رجــــــــــــل ومعروف (جديد)000000000-------000000اللغز حله الشيخ مسكين

[سطام F15]

السلام عليكم ورحمة الله وبركاته
صبحكم الله بالخير جميع
أنشدك عن رجل قديم ومعــــروف ::: وبعض العرب يطمع فيه الشفاء
عكسه رجل قروم ٍ ولايخــــــوف ::: يغزي ولايعقب مغزاه إلا الشقاء
ذا سهل المنال ومن الكل معروف::: ذا صعب ولايمكن بالسهل ينلقاء


(تحياتي)

[فهد الهلالي]

صح السانك ياخوي سطام اف 15 لغز ممتع امتعك الله بالصحه والعافيه
طرق اللغز جميل جدا يستاهل من يفكر فيه
تقبل تحياتي

[ابوظبي سيف]

سطام


الله يعطيك العافيه وكل عام وانتم بخير


وش رايك بالقرأن

[سطام F15]

صح بدنك يالشيخ وأسعدني تشجيعك وإطرائك ممايجعلني أواصل ببدع الألغاز بإذن الله والله لايهينك

[سطام F15]

هلابك يابو ظبي والله يعافيك ومن الشر ينجيك ومالك لوى بالرمعة أنتظر مرماعك القادم لاهنت

[بحار seas]

صح لسانك اخوي ورمعه على الطاير اقول ( عسل ) والله العالم .

[سطام F15]

هلابك اخوي بحار ومالك لوى ياطويل العمر انتظر مرماعك القادم

[سطام F15]

هاللغز سبحان الله حصلي موقف (شين) وطرى ببالي هاللغز بس مقدر أقوله لأني لو قلته إنحل على طول . اللغز عليه جائزة وهي ليا حليتوه أقولكم الموقف وإذا ماحليتوه ماقول شيء . وش رايكم

[وضح النقى]

هاللغز سبحان الله حصلي موقف (شين) وطرى ببالي هاللغز بس مقدر أقوله لأني لو قلته إنحل على طول . اللغز عليه جائزة وهي ليا حليتوه أقولكم الموقف وإذا ماحليتوه ماقول شيء . وش رايكم

الكلام هذا يوحي لي بـ ( حلم ) ( ملح )

والحلم سيد الأخلاق

والملح سيد الطعام

هاه أستاهل الجايزه ;)

[هيل]

السلام عليكم ورحمة الله وبركاته
اخونا سطام بارك الله فيك على هالغز
وش رايك/فزع تاتي مساعده نخوه وتاتي خوف وعكسه عزف

[سطام F15]

هلابك ياوضح النقى ومالك لوى يالغلا ولاتنسى انهم رجلين كل واحد عكس الثاني وإنشاء الله تجيب الجائزة

[سطام F15]

هلابك أخوي هيل ومالك لوى يالغلا بس لاتنسى واحد بعض الناس يدور فيه العلاج والثاني له مغازي قشراء

[سطام F15]

وين الذباحـــــــــــــــــة

[ابو ماجد 2]

وين الذباحـــــــــــــــــة

صح لسانك وعلا شانك
والله يالغالي من طرحت اللغز وانا افكر برمعته ولكن مااخشاه ان الاسم مختلف بين المناطق واللغز مبني على الاسم اصلاً

[سطام F15]

هلابك يابو ماجد والاسم واحد بين كل المناطق بنسبة 99% والاول معروف عنه بين بعض الناس إنه يفيد بالعلاج والثاني أقشر وله مغازي قشراء

[وضح النقى]

ودع

عكسه

عدو

[سطام F15]

مالك لوى ياخوي وضح النقى الودع نوع من الحجار الكريمة ولكنه يستخدم من البعض في السحر والعياذ بالله (والعدو) هنا يدل على اي شخص معادي لك ولكن اللغز اسم محدد وذكر في حديث عن النبي صلى الله عليه وسلم .

