هل تعجبك مثل هذه الرحلة ....صوره واحده فقط ...!!! [الأرشيف]

علي العُمري

16/10/2009, 01:58 AM

طلعة ما عليها كلام

الإيجابيات كثيرة ويكفي أنها طلعة وتغيير جو المدينة..ومنها اصطحابكم لكبار السن معكم وهم والله نكهة الطلعات..

أما السلبيات فأنا أعتقد أن المكان منخفض وهناك غيوم .. فلو كان مكان الخيمة في مرتفع لكان أفضل,,
ومن السلبيات لو كان معكم خزان لأراحكم من عناء دبات الماء..
وأيضا قرب مكان الطبخ ولو كان أبعد قليلا عن الجلسة لكان أفضل..وأيضا يلاحظ عدم ترتيب الاواني..

أبا مجاهد

16/10/2009, 01:59 AM

ماشاءالله منظر جميل ويازينه زيناه

لكن اعتقد عذروبها كثرة الجوالين وحلها بخزان الما وكذلك عدم ترتيب العده ووضعها بعشوائيه

وبيني وبينك مايهم اهم شي الى من غلقوا نظفوا مكانهم والسلام

سفير الشمال

16/10/2009, 02:08 AM

السلام عليكم ورحمة الله وبركاته
ياهلا والله بمشرفنا الغالي
ابو محمد (الحر)
أنت خليت فيها سلبيات اللي اشوفه كل شي مكمل ماشاء الله عليكم:good::good::good:
لكن هل الفرشات اللي عليها شنطة العزبه المقلط:)
لك خالص تحياتي وتقديري

((( الحر)))

16/10/2009, 02:19 AM

اخي علي العمري

واخي ابا مجاد

واخي سفير الشمال

الف شكر على مروركم

ولكن الى الان لم تصلوا الى ما اقصد

بانتظاركم

* Storm *

16/10/2009, 02:26 AM

السلام عليكم

الطلعة ماعليـها كلام ليـتني معـكم .. :mad:

بالنسبة اللجو خياااااالي ونفيض ماشاء الله

والله اول شي عجتني النظافه يعني لو تلاحظ ان مافي اي واساخ

والترتيب شوي ملخبط .

والأخطـر الطبخ ! :confused:

خطر جدا الطبخ عند الخيمه وفراش المجلس ؟

والنار مكانه غلط ؟

لان لو هبـت ريح ولا نسمة سحابه بتطير الجمر على الفرش

يعني لو انكم تخلون الهواء على ضهوركم وتفرشون كان زين

والله يوفقكم بالطلعه

ثعول نجد

مقلع الرمث

16/10/2009, 02:35 AM

ياسلام على هالاجواء والله حلوه الله يجيب ايامها

من السلبيات اتوقع كثره الفرشات اللي مالهاش لزمه

بعدين الجوالين

واتوقع الخيمه بابها شمالي او ماشابه فقط

طحنون

16/10/2009, 02:47 AM

بالنسبه لعدد افراد الرحله جدا مناسب حسب من هو ظاهر بالصوره وأعتقد المصور الخامس
لان الكثره في الرحلات لها سلبيات اكثر من الايجابيات وأختلاف الاذواق والراي
لاكن أسلوب المكان وترتيبه لك عليه شوي
وهاذا يدل على عدم التعاون فيما بينهم في الترتيب ( نفسي نفسي ) وأخدم نفسك بنفسك
أتوقع هاذا شعارهم في هاذي الرحله والاتكاليه المفرطه

شغلهم حوسه ماعجبني ابد حتى وقفه السياره غلط والطبخ غلط ريحه الطبخ تخرب مزاج اللي جالس
اتوقع يبيلهم سوفت وير
هاذا الكلام الصريح مره واذا تبوق كلام ثاني ابشرو
لاكن الجو عزالله انه ماينتفوت ابد

محمد----

16/10/2009, 02:49 AM

ما شاء الله على الطلعة الطيبة والله يجمعكم على طاعته
اعجبنتني الخوة ورضاء الوالدين
الملاحظة عندي هي اللي الى نازل من الونيت اعتقد اذا ما حد انتبه له او رفعه من الارض راح تنتهى المطارة
الشء الثاني
الجالون الأخضر شكله قاز ممكن الشايب يغلط ويغسل يديه منه :j

الانبوبه معرضة للشمس

ذيب عالية نجد

16/10/2009, 02:55 AM

الإيجابيات يكفيك الجو والمكان الزين والنفود الممطور
السلبيات الحوسه وعدم الترتيب والمفروض ترتيب الفرش والعزبه بعد القومه من النوم قلي بالله لو جاكم ضيوف أو واحد تايه وش بيكون موقفكم

straitlaced

16/10/2009, 03:02 AM

السلام عليكم

ألي اشوفه أن الخيمه ماهي مبنيه عدل مع أدنا هبة هوى قوي راح تلعب

ألشي الثاني هو الرجال المقبل على ربعه والفرشه الي في قفاه أغراضها متنثره

والله أعلم
وتقبل مروري

VIP-503

16/10/2009, 03:02 AM

مشاء الله تقبل مروري

متابع بصمت

ههههه
تحياتي

جمـر الـغـضـى 11

16/10/2009, 03:05 AM

ماشاء الله على الجو والله هالطلعه شكلها طيبه وذكرتنا بطلعاتنا حوسه ولخبطه وكثر دبات الماء هههه ملاحظاتي مثل ملاحظات الاخوان لكن اشوف كرسي ورا العزبه لو مبعد مكان الطبخ والنار شوي عن الخيمه والقعده وجايب هالكرسي الصفط وجالس عليه وتطبخ .. :)

skaka1426

16/10/2009, 03:08 AM

ملاحظة الخيمة منصوبة دون الإستفادة منها في شيء العزبة والفرش والأغراض كلها برا ،،،،،،، الله يستر لو يجي مطر يبون ينحاسون:d

من متى

16/10/2009, 03:12 AM

ياسلام والله طلعة ترد الروح الله يعجل بالخير ..

ما اشوف من السلبيات الا كل العزبه والفرشات برا ..

تحيتي لك

ذيب الداهية

16/10/2009, 03:12 AM

يعطيك العافية أخوي محمد موضوعك جد رائع
الظاهر والله العالم توهم منزلين العفش وداقين الحيمة بدليل الرجال الي واقف في يمين الصورة يشد الرواق

سلبيات
عندك جراكل الماء هذي مالها داعي منطله في كل جهة يجبون لهم من البراميل الكبار وصلى الله وبارك
الشويب الي جالس يحوثر عند مشب النار شكله بردان:no2: المفروض جيبن معه فروته !!
شف فيه واحد معلقن شرباته على حبل الخيمة غلط :no2: لو يجي هواء ويطيرهن !!
أغلب الكشاته اذا طلع للبر يترك باب السيارة مفتوح غلط :no2: مما يؤدي الا دخول الغبار والأتربة للطبلون
مثل الي في الصورة تاركين باب الهايلكس مفتوح !!
شف الزوالي الي مجدعه ورى الخيمة غلط :no2: نزل الي تحتاجه لو جى مطر فجاءة انحاست الدنيا
ناظر الجو فيه خيال المفروض يسون جالستهم جو الخيمة لآسمح الله وهبت رياح وأمطار قوية ولاهم في مأمن داخل الخيمة ..
بس وسلامتكم

أيجابيات
يزين جوهم

magoode

16/10/2009, 03:29 AM

طلعه ولااحلى

والجو كلااااااام ..

