(( كلن )) يروح لفصله

[عبدالعزيز الدباسي]

اجدها فرصة ومناسبة جميلة أن ارحب بكل الزملاء بعد العودة للمدارس :p :p

وبعد الانقطاعات والاجازات والغيابات التي استمتعتم بها خلال هذه الاجازة .

والحقيقة ان الواحد ما ودك ياخذ اجازة ،،، ولا ودك ينقطع عن العمل ،،،،

لان عودة المياة الى مجاريها تكون بعض المرات شينة وثقيلة ;) ;) وتاخذ وقت ( الين ) تسلك الامور .

وسمعت ان بعض الأدباء المكشاتيين يقول ( ان احوج شخص للاجازة هو القادم من اجازة ، فلذلك يجب على صاحب العمل اعطاء العائدين من اجازات بضعة ايام اجازة ) انتهى كلام الاديب المكشاتي

وطبعاً حنا يالمكشاتيين اكثر ناس محتاجين لاجازات ،،، لان رحلاتنا متعددة ،،، وسفراتنا كثيرة ،،،،، ومواسمنا متقاربة ،،،، فما يبديك على دخول سبتمبر واول سهيل الا انك تنتظر الى آخر اكتوبر وهذا خاص للبواردية وراعين الصيد ،،،، ومن يبدأ الدِّخل والصفارى اللي يبشرون بمقدم الضيف الكريم القميري الين يختمهن الكرك والطيور الكبار .

وبعدها يجيك الوسم وعلوم الحيا وملاحق الامطار والسحب الموسمية ، ،،، اللي الواحد يتشقق من الوناسة ويحمد ربه اذا امطرت او سمع خبر سيل ،،، ولا يهونون اهل الطيور اللي ينبسطون بذاك الوقت بملاحق الحبارى والمطامر وراها

عاد وبعدها يالله من فضلك تجيك طلعات البر و شبة النار في عز المربعانية وفلة الحجاج لكل المكشاتيين راعين البر والصيد والطيور.

ويصير الواحد مع الربيع وتتبع اخباره كل يوم في فيضه ، وكل اسبوع في مكان ، والعزبة ما تنزل من الموتر والواحد ولله الحمد ما يلحّق على الطلعات وفلة الحجاج والوناسة .

ومثل ما كل شى له بداية فاكيد له نهاية ،،، وينتهي الربيع والكشتات وتبدأ الانفس تضيق والحرارة ترتفع ،، وكل ما يزود النهار ،،، تضيق النفس ،،،، وتتعب مع الحر ،،،،،،

الين الله يرحمك باجازة تاخذ اعيالك وتتمشى انت وياهم وتوسع اصدورهم وتنبسط انت وياهم بعد هالسنة الطويلة والاجازة الثقيلة و تغيب كم يوم عن الدوام ، وعن مكشات ،،،،،

والحمد لله ان الايام تدور بتتابع الشهور ، وكلن يلقى مسلاه وياخذ مبتغاه ، وكلن يلقى درب لهوايته ويلقى اخويا مثله ،،،، وبمكشات يلقى خيمة تضمه لتخصصه .

قولوا آمين عسى الله يجعل كل ايامكم فلة احجاج و وناسة ،


والحمد لله على سلامة الجميع

[Rahhal_xp]

أيوه كله يروح لفصله.......ههههههههههه

ما شاء الله عليك يا مشرفنا، شكلك مدرس وتوك جاي من وجع الراس........

[راع الكحيلة]

الله يرضى عليك يا بو عبدالله
والله يونّسك بالعافية والطاعة

تصدق وانا اقرأ موضوعك جاني شعور التلميذ الكسول الصغير اللي ما حل واجبه وموعده
اليوم الصبح مع مدرس يده ما تفرق بينها وبين محماس القهوة....المحماس القديم جدا

صار عندنا شعور إن العودة للمدارس غثا لنا ماهوب لورعاننا وقامت المرارة تقوم بالانتاج الزائد
واعطاء ذلك الشعور المخيف كمن يترقب شرا :)

ليييييه الشر؟؟

ما هوب شر إن شاء الله ..ولكنه بسبب ترقب الإلتزامات والطلبات المدرسية وكأننا نحن أولياء الأمور لم ننته من المدارس بل بدأت مرة أخرى لنا في أبناءنا وبناتنا.. الله يصلح ذريات الجميع.