[فهد الهلالي]

اخوي سطام رمعه
نصفه داء ونصفه دواء\او بين داء ودواء
تقبل تحياتي

[سطام F15]

مالك لوى يالغالي انتظر مرماعك القادم ولاتنسى انه احدهم يطلب للشفاء والآخر يغزي ومغازيه قشر

[فهد الهلالي]

دائم مايقال سلاح ذو حدين
او يوم لك ويوم عليك
تحياتي

[سطام F15]

ياهلا والله وغلا بالشيخ مالك لوى بالرمعه . يوم لك ماحد يطمع فيه شفاء واللغز الاول يطمع فيه الشفاء فعلا والثاني ليا غزى أقشر (لعين صلايب)

[فهد الهلالي]

طيب مايكون الجراد يقولون اذا جاء الجراد اربط الصرار اللي هو صرار الدواء ويطمعون فيه الاولين بالشفاء ولكن اذا حل في مزارع جاب العيد
تحياتي

[ابوسعود]

صح السانك وش رايك في الذباب والجنحان

[سطام F15]

هلابك ياشيخ بس وأنا أخوك الجراد جمع ومفرده (جرادة) مؤنث ولحالها ماهي غازيه ولاطايب فالها ولغزي مذكر ومغزاه لو هو لحاله فتك وعزالله إنها رمعة طيبة من طيب . خلك على هالموال وإنشاء الله إني بقولك الجائزة ومنت بعيد بس مذكر وليس مؤنث .

[سطام F15]

هلابك أخوي أبو سعود ومالك لوى يالغالي وشف توضيحي للشيخ لاهنت

[فهد الهلالي]

طيب مايون الكي طيب ونار والكي مكروه

[عاشق الموطن]

مسيت بالخير اخوي تراي مداوم باكر
لاكن اخذتلي لفه على الالغاز وقلت ارمع وزي ماتجي تجي
ايش رايك ب ال(مره) تستخدم علاج وعكسها (هرم) الله يحسن خواتيمنا ذيك الحزه
تصبح على خير

[سطام F15]

مالك لوى يالشيخ الكي يطلب فيه العلاج ولكن لاتنسى عكسه (يك) مافيه معنى وعلى فكرة تراي نسيت أوضح لك برمعة الجراد إن عكسه (دارج)ولايغزي أبد أعجبتني الرمعة ونسيت أوضح . وهو نفس المنوال بس إسمٍ يطلب به الشفاء وليا عكسته إسمٍ يدل على رجلٍ له مغازي قشر. أتمنى إني وضحت اللغز حسب طلبك (وماكشفتــــــــــه)

[سطام F15]

هلابك ياعاشق الموطن وكلنا وأنا أخوك مداومين بس تعودنا على السهر برمضان ومالك لوى أخوي ولاتنسى إن المرة مؤنث واللغز مذكــــــــــــــــــر . لاهنت

[فهد الهلالي]

بالطب الشعبي يستمل الرشاد (رشاد) وهو نوع من الحبوب وعكسه يجيب الصمرقع
تحياتي

[عاشق الموطن]

بالطب الشعبي يستمل الرشاد (رشاد) وهو نوع من الحبوب وعكسه يجيب الصمرقع
تحياتي



ان شاء الله انك فقئت عين اللغز واضم صوتي لك ياشيخ مسكين

[سطام F15]

مالك لوى يالشيخ عكسه يجيب الصمرقع على نفسه ولاهو بقرم ولاله بالمغازي نصيب . وأنا أشهد إن بقيت على هالمراميع غير تذكيه ومع خناعه بعد الله لايهينك .

[سطام F15]

ان شاء الله انك فقئت عين اللغز واضم صوتي لك ياشيخ مسكين

أبد مالك لوى ياخوي عاشق الموطن والداشر ماهو قرم وماله بالمغازي نصيب وانا ذكرت

(عكسه رجلٍ قروم ولايخوف ) أنتظر مرماعك أنت والشيخ والظاهر إنكم قاضين عليه لا محالة

[عاشق الموطن]

رمعه مع تفاعل وسريعه ولاتضحك

ال(بيض) وعكسها ضبي
هااااااااه
عطن القصه لاهنت

[سطام F15]

ههههههههههههه مالك لوى ولاهنت عشان هالرمعة بكرة إنشاء الله بفطر بيض مقلي

[سطام F15]

هاللغز سبحان الله حصلي موقف (شين) وطرى ببالي هاللغز بس مقدر أقوله لأني لو قلته إنحل على طول . اللغز عليه جائزة وهي ليا حليتوه أقولكم الموقف وإذا ماحليتوه ماقول شيء . وش رايكم


هذا موقف حصلي يوم إني عند شيباني بأطراف جبل (طميه) بس ماقول القصة لين تحلونه . الله لايهين الجميع

[عاشق الموطن]

