فضائح صيديه .... الثانيه ( عجيب لولا الشحم كان صاد ) [الأرشيف]

مشاهدة النسخة كاملة : فضائح صيديه .... الثانيه ( عجيب لولا الشحم كان صاد )

أبو رداد

12/09/2004, 07:49 PM

بسم الله الرحمن الرحيم

السلام عليكم ورحمة الله وبركاته

الاخوه الاعزاء ...
اليكم القصه الثانيه (عجيب لولا الشحم كان صاد ) ...
http://www.mekshat.com/pix/upload/images5/mk8675_b1f.jpg

العام الماضي وفي نهاية الموسم اتصل بي احد الاخوان وقال يبورداد انا عند الله ثم عندك ( وهو كان متفق معي يجي اول الموسم لاكن ظروف عمله لم تسمح له واضافه لذلك ذهب الى الباكستان ) ... قلت كيف يبو فلان الحبار يودع وفيه بيض .. وطيوري في المكيظ الي ارسالتها للامارات والي مكيظه في العراق ... قال مااعرف انا جايك ... قلت زين تعال ونطمش على طيورك ... قال لا لا .. زماط لاتتهرب يبورداد ... انت موتجي عندي قال طيوري كذا وفعلهن كذا ولقفت على فلان وطير فلان انسبق وطير فلان انضرب ... ويوم اجيك تقلي طيوري في المقيظ ... قلت تم وحياك الله ... قال يويلك ويلاه من عجيب(ثري كوارترز ابيض) وسويد(جير شاهين اسود) ... قلت في نفسي اعوذ بالله هالرجال ناويلي نيه قشره ... والله اتصلت في ربعي وقلتلهم انصبوا الخيام في المكان الفلاني في الجنوب وبعد يومين اجيكم ومعي ضيف ... وفي نفس الوقت اتجه غربا الى المقيظ ... طبعا نصف القوه القتاليه الي عندي مكيظها عند خوي في الامارات الي هم (الذيب وجلمود وهولاكو) والنصف الثاني في العراق ... كنت معتمد على ابو خنجر(حر قرناس هوى بكر) وعنتر(جير شاهين اسود ) .. لقيت عنتر تايح ريش وشليت شاهينه جبليه كنت واضعها بمصقره علشان التكاثر ....
والله خوينا وصل الاردن واتصل بي ويقلي يويلك ويلاه .. وبنفس الطريقه وصلوا الى بغداد .. وتغدينا سوى وكلما احط لقمه في حلقي يقلي يويلك ويلاه وانا اغص ... المهم واحنا في الطريق قلت في نفسي خلني اهاجم في الكلام واهبط المعنويات احسن موكل شوي يقلي يويلك ويلا ويغربلني بهلكلمه ... قلت ترى مافيها استر على ماشفت .... قال نعم الي طيره ينسبق يتصل بفلان خوي مشترك (مثل قناة الجزيره) ... قلت زين تريد نبدي بالحبار الفقير لو الشرد ... قال عليك بالشرد ( وانا ابلع بريقي وقلت هذا الرجال متعني يغربلني ويفضحني بين الربع هناك واويلي من لساني الي يجيبلي المصايب) ....
المهم وصلنا المخيم ومكانكم خالي لحم هرفي والفقع جبته من مغرب معي لان مايصير في المناطق الشرقيه والجنوبيه الي كنا قانصيها ... وربيع ... تشبه سفرة الفيتو ... ماينقصها الا فروخ الحباري ... وحليب المصاغير ههههها ...
وكان خوينا مامعه الا بنغالي يشيل طيوره والطباخ ... ويقلي عجيب شاريه ب30000 الف دولار وسويد بنفس السعر (اوردر خاص)... والرجال عنده خير والله يزيده من نعيمه ... والي حطم معنوياتي اكثر هو البنغالي ( يقلي انت شو يعرف ويسوي زمات مع ارباب انتي خسران خسران اجيب يسيد عسره وسويد يسيد ثمان تسء في يوم واهد).... وانا اقول في نفسي ياصباح لاتصبح انفضحنا والله ...
وكالعاده اخليكم مع بعض الصور وبعد 24 ساعه اكمل وترى هذه وصيت الفيتو وسنافي ... بس الله يسترنا من الفايروسات ....
الصوره الاولى ... ابو رداد يتوسط خوينا والطباخ الي كان يكرش الحبار ...وعجيب متنومس جنب الطباخ ...
http://www.mekshat.com/pix/upload/images6/mk8675_b2f.jpg
الصوره الثانيه ... الطباخ يكرش وخوينا راقد لان الضغط مرتفع ....
http://www.mekshat.com/pix/upload/images6/mk8675_b3f.jpg
الصوره الثالثه ... خوينا مع صقاره والحبار في ايدهم ... والله اعلم صيد طيورهم لو غيرها ...
http://www.mekshat.com/pix/upload/images6/mk8675_b4f.jpg