يبا .. مدرسة الإنجليزي تقول أكتبوا لي موضوع عن تداعيات الأوضاع السياسية الراهنة على الفائض الاقتصادي والمتمركز في قطاعات متعددة من رؤوس الأموال التي حان قطافها ..وخلّوا ابوكم والا أمكم يكتبون لكم الموضوع..:confused:

يبا.. مدرسة العربي تقول حضروا لي موضوع تعبيري عن الألوان وتأثيرها على اتخاذ القرارات السياسية :confused: وخلّوا أبوكم والاّ أمكم يكتبون لكم الموضوع.

يبا.. مدرسة العلوم تبي وردة خضراء واوراقها حمراء ولا زم تجيبونها ..تقول علشان أثبت لكم إنه ما فيه وردة لونها أخضر.:confused:

أما العيال..

هاه يبا عطوك واجب اليوم؟؟ ...لا أصلا ما قالوا لنا شي.
بعد كم يوم
هاه يا شيخ عطوك واجب؟؟ ... لا ..أصلا هم ما يعطون واجبات.
بعد كم اسبوع
هاه يا سنافي عطوك واجب؟؟ ... لا .. أصلا حنا نقولهم عطونا واجبات وهم ما يعطون.
وعند استاذ العربي..
استاذنا الفاضل انتم ليه ما تعطون واجبات لزوم الممارسة وللتقوية؟؟

مييين اللي آلّ كده؟؟.... هو قال لي.

إييييه؟؟

يا خراااااابي يا مصييييبتي يا دهوتي يا خراشييي

دانا كل يوم بادّيهم واجب لحد ما طلعت عينيّـة .. إبنك دا. .دا.. شزّاب وما عندوش سالفه .. يا عزتي لباباه



عرفت ليه يا بو عبدالله وش اسباب الغثا ..طلبات معقدة ومطارد ومتابع الورعان :D :D :D


ملاحظة:
شزّاب=هي كلمة مخلوطة خليجية مصرية من تأليفي وتعني كذّاب




طبعا ما ذكرته في الأعلى هو للتمـليح فقط....




والا الصحيح أعبر من كذا:D :D

[القماري]

حمد الله عالسلامة ياشقردي ، ذي الإجازات وإلا فلا
وينا وين الإجازات 20 يوم وتخب علينا ماتعدينا باب البيت يابو عبد الله
وحياك مليون يالغالي

[السمح]

الحمدلله على السلامة أبوعبدالله وأجعلها سلامة دايمة .
ما أدري ليش بعد ما انتهيت من قراءة هالموضوع تذكرت قصة الولد الغني والفقير اللي بعز المربعانية الولد الغني يقول للولد الفقير ليش ما تروح عند أمك وتعطيك حنيني وتشرب لبن وتلبس جوختك وتجي نلعب :p
أقول الله يخلف علينا اللي شوانا الحر واللاهوب .. لكن ما عليك يابوعبدالله حنا منتدبينك تتابع واحد على بالي وزين اللي جبت خبره :D
عشت أخوي شقردي وكل سنة وأنت طيب وانتبه إني نايم بالفصل لين تبدا الدراسة .. أصلا ما طلعت من المدرسة :rolleyes:
وأحلى شي :

فلذلك يجب على صاحب العمل اعطاء العائدين من اجازات بضعة ايام اجازة


أحلى تحية

[نفل]

وعليكم السلام ورحمة الله وبركاته

اخوي المشرف شقردي

الف الف الف الحمد لله على السلامة

والله لك وحشة .

[خشم الحصان]