أبا مجاهد

16/10/2009, 03:31 AM

الشايب وده يشب الضو بالقرب من البطانيه

<<بالمناسبه الواحد اذا كان فاضي تجيه فلسفه غير طبيعيه

ذيبان حريملاء

16/10/2009, 03:32 AM

هلا فيك أخوي

الآخوآن مآقصرو فى توضيح آلسلبيات والأيجابيات

تشرفت بمروري من هنــا

فرغالي

16/10/2009, 03:56 AM

ماشاء الله الوضع صح بس فيه مشكلتين
1-الجو غيوم يعني لو نزل مطر مايمديكم تدخلون العفش والخيمه مافوقه شراع
2- موقع السيارة فيه خطوره لو سمح الله دحدرت

وشكرا على الصوره الجميله

الناب

16/10/2009, 04:08 AM

وهل هو في أحلى من التخييم
في أرض صحرى وشيل وحط ونصب خيمه 4*6

وتنزيل أغراض والفرشات وشيل السرندل إلي يقص الظهر

أما أحيل أغلب الشباب ما عاد يعترفون بمثل هالرحلات
كلهم همهم أنهم يقولون رحنا الصمان وشفنا الخضار
وفي كل فيضه ما ياخذ له نص يوم

جميل التنويع والأحب إلى قلبي التخييم في أرض جردا قفرا
ونصب الخيم وإلخ

الله يبارك فيك لكن ربعك إلي في الصوره ينقصهم ترتيب أشوي
موفق خير
أخوك
بن فهد

جـرح الشمـال

16/10/2009, 08:01 AM

ماشاء الله جو حلو
والاخوان ماقصروا بينوا السلبيات

العماري10000

16/10/2009, 09:42 AM

الإيجابيات يكفيك الجو والمكان الزين والنفود الممطور
السلبيات عدم الترتيب والرجال اللي قاعد قدام الشايب ليه مايشتغل والشايب الله يطول بعمرة قاعد يشب النار

قاصد الصمان

16/10/2009, 10:08 AM

لاتعجبني مثل هذه الرحلة

فما احلى من الرحلة الخفافية في كل شي

وهذه الرحلة فيها :

من الايجابيات :

حسن اختيار المكان ،الاجواء الجميلة ، وجود خيمة في مثل هذه الاجواء ، العدد منا سب للرحلة ، شبة النار

السلبيات :

خيمة غير منا سبة في حجمها للعدد لكبرها، كثرة الحوسة (دبات ماء ، الفرشات كثيرة بدون داعي لها ، العفش كله منثور على الارض مما يصعب ترتيبه ويحتاج الى سيارة دينا لنقله، اسطونة غازكبيرة (ممكن الاستغناء عنها باحد الدبات الصغير المتوفرة ) خصوصا وان القدور اللي معهم صغيرة الحجم .

معدي المرقاب

16/10/2009, 10:12 AM

حلوه مشااء الله يسدك هالجو ينسيك كل شي ..........وهم شي ان المكن يكون كما كان

ذئب الدهناء

16/10/2009, 10:24 AM

السلام عليكم

السببيات منها

كثرت العفش

سياره واحده وهايلوكس

الخيمه حجم عائلي

المكان منخفض والجومطير

الايجابيات000000000يكفي انها كشته

العزوم

16/10/2009, 10:44 AM

انا اتوقع قصدك التخييم في مكان واحد والاستمتاع بالمكان حوله خصوصا في النفود عند المطر
وهذا حسب الاشخاص في الرحله اذا كان معكم كبار سن مثل اللي في الصوره الله يمتعه بالصحه والعافيه
فهم يتعبون من كثر التنقل بالسياره في البر ويكفيهم شبة النار والسوالف عن الماضي ووصف ماكانت عليه الارض والصيد الموجود فيها الخ

تحياتي

المتحـ2007ـد

16/10/2009, 10:53 AM

الطلعه خباااااال مع هذا الجو وش خليتوا

ما شاء الله عليكم

وصوره تغني عن الف صوره

يكفي الجو والارض توها ممطوره تغطي عن كثير من العيوب اللي ذكروها الاخوان

كل الشكر لك اخوي والله يعطيك العافيه

العتل

16/10/2009, 11:32 AM

الخيمة ليش مبنية مادام جميع الفرشات والاغراض منثره في الخارج

ساري_1

16/10/2009, 11:40 AM

عدم الترتيب في الجلسه

العزبه وضعها غير منطقي في كل مكان والجيكات يمكن في جيك بنزيم قريب منهم

وتقبل مروري

عاشق سماسم

16/10/2009, 01:40 PM

الرحة ماعليها كلام
ولكن السلبية هي ان باب السيارة مفتوح والمبة والعة
وهذ يؤدي الى ان بطارية السيارة راح تنتهي لانهم في
النهار ولا يشوفونه

عاشق السيل

16/10/2009, 01:46 PM

أنا ما أشوف إلا سلبية وحدة بس : عدم الترتيب !!

والباقي كله إيجابيات ،، ومسألة إن العفش برى هذي هي الوناسة أحسن من حجرة الخيمة !!

حتى جوالين الماء طبيعية إذا ماتوفر تانكي أو خزان ماء كبير !!

ومسألة إن الخيمة كبيرة والأغراض كثيرة فهذي طبيعية لأن بعض الناس يكشت مرة بالسنة وإذا أعجبه مكان مايغيره إلى الرجعة ،، وأنا متأكد إن العدد أكبر من كذا وعسى الله يهنيهم ويوفقهم .....

قناص666666

16/10/2009, 01:48 PM

السلام عليكم ورحمة الله وبركاته :
واسعد الله اوقاتكم بالمسرات .
صراحة لقطة رائعة وجو أروع ماشاء الله ---- لكن اللي لاحظة كثرة جراكل الماء والظاهر ان كل واحد جاي بجركله(نفسي نفسي) أيضاً المراكي جايبينها على عددكم !!!!! كما يضهر لي بالصورة . ولاننسى الفرشات خاصة اللي من ورا الخيمة :d:d:d بس قلي وش خانة فرشها خلف الخيمة !!!
أما الشيئ اللي اعتقد انه خطاء فهو وضع السيارة المائل الذي يمكن ان يتسبب في رجوعها للخلف والتسبب بمشكلة بالخيمة انتم في غنى عنها .
وأخيراً اعذروني على الإطالة وتقبلواااا مروري.

محمد عبد القادر

16/10/2009, 01:50 PM

الايجابيات كثيرة ومعروفة لكن السلبية الوحيدة هي الفوضى الظاهرة في الصورة لكل شيء تقريبا.

راعي طفات

16/10/2009, 01:58 PM

أتوقع طريقة بناء الخيمة خاطئ

الرواق ناقص

ابوخالد38

16/10/2009, 02:02 PM

السلام عليكم ورحمة الله وبركاته

الله يعطيك العافية رحلة موفقه ماشاءالله ربع نشاما ومكان روعه وجو خيالي وفيه ملاحظة وحده فقط
ما خذيتوني معكم بس والبر حلاوته فيه نوع من الفوضى البسيطة جدا بحيث لا تترك اي اثر سلبي على الاشخاص او اذا وجد جيران ولا يقل اهميه المحافظة على المكان كما كان ان وجد نظيفا او حصل تنظيف على السريع ترى حنا اهل الوسطى مالنا غناة ولا لنا غير البر

تقبل مروري المتواضع

شاص2001

16/10/2009, 02:02 PM

ماشاء الله تبارك الله طله مايختاج كلها ايجابيات
وتقبل مروري

مشعل العيسى

16/10/2009, 02:06 PM

الرحلة والصورة كلها تمام وماشاء الله تبارك الله وحاولت ادور سلبيات مالقيت ... ولو الواحد يقعد يدور سلبيات كان ضاعت متعة الرحلة ..