ابو عايد

12/09/2004, 09:58 PM

وعليكم السلام ورحمة الله وبركاته
أخي ابو رداد تمتمعني دائماً بسوالفك الطبيه كلماتك العذبة أخي الغالي مادمت تنحفتا بهذا الصور

الشيقة فأرجو منك أن تتحفنا بصورك القديمة والحديثة وخاصة طيورك تنزل لنا صور .

الصوره الثالثه ... خوينا مع صقاره والحبار في ايدهم ... والله اعلم صيد طيورهم لو غيرها :eek: :eek: :what:

والله ماعــــــــاد لقيت كلام اشرح به اعجابي

ابداع متواصل ... يعطيك العافيه اخوي ابو رداد الغالي

لك مني جزيل الشكر

وتقبل تحياتي // العاشق الولهان

العتيبي......

13/09/2004, 12:13 AM

وعليكم السلام ورحمة الله وبركاته

الله يستر يابو رداد من اللي ب30000الف دولار.

اخوك:العتيبي.

الفيتو

13/09/2004, 06:03 AM

السلام عليكم ورحمة الله وبركاته
الأخ العزيز
* ابو رداد *
مساك الله بالخير حقيقه مدري وش اقول ......................................الله يجمعنا في خير
والله شوقتني للعراق وأهل العراق وصيد العراق ....... ننتظر السالفه بفارغ الصبر
الله يهديك يالسنافي سنيت سنةٍ لعبة فينا ... البنقالي يقول صايد تسء وعسره
هههههه اثر فيهم حميا مع معازيبهم انا ولد ابوي ولده والله بنجزع
في رفيقنا ابو رداد . وش عذرنا مالنا عذر تكفى يا بو رداد
سدنا فيهم والا الله يعينا عليهم فالجايات نرسل اللي
يبيض وجهك
والسلام
الفيتو
الحجاز-29- رجب - 1425هـ
http://www.mekshat.com/pix/upload/images6/mk8575_w.jpg

أبو رداد

13/09/2004, 07:56 PM

بسم الله الرحمن الرحيم

السلام عليكم ورحمة الله وبركاته

مشرفنا العالي ابو عايد .... مشكور على مرورك الكريم ... وابشر بالصور ... بس انتظر الموضوع المناسب.. واتعلم على السنكر زين ... لان كلما ردت توضيح الصور كبر الحجم ولايحملها البرنامج ....
__________________________________________________ ____________

الاخ العزيز العتيبي ... مشكور على مرورك الكريم ... وتجيك السالفه انشاء الله ...

__________________________________________________ ____________

الاخ الغالي الفيتو .... مقدما .... يويلك ويلاه من الذيب وابوخجر ... ترى العام انا مسيطر لان الوضع مخربط ومااجى للعراق غير خويانا ... ولا صارت قسمه وبعت شي من طيوري ... وعلى قولت خوينا الشاعر في واحد يذم نفسه ... السنين القبله ينتظروني متى ابيع الطير طيب الفعل ويجون يغربلوني ... بس خليها مستوره ...

ملاعب الريح

13/09/2004, 09:03 PM

بسم الله الرحمن الرحيم
مشكور أخوي أبو رداد على هذه القصه الشيقه والمثيره ننتظر الباقي بفارغ الصبر أخوك(بو سيف):good:

