيل يخليك تشقق من الفرحه والوناسه يابعدهم الحمام مهنا حمام بس دجاج الحبش وبر وارنب واهل ذيك الديار مايكلونها وغرنيق وطيور ماعمري شفتها الا في التلفزيون حق (ابو شكاع) عسي اعلانك مهوب عن غياب عامل ترا تسويها ثم خذ سعة صدر من ابو شكاع الي طبيب الي ضب وحفر لوجيا اذا ضهرة في الجريده وتحت الصوره هروب عامل (خشم الحصان)
اقول فكنا من هالحكي الي يعور وشو شارعه....... قل سراج وبس
مشكورؤ يابعدهم والله يغفرلك ويرفع من قدرك يالغالي
اخوك
خشم الحصان
...............................................
الاخ الحبيب ابو سليمان(حفرلوجيا)
اخي الحبيب نعم هذا هو المقصد يعني اهلنا شابين فينا نبي نروح نصيف نبي نروح نتمشي نبي نبي نبي اماكم
اذا جاء البرد والمطر تنقزتم مثل الفشار الي في التاوه ولاعاد نشفكم الا في السنه حسنه وراكم متفرغون لنا في الصيفيه ولكن اذا رحنا يم المصايف او نوينا بهم طق في الراس مليون هوجاس وتفكير وهي.
1- السياره
2- العفش كنك شاد من بيتك
3-مصاريف
4-اتصال علي كل واحد تعرفه من ربعك اما في الجنوب او في الطائف تكفي ياولد الشايب هه عسي لقيت سكن
5-الاجار ومادراك مالاجار ولاهوب مشكله لونه خرابه
6-الاكل والمشروب من المطاعم والمندي والحنيذ وغيره حتي الي يبسطون علي الشوارع عرفين ان المخبات مليانه
7- المحطات الي علي الخطوط والاسترحات يووووووووووووه الله يعين
وغيرها وغيرها كثير واذا التفت يم هالبزران ولا كل واحد غادي كنه مطيار فاق اثمه يبي ويبي(المطيار هو فرخ العصفور) ولا يدري الحبيب ان المزانيه حقة التصيف نصفها من الجفره سلف
اقول اخوي ابو سليمان الاهل هم يعرفون ان الكشته اخف واونس من التصيف ولا الموضوع مغاير ليش عيال عمي يرحون وليش عيال عمتي وخالتي والجيران اخير منا وليش وليش .
عموم ذكرت العام يوم البروق والمطر وهاك النفدان مشققها المطر تقول شطوب في رجلين حرفي
مهيب ارخص واونس من ياولد جب ياولد كم الحساب والحسابه بنحسب
مشكور يابعدهم والله يغفرلك ويرفع من قدرك
اخوك
خشم الحصان
...............................................
الغالي والحبيب
الرحال2003
الله مير يسلمك من كل مكروه امين يابعدهم وكلامك فيه شي زين وفيه شي بنتداقش معك فيه زين اخيي.
1- السياحه صح خساير
2-البزران لهم حق في انهم يتمشون وان حنا نتفرغ في السنه ولو شهر لهم اذا حصل اجازه بعد بس مانقيس الشي مثل مايقيسونه هم كل همهم يتمشون ويصيفون وانت في نضرهم مامثلك احد في هالكون الفسيح يعني هو متعشم فيك كل شي وشينه تكسرها في خاطره والدنياء متسوا عبره من عيونه اذا ناظرك والمحاجر فيها دموع.
انا اتفق معك في قول ابو سليمان
حلو اذا نتفق علي ان الكشته هي مثل السياحه لها وقت معين في السنه نحتريها علي احر من غاز بيوت العروس.
وعلي قول الشاعر
الكشته مافيه مثلها.............. شباب جملة اهلها......... وبين هاك الربيع
بس ياخيي وشي هالكلمه(فور او ايل)
عسي الله يجيب السيل وتخضر الاسياحي علي وزن سياحي.
الخساير مهيب مشكله لئنك انت الي بتنضم الكشته يعني بتوزنها علي مزاجك مهوب مثل التصيف انت الي موزون علي وزنية هات مهوب كم
يعني التصيف هات ولا تسال عن كم هو به
اما الكشته بس كم هو به
عرفة الفرق
مشكور يابعدهم والله يغفرلك ويرفع من قدرك يالغالي
اخوك
خشم الحصان

[سنتافي]

السلام عليكم ورحمة الله وبركاته

والله شوف هي كلمتين ياكشته يابره يعني يا تنظملك مجموعة كشتات ولا اروع او خذ عيالك وسافربهم بره والسياحه الداخليه انحش عنها http://www.mekshat.com/vb/images/smilies/biggrin.gifhttp://www.ezboard.com/images/emoticons/wink.gif

http://www.mekshat.com/pix/upload/images5/mk8041_1121.JPG

[المترو]

