وش الراي؟؟؟؟؟؟

[الروقي2]

طير العام بكر خلوي والسنه هاذي طلعته من المقيض وفيه نزاره ووحاشه
حيث طوفته اكثر من اربع ايام وراسه يابس مغير اعطيه نسر صغير ما يذكر-- عشان يركد على اليد
حتى التنقز ما يجي إلى بصعوبه-
هل اشنذره او اعطيه سكر نبات ؟؟؟؟؟؟ علما انه قرنس هدد....
ما نستغني عن اهل الخبره في الصقاره........

[صقر الرحيبة]

السلام عليكم

الله يعطيك العافية اخوي
الصبر زين / انا من راي شنذره واسهر عليه كمن ليلة
وانشالله بيرب
والاخوان انشالله مابيقصرون

[صقار الأسياح]

طير العام بكر خلوي والسنه هاذي طلعته من المقيض وفيه نزاره ووحاشه
حيث طوفته اكثر من اربع ايام وراسه يابس مغير اعطيه نسر صغير ما يذكر-- عشان يركد على اليد
حتى التنقز ما يجي إلى بصعوبه-
هل اشنذره او اعطيه سكر نبات ؟؟؟؟؟؟ علما انه قرنس هدد....
ما نستغني عن اهل الخبره في الصقاره........

اخوي لا تطوف الطير اكثر من يومين متواصله والطير بالليل حط عنده رادو او او قناة الساحه 2 حقت المحاورات خلها تسهره ليله كله وبعدين انقله على يدك واجد وكرر التنقيز بطريقه وحده وزد المسافه شوي شوي واذا كان عديد شنذره بوقت برد

[ربع خالي]

أخوي إن عاند الطير معاك , شل الطير وخذ معاك حمامه ورح يم البر , وإذا صارت حزت هدت الطير , خل الطير على وكره وهو مربوط فيه وخله يشوف الحمامه من غير مايطالها , ويوم بتشوف الطير مجهد على طلب الحمامه ارمها تحته وخله يذبح , ولو معك حمامتين يكون افضل , يذبح الاولى وتعزل عنه بعد مايعلف شوي من الاولى وتعطيه الثانيه بنفس الطريقه , بشرط يكون الحمام ذكر وقوي شوي , وساعتها رح تشوف الفرق في طيرك ,( الطير متى ماذبح ركد سوا قرناس أو فرخ توه مطروح ),,,
تقبل مروري
تحياتي

[@قرناص@]

كثرة نقلة الطير تبعد وحاشيته ..

والصبر مفتاح الفرج ,,

[قرناس شماالي]

عطاك المعلومه الطيبه اخوي /الربع الخالي

[الروقي2]

مشكورين وكلامكم على العين والراس والله لا يحرمكم الخير -
صقار الاسياح
صقر الرحيبه
ربع خالي
قرناص
قناص سكاكا
(((((((( فــــــــــا لكم الخرب))))))

[تمياط]

اخوي كثر من نقل الطير وان شاء الله يركد( والصبر مفتاح الفرج )

[فالح الملعبي]

خذ العلم مني صك برقعه في راسه وخله ثلاث ايام لا يشوف نور ولا يذووق شي وبعدها بتتغير نفسيه اما بالنسبه للشناذه وطير ماطاره انا اشوف انها ماتوفي بالغرض ولا تجيب راسه .
واللي يقول التطويف يضر الحر فان عكسه يضر الشاهين صح بس الحر مايضره

[جـرح الشمـال]

هذا هو البكر طبعه اذا طلع من المربط نزر الله يعينك واستمع لنصائح الاخوان

[الروقي2]

صقار الرحيبه كلامك على العين والراس انا خليت البرقع براسه يومين لكن جاه قمل والطير نزارته اللي فيه هي تخليه حتى يصوم عن العلف وهاذي ببعض الطيور -
الطير ينقل ثنو اللحين والعام بكر خلوي
مشكورين على الردود لا عدمناكم

[جبل سطاع]

ابسألك كيف حاله مع البرقع؟ لان الطير اول مايخرج من الرباط مايطيق البرقع .. ويبغاله كم يوم حتى يتعودعليه .. وهذا شي طبيعي و الطير البكر اشدعصاوه .. وخل البرقع عليه فتره ودهله وخله يعلف على يدك ولا تشبعه .. ولا تعجل عليه وتراه بيركد بس خلك وسيع صدر وفالك صيد الحبارى

[بدران123]

حياك الله اخوي كلام اخونا>>> فالح الملعبي<<< اكثر الصقاره ماشين عليه والطير اذا مرتاح حتى بالنقله على اليد تراه مايركد..

واما بالنسبه للتطويف فيه طيور نطوفها الى 7 ايام وفيه طير وصل الى 15 يوم..

والتطويف يضر الشيهان..

لكن عليك بالنقل المتواصل وطريقة النقل اذا حولك ناس فيه اطفال وانتبه من الاطفال تراهم يغيرون بعض طبوع الطيوور...

بدران

[@السيف@]

الله يركده لك بس وسع صدرك وانقله اكثر اليوم

[شايش الراس]

اخوي الروقي ان طعتني شنذره وبعد ساعتين وره نسر شف وش بيسوي فيك هذا والله اعلم منكبر الشبيكاء وشرط ان يطيح الي براسه بس نصيحه لاتشنذر الا متاكد ان الطير مافيه التهاب ولاهوبناقض بعدته

[الروقي2]

مشكورين جميعا
الطير ركد
وشنذرته اليوم وعطيته صافق حمامه
وان شاالله بتزين طبوعه ونفسه-
علما ان الشبيكاء صغيره لكن بكررها بعد شهر
وفالكم الحباري

[مشبر البران]

الأخوان ما قصروا

[نهار قطر]

لا تشنذر الطير وهو وحش يمكن يصر عليها وتذبحه رببه ودهله
يبي له صبر ويطيح اللي في راسه بس احرص عليه والامر بسيط انشاء الله يالذيب

[ذعذاع نجد]

اخوي الروقي شنذر طيرك وانقلة لا ينزل من يدك وان شاء لله بيطيح الى في راسه



تقبل مروري