ودي والله اسير عليكم واحب خشم الوالد وامشي ... الله يخليه لكم ... يطول عمره على طاعة الله ...

الشقردي 449

16/10/2009, 02:38 PM

ما أقول ألا الله يهنيكم على هالطلعه الزيييينه--
أما السلبية فهي بالماء لو خليتوه بجركل كبير أو تانكي في السيارة
تقبل مروري

الوافي

16/10/2009, 02:43 PM

يعطيك العافية
1-إجابياتها وجود الشايب الله يعافيه
2-وجود الخيمة الكبيرة
3-وجود الرفقه وأهم شي الطيبه
أما السلبيات:
1-عدم وجود الجيب
2-عدم وجود شبك الطائرة :D

مشعل_1001

16/10/2009, 04:44 PM

يمكن السلبيات عدم الترتيب
او ان الخيمة مافيها فرشات

الشمالي3

16/10/2009, 05:06 PM

يالبى قلبك والله هيضتنا والله اني استانس لا شفت النساما شرواكم كاشتين

تحياتي لك

ذرب سدير

16/10/2009, 05:17 PM

ما أقول غير الله يسعد هالرفقه الطيبه

خوّتن تشترى بمال قارون .. إي والله

م.بندر

16/10/2009, 05:30 PM

ماشاءالله تبارك الرحمن
باصطين بحراج المقاصيص
ههههههه
لا يعلا عليه ابد
جو حلو
وخوة نشاماء شرواكم
لكن يعاب عليكم كثرة القش
شكل راعي العزبه ماسكه تنضيف فال العزبه فل
الله يهنيه

جلستكم جهة الشمال

رحآل الجنوب

16/10/2009, 06:42 PM

رحلة بنظري رآئعة جداً ..

شاهين ليبيا

16/10/2009, 06:53 PM

الإيجابيات كثيرة ما شاء الله رحلة موفقة،،،،ولكن السلبية الواضحة في هذه الرحلة عدم ترتيب الأمور مما لايلزم

MrDolphin

16/10/2009, 06:54 PM

الرحلة عيبها الوحيد أني ما كنت معكم :)

الف شكر أخوي على الصورة الأكثر من مميزه

تقبل مروري وألف شكر

مجاهيم

16/10/2009, 06:56 PM

السلبيات ... خيمتكم أطنابها واجد.
الإيجابيات.. الجو جو كان بعض العرب جو... وإن كانهم ماجو مازان جوي
جمعتكم الحلوه والأحلى اللي يخدم اخوياه.

الكونترولCONTROL

16/10/2009, 06:57 PM

الإيجابيات : سعة الصدر والنظافة
السلبيات : تراكم العمل و تناثر الأغراض

سعد ناصر

16/10/2009, 07:04 PM

مساء الخير للجميع ..
اولاً : يبدو لي ان الربع مخيمين والتخييم ما ينفع له دبات الماء المنتشرة بكثرة .
ثانياً : الخيمة لم يتم الاستفادة منها لأن العزبة والعفش كلة برا الخيمة , والخيمة فاضية يعني يمكن الاستغناء عنها ( وجودها مثل عدمها ) .
الربع يبدو لي انهم منهمكين في العمل لانهم كثيري التنقل ويبدو عليهم عدم الاستقرار .
الربع مشغولين بعمل لكن ماهو هذا العمل الله اعلم .
على العموم خروجهم للبر بحد ذاته عمل ايجابي .
وتقبل مروري .

وادي الريمة

16/10/2009, 07:07 PM

ماشاء الله رحله رائعه جدا خاصه بانها في هذا الجو الاكثر من كايف متى تكرر وانا اخوك هذه الاجواء الله يجيبها
بس فيه نقطتين وهما دبة الغاز لو بدالها دوافير اثنين كان احسن والخيمه لو فوقها شراع عن المطر لان شكلها تخر المطر وشكل عفشكم كله رطب من المطر وطلعتوه عشان ينشف .
والي يقول مكانكم خطر من المطر عشانه منخفض اقول غيرصحيح لانكم في النفود .

والله يكرر هذه الرحله مره ثانيه واتمنى لكم التوفيق دائما وسلامتكم

ابو نايف التميمي

16/10/2009, 07:12 PM

ياسلام على هالاجواء.. تنسيك التعب

بما نا الرحله تخييم..جراكل الماء المفروض مايخذون معهم الا حق الشرب والطبخ..وياخذون لهم جركل ولا اثنين كبار وتجلس في صندوق الموتر..وينزلون منه لي بحنفيه وخلاص.. الفراشات المفروض انها داخل الخيمه..وبرا ياخذون لهم فرشات صغارحقت الجلسه حول النار تنباع في المحلات..الغاز الكبير متعب.. ياخوذن لهم دبتين صغار احسن..الخيمه كبيره.. الحين فيه خيام اصغر في الحمل واسهل في نصبها ..وياليت من كان معهم في هالجو

ابولولو

16/10/2009, 07:16 PM

اخوي الحر اسعد الله مساك بالخير والمسرات
انا اشوف كثير هي السلبيات
1- كثر الفرشات وكبرهن والبديل مقاسات صغيره عرض تقريبا 80سم في امتر وخمسين سم

2-كثردبات الماء والبديل ماء 100لتر او200لتر حسب الحاجه
3-الحوسه والعفش منثر بي كل مكان
4-الخيمه اتوقع انه نازله شوي وادري ان الرمل يشرب الماء بس الرفع ازين وانت ابخص ياخبير
5-توزيع الفرشات بي كل مكان وهاذي سلبي لو امطرت عليكم بحلتوا بظف العفش وكثرهن
6-واخيراالشراع الازرق ظروري فوق الخيمه لاتخرعليكم والخيمه يبغاله شد رجال وانتم ارجال
7-واخيرا تحملنا لانك فتحت لنا باب السلبيات ورحلات جايه احلي اخوك الصغير ابولولو

H5N1

16/10/2009, 08:19 PM

ماعندهم حطب !!!!

جمران

16/10/2009, 08:40 PM

الحين له اربع سنين وتوها تطلع
اتوقع المخيمات دائما اغراضها كثيرة ولابد منها (ولايقصر عليك شيء )
خاصة اذا كانت بعطلة الحج :cool:
أما انا لاتعجبني المخيمات اطلاقا فانا مغرم بتغيير المكان وعدم الجلوس فيه
كثيرا
الحوسة تصير أحيانا بس لايصير معك تنبلي من هواة التسدح :eek:

راعي بيشة

16/10/2009, 08:41 PM

الصورة أبداً .... أبداً ...... ما أعجبتني

إنما اشعلت في صدري الرغبة لتلك الرحلات ، والسمر ، والسوالف ، والنشيد ، وخدمة المطاليق ، شروا خوي الحر

إن زان وقتي خذت لذة فواقة ..... إلخ الأبيات

بالنسبة وش زان لي في الصورة أو شان فما دققت المهم الصورة جناااااااااااان

.

جمران

16/10/2009, 08:45 PM

الفكرة جدا راااائعة يبو محمد بطرحك للصورة وسؤالك عليها
الله يرزقك الجنة

وسم 29

16/10/2009, 09:11 PM

من سلبيات التخييم أنها تربطك في مكان معين وعدم تغييره إلا بصعوبة
فالبعض يفضل الفطور بمكان والغداء بمكان آخر والنوم بمكان
أما الإيجابيات فلا تعد ولا تحصى ...
وشكرا لك على طرح هذا الموضوع

الاصلي

16/10/2009, 10:43 PM

ماشاءالله منظر جميل ويازينه زيناه
الايجابيات واجد
والسلبيات وحده وهي اني منب معكم
الله يوفقكم

((( الحر)))

16/10/2009, 10:49 PM

والله اني توهقت .... من جد والله يالربع توهقت..:j

حشاء من وين طلعتوا انتم .... صراحة انصدمت بالردود..:no:

انا حطيت الصوره وطلب سلبياتها وايجابياتها ... وكنت اتوقع ان الموضوع بسيط

مادريت اني دخلت بالمكان الغلط ..:p

عزالله اني نشبت..