الاخ الغالي
شقردي
السلام عليكم
حسيك هذا فيه مواري صخونه الله يغفرلك امين اخيي وش عملك يابعدهم استاذ الله يعينك يالغالي وبعدين كلامك هذا يبله بريق غظار مخدر علي عودين ارطي
والشاهي ربيع مع لبتون ولونه تقول نظارات لحام حديد وبين اعشوين فوق عريق رمل تعال نتماخش الله يغفرلك ويرفع من قدرك يابعدهم. قل امين.
1-والحقيقة ان الواحد ما ودك ياخذ اجازة ،،، ولا ودك ينقطع عن العمل:mad: :confused:
بس ابي اعرف ياخيي هالحسي انت صاز الحين هم عطونا اجازه وحنا قلنا لا انت قضبنها ونعلمك وحلاله ياخيي مثل الي يقلون قطو و رجموه بمصير
2-لان عودة المياة الى مجاريها تكون بعض المرات شينة وثقيلة وتاخذ وقت ( الين ) تسلك الامور
يالله خذ نقدي من جهتنا حنا مركبين مواصير ثلاث بوص حار بارد بلاستكيك يعني ماينشب شي فيها مهوب روسي حديد نصف بوصه وين الاجازه ياضلوع ابوي وخلها مهوب تسلك الا خلها تنلطس بس قضبنا طريف الحبل الله يغفرلك لكن الي مثلك (مدرس)
مثل سوات راعي المثل الي يقول (الي امه في الدار ياكل عشاه حار) اجل ولد المطلقه مثلنا وش ياكل مودي اقول اخيي
3-وسمعت ان بعض الأدباء المكشاتيين يقول ( ان احوج شخص للاجازة هو القادم من اجازة ، فلذلك يجب على صاحب العمل اعطاء العائدين من اجازات بضعة ايام اجازة ) انتهى كلام الاديب المكشاتي
الله يجعل اميمته في الجنه هالاديب المكشاتي ايه هذا الحسي الي يخلي الواحد يتمدد وينشكح مهوب انت بس لا طبقونها الا بعد منقضب الاجازه ولا انتم يالمدرسين
مثل حذاف المكينه البلاكستون قطع 26 اذا قضبتو الاجازه مزعتوها وهي اذا قضبة ثوبك مسطتبك ولاحتك في القرنه مغير يتلوا و يونون الخشه مليانه تراب والضلوع متكسره
4-الين الله يرحمك باجازة تاخذ اعيالك وتتمشى انت وياهم وتوسع اصدورهم وتنبسط انت وياهم بعد هالسنة الطويلة والاجازة الثقيلة و تغيب كم يوم عن الدوام ، وعن مكشات ،،،،،
مانيب قايله الصخونه لها تاثير قبل ياخيي اتمشي انا وياهم اذا انتبه الي اذا كان فيه اجازه يبيلك تمر الجفره الي في مقيبره وتدين ثم رح انت وياهم وتمش بس لاتنشد عن اي شي كم هوبه بس ادفع لئنك لو نشته بقول ياخي بسرعه غيرك ينتضر يعني الاتهم الحاسبه خربانه اذا لقيت شي تسكن فيه انت وياهم...... قال تمش ياخيي طقيت جرح مستشم ماطاب
5- قولوا آمين عسى الله يجعل كل ايامكم فلة احجاج و وناسة امين ياخيي
مشكور يابعدهم علي هالموضوع الله يغفرلك ويجزاك عنا بدخول الجنه امين
اخوك
خشم الحصان

[أبو فالح]

السلام عليكم ورحمة الله وبركاته

شقردي قلبي :;)

يا بعدهم صاير وزير التعليم ، على غفلة ،، ( كلن يروح على فصله ) ،، لكن أسمع ، أنا ، ناوي أسوي

أضراب ، مكشاتي ، لأصرخ بأعلى صوتي : ( كل واحد يروح خيمته ) يعني صاير، السمح على غفله .


طيب خلنا من وزير التعليم ، والأضراب المكشاتي ،،، أبسألك كم سؤال ،،، مستعد ،،، بسم الله .


1- إجازك وراها كثيرة ؟:mad:

2 - من متى ، بديت أتفلسف ( إنّ أحوج شخص للإجازة ،،، الخ ) لكن تبي الصراحة ، عبارة:good:


3 - إذا قال ، أخوك أبو فالح ، الحمد لله على السلامة يا شقردي عمري ، ويا عله وناسة دايمة ،، وش

تقول ؟

4 - طيب ، وذا قال ، مع السلامة ،، وش ترد ؟

[ابو شكاع]

فعلا ياخوي شقردي

انا مثلك لاحظت نفس الشي

والغريبة انه كثير من الناس ما انتبه لهذا الشي

المفروض ان اللي يشري ماطور هواء يتأكد من صناعته

<<<< راد وهو ما يدري وش السالفة بس من العجلة

نرجع لموضوعنا

بيني وبينك انا لو يحصل لي يصير شهر دوام و11 شهر اجازة ما قلت لا

قل وراه

اقول لك كراه

تسذا ...........خلقه ............. بي كره للدوام مهوب صاحي ........... كم مره اقول لكم ابصير المدير والا ابكسر القدد ويقولون لي لا خلك على مكتبك لايجيك اكتب منه <<< على وزن خلك على مجنونك لايجيك اجن منه



وعلى قولتك يالله انك تجيب القمري .............عز الله انه ينعش المعده :)

بس انا سمعت انه هالسنة مرشوش <<< هذا جراد مهوب قميري

وش نسوي ودنا نذير الناس عنه غديهم يغفلون شوي :)

