المساعد الشخصي الرقمي

مشاهدة النسخة كاملة : صدع راسي من صوت طقطقة الباب الخلفي للباثفندر تكفون


طريق خريص
30/09/2009, 07:06 PM
السلام عليكم ورحمة الله وبركاته

يالله ان تحييني :D

تكفون يا اخوان وش السوات بصوت طقطقة الباب الخلفي للباثنفدر موديل2001

توني شاريه الله يطعمني خيره ويكفيني شره

والموتر ماشالله تبارك الرحمن تمام بس الصوت ذا نرفزني بالحيل

وعلى فكره يوم رحت اشيك عليه لقيت به عذروب واحد

الاخ الي انا شريته منه الله يهديه فاك عمود التوزان الخلفي (نحيف متعرج )

المهم رحت وشريت واحد وطلع علي بـ600 ريال مع جلد 2 بـ 50

بقى فوز الي يمسك عمود التوازن تخيلو تقطعت رجليني بين المحلات مالقيت

ودقيت على الوكاله قالو نطلب لك وسعره 28 ريال

تدرون وش سويت !!

رحت لواحد من المحلات ووراني شكلهن بالكمبيوتر عندهم

طلعت مطابقه لحقات الددسن موديل 2005 بالضبط :confused:

ولا مو بس كذا ارخص الوحده بـ15 ريال يعني الثنتين بـ30 ابو التوفير

وركبتهن ومن احسن مايكون :)

المهم يالغالين وش السوات بطقطة الباب الخلفي فزعتكم وش اسويبه لاتهور واقلعه :D
طريق خريص
30/09/2009, 07:28 PM
وينكم يالغالين دلوني على الحل والله مالكم ألا الدعاء والاجر :(
المحترف800
30/09/2009, 11:10 PM
الله يعطيك خيره ويكفيك شره ...

بالنسبه للباب الخلفي اشوف بعض الشباب يلفون عليه شطرطون ( تيب ) على الحديده اللي تمسك الباب

الخلفي ...
طريق خريص
30/09/2009, 11:24 PM
الله يعطيك خيره ويكفيك شره ...

بالنسبه للباب الخلفي اشوف بعض الشباب يلفون عليه شطرطون ( تيب ) على الحديده اللي تمسك الباب

الخلفي ...



توني جاي من محل زينات

يقولي وزنيه للحديده المهم انه وزنها

وركب ربلات على الجوانب

صحيح خفت الطقطه

س شكلي بلف تيب على قولتك اخوي المحترف لاهنت :)
المحترف800
01/10/2009, 12:26 AM
توني جاي من محل زينات


يقولي وزنيه للحديده المهم انه وزنها


وركب ربلات على الجوانب


صحيح خفت الطقطه


س شكلي بلف تيب على قولتك اخوي المحترف لاهنت :)






اذا كانت الربلات اللي حطها السود ( السفنج )) اللي يقولك مانع للهواء والخرابيط اللي تلقاها بالغرابي هذي

تراها تعدم وزنيه الباب ...
طريق خريص
01/10/2009, 12:48 AM
اذا كانت الربلات اللي حطها السود ( السفنج )) اللي يقولك مانع للهواء والخرابيط اللي تلقاها بالغرابي هذي

تراها تعدم وزنيه الباب ...


الي حطها سود تقل حبات زيتون برأس مدبب

السفنج ؟ تقصد الي تقل شطرطون ؟؟
طريق خريص
01/10/2009, 04:51 PM
وينك يالمحترف:confused:
هويدي
01/10/2009, 05:04 PM
عطاك الحل المحترف ونا مجربه على موتري السابق ـ باترول ـ ممتاز 100%


بالنسبه للباب الخلفي اشوف بعض الشباب يلفون عليه شطرطون ( تيب ) على الحديده اللي تمسك الباب

الخلفي ...
طريق خريص
01/10/2009, 07:54 PM
عطاك الحل المحترف ونا مجربه على موتري السابق ـ باترول ـ ممتاز 100%
هويدي ياحبيل قلبك هل هو الشطرطون العادي ؟

ولاتيب مثل الستك !!