اثركم ناس تفصفصون الصوره وتطلعون اشياء ماتوقعتها ... ولا شفتها الا يوم ذكرتوها..:confused:

عموما .... الى ان اطلع نفسي من هالمازق .. انتظر باقي ردود واراء الباقيه

ولا اوصيكم ... زيدوا الطين بله
وزودوا مع الحمى مليله

straitlaced

16/10/2009, 11:08 PM

من ناحية السلامه الرجال الي يشد الطنب في قفاه القدر

لو يسنى ويرجعا ورى راح يطيح ويحترق لا قدر الله

هواوي

16/10/2009, 11:35 PM

اقووووووووووول

والله ما يعيبها شي

الا واضح ان الجو روعه وخيالي

وان الارض ممطوره

وان الشله حقين وناسه وخبرا لانهم كبار في السن

ومثل ما قال احد الاخوه

عيبها اننا ما حنا معهم ونتمتع بذا الطلعه

اتخيل ريحة الحطب في ذا الجو وخاصة بعد المطره

كثر لنا من ذا الصور تر لها نكهه غير

مرقاب الشرق

16/10/2009, 11:44 PM

الله اكبر الجو خيالي تصدق عاد توي جاي من المخيم وتونا طقينا الخيمه مثل هذي بس ناقصنا الجو الله يجيب المطر.

صقرحايل

16/10/2009, 11:58 PM

ماشاء الله تبارك الرحمن
كل شى على اكمل وجه

alsat3

17/10/2009, 12:31 AM

السلام عليكم ورحمة الله وبركاته
هلا وسهلا باستاذنا الفاضل
ابو محمد
بصراحة الصورة جميلة ورائعة سلمت يمينك عليها
يازين الجمعه ويازين البر
الصورة رائعة بس انا احب التغيير والتنقل ولا ارتبط بمخيم
لك تحياتي وتقديري

الوعد البراري

17/10/2009, 01:27 AM

مجملها جميل جدأ

السلبيات الشراب معلق على الخيمة
ا

أبرق الشيوخ

17/10/2009, 09:14 AM

كثرة الكشششششششششششششش !!!!

PATROL

17/10/2009, 09:25 AM

باختصار السلبيات هي الحوسه وعدم الترتيب!
تقل قش.......... :d هههههههههههههه

القنـاص2008

17/10/2009, 09:34 AM

نعم انا مع الاخ علي العمرى في كلامة تقبل مرورى

فنجال

17/10/2009, 10:15 AM

كل شي تمام
ومحلات التاجير ريحت العالم ..فلوسك تخدمك ...فرشات... خيمه... ماطور.... وكل شي ..واسعارها مناسبه
تحياتي

عزيز نجد

17/10/2009, 10:27 AM

يالله حيه وحي الجميع

اولا : انت هيضتنا بهذي الصورة اللي تذكرك بالمطر والخير
ثانيا : الفكرة جميلة والدليل ان الكثير بدأ يبحث عن السلبيات اللي ممكن انه يقع فيها هو بدون ما ينتبه.
الشيء الثالث :
هو السلبيه : تعليق الشريريبات على طنب الخيمة ( اتوقع انها مخيسكم من الريحة):)
ويعطيك الف عافيه

ابوسعودد

17/10/2009, 10:40 AM

ماشاء الله تبارك الله

راعي الطلعات

17/10/2009, 10:54 AM

ما اقول غير ما شاءالله تبارك الله

طلعه طيبه ومباركه ماشاءالله

والايجابيات فيها كثير

السلبيات يمكن بس في ترتيب المكان

والخيمه كبيره شوي واحس انها متعبه على اربعه او خمس اشخاص بأعتقادي

بس رحله و موقع جدا رائع

الله يعيدها عليكم بالخير والبركه وعلى الجميع كذلك

مسافر مكشات

17/10/2009, 10:57 AM

طلعة موفقه وممتعه

ابو عبدالكريم

17/10/2009, 11:33 AM

الصورة ما عليها كلام ..

كل شئ زين ،، والطلعة اللي ما فيها دعثه وكركبه وحوسه ما هي بطلعة ..

اللي يبي الترتيب لا يطلع يقعد يرتب ببيته احسن له ..

الشغلة والمقصد تغير روتين وقابله لجميع الافكار والتقليعات ،، حتى اذا وجد سلبيه لا يعتبر سلبيه ..

والمجموعة باين عليهم انهم قروم وفاهمين لبعضهم البعض ومحترسين لاي طارئ وما عندهم خلاف .. ما شاء الله عيني عليهم باردة ...

((( الحر)))

17/10/2009, 01:10 PM

ماشاء الله تبارك الله

الله يعطيكم العافيه

الصراحة تفاعل اكثر من رائع مع الموضوع

وهذا ماعودتمونا عليه احبابنا الكرام

لازال هناك كثير من السلبيات .. وقليل من الايجابيات التي لم يتم ذكرها نتمنى ان نرى ردود جديده ..

وبعدها سوف حصر الموضوع وتفنيده بما يتناسب مع تفاعلكم الكبير ... ان شاء الله.

شكرا للجميع .. ولا زلنا بانتظاركم.

طلعة بر

17/10/2009, 01:24 PM

ما شاء الله الله يوفقكم ان شاء الله
من ناحية الطلعه
بقول رائيي بكل صراحه :d ارى انه صواب لكن يحتمل الخطأ
الايجابيات
1- اختيار المكان للتخيم.. مهوب شعيب او منقع او مجرى سيل بحيث لو جاء مطار ان شاء الله الارض بتشربها بحكم ان الارض مثل الطعوس
2 - الاهتمام بدفن ارضية الخيمة
3- وقت الرحلة في هذا الجو الرائع
4- وسعتوا صدر هالشايب بالطلعه هذي ... الله يخليه لكم
السلبيات
1- الترتيب العام عشوائي لو كان هناك تنظيم بتنشرح صدوركم اكثر للجلسه ..
2- عزبة الطبخ منطله في اكثر من موقع لو بغيت تطبخ.. كل شوي بتدور غرض.. لو تكون العزبه والمعاميل قريبه من الغاز وداخل الخيمة بيكون افضل.
2- في هذا الوضع الاغراض معرضه للضياع داخل الرمل او الرياح القوية...
3- مثل ما قالوا الاخوان كثرة الجراكل الصغيره وعدم الاستفادة من الخيمة.

a1Ruwais

17/10/2009, 03:13 PM

موضوع جميل
بارك الله فيك

الدرب البعيد

17/10/2009, 04:10 PM

الشي الغريب والسلبي الملاحظ
مستلزمات الكشته كثيره على افراد الكشته (خيمه بعامودين لاربع اشخاص )!!!!
وايضا الجو يتضح لي انه ماطر واغرضكم متناثره
الشيء الايجابي:
الجو الرائع

ابولولو

17/10/2009, 05:18 PM

تذكرت اضافات بقولها :D
8-كبر الخيمه علي5اشخاص اشوفه سلبيه لان كثر العفش وخاصه الخيمه الكبيره تاخذ مكان علي حساب باقي العفش وثقل عليكم والسياره
8-الرحله والحوسه كوم وتعليق الشراب الله يكرم الجميع كوم:D الشيبان واجد بالرحله وهم حلوه كل رحله وطلعه وهذي اضافه جديده