انا خابرن صقر يبي يمرن نروح نصيد قميري بس سهجن .......يقول انت ما تصلح بالطلعات بسبب هكالموقف اللي حستنا به العام يوم تروح معنا

مع اني ما سويت شي ابد

فعلا اني اخطيت خطأ بسيط بس ماكان قصدي

تتقول وش لون

انا اقول لك

اتصل علي ابو احمد قال تولم تراي بالطريق ابمرك نروح نصيد قميري او ما يسمى عندنا بالحدر

قلت يابو احمد وش لون اروح معك ... عيالي عند خوالهم وتوهم ساكنين بيت جديد ما به تلفون وام شكاع ما معه جوال للحين ما طلعنا له جوال .....مخططين نطلع له جوال اذا صارت الدقيقة بهللتين

قال ما علي منك .........هذي حولك يالله تولم ما بيني وبينك ولا 5 دقايق انجز

قلت الشكوى لله

ومير اكتب بورقه هالكلام :

الغالية ام شكاع ........انا طلعت مع ابو احمد للبر نبي نصيد قميري لمدة يومين ونبي نرجع الجمعة ان شاء الله

تلقين هالورقة تحت الزولية :(

ويوم جيت عقب يومين واثر الدنيا معفوسه

انا ناسين جوالي

ولا يدرون وين انا بوه

واثر ام شكاع وشكاع واخوانه خزاز وسواج واخته الصغيره ام سنون مغير مناشق يصيحون يقولون وين رحت وخليتنا

عقبه حرم ابو احمد يمرن

عاد وش رايك ................. احس ان ابو احمد ما صدق على الله انه يصير هالموقف علشان يبدأ يسهجن ولا يمرن ....... طيب يابو احمد لا تمرن بس على الأقل اجدع علي كم حميمة وانت راجع :)

[ابو عايد]

الأصل كُتب بواسطة السمح
الحمدلله على السلامة أبوعبدالله وأجعلها سلامة دايمة .
ما أدري ليش بعد ما انتهيت من قراءة هالموضوع تذكرت قصة الولد الغني والفقير اللي بعز المربعانية الولد الغني يقول للولد الفقير ليش ما تروح عند أمك وتعطيك حنيني وتشرب لبن وتلبس جوختك وتجي نلعب :p
أقول الله يخلف علينا اللي شوانا الحر واللاهوب .. لكن ما عليك يابوعبدالله حنا منتدبينك تتابع واحد على بالي وزين اللي جبت خبره :D
عشت أخوي شقردي وكل سنة وأنت طيب وانتبه إني نايم بالفصل لين تبدا الدراسة .. أصلا ما طلعت من المدرسة :rolleyes:
وأحلى شي :



أحلى تحية

[عبدالعزيز الدباسي]

هلا بك اخوي ganderone

لا يالغالي انا ما نيب مدرس لكن منقهر من المدرسين اللي اجازاتهم اكثر من دوامهم ،،، وهم اكثر ناس موظفين يتأففون ويتظلمون من الوظيفة .
----------

حياك ربي يا ابو طلال ،،،، والظاهر اني فتحت لك باب الآهات والونات وجرح ماله دواء ...

وازيدك من الشعر بيت ،،،،،، بنتي الكبيرة الله يحفظها ،،، مشترطة علي اني افضي نفسي لها يوم خاص ، علشان تتقضى اللي تبي وتأخذ كل شى قبل الدراسة ،،،،،
وفعلاً رحنا لكذا محل وشرينا كل اللي تبي من اغراض ،،، وخصوصاً التلاوين والقص واللزق والمقاص ( تعرف بنات )
المفاجأة يوم جت اليوم ،،، قالت لي الابله تقول نبي ناخذ منكم فلوس واجمعها واشتري لكم اغراض موحدة على شان يصير الفصل ( طقم )
قالت بنتي المسكينة طيب يا آبله انا اجتهدت وشريت كل شى ،،، علميني وش تبين زيادة على شان اكمل الناقص ،،،،
قالت الابلة ،،،،، لا تجيبين اي شى انتي شاريته ،،،، لازم تكونين مع زميلاتك ولازم تدفعين معهم :mad: :mad:

اكيد يا ابو طلال هالخبله فاتحه مكتبة جديدة ،،، وتبي تترزق الله على حسابنا .
========

الله يسلمك يالقماري ،،،، وين ايامك يالغالي ، وهذي الساعة المباركة اللي شفنا اسمك .

