مشكلة في السفاري 2001 الطارة ترج معاي مع اي مطب قوي شوي

[حسون2001]

ياجماعة الخير انا معاي سفاري 2001 شاريه نظيف من ولد عمي لكن فيه مشكلة عجزت اتخلص منها اللي هي الطارة ترج معاي لما اكون امشي فوق100 واحيانا اذا كان المطب قوي مررررره يقوم القير يرج مع الطارة بعد وللمعلوميه انا مابقى شي في السيارة ماصلحته وغيرته من تحت كل شي غيرته وشريته من الوكالة وكلفتني الارضيه كاملة حدود 2000 ريال ومع هذا كله ماافتكيت من رجة الطارة:( وفيه احد الاخوان نصحني وقال دبل مساعد الدرقسون وانا ابي فزعتكم الله لايهينكم واكون لكم من الشاكرين

[ن م ر]

شيك على مساعد الدركسون + عمود التوازن ان وجد + جلد الاذرعه + كراسي الدودة

وبالتوفيق

[سندهم]

زي ماقال أخوي : نمر

شف الدودة كانه الطارة هواء

[qsmngee]

مثل ما قالوا الاخوان
وتدبيلة مساعد الدركسون تراها فكرة طيبة
كل اللي اعرفهم سووها يقولون ليتنا من زماااااان مرهمينه .
تحيتي لك ....

[ياعمار يانجد]

حياك الله
اكبس اذرعة الدركسون عند محل ميزان اذرعة وترى ما تكلف من 150 الى 200 ريال
تحياتي لك
أبوعبدالله،،،

[هولوكس2005]

أخوي 90% من الرمان شدهن ولتأكد رج الكفر كأنه رج معك فأن المشكله من الرمان وطبيعي يرتخي ولا تخاف في تيله حماية

[حسون2001]

الله يبيض وجيهكم ياجماعة الخير وماقصرتو وكثر الله من امثالكم والله يجزاه بالخير من قال لي سجل في موقع مكشات واهم يعطونك الحل مع خااااااالص شكري لكم اخوكم عبدالمحسن وبالنسبة للرمان انا شاريها طقم كاااامل وبرضوة جلد الاذرعة شاريها جديدة ومساعد الدرقسون شاريه جديدة مو باقي اجل الا الدودة ويعطيكم العافيه مررره ثانيه

[معدي المرقاب]

اخي المشكلة كانت معي اذا ظربت مطب من قو الرجة قلت الكفرات تتطلقن ورحت لميزان وكبست الاذرعة والحمد لله اخي اذا كنت بالقصيم ابشر بعزك .

[فتك ابوفهد]

تبي الحل اللي يريحك سو اللي بقولك عليه :

1_ شد الرمان
2_اكبس الاذرعه او غيرها
3_دبل مساعد الدركسون < مهم ويريحك من الرجه نهائياً
انا مدبل المساعد من سنه تقريباً والحمد لله راحت النفضه اللي بالطاره نهائياً

[راعي جيوب]

مثل ما قالوا الأخوان شيك على الدوده

[ساري 111]

كد صارت معي نفس مشكلتك يوم كان معي باترول
اذا صرت امشي فوق الميه وضربت جفرة او مطب خفيف كل الدنيا ترج الطاره ودفرنس قدام والقير وتحس ان دفرنس قدام يبي يطيح (شي يروع صراحه)

لكن اذكر رحت لورشه جيفر ببريده بطريق عنيزه غير لي ذراع فوق الدفرنس القدامي يقول انه بدل الربل يكبس رمان لكن الشاهد ان الموتر ضبط بعد خسااااااير كماهي العاده ع النيسان الله لايعيد ايامه

[راعي العشــه]

الله يكون فعونك
ومثل ماقالو شيك على ذراع الدركسون

[دانكن]

كاني منب واهم فانا قابلتك في ورشة بصناعية ام الحمام .. ؟

المهم تبي رأيي .. مر ميزان العضيب ورصص ارضي .. ودبل مساعد دركسون ..