ولا الشطرطون الي يجي تقل فيه فلين وجهه فيها لزقه وجهه اسفنج !!
هويدي
02/10/2009, 01:08 AM
شطرطون عادي يالبى قلبك

وابصور الحديده المقصوده لتتضح الفكره واسدحها بالموضوع
طريق خريص
02/10/2009, 02:53 AM
شطرطون عادي يالبى قلبك

وابصور الحديده المقصوده لتتضح الفكره واسدحها بالموضوع

يامال العافيه والله لاهنت كلفت عليك عسى عمرك طويل ;)

انتظرك يالغالي:)
ناجز
02/10/2009, 03:04 AM
الله يثبكم اخلصو علينا ترى عندي نفس المشكلة
طريق خريص
02/10/2009, 03:16 AM
الله يثبكم اخلصو علينا ترى عندي نفس المشكلة

البركه في اخونا هويدي ولايهونون باقي الشباب بعد ماقصرو الله يجزاهم خير

انا مثلك انتظر مع اني توني واصل من القصيم جاي للرياض وش اقولك بس الخط انواع الزحمه تحلف بالله اننا ببداية اجازة الصيف:D
هويدي
02/10/2009, 10:26 AM
آسف على التأخير يا اخوان
والحمدلله على السلامه ياطريق خريص

هاذي صور توضيحيه للقطعه المقصوده للباترول

والباثفندر ان شاء الله انه حول الدعوى

http://www.mekshat.com/pix/upload03/images125/mk19651_mm1.jpg

لاحظ الشطرطون على القطعه المحدده بالاحمر . وكميه الشطرطون على حسب الصوت وقوته

بس لاتكثر علشان ما تثقل فتحة الباب

http://www.mekshat.com/pix/upload03/images125/mk19651_mm2.jpg

وهاذي القطعه الثانيه اللي بالسقف . . الشطرطون موب باين لان القطعه لونها اسود والتصوير بالجوال

http://www.mekshat.com/pix/upload03/images125/mk19651_mmm3.jpg
وهاذي اللي تحت الباب الكبير الخلفي .. بعض الناس اللي وضعه مزري يلف عليه بعد :D

في حال ان الباثنفدر مقاضبه ميب زي الباترول يمكن تكون مقاضبه على هيئه ربل مقوى ومع الحر والشمس نشف وصار يصرصر زيته ويتسلك امورك ان شاء الله

واتمنى ان الفكره وصلت واي استفسار حاضرين
طريق خريص
02/10/2009, 01:28 PM
قل آمين الله يفتح ابواب التوفيق والرزق في وجهك بهاليوم الفضيل


وجمعه مباركه عليك والله يعطيك الف عافيه على الشرح كفيت ووفيت بروح اسويها وارجع ارد لك خبر وش صار معي


:d
المحترف800
02/10/2009, 01:55 PM
هلا هلا والله ...

شف نفس اللي بالصوره مصورها هويدي اذا فتحت الباب الخلفي نزل راسك شوي بتلقاها لونها أسود ..


http://www.mekshat.com/pix/upload03/images125/mk19651_mm1.jpg
هويدي
03/10/2009, 08:57 AM
قل آمين الله يفتح ابواب التوفيق والرزق في وجهك بهاليوم الفضيل

وجمعه مباركه عليك والله يعطيك الف عافيه على الشرح كفيت ووفيت بروح اسويها وارجع ارد لك خبر وش صار معي



آميـــن يارب العالمين

والله يجزاك خير على الدعوه


بشر وش صار عليك
غربي هواوي
03/10/2009, 09:55 AM
يعطيكم العافية
massa
05/10/2009, 04:39 AM
السلام عليكم
انا عندي نفس المشكله
الحل في جلده تكون عند زاويه الباب منها ثنتين في كل زاويه وحده روح اشترها من الوكاله قيمتها 16 ريال
انا حصلت وحده في الوكاله و الثانيه قالوا نطلبها من اليابان
واذا ما حصلت في حل كمان
ابو جنى 2005
06/10/2009, 01:33 PM
طريق خريص بسألك
هل الطقطقه عندك فيها صوت حده ( يعني تحس ان الصوت من نفس مقاضب الباب) اذا كانت كذا اول شي غيرها وجب وحده فيها ربل اصلي لأني مجرب حركه اخونا هويدي ما تدوم تخرب على طول ويرجع الصوت .
اليك الحل الانسب والاسلم والأدوم واللي تسويه انت في البيت غيرها المقضب
ابو جنى 2005
06/10/2009, 01:39 PM
تكملة الرد حقي ما ادري وش بلاها اضاف الرد ولا احد قاله ذا الجهاز شكل مخه ديزل
المهم
اذا ركبت المقضب شده شد بسي بعدين طقه بالشاكوش للداخل بحيث يكون الشد للداخل وبإذن الله تروح الطقطقه
طبعا هذا في حال اذا كان الصوت من المقاضب اما اذا كان الصوت من الباب كاااااامل فالحل سهل جدا
جب لك لي مكيف صحراوي وشوي زيت وافتح فتحة صغيرة في الربل اللي دار ما دار على الباب
وابدأ بدخيل اللي داخل الربل وكمل الشغل لين تحشي الربل كامل باللي بيصير بعد كذا الربل كنه وكاله جديد ومنتفخ يعني تروح الفضاوه
هذا مالدي وان اصبت فمن الله وان اخطأ فمن نفسي والشيطان
اخوك ابو جنى
طريق خريص
07/10/2009, 11:23 PM
السلام عليكم