كلام طيب من وجه طيب بس تراك مره قالبها قصيمي بحت طيب واللي ما يعرف المصطلحات القصيميه ولا خبير لهجات هذا يلزمه مترجم
المهم كلامك 100% صحيح عن الابناء والعائله ان لها حق علينا ولا تخاف مدسمين شواربهم بالصيف عشان ناخذ حقنا بالشتاء؟؟؟؟
وصراحه انك رومنسي عن االعيال وفعلا هم اغلاء ما نملك ولو انهم يرفعون الضغط احيانا لكن احباب الله الله يخليلك عييلك والجميع
اما الكلمه اللي خطمت غصب وتعني لبعض الوقت for a while

هذا وسلامتكم الرحال2003

[أبو فالح]

السلام عليكم ورحمة الله وبركاته

طبعآ أول مرة ، أسمع صفة الشايب من ( حفرلوجيا ) ،، خذ حقك .


نرجع إلى سؤالك :

من الصعب جدآ ، إيجاد إجابة محددة ، عن هذا السؤال ، فهناك الفروق الفرديه ، والطباع المختلفة ،

والرغبات المغايرة ، من شخص إلى شخص ، ومن عائلة إلى أخرى .

وهنا ، سأتحدث عن الأب المكشاتي ، والأسرة المكشاتية ،، مهملآ شريحة كبيرة ،،، غير مكشاتية .

وهنا ، أيضآ يجب التفريق ، بين الأب من جانب والأسرة من جانب آخر .

فأنا لا أشك لحظة واحدة أن الأب المكشاتي ، يفضل البر والكشتات ، سواء مع الأسرة أو مع الأصحاب

والأصدقاء ،،، على السياحة في أرجاء المدن السياحية ،،، فأنا أدرك ، أنّ فعاليات صيف ( أم سالم )

البري ، وهي تتراقص ، بين أغصان ( الأرطى ) وتترنم ، بصوت جميل ورائع ،،،، لا يعادله ، صيف آخر ،

في أي مدينة سياحية .

ولكن ، ألأسرة ، وفلذات الأكباد ،، غالبآ ، لا يستحضرون هذا الشعور المكشاتي عند الأب ،،، فهم لا

يرون ، مايراه الأب من وحي ( أم سالم ) المكشاتي ،،، فهم يرونها طائر لا يختلف كثيرآ عن غيره ،

والسياحة الحقيقية في نظرهم ،، هي السفر بعيدآ عن مدينتهم ، والتعرف والتجوال ، في أكثر من مكان

سياحي مفتعل .

وفي هذا المفترق ، هناك، ثلاثة أنواع ، من الأباء ، المكشاتيين :

الأول :

يغلب الجانب الذاتي ، فيذهب بعيدآ ، في أرجاء الصحراء ، ولسان حاله يقول : ( أم سالم ،، غير ) ،، وفي

كل لحظة يترنم ، بهذا البيت :


عندي منام الطعس ، والرمث مركاي=أحلى من ، القصر المشيد، وزله

مخلفآ ، الأبناء ، والنساء ، يقتلهم الغيظ ، وحسرة الحرمان ، والتخلي .

( وهذا في نظري ، سئ الأباء ) .


الثاني :

يغلب ، الجانب الأسري ،، على ذاته وملذاته ،، ولسان حاله يقول : ( سعادة أبنائي ،، غير ).

( وهذا في نظري ،، من أفضل الأباء )

الثالث :

يزاوج ، بين ، ملذات النفس ، ورغبات الأسرة ،،، فهو ، يذهب هنا وهناك ،،، تارة بين أطفاله ونسائة ،،

وتارة ، يذهب بعيدآ في ضيافة ( أم سالم ) .

( وهذا في نظري ،،، الأفضل من الأباء ) .

[line]

ختامآ :

أنت ، من أي ، الأباء ؟؟؟

[بركان]

اخوي خشم الحصان
الحمدلله على السلامه

هالحين هذا كبرك ولا تفرق بين السياحه والكشته؟؟!!!!ههههههه

حسب العرف الدارج بين الناس فالسياحة عادة ماتكون لعدة اماكن بمفردك او بصحبة اصدقاء او بصحبة عائلة
ولمدة طويلة وتضطر في الغالب الى ارتياد المطاعم والمقاهي والفنادق وحسب او قات معينه وتدفع اللي يطلب منك وانت مكره.

اما الكشته فهي رحلة سياحية قصيره خارج المدن على كيفك تختار من تريد من الاصحاب وكذلك نوعية ووقت الاكل ومكان الاقامة بعيدا عن ضوضاء المدينة وادخنتها السامة القاتله وتنام على عواء الذئاب ونباح كلب البدو ونهيق حمار الراعي وتصحوا على موسيقى وتغريد ام سالم وهدير محرك وايتات الماء التي تجلب المياه لسقيا الأغنام.!!!
وصوت نجر تلاعبه انامل بدوي صلى العشاء ونام في مصلاه.!!!
وبامكانك ان تشعل نارا سناها يتوقد اما في الرحلات السياحيه فلا يمكن الا ان تشعل سيجاره. .

والسلام.