الاداري

17/10/2009, 05:23 PM

الحر

الشباب ما قصرو

باقي عليك تقول وش السلبي الى الان الشباب ما قلووه

جبل عبلان

17/10/2009, 05:50 PM

اولاً ماشاءالله عليكم جو جميل وارض نظيفه
ج/لاتعجبني مثل هذا الرحله
الا اذا كانت الرحله عائليه
ج/الملاحظات على الصوره

http://up4.m5zn.com/9bjndthcm6y53q1w0kvpz47xgs82rf/2009/10/17/07/h7k7stg1y.png

ج/ الخيمه كبيره حقت عرس والزوالي كثيره
الحركه نشطه ولايوجد شباب ولاحطب في الصوره
والطلي مدري وينه
ج/ الايجابيات
الجو و المكان وخوة الرجال والترفيه عن النفس
والسلبيات كثرة الاغراض ويكفي منها
خيمه صغيره
دله قهوه وابريق شاهي و تمر وحطب وبرميل ماء وفرشتين و مسحاه
وقدر وصحن وطلي وطبعا اغراض القهوه والشاهي والطبخ
اغراض يشيلها صندوق واحد فقط . عشان مايصير تبذير ولاكلفه
وكثرة الخويا يفقدك الاستمتاع بالطلعه و الهدوء
تحياتي

سيف السيف1

17/10/2009, 06:54 PM

ما تعجبني لعدة أسباب
الإيجابيات الجو الرائع فقط
السلبيات كثيرة ثمان زوالي كثيرةتحتاج سيارة لشيلهن,, عفش كثير غير مرتب وشكل كل واحد جايب معه عزبته ... والدليل كثرة مطابيق التمر :D دبة غاز 25 مالها داعي جراكل الماء كثيرة والواضح في الصورة أن الهايلكس فيها تانكي ماء :no: خمس مراكي مالها داعي يكفي الفراش إذا طويته تستفيد منه كمركى ,, خيمة عمودين كبيره عليهم؟؟ مع ها الجو الخيالي ما شبت النار وهذا دليل أنهم قايمين متأخرين .. شكلهم واصلين المكان ألي هم فيه متأخرين بالليل تعشوا وناموا وخلو الدرعى ترعى ...
الله يعينهم على شيل العفش وترتيبه

فيصل التميمي

17/10/2009, 10:40 PM

الطلعة تفتح النفس ولكن يعاب عليها شي واحد وهو كثرة الاغراض والتكلف الزائد في بعض الرحلات

طير ماوان

17/10/2009, 11:53 PM

هلا بالحر
ماشاء الله
http://up4.m5zn.com/9bjndthcm6y53q1w0kvpz47xgs82rf/2009/10/17/07/h7k7stg1y.png
هذي الظاهر 60×1
يعني ستين كشتة في صورة بعض الأشياء تبدو لي غير طبيعية وتوزيعها عجيب
الأشخاص وأحجامهم وحجم الخيمة والسيارة بدون أثر وأشياء كثيرة
المهم أعتقد ان الصورة مركبة أو مدخل عليها أغراض ليست موجودة بالصورة الأصل
وهذي السلبية الموجودة في هذه الكشتة
أما إذا كان غير ذلك فالحوسة طبيعية وهي أحلى مافي البر والكشتات
سلامي لك

محمد اليافعي

18/10/2009, 03:56 AM

انا في رأيي ان في اغرااض كثييييرة مالها داعي وفي تكلفة كبيرة يعني هم خمسة اشخاص ولو قلنا عشرة اشخاص الاغراض تكفي اقل شي عشرين شخص يعني مالعها داعي وغير كذا الشباب ما قصروا هذا كل الي عندي .
ومشكور اخوي الحر على الطرح

رحال نجد1111

18/10/2009, 08:41 AM

منضر مااحلاه

abo tamem

18/10/2009, 03:24 PM

الصراحه حلوه وباين انه شيل وحط :d

بس ناقصه الترتيب

almlgof

18/10/2009, 03:51 PM

متابع الله يعطيكم العافيه

مرقاب الشرق

18/10/2009, 10:11 PM

روعه روعه

السلبيات:
الزقرت مستعجلين نثرو العفش وراحو يطعسون مايلامون جو خيال . اجل خيمه 5*8 وعفش وكومه مراكي لاربع اشخاص

ابو نووووره

19/10/2009, 12:44 AM

متااااااااااااااااااابع

hsht

19/10/2009, 01:31 AM

الجو رائع وجميل ولايوصف ولكن هناك بعض الاخطاء وهذه وجهة نظر فقط ومنها ..
1- كثرة العفش بدون حاجة مثل الزوالي
2- الخيمة كبيرة على 4 اشخاص وفكها وتركيبها غثيث كما هو معلوم
3- الموقع غير مناسب لانه في اعتقادي نازل (طامن)
4- كثرة جراكل الماء ولو كان واحد كبير افضل خصوصا معكم وانيت .
5- مكان الطبخ في الخارج لايصلح خصوصا مع تقلبات الجو ولو كان داخل الخيمة كان افضل في الذرى
6- لايوجد اثر للنار والحطب!!!!
واهم شي النظااااافة اوصيكم ونفسي بالنظافة لان مثل هذه الاماكن النظيفة حرام تكون مرمى للنفايات.
ودمتم سالمين

][ســهم][

19/10/2009, 02:08 AM

طلعه روعه ماشاء الله

فيها سلبيات بسيطه
مثل كثرة العفش ومكان الطبخ

الشقردي 999

19/10/2009, 05:51 AM

سلبيه
لازم يكون معكم سيارتين ع الاقل:rolleyes: :no2:

ابو باسل

19/10/2009, 10:53 AM

الله يعطيك العافية على الصورة المتميزة
كلها ايجابيات
فيه سلبية واحدة وهـــــــــــــــــــــــــــي

اني ما خويتكم :cool:

حزماوي

19/10/2009, 12:12 PM

من ابرز السلبيات في نظري

كثرة استخدام البلاستيك من جراكل ماء وغيرة

نوض السحاب

19/10/2009, 01:09 PM

صوره عن الف صوره :good:

مكشات414

19/10/2009, 01:23 PM

الله يعين اللي يضف هالحوسة ...

ابو عزيز1961

19/10/2009, 02:17 PM

اعتقد ان لو تاخذون معكم رواق زايد وتدقونه قريب
وتحطون كلش وراه واذا بغيتم شي خذوه
وتكسيبون جلسه مرتبه لاتخدش المناظر الحلوه
وبالتوفيق

طحنون

20/10/2009, 12:12 PM

البطر1ن

20/10/2009, 12:46 PM

الصراحة يوم شفت الصورة طراى علي ريح المطر وخنقتني العبرة :(

غليص 506

20/10/2009, 12:54 PM

ماشاء الله في غايت الجمال .. الله يجيب الشتاء..

((( الحر)))

20/10/2009, 01:29 PM

طيب السؤال
حنا الحين كتبنا اللي عندنا وأستفدنا من اخطاء غيرنا واستفدنا من تعليقات وردود بعضنا البعض
وبعدين ترى لو يدرون عن اللي صار لهم في المنتدى راح يجيلهم احباط ماراح يكشتون مره ثانيه
من اللي جاهم ويمكن ان فيه واحد منهم حسه قلبه ان اعضاء المنتدى انتقدوهم

هلا باخوي طحنون
الصراحة اني حطيت الصور لهدف ... ولكن بعد هالردود والفوائد التي حصلنا عليها جميعا .. صار الهدف الي اقصده ثانوي بالنسبه لتفكير كثير من الاعضاء ماشاء الله عليهم..