اقول مافي دوام بكره
ينحل ينحل ايش رايك في
ال(درق)وعكسها قرد

[سطام F15]

مالك لوى الدرق حسب علمي ماهو بعلاج والقرد لايغزي ولايعقب بمغزاه الشقاء

[عاشق الموطن]

طيب قرب شوي العكس
قفص والا نفس

[سطام F15]

مقدر أقرب أكثر قربت حسب شروط خيمتنا الغالية وهي إن تقرب ولكن ليس التقريب اللي يكشف اللغز وشف رمعات الشيخ

[عاشق الموطن]

هيا
تصبحوا عل خير
وان شاء الله ان ربك ييسرها باكر
وتقبل مروري ومحاولاتي الحثيثه

[سطام F15]

هلابك يالغلا وتلقى خير إنشاء الله وكل الأمور يسيره وأنا أخوك بإذن الله وإن منحل اليوم ينحل باكر

[ابو ماجد 2]

اخوي سطام
اللغز يالغالي مستوفي والمطلوب واضح والحبكه ماشاء الله عليك ولكن مثل ماقيل الرمعه تحضر وتغيب
اخوي سطام انت ماشاء الله عليك من القادمين للساحة بقوه لامن ناحية بدع الالغاز ولامن ناحية الحلول والتواصل مع من هو مثلك مصدر فخر لنا
تحيتي لك وتقديري

[فهد الهلالي]

هلابك اخوي سطام والله يعطيك العافيه
تحيه اعجاب وتقدير مني لشخصك الكريم على ماتبذله من جهد في خيمتنا خيمه الالغاز
من طرح للالغاز ومتابعتك وحلولها
واخي الزعيم ابو ماجد دائم سباق بالطيب بارك الله فيه وانت تستاهل كل ما يكتب فيك من
كلمات الشكر والعرفان تقدير لجهودك
امل الاستمرار معنا في هذه الخيمه ولا تحرمنا من ابداعك
وتقبل تحياتي

[فهد الهلالي]

رمعه يالغلا
ويش رائك بالرطب (رطب) يعني تمر يقال عنها انها مسامير للركب وياكلونها الشيبان اللي اعمارهم مثلي 27علشان اركبهم ويرتفع عندهم السكر ويغمى عليه
وعكسها بطر يعني بطش دائم مانسمع كلمه البطش بالاعداء او يبطش باعدائه

[سطام F15]

اخوي سطام
اللغز يالغالي مستوفي والمطلوب واضح والحبكه ماشاء الله عليك ولكن مثل ماقيل الرمعه تحضر وتغيب
اخوي سطام انت ماشاء الله عليك من القادمين للساحة بقوه لامن ناحية بدع الالغاز ولامن ناحية الحلول والتواصل مع من هو مثلك مصدر فخر لنا
تحيتي لك وتقديري



هلابك يالغالي وماعليك زود ياطويل العمر وأنا ماسويت شيء وأنا أخوك البركة فيكم جميع ولولا الله ثم تشجيعكم ماكان قدرت أبدع الألغازوأحلهاوالفخر كل الفخر لي بوجودي بينكم ياإخواني وأنا من أشد المعجبين والمهتمين بالموروث الشعبي سواءٍ الألغاز أو غيرها ولا خلا ولاعدم يابو ماجد ومانستغني عن توجيهاتك طال عمرك . تقبل تحياتي أخوك سطام F15 الحربي

[سطام F15]

هلابك اخوي سطام والله يعطيك العافيه





تحيه اعجاب وتقدير مني لشخصك الكريم على ماتبذله من جهد في خيمتنا خيمه الالغاز
من طرح للالغاز ومتابعتك وحلولها
واخي الزعيم ابو ماجد دائم سباق بالطيب بارك الله فيه وانت تستاهل كل ما يكتب فيك من
كلمات الشكر والعرفان تقدير لجهودك
امل الاستمرار معنا في هذه الخيمه ولا تحرمنا من ابداعك


وتقبل تحياتي


هلابك ياشيخنا والله لايهينك طال عمرك وألف شكر وتقدير مني لك شخصيا ولجميع الإخوة الموجودين أنت ماقصرت أبد لا من ناحية التشجيع ليس لي بل لجميع الزملاء أخي الأكبر الشيخ الفخر كل الفخر لنا بوجودك على هرم هذه الخيمة الغالية علينا جميعا وبإذن الله متواصلين على الصفاء والنقاء دائما وأبدا ولانقدر نستغني عن توجيهاتك الثمينة والزعيم مايوفيه حقه ملايين الكلام الله لايخلينا منه. تحيات أخوك سطام F15الحربي