أخوي المحترف واخوي هويدي

سويت نفس هالحركه هذي

http://www.mekshat.com/pix/upload03/images125/mk19651_mm1.jpg


لفيت على قلوتكم شطرطون تيب ولاتغير شي ابد هي هي الطقطه مع العلم انه القفل حق الباث مو مثل الباتروليصير ع الباب لا بالوسط مربوط بالبدي :confused:

بحاول اصوره لكم :(
طريق خريص
07/10/2009, 11:26 PM
السلام عليكم
انا عندي نفس المشكله
الحل في جلده تكون عند زاويه الباب منها ثنتين في كل زاويه وحده روح اشترها من الوكاله قيمتها 16 ريال
انا حصلت وحده في الوكاله و الثانيه قالوا نطلبها من اليابان
واذا ما حصلت في حل كمان


قصدك الجلد الي على شكل هرمي :D

ياحليلك ماخليتهن ركبتهن وعلى فكره ترى يجي نوعين فيه كبار وصغار انا ركبت كبار عشان اقطع الشك باليقين ولافاد وشف وانا اخوك انا لقيتهن على 5 ريال عند حقين قطع الغيار نفس حقت الوكاله بالضبط :D بس ماش مافاد الطقطه فيه لازالت :(
طريق خريص
07/10/2009, 11:37 PM
تكملة الرد حقي ما ادري وش بلاها اضاف الرد ولا احد قاله ذا الجهاز شكل مخه ديزل
المهم
اذا ركبت المقضب شده شد بسي بعدين طقه بالشاكوش للداخل بحيث يكون الشد للداخل وبإذن الله تروح الطقطقه
طبعا هذا في حال اذا كان الصوت من المقاضب اما اذا كان الصوت من الباب كاااااامل فالحل سهل جدا
جب لك لي مكيف صحراوي وشوي زيت وافتح فتحة صغيرة في الربل اللي دار ما دار على الباب
وابدأ بدخيل اللي داخل الربل وكمل الشغل لين تحشي الربل كامل باللي بيصير بعد كذا الربل كنه وكاله جديد ومنتفخ يعني تروح الفضاوه
هذا مالدي وان اصبت فمن الله وان اخطأ فمن نفسي والشيطان
اخوك ابو جنى

اخوي ابو جنى الصوت احس انه مو في مقاضب الباب احس انه في الديكور حق الباب مع اني شيكت عليه لقيته ثابت مايتحرك

هل القزازه الخلفيه لها دور هقوتك مع انها ماتنسم والصوت احسه من الباب ؟؟

فيه شي واحد انا ماسويته بس مدري هل هو له دخل ولالا شفت اللوحه حقت السياره الخلفيه الي تجي بالباب هي من النوع الملكي الطويل ومركبها بدون برواز تتوقع منها مع اني ماعتقد انه لوحه تصدر صوت كذا ؟
الدرعيه
07/10/2009, 11:46 PM
الله يعينك

تدري وشهي منه

اتوقع والله العالم ان القزاز اللي ورا فيه بلا
تاكد منه ولا شف يمكن فيه شي بالمساحات

لاني اتذكر قد مرت علي ذا المشكله .
ftc
08/10/2009, 09:22 AM
اخوي فيه واحد من اخوياي توه شاري باث
فيه نفس الصوت الي تقولة حط تيب وشحم على مقابض الباب وسوف تدعيلي
وانا الي مسويه في الباث اختفى الصوت بتاتن
فتى الوادي
08/10/2009, 09:53 AM
السلام عليكم