أبو رداد

13/09/2004, 11:45 PM

بسم الله الرحمن الرحيم

السلام عليكم ورحمة الله وبركاته

تكملة السالفه ...
ياجماعة الخير ... اصبح علينا الصبح ... والمطر ينزل ... قلت رحمتك يارب ... قلت يالربع اليوم مانقدر نروح على الحبار الشرد ... انشاء الله نروح على حبيرات فقيرات ... ارضها رمل علشان نخلص من التغريز ... ورغم المطر توكلنا على الله ... واقل لخوي شو تبا الهدد اول لي لو لك ... قال لي ... قلت تم ... وبعد فتره قليله ... ولن جول 7 حبارات قدامنا يتلامطن جناحينهن ... ويصيح خوينا عجيب عجيب والبنغالاي يعطي عجيب ... ويكوبر واحد من الخروب بوجه عجيب ويصيدا ... وخوينا يصيح ماشاء الله عليك يعجيب ... قلت ماشاء الله ... قال شفت السبق ... قلت نعم نعم ( والله ياجماعه كان يطير ويسنح جناحه بس الحبار فقير( مأمن) ) ... ماطول عليكم السالفه ... بعد ان عزل عجيب عن الحباره .. نتجه صوب الخمر ... ولن قومت حباره من تحت ويل السياره ... ويهد سويد ... وتقله الحباره اعذرني واذا بيك فايده الحق ... ويصعدن فوق ... ولما سنح..... واعطي الجبليه سبوقها ... وتنزل من النجوم مع الحباره ... قال زين زين هي الجبليه ماتقدر على الحباره الافوق !!... وعقب ماعزلنا الجبليه عن الحباره ندور ولن حباره من المخمر تكفع ... ويصيح عجيب .. ويطلع عجيب ويقلنا وش هذ الي هادني عليه ونقله يعجيب هذه حباره حباره توك صدت اختها ... قال مااعرفها ولااريد اعرفها ... وعقب ماغابت الحبار يقلي هد .. قلت الحبار واجد ... وماطول السالفه في ذاك اليوم سويد صاد حباره وحده ... وابو خنجر ثلاث حبارات ... واول ماوصلنا المخيم وعقب شرب الشاي ... اتصل بخوينا ( قناة الجزيره) ... وخوينا يقلي يبو رداد طول بالك اليوم اول يوم والطيور ماتعرف هذا الحبار ... لاكن فاته السوم والتلفون دق ... وننقل الواقعه الى قناة الجزيره .... وخوينا كان مومهتم حيل ... لان كان عند هقوه في طيوره ...
انا هالوقت وعقب ماشفت فعل الطيور ترهيت ... وقلت في نفسي بكرى نروح على الشرد واضر الضربه القاضيه .... ( في مناطق عاصيه لكن على طريق الصياده الي ماعندهم اجهزة طيور فلما يقوم الجول يهدون واذا ابتعد الطير دعوا ... فحباره يكون شااااارد) ...
وصباح اليوم الثاني نتوكل على الله ... ورغم التغريز الي تشوفون صورته ... لكن كان فيه هدد حلو ..
http://www.mekshat.com/pix/upload/images6/mk8675_b6f.jpg
اختصر القصه ... في ذاك اليوم النتيجه النهائيه طيور ابو رداد 8 ... وطيور خوينا 0 ... والعذر الحبار مشحم ... اما الي تصيدها طيوري مافيها شحم !!! وطبعا نقل مباشر لقناة الجزيره ... خوينا ارتفع الضغط ورقد اول مارجعنا ..... وابو رداد استلم البنغالي ...وينكم وين طيوركم ... وهو يقول هبار باكستان غير وهبار اراق غير ....
وبعدها رفعت الرايه البيضاء .... وصارت هدنه ... وقمنا ندور حبار فقير لطيور خوينا ... وبالنتيجه خوينا قال يلعن يوم الجيره ... ووصى على حر طيب مهما غلى ثمنه ... وبينا الحكي العله مو بالجيره ...
وهذه صورت ابوخنجرعلى ايد واحد من ربعي بعد النصر ....
http://www.mekshat.com/pix/upload/images6/mk8675_b5f.jpg
وهذه صورة الشاهينه الجبليه الي تفداكم ... ماتت قبل شهر بعد ان غسلت بالكامل ...
http://www.mekshat.com/pix/upload/images6/mk8675_b7f.jpg
وفي الختام تقبلوا اجمل تحيه .... وترقبوا الفضائح الجديده ....