------------------

تصدق يا ابو تركي ان ربط الاحداث بالقصص القديمة اول انواع مرض ( الفوبيا )

لا تصير يالغالي مصاب بهالمرض وتخاف تطلع من المدرسة ترا الامر هين ،،،، ما غير دق سلف وانطح السحاب
تسلم يا خلفهم ، ،،،،
=======
الحين يا ابو محمد ،،، احد ما نعك انك تاخذ اجازة ،،،،

لا تقول زحمة العمل وما اقدر ،،، وعدد الموظفين قليل ،،، ومن هالكلام اللي نسمعه من ( الشيبان ) اللي عندنا بالعمل .
تراهم ما يعوضون الا ثلاثة اشهر بس ،،،،، ارحم اركيباتك وريحن شوي .
-------------

ياقلب شقردي يا ابو فالح ...

اجل انا فاهم غلط ،،،، احسب اني يوم رجعت خلوني مدير ،،،، واثر بعض الناس ما طلع من المدرسة ابد
:p
اجازتي يالغالي طويلة ،،، لاني سمعت ان واحد يقال له ابو فالح ، ناوي يزور المنتدى ،،، على شان كذا هجيت وما شاف الا غباري ،،،
ومن ناحية مقولة ( إنّ أحوج شخص للإجازة ،،، الخ ) ترا ها الاديب المشكاتي عنده مقولات على كيف كيفك وتصلح في كل الاوقات وفي احلك الازمات .

مشكور يالغالي ،،، وجعلك سالم
--------
اشوا انك علمتن يا ابو شكاع ،،، ان ابو احمد مهوب هاك اللي تبي ،،،،،
تصدق انه يدق علي كل هالاجازة ،،،، بس صرت ذيب ،،،، ولا رديت عليه
تعرف اللي مثل ابو احمد يحاول يحتك ، ،
تسلم يالغالي وماقصرت .
------------
الله يسلمك ياابو عايد ومشكور يالغالي ،،،

[أبو تركي القطامي]

أخوي الغالي أبوعبدالله

مشكور على الموضوع ويعطيك العافيه بس تعال
وش قصدك الله يهديك ويرضالي عليك



الأصل كُتب بواسطة شقردي


لا يالغالي انا ما نيب مدرس لكن منقهر من المدرسين اللي اجازاتهم اكثر من دوامهم ،،، وهم اكثر ناس موظفين يتأففون ويتظلمون من الوظيفة .
----------

[/B]

ليش المدرسين إجازات أكثر من دوامهم ياخي المدرس من الساعه ست ونصف الصبح وهو واقف بالطابور

وبعد الطابور خلنا نقول عنده خمس حصص باليوم كحد أدنى وكل حصه 45 دقيقه ومطالب من ربه وضميره أنه

يتكلم كل هالوقت ويعيد الشرح خاصه أن كان هناك أسطول بالصف مايفهم من أول شرح

يعني تخيل أنك 6 ساعات وأنت واقف وتتكلم لا وبالصوت مسموع وجهور ماهو شعورك ياعزيزي لمنك طبيت

المعارض وقت التحريج على السيارات وطلعت بعد ساعه ؟

وبعدين على هالمنوال ثلاث شهور :mad:

ناهيك عن النوعيه من الطلاب هالوقت الي يرفع الضغط

وناهيك عن التغرب عن أهلك وديرتك ياخي تخيل أنك كل أربعاء تمشي من الجوف الي القصيم وترجع الجمعه

وتمشي 200 كم صحراء و700 زفلت لمدة خمس سنوات ماهو شعورك

وتخيل أنك لوقدر الله ومرض أحد أولادك أو أهلك ماتقدر تأخذ إجازه مثل الموظفين الأخرين وتروح الا حسم من الراتب

وسو أستفتاء وشف من أكثر الي بهم ضغط وسكر من الموظفين وتعرف سبب تأفف وتظلم المدرسين

وبعدين المدرس مثل الشمعه يحترق لكي ..........

وبعدين المدرس شف وش يخرج من تحت يديه الطبيب والمهندس والخطيب و..............الخ

وتحسدهم بعد هذه المقدمه البسيطه :( ياأبو عبدالله الله يجزاك خير

وهالشهرين الي ياخذونها بها منه بعد :(

[بركان]

الأصل كُتب بواسطة شقردي


وطبعاً حنا يالمكشاتيين اكثر ناس محتاجين لاجازات ،،، لان رحلاتنا متعددة ،،، وسفراتنا كثيرة ،،،،، ومواسمنا متقاربة ،،،، فما يبديك على دخول سبتمبر واول سهيل الا انك تنتظر الى آخر اكتوبر وهذا خاص للبواردية وراعين الصيد ،،،، ومن يبدأ الدِّخل والصفارى اللي يبشرون بمقدم الضيف الكريم القميري الين يختمهن الكرك والطيور الكبار .

