قير الجمس ارجو المساعده

[مب لازم]

السلام عليكم ورحمة الله وبركاته

اخواني مشكلتي مع الجمس انه ما يعشق للثالث ومره مايعشق للثاني وتو انا جاي مشى فتره بسيطه بس عادي عشق كل التعشيقات ورد النمره ورجعت المشكله وولعت لمبه الاي بي اس وكلها في نفس الوقت :(
وديته لصناعيه ام الحمام وقلتله انه ما يعشق شاف زيت القير وقال لازم توضيب :confused:
رحت للثاني اول ما قلتله انه ما يغير القير قال توضيب على طول
وانا ما ضنتي توضيب قير لانه وش دخل التوضيب في لمبه الا ي بي اس :confused:
وانتم ادرى بهالامور وابيكم تكفون تفيدوني وتراي مب ذاك الزود يعني ابيكم اذا صار يبي توضيب تعلموني كم يكلف الله لا يهينكم

السياره جمس 94م

[البوابه]

بسم الله الرحمن الرحيم
اخي العزيز

هل القير عادي او امتوماتك

حاول فعل الاتي

افصل البطاريه لمدة 5 دقائق ومن ثم اشبكها وان شاء الله ترجع لان الكوميوتر يضبط نفسه وان رجعت لاتوضب الا بعد التاكد من الكهرباء في السياره انها مضبوطه لان القير الاوتوماتيك كهرب

الشيئ الثاني اطفئ السياره ان كان القير اوتوماتيك ادعس على البريك للاخير بقوه حتى انك تحس انك وصلته الصاجه ثم خلك على الدعسه نفسها للاخير لمدة 3 دقائق او اكثر قليل ومن ثم انتضر 5 دقائق ثم افتح السلف شوي حوالي دقيقه ثم شغل وجرب القير

ان شاء الله يفك من شر التوضيب

[مب لازم]

القير هو تامتيك

وابجرب الطرق وان شاء الله يزين وافتك من التوضيب

ومشكور على ردك

[الدبوس]

القير ماله علاقة بـ Abs ولكن ماذكرت الموديل ترى موديل (95 - 97) يجيلها طواري . حاول تتأكد من الأسلاك ترى بعضها مع المطبات تشكل ، غير الزيت والفلتر .
إذا قرر عليه توضيب (لا تغيره من التشليح) وظبه وأبعد عن السوري واللبناني ، وجب قطع الغيار أنت بنفسك ، وترى فيه ورشه اسمها المعالي مقابل ميزان المجد من شرق (تفتح غرب) وأبعد عن تشالنجر وربعها .

[مب لازم]

اخواني جربت الطريقه الاخ البوابه ولا نفع معه

هو يمكن التماس لانه يزين شوي ثم يخرب يغير عادي كنه ما خرب ثم لا هديت رجع مره ثانيه ولا يغير ويرجع مره ثانيه بسرعه

والموديل تم ذكره في الموضوع 1994م تماتيك

[فتك ابوفهد]

اول شيء افحص كمبيوتر عشان تشوف حساسات القير شغاله والا لا

ثاني شيء غير زيت القير مع الفلتر

مشكلتك في كهرباء القير 100% ولا توضب الا انت متأكد لا يستغلونك اهل الورش اللي ماعندهم ذمه

أهم شيء لاتستعجل

[_ذيب ثهلان_]

افحص قبل ما توضبه

[سوبر VTC]

و عليكم السلام و رحمة الله

اذا دست بنزين
و كانت المكينه تحن
و العزم ضعيف
فالكلتشات حرقانه
او عندك ضعف بطرمبه البنزين
او بواجي تعبانه

شم ريحه الزيت هل هو حرق ام لا ؟

غير الزيت و الفلتر
ثم افتح السويتش و
افصل البطارية

عندنا ورشة العثمان :good:
ببريده
تخصص امريكي

موفق

[الطواشالاول]