رعد الجنوب

14/09/2004, 12:20 AM

السلام عليكم ورحمة الله وبركاته
اخوي ابورداد الله يعطيك الصحة والعافية
دائما سواليفك وعلومك غانمه
قصص رائعة قصص المقانيص
نتمنى لك ولجميع المقانيص التوفيق في الموسم الي على الابواب
ونتمنى من الله الكريم ان يرزقنا وجميع بلاد المسلمين بالامطار.
سلامي للجميع

الفيتو

14/09/2004, 06:35 AM

السلام عليكم ورحمة الله وبركاته
مساء الخير يا بو رداد
جعله من طبعك وحنا من ربعك والله يكفينا الصفر اللي طلع به البنقالي ومعزبه
مشاء الله على ابو خنجر طير محسوب ومع صقار عزالله يبي يتيهه
ربيع وخير الله يزيدكم . أجل رفيقك ما عاد يبغى للجير شوفه
هههه .تعيش وتسلم ولاهنت يالغالي
والسلام
الفيتو
الحجاز - 30 -رجب -1425هـ

يا بورداد ارسلت لك رساله خاصه بس بريدك مليان
http://www.mekshat.com/pix/upload/images6/mk8575_w.jpg

بوصقر

14/09/2004, 09:40 AM

ويطلع عجيب ويقلنا وش هذ الي هادني عليه ونقله يعجيب هذه حباره حباره توك صدت اختها هههههههه

والله هذا الطير نكبه

وهو يقول هبار باكستان غير وهبار اراق غير هههههههههههه تويه يدري

لاكن المشكله يا بورداد انك اتهد على الحباري الغير مشحمه ورفيقك ايهد على المشحم

وهذا عذر جديد ادخله في قاموس الاعذار

وتسلم على الفضايح العجيبه :good:

laith

14/09/2004, 10:37 AM

السلام عليكم ورحمة الله وبركاته

نظمت فاجدت ماسطرت يابو رداد

لقد اصبحت ماسورا لسوالف بورداد ومشاركاته ولي العذر في ذلك فلم تترك شارده ولاوارده الاصغتها بسيناريو جذاب. :p :p

دمت سالم وغانم :good:

abo fahad

14/09/2004, 03:49 PM

عاداتك السوالف الزينه ياخوي و ياشين اي يبلشك بطيره انه بيسوي و بيفعل هذا لا تخاف منه الخوف من الساكت الي يعمل بصمت ماتدري الا وهو ملحق على طيرك و محول بالحبارى........................ابو فهد :) :)

ميراج

14/09/2004, 10:39 PM

السلام عليكم ورحمة الله وبركاته

مساء الخير ياجماعه اثركم فالين الحجاج وانا ما ادرى

زانت علومك يابو رداد الله يعين اللى طيوره كلها تفريخ يا كثر تصانيفها

ما مثل طرح الشبك إلى الله وفقك فى واحد فارط ويهوى الحبارى والله ما تصخره ولا الشياهين

جا عندى طير الله يخلفه ظاع فى فيحان 3 سنوات ما ضيع ولا حبارى الحبارى بعيد ولا قريب معشر عدها فى

الخرج بس بيض الله وجهك يوم وقفت البنقالى عند حده ولا كان شاخ عليك هو ومعزبه ولاكن نصرك الله

تحياتى

ابو عايد

14/09/2004, 10:50 PM

أبو رداد

16/09/2004, 12:53 AM

بسم الله الرحمن الرحيم

السلام عليكم ورحمة الله وبركاته

الاخ العزيز ابو سيف ... مشكور على مرورك الكريم ... واعذرنا اخوي تراك رديت لما كنت اكتب تكملة السالفه ...
__________________________________________________ ____________

الاخ العزيز رعد الجنوب ... مشكور على مرورك .... ومشكور على هذا الاطراء .. والله يوفقك ويوفق كل القوانيص المسلمين بصيد طيب وربيع دائم ....
__________________________________________________ ____________

الاخ العزيز حق النقض ( الفيتو) ... مشكور على مرورك الكريم .... وامين يارب العالمين ... ومشكور على هذا الاطراء ....
__________________________________________________ ____________

الاخ العزيز بو صقر ... مشكور على مرورك الكريم ... وتراه ذبحني ذبحني ذبحني ( مثل الشله مال عيضه بن طناف) ... بس عقب مقناص ثاني يوم ذبحته ذبحته ذبحته ..ههههههه
__________________________________________________ ____________

الاخ العزيز ليث ... مشكور على مرورك الكريم ... وعليهم عفيه اخوي هههه
__________________________________________________ ____________