[حسون2001]

الله يبيض وجيهكم مرررره ثانيه ياجماعة الخير وماقصرتو واقدم كل الشكر للاخوان اللي شاركوني في الموضوع اخوكم عبدالمحسن

[Black VTC]

شف يا عبدالمحسن ان كان مشكلة الباترول عندك مثل ما فهمتها انا وهي ان الموتر اذا تعديت 100 ما فيه مشكلة ابداً الا في حالة انك تضرب بطناج او مطب او حفرة صغيرة بالارض او خلافه يجلس يرج الدركسون بيديك رج اللين تنزل تحت المية و تلمس الفرامل ثم يرجع التوازن ثم ترجع الرجة بعد ضرب بطناج مره ثانية ... وان كنت في
طريق متساوي ما فيه رجه فالعلم والله اعلم عندك مشكلة بالرمانات ... و الحل عند ميزان البادية بالصناعية القديمة يدبلون لك الرمانات ويغيرون الصوف حقات العكوس الامامية ... راح يرجع الدركسون ثقيل شوي كم يوم ثم عقبها يلين و انس موضوع الرجة ...

[ابرق نثيل]

عندك كما يظهر لي شغلتين

اولا: قدام ركب مساعدات شاص 2002 علشان لو تاكل اي مطب ماترج الطاره ابداً وتشوف الموتر ماسك وكانه قطعه وحده

ثانياً : رجة الدركسون على 100 اما تبديل مساعد الدرقسون اوبسبب رمانات العكس كما ذكر الاخوه
وسبب الرجه هو ان الباترول يحتاج الى تشحيم رمان العكوس كل 80 الف
الظاهر ولد عمك ماعمره شحمهم
وعدم تشحمهن يؤدي بدوره الى رجه الـ 100-80 لان الرمانات تاكلن

[صقر20]

كانك بالرياض أسأل عن ميزان البادية وأناخوك
نصيحة محل الورشة بالصناعية القديمة - طريق الخرج
سوري شايب وعياله إثنين وعنده عمال هنود ممتازين بالحيل
الشغله كله ماتاخذ نصف ساعة ولو يطير وإلا يوقع لاتعطيه إلا 250 ريال

[aooa]

تــأكــــد ان دودة الدركسون المثبته على الشاص غير مكسوره

وبعد كذا حلها بسيط اما ترصيص او مساعد دركسون ....

[عاشق البسمه]

طبيعي في الباترول

[سوبر مكشات]

قد كان ياماكان في سالف الازمان
قد كان معي باترول 95


ايييييييييييييييييييييييييييييييييييييييييه الله المستعان
المراد

كان عندي المشكلة هذي وجتتني يمكن 4 مرات
ولها اسباب

1- انا راعي مقامز ومطامر وادخل النفود واتعيجز انسم :وهذا يدمر كل شي بالسيارة

2- ادخل مناقع الماء مسرع واذا شفت اي حارة فيها مناقع واختفت فاعلم انني كنت هناك


اعراض المشكلة: مثل ماقلت رجة وعشان تختفي اما انك تهدي اوتجدع يمين او يسار تروح





حل المشكلة
















































































بعد








جلب الشداد اللي تجيك كانها يدين ماسكة الدفرنس الامامي

تصير مكسورة تغيير الثنتين 300 ريال ولاتغير الا اصلي

وشف عمود الدبل يمكن فيه فضاوة

والكردان وكان الكردان عندي متاكل شوي لاني كنت مااشحم وادخل المناقع واوطي كل شي واقامز

والموتر خدددددددددددددددددددددددددددددددددددووووووووووووم

اتمنى ان الحل يفيدك







-----------------------------------------------------هامش
موتري بعد خدمة 7سنين استشهد في ساحات ................... ووري الشبك في تشاليح الحاير
حسبنا الله ونعم الوكيل
وانا لله وانا اليه راجعون

وان شاء الله انزل موضوع كامل عن قصة الحادث

[almlgof]

كانت عندي
المساعدات الاامي هي المشكله بعد مالفيت على الورش وكل واحد يقول غير مساعد ادركسيون
والي يقول ادوده وارمان والي يقول رصص واوزن اذرعها

واخرىشي وبصدفه اشيك على العضلات الاماميه الا المساعد الايمن به تهريب زيت ويوم غيرته راحت الرجه