[سطام F15]

رمعه يالغلا



ويش رائك بالرطب (رطب) يعني تمر يقال عنها انها مسامير للركب وياكلونها الشيبان اللي اعمارهم مثلي 27علشان اركبهم ويرتفع عندهم السكر ويغمى عليه


وعكسها بطر يعني بطش دائم مانسمع كلمه البطش بالاعداء او يبطش باعدائه


هلابك يالغالي ومالك لوى طال عمرك ولاتنسى إن الرطب جمع واللغز مفرد أنتظر مرماعك الجاي لاهنت

[هيل]

ياخ سطام الله احييك والربع
رمعه تجول براسي وهي جمع
وش رايك /مرق وعكسه قرم
والسلام خيرختام

[سطام F15]

هلابك بالغالي ومالك لوى إن عكسه شهير بالمغازي

[فهد الهلالي]

اخوي سطام الله يمسيك بالخير
رمعه
بعض الناس ياكل الشحم
يقول علاج وهو زود مرض
وكلمة 0شحم 0 عكسه محش يقضي على الزرع ومايحصل الا الشقاء
يعني يحصد ولا ياكل ويش رائك بالرمعه
تحياتي

[سطام F15]

هلابك ياطويل العمر والله يمسيك بالنور ومالك لوى . الشحم ماهو علاج على قولك وترى اللغز ماهو بالصعب والله إنه سهل جدا بس يبي شوي تركيز

[بحار seas]

اخوي صطام ماهو السمن ( سمن ) و ( نمس ) ان شاء الله جبتها قول تم ..

[سطام F15]

مالك لوى يالغالي والله والظاهر منت بعيد بس النمس أعتقد ماله مغازي

[ابو ماجد 2]

اخوي سطام
كان عندي رمعه استبعدتها بسبب اني ماخبرت انه للطب ولكن بعد ردك على اخوي بحار ابقولها يمكن تلقح
سمان الطائر المعروف والعكس نامس والنامس لعين المغازي
تحيتي لك

[سطام F15]

مالك لوى يابو ماجد والسمان جمع مفرده (سمانه) مؤنث واللغز مذكر يازعيـــــــــــم ولاتزيد أحرفه عن اربع

[فهد الهلالي]

ويش رايك ياطويل العمر لبن ونبل تحياتي

[سطام F15]

مالك لوى يالشيخ وتراك من البارح تحوم حوله بس مدري وش فيك الظاهر 27لها دور

[فهد الهلالي]

مايكون علقم ومقلع طميه

[سطام F15]

مايكون علقم ومقلع طميه

مالك لوى يالشيخ ولاتبعد بعيد وخلك من الثلاثة للأربع حروف بإنتظار مرماعك الذابح

[فهد الهلالي]

ماتكون كلمه مريض عكسها ضيرم والضيرم من الشجاعه
تقبل تحيتي

[سطام F15]

ماتكون كلمه مريض عكسها ضيرم والضيرم من الشجاعه
تقبل تحيتي

مالك لوى والمريض محدٍ يرجي منه الشفاء هو اللي يرجي الشفاء لنفسه الله يكفينا وإياكم جميع الأمراض والضيرم من الشجاعة ولكنه لايدل على رجل له مغازي قشر على الــــ,,,,,,,,,؟؟؟؟

[ابو اسامه 2]

هلا بك يا سطام وصح لسانك

وش رايك في كلمة نبيذ

وعكسه ذيب

انا اشك ان الموضوع فيه ذيب عند الجبل :D

او كلب وانتم بكرامه وعكسه بُلك



تحياتي لك

[فهد الهلالي]

اخوي سطام رمعه
الرماد كان بالقديم يستعمل للجروح والحروق والاصابات والامراض الجلديه وغالبا او افضل
مايكون من شجر الرمث (الحمض)
لتفاعله مع الجروح واستجابة الجرح للشفاء
وبهذا تكون رمعتي
الرماد
وعكسها-------دامر من الدمار
تقبل تحيتي وتقديري

[سطام F15]