الاخ العزيز ابو فهد ... مشكور على مرورك الكريم ... كلامك صحيح على الساكت ... بس ماظن يقدر يلقف على طير من طيوري وانا متاكد من طيري ... :D واذا تريد ظل ساكت وتعال ... ابو خنجر هالحين على ايدي .... ومن يومين تجيني علوم في المكان الفلاني 7 حبارات وطيرنا خمسه من المكان الفلاني ...
__________________________________________________ ____________

مشرفنا الغالي ميراج ... مشكور على مرورك الكريم .... ويبو طارق لاتلومني ... لوم سنافي والفيتو الي علمونا هذه الطريقه :D .... والطيور التفريخ اثبتلي بانها اذا ماتستفرس في الصيد ... وتصيد كميه كبيره من الحبار ... الها يوم تخجل راعيها ... بينما الوحوش من يصيد حباره حبارتين تنطبع في ( الميموري ) وماتنمسح يلو بعد سنين ...
وطيرك الي ضاع ... الله يخلف عليك .... وترى طيوري كلها قدامك ... اتخير منها ... وتراني جاد والله ...
__________________________________________________ ____________

مشرفنا الغالي ابو عايد .... مشكور على مرورك الكريم مره ثانيه ... وامين يارب العالمين ... وانشاء الله تتعدل الامور وتجون بين اهلكم في العراق ... ويصير زماط وتصير الفضائح على الهوى ( نقل مباشر ) .... بس تراك حكم ومايصير تشارك .. ههههها ....

ترقبوا جديد فضائح صيديه ... الثالثه ( خوينا رمى الطير في برقعه وقال ياروحي مابعدك روح )

وهذه الصوره راس الذيب بيد ابو رداد
http://www.mekshat.com/pix/upload/images6/mk8675_debf.jpg

والي بعدها ... ( الثعلب اخذ الطير وحنا نتبع الريام )
هذه الصوره اخذناها ولانعرف به الوقت الثعلب يعلف بطيرنا ...
http://www.mekshat.com/pix/upload/images6/mk8675_remf.jpg

الساكتون

16/09/2004, 12:31 PM

الله لا يهينك

خليتني متسمر عند الكمبيوتر أنتظر جديدك

بيض الله وجهك على السوالف الزينه

وأبشر بالعوض بطيرك والله شاهد

أخوك
الساكتون

أ

عبدالله بن فرحا ن

16/09/2004, 01:25 PM

السلام عليكم ورحمة الله وبركاته
مقناص اكثر من رائع تسلم ابو رداد لكن عندي بعض لاسئله اذا مافيه احراج
1-هل اسم راعي الجير ( خليفه ) لانه روالي نفس المقناص
2-هل استطيع الذهاب الى هذا المقناص خلال هذه الظروف الراهنه

تقبل تحياتي . عبدالله

قشاع الرمث

17/09/2004, 10:03 PM

الأصل كُتب بواسطة رعد الجنوب
السلام عليكم ورحمة الله وبركاته
اخوي ابورداد الله يعطيك الصحة والعافية
دائما سواليفك وعلومك غانمه
قصص رائعة قصص المقانيص
نتمنى لك ولجميع المقانيص التوفيق في الموسم الي على الابواب
ونتمنى من الله الكريم ان يرزقنا وجميع بلاد المسلمين بالامطار.
سلامي للجميع

هاوي مقناص

18/09/2004, 01:05 AM

أبو رداد

19/09/2004, 11:25 PM

بسم الله الرحمن الرحيم

السلام عليكم ورحمة الله وبركاته

الاخ العزيز الساكتون ... مشكور على مرورك الكريم ... وابشر بالجديد يالغالي ... والهديه مقبوله وموفره ومشكور جعلك تحيا ...

__________________________________________________ ____________

الاخ العزيز نسيم الشمال ... مشكور على مرورك الكريم ... واسم راعي الطير موخليفه .. ولااتذكر اسمه مطلقا .... وحياك الله في هذا المقناص بعد استقرار البلد ...

__________________________________________________ ____________

الاخ العزيز قشاع الرمث ... مشكور على مرورك الكريم ... والله يعطيكم العافيه ويرزق المسلمين الخير والربيع والمطر ...

__________________________________________________ ____________

الاخ العزيز الخشف ... مشكور على مرورك الكريم ... والله يعطيكم العافيه ويرزق المسلمين الخير والربيع والمطر ...