يمكن يكون صاحب السيارة الأول وضع ( لي ) مكيف صحراوي داخل جلب الباب الخلفي ..
تأكد إذا كان داخل الجلب لي مكيف شفاف فلإذا كان طلعه ...
هذه كانت عندي في سيارتي لا ند كروز وجننتني الطقطقة في الباب الخلفي للشنطة ..
وآخرتها طلعت اللي اللي وضعوه داخل الجلب بزعمهم انها تكتم الباب من الهواء وهذا كله خرطي في خرطي .. ومن يوم طلعت اللي والطقطقة راحت ..
aljthab
08/10/2009, 04:57 PM
حياك ياخوي
اولا تاكد شف من وين الصوووت وحاول تحدد مكانة 100% مع احترامي لراي كل الشباب
الشطرطونات والتيب هذي حلول ما تدوم اسبوع ونرجع زي اول
انت حط يدينك على الباب وهزة ودفة اذا تحس الباب يهز وفية شوي خلخلة مع الصوت الي تقول علية او بدون اهم شي تحس الباب يتحرك
عليك باعادة وزن الفصالات الي حطوا صورها الشباب اذا تجيد هالشغلة او ودة لسمكري شاطر يوزن لك البيبان يحلهن ويربطهن من جديد بعد مايوزنهن..... هذا اسلم حل
المرتاع
18/10/2009, 04:26 PM
شف انا كنت بالصمان وجابلي الصداع والحل لقيت كرتون على الطريق وقمت ودبلت الكرتون وحطيته على الربل اللي على شكل هرمي وصكيت الباب عليها والحمد لله اختفى الصوت بالكامل لين وصلت الرياض حلى فكره
الحاتمي
19/10/2009, 02:04 AM
الحل اركب بالشنطه وخل احد يسوق بك وحددمكان الصوت يمكن من المساحه الخلفيه غيره
او من وزنية الباب اوزنه اومن مساعدات القزازه الخلفيه غيرهن
اومن التنده واناصار عندي صوت كانه بالباب الخلفي
وبالاخير ركبت بالشنطه واكتشفت ان الصوت بديكور التنده اللي بالشنطه
وكنت اظن الصوت بالباب
رحت لمحل تنجيدوفكيت الديكور وقلت للمنجديحط سلكون وراح الصوت
قمة افرست
19/10/2009, 11:33 AM
الامر بسيط جدا
تحتاج الي جلدة تحشر الباب تسد الفراغ الي يسبب الصوت
وهذي تروح اقرب محل تنجيد وتقوله المشكلة يركب لك جلده على كامل الباب الخلفي من الداخل
وطبعا يثبتها بغراء واذا حبيت تشيلها بعدين فقط بنزين وتمسح الغراء بخرقه ويروح
او يركب لك جلده على كامل حافة الباب الي فيها الفضاء وطبعا بيكون صكت الباب ثقيله شوي بس اذا انصك
انسى تسمع صوت
وهذه مجربها بجميع جيوب التويوتا لو تمشي ببطناج وردمية ماتسمع صوت الباب
العيوب من الجلده الي بدون غراء ماهي ثابته يدخل تنسيم ومنه يدخل بعض الغبار
البسيط

الحل الاخير والانجح في نظري

تروح اقرب محل لبيع ادوات المكيفات قطع غيار

وتطلب منه جلدة حقت مواصير المكيف السبيلت عازل مواصير ( المركزي ) وبتلقا مقاسات كثيرة بعرضها خذ مقاس مناسب بحيث تحشره بين الباب والبودي ويقفل الباب عليه
وسعرها مايكلف 20 ريال يبيعونه بالمتر
طبعا هو يجي شكل لي الماء انت تقوم بفكه بمشرط يعني تفرده وتثبته حول البابين وتقفل عليه الباب بدون غراء ولاغيرة
اهم شي اختار مقاس ماهو كبير ومناسب
او الباب الي شاك فيه وصله بسيطه من العازل وحشر فيها الباب

العازل عبارة عن اسفنج ولا يضر وسهل الطي والكبس

وهذي تنطبق على استبنة جيب التويوتا الي بالباب الخلفي تحشر الاسفنجه في المكان الي بين القاعدة للاستبنه والكفر ولاراح تسمع صوت ابدا

هذا في حال ان الصوت من الابواب

قد يحدث صوت وتعتقد انه من الباب ولاكن يكون من جرايد السقف
وهذي تكتشفها بنفسك فقط تحسس اماكن الجرايد داخل ديكور السقف الداخلي ثم قم بالضرب عليها بيدك اذا فاك اللحام بتسمع صوت الجريدة وهنا لازم محل تنجيد لاعادة تثبيتها
بالسلكون
صوت اخر قد يكون من الاستبنه وهذي تحدث بجيوب النيسان لان القاعدة للكفر رديئه ( الاستبنه ) قاعدتها في الباب ليست بالقوة الكافية فتحدث صوت بالباب مع قوة الارتجاج رغم ثباتها وثبات الكفر لانه مثبته على مايشبه المحور الواحد
وتلاحظ الفرق بجيب التويوتا على اربع قواعد مثبت الاسبير ( الاستبنه ) ويلاحظ ان الباب في جيب التويوتا لايحمل الكفر بل يساعد على ثبات الكفر فهو مثبت بالطرف لقاعدة البودي عكس النيسان القاعده بالكفر يحملها الباب مايجعل ارتخاء بحديد الباب
ويسمع الصوت مشابه لصوت الصاج بعد ارتخاءه اثناء البطناج القوي
ومن الطبيعي مع الوقت يبداء الباب بفقد قوته
ولتجربة هذه الملاحظه فك كفر الاسبير وتجربة السيارة مع الطرق الوعره

اسف جدا على الاطالة بالشرح
وسلامتك