تصفحت الردود واحد واحد وطلعنا بايجابيات وسلبيات كثيره ومهمة سوف الخصها باذن الله في القريب العاجل.

اما بالنسبه للي بالصور .. فهم الى الان .. لم يطلعوا على الموضوع ولم يعلمو ا عنه ..

وسوف ابلغهم عنه لاسمع وجهة نظرهم .. بعضهم سوف يكتبها هنا لانه احد اعضاء المنتدى والباقي سوف انقلها اليكم...

تحياتي

العميد ابواروى

20/10/2009, 05:15 PM

خطيرررررهـ

تسلم والله

رفيق الأمل

26/10/2009, 12:55 PM

:good: :good: :good: تسلم ياخوي وشوف ولا يهمك شي لا ترتيب ولا تعديل ولا خلافة اهم شي انكم وصلتو بالسلامة ووسعتوصدركم وحققتو امنيتكم وفتحتو جوكم وخلوها راحة على بيالة الشاهي

برنس البر

26/10/2009, 02:54 PM

الله والله تشرح الصدر يعطيك العافيه

برق بريده

26/10/2009, 03:19 PM

السلبيات ..لايوجد الترتيب

والايجابيات ..روعه الموقع والحيويه بينكم

ولكن كل هذا ما يهم بقدر منهم ربعك بالنسبه لي

نفود الطوقي

26/10/2009, 04:33 PM

فيما ذكره الاخوان كفاية

MEHWAR

26/10/2009, 04:36 PM

والله الطلعة ممتازه

والجو ماهنا احسن منه واكيد الاصحاب ماهنا حلوهم

وزين ما بهالكشته هالشويب وحليله اللي عند الضوية

ايه بس لا يطلع مهب شايب بعدين يزعل على مكشات

الا سالتك وشهي نوع الكاميرا اللي تستخدمها بمعرضك اللي بموقع flickr

wolf220

26/10/2009, 06:30 PM

مدااااشااااااااء الله

طلعه بنأكيد تنال الاعجاب

ابوسعدبدر

26/10/2009, 07:01 PM

الا الطلعه كلها حلى الله لايحرمنا واياكم الأجر ويكفي انكم طالعين بهالجوالحلو الله يمتعنا واياكم والمسلمين بالصحه والعافيه . حلى حلى حلى حلى حلى حلى عـــــــــــــــلى حلى .

ضامي الدلم

27/10/2009, 10:29 AM

السلام عليكم ورحمة الله وبركاته

الله يوسع صدورنا واياكم بالعافية

الصوره جملية جدا ولطلبكم يوجد ملاحظات استنبطت سلبيه واجابيه
السلبيه ملاحظة الخيمة منصوبة دون الإستفادة منها في شيء العزبة والفرش والأغراض كلها برا ،،،،،،، الله يستر لو يجي مطر يبون ينحاسون

وكثرة الاغراض مما يجعل الطلعة تأخر في الخروج من البيت للبر يعني العفش يبيه اقال شي ساعتين علشان يتحمل
كما يوجد كثره في الفرش والعدد خمسة قال صفو صفين قال حنى ثنين

الاجابيه تحليه الطلعة بالشيبان والسوالف الخاثره وتذكر الماضي

الله يوفق الجميع
الله يجيب الخير ويغيثنا وعم به ارجاء البلاد

نعناع الجبل

27/10/2009, 11:18 AM

الظاهر يامشرفنا الرمعات سماويه ومافيه زود على ما اورد الاخوان

شفايف نعجة

27/10/2009, 10:34 PM

الله يوفقكم ....... بس يلزمكم ( دينا ) تشيل العفش
الوذافه والتكتكه حلوه .
الضنايه اهون علي من فك الخيمه:D :p :D

المهند تمير

27/10/2009, 10:43 PM

والله الصورة ما عليها كلام ...

كاملة والكامل الله ...

الفهد القصيمي

27/10/2009, 11:03 PM

حلوووه منك 00صور رائعه 00

@قرناص@

27/10/2009, 11:26 PM

صوره تبين ان الطلعه ماشاء الله كانت من آفضل مآيكون ,,

ولآ يعجبني التدقيق والربع مآقصرو ,,

مخايل الحوطه

27/10/2009, 11:36 PM

الرحلة هذي روعة لآخر درجه ولايوجد بها سلبيات
ومن يقول غير ذلك ماعنده سالفه
وإذا أنت يالحر تقول فيه سلبيه كذلك ماعندك سالفه ههههه
أما بعض الأمور الدقاق والملاحضات البسيطه فلا تحسب سلبيه

الفزعه ياأخوه

28/10/2009, 07:32 AM

طلعه حلوه صراحه بس الكرسي ماثقل عليكم

بلحارث

28/10/2009, 11:45 PM

الكشته ماشاء الله ولا اروع لكن المفروض يجلسون مع بعض ويمكن ان بينهم وقفه نفس :mad: لاني ملاحظ ان الشويب جالس لحالة وواحد مقابله بنص وجه:no: والثالث ماهو يمهم والرابع مثله ، ترى الطلعه متعتها السوالف والوناسة:D

سيف الظفير

31/10/2009, 12:29 AM

http://www.mekshat.com/vb/../pix/upload01/prof005/mk1112_al7or111.jpg بها الجو والمكان والله لاانسى نفسي هذي طراه العمر يا خي
http://www.mekshat.com/vb/../pix/upload01/prof005/mk1112_al7or5655.jpg

الله يرحم اهلك هالصورة اعلاه وين محلها بالتحديد

وماشاء الله عليك التقااااط ممتاز

WHITE HAWK

31/10/2009, 02:34 AM

ماشاء الله عليك صوره قمه بالجمال .......لكن الملاحظه عدم التنظيم وعشوئية الاغراض تقل عفش مطلقه.لكن بخبرتي القصيرة اتوقع انكم توكم واصلين

العفّار

31/10/2009, 08:30 AM

اعتقد انهم مستاجرين الخيمة والفرشات والمراكي لانه مستحيل كشاته يشيلون معهم كل هالزوالي والمراكي .

مافيه سلبيات ابد والله يمتعهم بالصحه والعافية

vip000

31/10/2009, 08:38 AM

والله اني احترت من اليوم اقلبها اخواني ماخلوا شي بس بانتظار تعليقك يالحر.......والله يجزاك خير على الموضوع

هوايتي مكشات

31/10/2009, 08:57 AM

الايجابيات طلعه محترمه وجو اكثر من رائع
السلبيات حوسة الاغراض

اخو الريم

31/10/2009, 09:17 AM

ماشاء الله عليكم كل لاهي في شغله
لكن الملاحظه / انا اشوف ان الفرشات اكثر الرجال
والباقي كله حلو (( عدم الترتيب يظبط الطلعه ))

الخيال2006

31/10/2009, 10:33 AM

خاثره - رحلة نشاما الله يعطيك العافية

الوعد البراري

01/11/2009, 11:31 PM

الأخطاء الست متابعة الموضوع

بلا حدود999

01/11/2009, 11:37 PM

يالسلام على الجو والجلسه

شي خيالي

عساس الوادي

01/11/2009, 11:39 PM

ماشاء الله صورة رائعة جدا سلمت يداك وعافاك الله ..تقبل تحياتي

برقا نجد

03/11/2009, 12:45 PM

صورة و لا أروع ياليت أخوي الحر تشوف مشاركتي على صورك هذي الروعة و عسى ما تعديت على خاصيتك و تعطينا مشاركتك

لأنها خاصة فيك الصورة

http://www.mekshat.com/vb/showthread.php?t=240101

تقبل مروري

ابوسعد931

03/11/2009, 01:34 PM

رحله حلوه واللي فيها نشاما والسلبيات مافيه

تركي الضرغام

03/11/2009, 01:49 PM

السلام عليكم
هين الطلعه والجو ما عليهن كلام
وخوه كبار السن والرجال الطيبين شروا من يطلع على الموضوع مكسب
بس أنا عندي شي ما جازلي هالعفش والحوسه هي المشكله وكثرت العفوش
بس

البرفسوررر

03/11/2009, 01:57 PM

منظر جميل وخلاب

يعطيك العافيه على هذا المنظر

ابوالوليد 1429

04/11/2009, 09:07 AM

شكرا ماقصرت

فارس كيفان

04/11/2009, 09:20 AM

جميييييييييييييييييييييييييلة

السلبيات : أشوف في أكثر من جلسة ،،،، والأغراض شبه مبعثره .