هلا بك يا سطام وصح لسانك






وش رايك في كلمة نبيذ


وعكسه ذيب


انا اشك ان الموضوع فيه ذيب عند الجبل :D


او كلب وانتم بكرامه وعكسه بُلك




تحياتي لك



هلا بك يابو اسامه مدري وش اقول أنت كسرت أحد رجليه بس (بيذ) مايطلب منه الشفاء أنا أبيك تعطيني الرمعة صح على الوجه الصحيح والأسماء الصحيحة وعطني عكس الذيب اللي فيه شفاء ركز فيها وبتجيبها تحياتي

[سطام F15]

مالك لوى يالشيخ والدامر مايغزي ومنشدي له روح وجسد ويغزي ومغزاه أقشر وابو اسامة جبع رجليه بس بقى الأسماء الصحيحة عشان يكمل الحل

[فهد الهلالي]

مارايك في كلمه عبس وعكسها سبع والعبس
تحيتي

[ابو اسامه 2]

اذا ما صابت كلمة سبع للشيخ


نقول


وحش وعكسه شوح ويُقال شيح


والشيح نبته يرجى منها الشفاء


تحياتي لك وللشيخ

[سطام F15]

مارايك في كلمه عبس وعكسها سبع والعبس
تحيتي

صح الله لسانك يالشيخ وبيض الله وجهك فعلا هي عبس وهو بول الإبل ويطلب منه الشفاء وأتى به حديث عن النبي صلى الله عليه وسلم ولكن ماني حافظ الحديث وفيما معناه أنه أتى أناس للنبي وكان بهم مرض فقال لهم النبي إذهبوا إلى لإبل الصدقة وأشربوا من ألبانها وأبوالها وعكسه سبع وهو اللي له مغازي على أهل الدبش الغنم ويآكل غنمهم ويعقب القشر لهم في حلالهم والعبس يلقى بالإبل وسهل الحصول عليه و أما السبع صعب تلقاه ليا بغيته . والآن تستاهلون الجائزة اللي هو الموقف وبقوله لاتروحون بعيد

[سطام F15]

اذا ما صابت كلمة سبع للشيخ



نقول


وحش وعكسه شوح ويُقال شيح


والشيح نبته يرجى منها الشفاء



تحياتي لك وللشيخ
أنا أشهد إنك ماقصرت يابو اسامه كسرت رجليه وقضى عليه شيخنا وبيض الله وجيهكم بس أعتقد لغز مليان وإلا أنا غلطان

[عديم الوصايف]

السلام عليكم ورحمة الله وبركاته

صبحكم الله بالخير جميع
أنشدك عن رجل قديم ومعــــروف ::: وبعض العرب يطمع فيه الشفاء
عكسه رجل قروم ٍ ولايخــــــوف ::: يغزي ولايعقب مغزاه إلا الشقاء
ذا سهل المنال ومن الكل معروف::: ذا صعب ولايمكن بالسهل ينلقاء



(تحياتي)

اسلام عليكم التوقع والعلم عند الله
1- الســهم يستخدم في الغزوات
2- الســم ويستخرج منه مصــل مضاد لامراض عده

[ابو اسامه 2]

أنا أشهد إنك ماقصرت يابو اسامه كسرت رجليه وقضى عليه شيخنا وبيض الله وجيهكم بس أعتقد لغز مليان وإلا أنا غلطان[/center]


هلا بك يا سطام

وبيض الله وجهك

واكيد لغز مليان

وصح لسانك واعتلا شانك

والله لا يحرمنا منك

وهات القصه لا هنت

تحياتي لك

[سطام F15]

[quote=سطام F15;3169071]هاللغز سبحان الله حصلي موقف (شين) وطرى ببالي هاللغز بس مقدر أقوله لأني لو قلته إنحل على طول . اللغز عليه جائزة وهي ليا حليتوه أقولكم الموقف وإذا ماحليتوه ماقول شيء/

quote]السالفة ومافيها يالربع إني كنت عند شيباني بالقرب من جبل طميه وهالجبل معروف بالذيابة السباع وحاطلي عندهم تجارة عبارة عن طليان (خرفان) عددها 78 راس وقبل العيد بليلتين سرحتهن وضويتهن مابهن خلاف وأثر أخوكم اللي هو أنا ماربطت باب الشبك زين ويوم أمسى الليل ونمت طلعن الطليات برا وسرن وطــاح فيهن (سرحان) الله لايبارك فيه ويعوملك فيهن ويآكل واحدٍ ويغبب 7(يغبب) يعني(عض حلوقهن )ومافيهن اللي نجى لو واحد والعوض على الله وحلفت إني مترك يالشيطاني ودورته لين إنقلب راسي وكل مطلع للديرة بدوره لين أقضي عليه والله ‘نهن مسيومات من 950 جملة ومعيي لكن قدر الله وماشاء فعل (حسبي يالله عليه اللعين ) ودمتم بخيـــــــــــــــر .أخوكم سطام F15 الحربي

