المساعد الشخصي الرقمي

مشاهدة النسخة كاملة : يا اهل الشوازن ارجو الافاده


عاشق البر والصيد
07/10/2009, 10:08 AM
السلام عليكم ورحمة الله وبركاته


اخواني ممكن تفيدوني عن الشوزن ام حبه فرنسيه الصنع وش رايكم فيها مرهمه بماصورة طويله كسر وتسفط نصين ويكون شكلها صغير سهل وضعها بأي مكان معروضه على بقيمة 2000 ريال مع 6 كراتين فشق يعني قيمتها الصافيه تقريبا 1400 ريال


قريبا انشالله اجيب صورها هنا



ارجو الافاده وشكرااا
خيوط الليل
07/10/2009, 12:56 PM
اذا ما اخذتها انا اشتريهــــــــــــــــــــــــــــــــــا......... ...........لاتفوتها..
wolf220
07/10/2009, 02:23 PM
والله سعرها مغري لاتفوتك ........
عاشق البر والصيد
07/10/2009, 03:55 PM
اخواني خيوط الليل وولف مشكورين على المرور والافاده الله لايحرمنا منكم ومن بقية الاخوان ابي اعرف الشوزن الفرنسيه زينه تتحمل وهل خرابها واجد وش عيوبها وحسناتها هي زي الامريكيه ام حبه ام سيلان ؟
تركي98
07/10/2009, 04:09 PM
والله سعرها مغري ياخوي بس اول مره اسمع بالشوزن الفرنسيه...ولاقد خبرت على كثر البنادق اللي مرت علي ان فيه شوزن فرنسيه :)
لكن تبي نصيحتي خذ الشي المعروف امريكيه ولابرازيليه وريح راسك...هذي صراحه مغريه مره بالسعر ولا صارت كذا الا تحس ان راعيها يبي الفكه منها ..شف حاط معها 6 دستات فشق يبي يغري المشتري ..لو هي زينه والله ماتاخذها بهالقيمه.
هذا رايي وانت براحتك. تحياتي لك.
عاشق البر والصيد
07/10/2009, 06:49 PM
مشكور اخوي تركي على المرور وافادتك بالنسبه للشوزن للفرنسيه ان مثلك كنت اجهل فيها ماعمري سمعت بشوزن فرنسيه بس سويت بحث وحصلت والله يمدحونها زين والشوازن الامريكيه والبرازليه دورت وماحصلت شي اذا تخبر لي شي نظيف انا شراي وشكرااااااااااااا
بواردي الروضة
07/10/2009, 07:57 PM
اولا شي غريب أنه حاط معها فشق بالسعر هذا

يعني تقدر تقول يبي الفكه ويبي يغري المشتري ..


الشي الثاني

احمال جائز او غير جائز أن الرجال ترك الرمي والصيد ... واحتمال يكون عنده ضروف و محتاج ويبي يبيع بأي شي ... واحتمال يكون قليل الخبرة ولا عنده معرفة في الأسعار ... احمتال يكون نوع البندق رديئه .... انا من 15 سنة ما قد سمعت عن ام وحده فرنسية وأيضا من بعد ماقريت موضوعك سألت ناس لهم قرن في الصيد ولا عندهم علم عنها ..

بالنسبة عن هذه الاحتمالات اللي ذكرتها لك لا بد ان تتأكد منها من صاحب البندق وتسأل أهل الخبرة أكثر ...
عاشق البر والصيد
07/10/2009, 08:25 PM
اولا شكرا على مرورك اخوي بواردي الروضه
ثانيا الرجال عنده شوازل غير هذي اللي بيبيعها لي مو بحاجتها
ثالثا انا استغربت من صناعتها فرنسيه وسويت بحث في قوقل وطلع لي شوازل فرنسيه خشيت والكل يمدح فيها عمليه مره وصبوره بمكانك انت تسوي بحث وتحصلها والرجال هذا يمون علي يعني مو غاشني فيها السنه هذي صاد فيها ويمدح صيده
انتظر المزيد من الافاده وشكرا
قناص خليص
07/10/2009, 10:49 PM
الله يطعمك من خيرها كانك شريتها
عاشق البر والصيد
07/10/2009, 11:18 PM
مشكور اخوي حسن على مرورك والله يجزاك الف خير انا توني ماشريت بسئل عنها اول من ناحية ادائيها في الصيد وهل هي عمليه تصبر ولا لا