تحياتي

ابو احمد 2

04/11/2009, 09:32 AM

في الرمله بهلوكس بدون دبل شيء خطر لوغرزت العربانه كيف تطلع في هذه الرمله وسياره واحد مع ذي الغشان اعتقد وزن زايد ورمله عموما الله ستر هذه المره ولا تتعودها وتقبل انتقادي لمصلحت الشيبان والطلعه ما تتنكدون

الهدد يابعدهم

04/11/2009, 09:51 AM

ماشاء الله عليكم يكفى إنكم طلعتو وسعتو صدوركم أنتـــــــــــم كذا :good:

أبو عمر 330

04/11/2009, 09:57 AM

يظهر لي والعلم عند الله أن الإخوان يحملون الأغراض ويستعدون للرحيل بدلالة إخراج الأغراض من الخيمة ودبات الماء الفارغة والرواق المطوي وغيرها .
والجوا خياااااااااااااال .

الكشَات

06/11/2009, 10:37 PM

الشايب كنه أبو نوفل :d
الله يذكره بالخير

والرحلة جمييييييلة جدا والجو خيالي
ورجال نشامى

نايف الكشات

07/11/2009, 09:23 AM

رحله تسحر ماشاء الله
ودي ارتكي عند الشايب ابو غترة بيضاء ونطقها سوالف :)

البجلى

07/11/2009, 04:48 PM

السلام عليكم
رحله وكشته فى جوخيال وكما ذكر الاخوان عيبها انى مانى فيها
والله يمتعكم بالصحه والعافيه جميعا

ابوديحم2

07/11/2009, 05:08 PM

تعجبني هالكشته
الملاحظه جميع الاغراض من محلات تأجير الزل والخيام بس أهم شي الوناسه

هاوي الباترول

07/11/2009, 05:10 PM

والله ردي مثل رد ابو دحيم 2

رحال 6465

07/11/2009, 06:30 PM

الله يعطيك العافية صورة جميلة جدا

الكاشت 911

07/11/2009, 08:22 PM

ناقصها بباسي ومشروبات غازية
هذي السلبيات والباقي كله ايجابيات

أبو علي حائل

07/11/2009, 09:16 PM

الملاحظة على الرحلة عدم الترتيب فيها وكثرتعض الاغراض ويلاحظ انهم من كبار كسولين بعض الشي والاجوهم رهيب

بعيد الارماس

07/11/2009, 09:25 PM

والله يهي فله

راعي البخاخ

07/11/2009, 10:28 PM

ماشاء الله تبارك الله , طلـعة طيـبة وجــو خـيالي ونــفد تــفتح النـفس

السـلبيات طال عمرك : بكــــثـــر الحــوسة والاغراض وعــدم الـترتيب وكـثرة الجراكل على ماقالوا
الاخوان , لأنــك اذا جـيتوا بـتمشون وتـشدون تبون تتـعبون بالـشيل لأنـكم مارتبتم من اول

mngahi

08/11/2009, 11:26 PM

كم أحب ان أكون في مكان مثل هذا المكان
هو الشي ناقص هو ان السيارة واحده فقط
حيث الرحلات البعيدة أفضل شي ان يكون في الرحلة سيارتين على الأقل
وهو الأفضل بحيث عمل حساب الأعطال او الغرز أو إي شي يحدث على الرحلة خارج عن السيطرة
مع أفضل التمنيات برحلات ممتعه و جميله في ربوع وطننا الغالي

دربي قطوع

08/11/2009, 11:57 PM

ماشاء الله طلعه رائعه جدا

واظن البارح جايكم شي طيب من الامطار لو ان الارض ماهي نفود كان غرقتوا

الله يجمعكم على الطاعه

والطلعه كلها ايجابيات من حيث الوقت والمكان
والسلبيات مافيه شي اتوقع اللي يصور من فوق سياره ثانيه

انا هو هو انا

08/11/2009, 11:57 PM

هلا اخوي الحر السلبياااات انهم طاقين خيمه وفارشين فرشاتهم برى

بروق حايل

09/11/2009, 04:56 AM

يكفي اصطحاب الرجل الكبير بالسن فهو ارشيف حياه متنقل
ويكفي من السلبيات 18 دبة ماء متنوعه الاحجام فهي اعطت طابع فوضوي على المكان

تقبل نقدي يابن العم

الربذي

09/11/2009, 07:09 AM

اولا السلام عليكم
ثانيا ياهلا وغلا والف مرحبا بالغالي القديم الحر الابي تصدق لك وحشه زمان ماطليت قد لااصادفك ولكن لك وحشه توا القى لك موضوع ياهلا بهالطلة اكيد مشرف لك متابعات يوميه ولكن انا تو اشوفك .

تعليقى هي ان اغراضكم كثيره
والخيمه كبيره
والفرشات مقاسها صراحه غير مناسب قصيره مره وعريضه

وهي على قد المدة اذا يومين فقط اشوف ان الخيمه مالها داعي الكبيره لو تاخذون اصغر افضل
لو ان الوسع زين بس شغله بالنقل والبني وخصوصا وقت الهواء

نوماس الشريده

09/11/2009, 01:30 PM

والله ياخوك لو بها نقص انتم مكملينه

لكن بها عذروب واحد بس هو عدم الترتيب و ردا على اخوي العمري اللي يقول المكان منخفض وفيه غيوم

انا اشوف المكان مستوي لكن موقع المصور خلى الارض منخفضه

والله يهنيكم بأحسن منها

مخــــاوي الذيابه

09/11/2009, 03:00 PM

الايجابيات كثيره...
والسلبيات :
1- الخيمه مفتوحه مع كل الجهتين
2-مقابلين الهواء والدليل الشجر..
3-ماطقيتو الرواق حول الضو..
هذا ماعندي..
وتقبل مروري.....

شاعر تميمي

25/11/2009, 12:29 PM

اسعد الله مساكم

الخيمه مطقوقه على الفاظي دون الاستفاده منها

والفرشات في كل محل والكشته جدا جدا سيئه

لعدم التعاون والترتيب وتنظيم الوقت والاغراض

محليها الشايب الي عند الضو والى المحل نازل

بالتوفيق ياحلوين

فريدي القصيم

25/11/2009, 12:59 PM

وعليك السلام ورحمة الله
الله يعطيك الف عافية على الموضوع
الايجابيات كثير زي مقالو المشرفين والاعضاء
وكشته موفقه وخوة نشامى
السلبي بنظري
الفرشات - العزبة - نقصها ترتيب

نجم الصداوي

25/11/2009, 01:02 PM

يا زينها وزين الحوسه معاها .. قسم بالله في نظري تجنن ..خل عنك بس..
..
.. آآآخـ بس ..
شكرا على الإهداء

rosh00

25/11/2009, 01:10 PM

الأغراض غير مرتبه ولا تعطي متعه للطلعه وكثرة جوالين المويه الفضيه وش لزومها هههههههههههههههههههههه

نشمي حرب

25/11/2009, 01:22 PM

بصراحـــــــــــه أخوي طلعه جميله وأكثر من رائعه جداً ..
بس لولا جراكل هالماء مخربتن الصوره وعندكم شويه عدم ترتيب .. بيض الله وجهك يالغالي ..
تقبل مروري .