[عاشق الموطن]

أنا أشهد إنك ماقصرت يابو اسامه كسرت رجليه وقضى عليه شيخنا وبيض الله وجيهكم بس أعتقد لغز مليان وإلا أنا غلطان[/center]



والله مليان وفايض والله يعطيك العافيه دوم ومن يقرأ

والله يعوضك خير في حلالك ولعلها خيره من ربك
وننتظر جديدكم هنا
تقبل مروري

[وضح النقى]

إنا لله وإنا إليه راجعون

أطلب الله يأجرك في مصيبتك ويخلف لك خير منها

وبالنسبة للغز مليان مثل الطليان
ولا غببه إلا السباع

[ابو اسامه 2]

[quote=سطام F15;3169071]هاللغز سبحان الله حصلي موقف (شين) وطرى ببالي هاللغز بس مقدر أقوله لأني لو قلته إنحل على طول . اللغز عليه جائزة وهي ليا حليتوه أقولكم الموقف وإذا ماحليتوه ماقول شيء/


quote]السالفة ومافيها يالربع إني كنت عند شيباني بالقرب من جبل طميه وهالجبل معروف بالذيابة السباع وحاطلي عندهم تجارة عبارة عن طليان (خرفان) عددها 78 راس وقبل العيد بليلتين سرحتهن وضويتهن مابهن خلاف وأثر أخوكم اللي هو أنا ماربطت باب الشبك زين ويوم أمسى الليل ونمت طلعن الطليات برا وسرن وطــاح فيهن (سرحان) الله لايبارك فيه ويعوملك فيهن ويآكل واحدٍ ويغبب 7(يغبب) يعني(عض حلوقهن )ومافيهن اللي نجى لو واحد والعوض على الله وحلفت إني مترك يالشيطاني ودورته لين إنقلب راسي وكل مطلع للديرة بدوره لين أقضي عليه والله ‘نهن مسيومات من 950 جملة ومعيي لكن قدر الله وماشاء فعل (حسبي يالله عليه اللعين ) ودمتم بخيـــــــــــــــر .أخوكم سطام F15 الحربي




الله يعوضك خير يا سطام

وخيرها في غيرها

ولو اني قريب منك كان جيت اساعدك ندور عليه

لكن الشكوى لله

والله يرزق من واسع ابوابه

( ماذا يُستفاد من هذه القصه )

اي واحد عنده حلال يربط باب الشبك زين حتى لا يقع فيما وقع فيه اخونا سطام

تحياتي للجميع

[سطام F15]

اسلام عليكم التوقع والعلم عند الله
1- الســهم يستخدم في الغزوات
2- الســم ويستخرج منه مصــل مضاد لامراض عده
هلابك ملايين ياخوي والحل عند الشيخ لاهنت

[سطام F15]

والله مليان وفايض والله يعطيك العافيه دوم ومن يقرأ



والله يعوضك خير في حلالك ولعلها خيره من ربك
وننتظر جديدكم هنا

تقبل مروري

سلمت والله لايهينك تحياتي يالغلا

[سطام F15]

إنا لله وإنا إليه راجعون

أطلب الله يأجرك في مصيبتك ويخلف لك خير منها

وبالنسبة للغز مليان مثل الطليان
ولا غببه إلا السباع
الجميع إنشاء الله ياخوي وضح النقى والرزق على الله وأنا أخوك واللي جابهن يجيب غيرهن إنشاء الله

[سطام F15]

[quote=سطام F15;3176484]



الله يعوضك خير يا سطام


وخيرها في غيرها


ولو اني قريب منك كان جيت اساعدك ندور عليه


لكن الشكوى لله


والله يرزق من واسع ابوابه


( ماذا يُستفاد من هذه القصه )


اي واحد عنده حلال يربط باب الشبك زين حتى لا يقع فيما وقع فيه اخونا سطام


تحياتي للجميع





كفو ياالغلا قول وفعل والله لايهينك وبحول الله لقضي عليه طال الزمن وإلا قصر