وبعدها يجيك الوسم وعلوم الحيا وملاحق الامطار والسحب الموسمية ، ،،، اللي الواحد يتشقق من الوناسة ويحمد ربه اذا امطرت او سمع خبر سيل ،،، ولا يهونون اهل الطيور اللي ينبسطون بذاك الوقت بملاحق الحبارى والمطامر وراها

عاد وبعدها يالله من فضلك تجيك طلعات البر و شبة النار في عز المربعانية وفلة الحجاج لكل المكشاتيين راعين البر والصيد والطيور.

ويصير الواحد مع الربيع وتتبع اخباره كل يوم في فيضه ، وكل اسبوع في مكان ، والعزبة ما تنزل من الموتر والواحد ولله الحمد ما يلحّق على الطلعات وفلة الحجاج والوناسة .

ومثل ما كل شى له بداية فاكيد له نهاية ،،، وينتهي الربيع والكشتات وتبدأ الانفس تضيق والحرارة ترتفع ،، وكل ما يزود النهار ،،، تضيق النفس ،،،، وتتعب مع الحر ،،،،،،



-----

اهلين سعادة المدير العام
سوبر مشرف

ممكن تسمح لي اضع الكلام اللي فوق توقيع لسعادتنا
يا استاذنا هذا وصف دقيق وموجز لفصول العام
يعني اختصرت السنة في سطرين معبرين.

بس لو انك حطيت العنوان هكذا: كلن يروح لخيمته.!!! ترى ممكن تعدل اي وقت منتب زيي بس عندي 120 دقيقه.!!! يا حظك.!!! ليتني مدير هامور زيك.!!!

ما تلاحظ ان جماعة الربع من يوم يشوفونك منزل موضوع وهم على طول يتسابقون للظفر بالفوز باول رد
كسبا لرضاكم عسى ولعل ان توصون بتعيينهم مشرفا او تأمرون لهم بمكرمة وانا طبعا اولهم ’ من اول ما اشوف موضوعك وانا اعض ثوبي واجيك اطامر بين الخيام بس الله يفكني من الاطناب لا اشنقل على جنبي. كل هذا من غلاك يا سعادة المدير العام.

ما عليش يا مديرنا العام اسمح لي بس هالمره اخذ راحتي في السوالف معك واوعدك انني ما اتعودها مره ثانيه. بليززززز.

تحياتي وتقديري لكم ولكل من ينتمي الى مكشاااااااااااات.

[عبدالعزيز الدباسي]

تصدق يا ابو هنا اني الحين اقتنعت تماما ، انه فعلاً المدرسين هم اكثر ناس غير مقتنعين بوضعهم :p

وراك يالغالي جبت ( الآكو والماكو )

المدرسون هم نبراس الامة ، وهم المربون الافاضل ، وهم من نعقد عليهم آمالاً كبيرة في اصلاح الناشئة وهم من حملوا امانة التعليم
اخي الكريم لو ما يأتي من المعلم الا مقابلة اطفالنا الصغار وسماع صراخهم ومحاولة اصلاحهم ،،، لكن كافي ان نقف احتراماً وتقديراً لهذا المربي الفاضل .

( هاه عساك انبسطت )

ومع كذا هم اكثر ناس يتأففون من وظيفتهم ، ولن يخلوا مجلس اجتمع فيه معلمين الا كان نقاشهم حول ( الوزير - مدير التعليم - المناهج - واكيد اكيد اكيد قاعد كل واحد يشرشح مديره .:p
==========

هلا وغلا ومسهلا يا بركان مكشات العظيم

اسفرت وانورت يالغالي .

انت آمر وحنا نطامر ،،،،

ومن ناحية تغيير العنوان ،،، الحقيقة انه ( بالعنية ) حاطه كذا على شان مدرسين القواعد ما يهقوننا ويقولون ترا الجملة غلط ،،، مسوياه يعني اني فاهم باللغة .

ومن ناحية ( جماعة الربع ) الله يديم المحبة بيننا ،،،، وتراك واحد من هالجماعة ،،، ولا تعتقد انك في مأمن الدور عليك ;)

ولا عمرك تعوده :p :p :p