مشكور على مرورك مره ثانيه
سعود1504
08/10/2009, 12:08 AM
يشباب الله يعافيكم عندي شوزن بيكال تلك برصاص ابوغزال
ودائما تزم ,,,,,,,,,,,,,,,,,
تكفون الفزعة الله يعافيكم
ابوصالح3
08/10/2009, 12:44 AM
السلام عليكم النصيحه والدين النصيحه جربها ان كانت مثل مايقول خذها وانت مغمض والاخوان اللي يقولون مامرت علينا ولاسمعنا عنها انا ااكد كلام الرجال كان عندي ام وحده و ام ثلاث وكلهن فرنسيات وطبعا ماياصلن لمستوى الايطاليات بس صناعتهم طيبه زي الروس والالمان ارجو ان اكون قد افدت هذا مالزم ايضاحه مع خالص تحياتي
عاشق البر والصيد
09/10/2009, 03:15 PM
مشكورين كلكم على مروركم والافاده وابشركم جربتها وشريتها عزالله انها بندق ينغزى فيها
ومواصفاتها حلوه بعدكسر وصفط ومرهمه بماصوره 30 انش والفشق يطلع بنغزه زر الله يطعمني خيرها ويكفيني شره قولو امين :d :d :d

مشكورين مره ثانيه الله لايحرمنا منكم
ابو نايف حائل
09/10/2009, 05:00 PM
السلام عليكم
اخوي يعني وش الفشق الي تبي ترمي به
وبعدين وش تبي تصيدبه
وعطيك الخبر
عاشق البر والصيد
09/10/2009, 06:23 PM
هلا اخوي ابو نايف
نوع الفشق اللي جاي معاها ابو غزال رقم 1 و 2 و 3
وانشالله ناوي اصيد فيها الصيد الجاي طيور كبار مثل القميري والصفار وقطاء واي طير كبير من طيور النزل

وما استفني عن مشورتكم

ولكم تحياتي
ابو نايف حائل
09/10/2009, 08:17 PM
هلا اخوي عاشق
شف اذا البارود تتحمل وماتسخن بسرعه تراه جيده
وانا عاى ماعتقد ان ام حبه زينه وانا استخدمته ام سيلن فتره
وبعدين جرب البارود قبل لا تاخذه شف سوقه وهي تضم اوتنشر
ورمبه على اقل شي نص دسته وشف تحمله
وبعدين ترا القصبه تصلح لقمري
ام اذا تبيه كرك او اجوال كبيره لا تاخذه وشفلك ام خمس اوثمان اوتسع
عاشق البر والصيد
09/10/2009, 10:59 PM
هلا فيك اخوي ابو نايف
بالنسبه للرمي انا رميت فيها عشر فشق والحمدلله ما احتمت البندق زينه مره صح انها قديمه شوي بس مخزنه عند شايب يعني استعمال حشمه
وبالنسبه للفشق نبيها للقميري واللي كبره وهي جاي معاها ست كراتين نص فرش ونص يسوق جربتهم كلهم

ومشكور على مرورك والافاده

وتقبل تحياتي
اخوق عاشق البر والصيد

( ابو خالد )
ابو نايف حائل
10/10/2009, 12:11 AM
اجل يابو خالد اشره ولا تردد
عاشق البر والصيد
10/10/2009, 01:48 AM
ياهلا فيك اخوي ابو نايف مره ثانيه وتشرفت بمرورك
ابشرك البندق شريتها وجربتها مصورها وادور احد ينزل صورها انا معرف غشيم شوي بخليكم تشوفون المزيونه وانشالله نوكلكم من صيدها :D :D خاصه انت يابو نايف لأنك متفاعل معي كثير تستاهل
ولكم تحياتي
اخوكم عاشق البر والصيد
(ابو خالد )
سعود1504
10/10/2009, 07:00 PM
اخوي ابونايف مشكور وش الاسباب إلاي تخليها تلك بالفشق هذا هل هو خراب في البندق وإلانوع الفشق مايصلح لها
عاشق البر والصيد
10/10/2009, 10:26 PM
هلا اخوي ابو سعود شكرا على مرورك
بالنسبه لمشكلتك مع الشوزن جرب فشق نوع ثاني وشف اذا استمرت المشكله اكيد الخراب بالبندق

ولك تحياتي