انا اليوم مطلع سيارتي من الورشه موضب القير ومثل ما قلت ولعت عندي لمبه الاي بي اس بسبب الترس الصغير والكلتشات عندي محترقه طبعا انا من التفحيط في البر وعلى فكره اللي عندي ونيت جمس 2002 واحسن ورشه القير الامريكي في الجبيل وعندهم فرع في الدمام والاحساء واحسن شي الضمان ست شهور والسعر 2800 اتمنى اني افدتك

[تاهو في صحراء]

اخوي امرك هين انشاء الله
انا اشتغلت لمبة الاي بي اس وعداد السرعه ما يتحرك ابد تحت الصفر والقير مايبدل ابد
اذا كان عداد السرعه نازل تحت الصفر ويتحرك مع التفتفه فهذا بسبب حساس السرعه انا فصلته و رجعته والحمدلله صار افضل من اول وحصلت معي مرتين ونفس الحل. م 99

[مغلي]

الاخ // سوبر Vtc

ممكن توضح بدقه ... كيف يعرف ان الزيت حق القير محروق ولا جيد ... هل يتغير لونه او رائحه معينه

[الوافي0]

شيك على الكمبيوتر انا صارت معي في جمس 97 وحتى الجميح يقول ظفيرة والباقين توظيب واهون واحد غير حساسات وكلفتني فوق 1200 عالفاضي واخر شي طلع الكمبيوتر غيرته ضبط ب600 من التشليح
كيف تعرف اذا ولعت عندك اي لمبة طف السيارة وشوف يعشق معك من اول نمره للاخير كويس واذا وقفت يلخبط ويبقى في الرابع ا و الثالث لا توظب الا لما تتاكد من الكهربة والافياش والكمبيوتر والله لا يخسرك ولا يخسرنا ولا كل مسلم

[salih100]

بالنسبه للجمس موديل 94 ما يجي له كمبيوتر واذا انت بالرياض رح لصناعية الخليج ما ادري كيف اوصفك بس تعالها من جهة الشرق وثاني نافذ يسار طبعا بعد ما تدخل من بوابتها لف معه وامش يمكن 100 متر بعدين يجيك ع اليسار دخله بنفس مبنى الورش هو ع حجاجك الايسر اسمه علي التركي مشهوووور هناك اسئل عنه يدلونك ع طول انا قالولي توضيب وخرابيط هو فحص الموتر وغير حساسات بالقير والحين الموتر له معي سنه ماشي وترا موب غالي ويخيرك بين القطع الاصلي والاصلي سوق

[أبو بيلسان]

وعليكم السلام

اخي العزيز هل غيرت زيت القير من اخذة السياره او الفلتر
المعتلد اذا القير ما يبدل النمر 80% من زيت القير او الفلتر.
والله أعلم

تحياتي للجميع

[الوافي0]

الجمس 94 فيه كمبيوتر للقير مفصول عن كمبيوتر المكينة كل واحد لوحده

[مب لازم]

يوه الموضوع له شهرين:D

والموتر زان والحمد لله بعد ما حطينا فيه 4000ريال :mad:

وانا مغير الزيت مع الفلتر وفحصته كمبيوتر وطلع عندي حساسين خربانات غيرتهن ولا نفع واشوا راعي الورشه نعرفه ورجع القطع ثم قالي ابوي خل نوضب بس ولا يعلبون علينا

ووضبناه كامل مع ضمان ست شهور

والحين القير ما شاء الله :good2:

ومشكورين على الردود اللي ان شاء الله بتنفع غيري

[مشعل 1419]

الاخوة الاعزاء انا عندي شفر 2002 استعمال امريكي حصلت معي مشكلة غريبة
علق القير معي القير فجاه لا فوق ولا تحت وانطفئت لمبة الباركنق وسويت فحص كمبيوتر وظهر عندي 4اخطا وكذالك المفتاح رفض الظهور من مكانه وبعد محاولات انحلت المشكله لوحدها على الرغم انني مسحت الاخطا وهي الاتي 102-178-179-179وهي خساسات كما قال الفني
من لديه معلومه يفيدني وجزاة الله خيرا