كن كن

25/11/2009, 01:26 PM

رحلاتي خمسة اشخاص فقط لا غير

بخيص البر

25/11/2009, 01:34 PM

والله يازينها من طلعة والجو ممتاز ويبالها سمر باللييل يعاااااااااوك اطلق الناقه ابك ابك جو حلو ويصلح للكشته بس المكان فيه سلبيات مثل ماقال خوينا علي العمري و ابا مجاهد.

همس الغدير

25/11/2009, 02:08 PM

ما شاء الله على الطلعة الطيبة والله يجمعكم على طاعته

اسير الغضا

12/10/2010, 08:32 PM

صوره رائعه

بس ليش مايصير تانكي واحد بدال الجوالين

ابوعزيز2007

12/10/2010, 09:08 PM

رحله جميله والأجواء رائعه

aooa

12/10/2010, 10:05 PM

انا اشوف من السلبيات ان يكون فيه مثل هذا الجو ويقعد الواحد في البيت ...

وواضح ان الجو بارد جدا وممطر والفرش على ارض رطبه وفي المساء وعند نزول درجة الحراره سوف تكون هذه الفرشات مشكله قد تسبب الامراض .

mm33

21/10/2010, 06:42 PM

لااااااااااا

طلعت البر كلها ايجابيات
وتحمل منها ايجابيات للمدينة

القناص

21/10/2010, 07:16 PM

هههههههههههههههههههههه
أخي الفاضل الغالي (((الحر)))
أسعد الله أوقاتك ونحن معك والقارئين
والله انها اطول انتظار للاجابه على السؤال
ففي هذه اللحظات يكمل سؤالك لنا عن سلبيات الصوره سنه وشهر!
فرجائي ونحن على ابواب الوسم والخير بإذن الله
أن تجيب على السؤال الذي طرحته
والذي لم أوفق حتى الآن إلى العثور على إجابة شافية عليه.
وفق الله الجميع للحفاظ على البيئة
وتركيب توانكي للمياه في سياراتهم ،
إنقاذا لبيئتنا من تراكم قوارير المياه في البراري والمتنزهات والمكاشيت.
تحياتي
:)

ذيب المحمية

21/10/2010, 07:19 PM

الطلعه ما عليها كلااااااااااام

بس عذروبهااا كثرة هالاغراض ,,,,

هذي اغراض مقيمين ما هي اغراض كشاته ,,,

بالتوووووووفيق

عبدالله الجري

21/10/2010, 07:45 PM

اعذرنا توي اطلع على الموضوع

هذا لغز

لا والله ماتعجبني

اللي عاجبني ...الاجواء فقط

والسلبيات كلها سلبيات

هذي عزيمة ماتسمى رحلة

وسلامتك

تحياتي لشخصكم الكريم

رمز العطاء

21/10/2010, 09:10 PM

مبارك الله يقويك الصورة تخرق القلب ياملى السيل

العودالازرق

21/10/2010, 09:46 PM

اظن كثرة قشهم

العميد ابواروى

21/10/2010, 10:17 PM

يااااااهـ وش طلع هالموضوع ..؟

khrj

21/10/2010, 11:40 PM

مانشوف فيها الا نشاما مثلكم وشرواكم
والملاحظه انها سياره وحده معهم

عاشق ديرتي بريده

21/10/2010, 11:43 PM

الحر الله يتمم عليكم بخير

السلبيات كثرة القش

بصراحه تحوم سبدي من المكان اللي مليان اغراض

والغريبه الثايه بجهه وقز الطبخ بجهه

وبعدين وش الفرشات اللي وراء الخيمه ؟

انا من الناس اللي مستحيل اقعد بمكان حوسه احس أني متضايق اذا ماصار كل شي مرتب .

مجاهد111

22/10/2010, 12:48 AM

اخي الحر انت تسأل هل تعجبك مثل هذة الرحلة والشباب يعطونك سلبيات وايجابيات العفش

انا بعطيك رئيي لالالا تعجبني ابد ومن النوادر اطلع مثل هطلعة والسبب لانهم حطني لقيتني

واضح من كثرة العفش لاتنقل ولاتمشي وتغير المكان بلعربي اتوقع لهم اكثر من اسبوع ابمحلهم

وتقبل تحياتي

عزيزوغالي

22/10/2010, 06:58 PM

ننتظر ماذا ستسفر عنه هذه الصوره من سلبيات
مع اني اشوف ان المنظر جميل والجو رائع

بس الظاهر ان الصوره مركبه وغير حقيقه

وانا اكثر مايضايقني في الكشتات الحوسه وعدم نظافة المكان ..

واحد حساس

22/10/2010, 07:30 PM

تاريخ ووقت كتابة الموضوع
http://www.mekshat.com/vb/images/statusicon/post_old.gif 16/10/2009, 01:38 AM

ولحين لم تتم الاجابة من الحر؟

ياليت تجاوب يالحر حفاظاً على عيوننا

Al3rands

22/10/2010, 08:07 PM

الجو خياااااااال بس ترا فيه حكمه تنفعني دائما (الترتيب قبل العمل)

ابو كليب

22/10/2010, 08:07 PM

السلام عليكم

مــــــــاشاءلله تبارك الله

رحله جميله جداً
ماشاءلله
الرحلة فيها تعاون وكل شي كامل أن شاءلله
الله يخليكم لبعض

أما السلبيات عدم الترتيب

على العموم الله يمتعكم بصحه والعافيه وثبتكم على طاعته

عسعس الليل

24/10/2010, 01:09 AM

(( الحر ))
طلعه حلوه ورائعه وممتعه ويكفي العود الي جالس جنب مشب النار الله يخليه لكم انشالله سوا كان والد او جد ...الخ
بالنسبه للسلبيات عدم الترتيب وشي واضح من خلال الصوره
بالنسبه للإجابيات
:D
عدد الزوار لهذا الموضوع والتفاعل الرائع ...:type:
بس فيه شي مشغل بالي
المصور كيف التقط الصوره يعني من اي مكان معقوله فوق تندة سياره !!!!
تقبل مروري

نوءالمرزم

24/10/2010, 01:35 AM

لالا انا اقولكم السالفه ومافيها ان العده هاذي كلها جايبينها بالهاي لكس

يعطيك العافيه اخوي طلعه رائعه حتى ولو كانت فيها سلبيات

بساط احمدي

24/10/2010, 03:00 AM

يا شيخ مخااااااااااااااااااالف حطن بالمكان وهج عن وخلن لحالي راااااااااااضي ابد هههههههههه

الله يهنيكم

saa_00

24/10/2010, 08:11 AM

تذكرني بحوست البدو وهم شادين وانتو عكسهم نازلين .
احس ان المكان عفيسه كني في حراج

أطلال نجد

24/10/2010, 08:24 AM

ما شاء الله , طلعة ولا أزين منها ..

خصوصاً وأن بها كبار سن ملح ونكهة الكشتات أطال الله أعمارهم على طاعته .

وما ينقصها إلا بعض الإحتياطات الوقائية والترتيب

تحياتي

ادليلة

24/10/2010, 08:38 AM

السلبيات الخيمه ماركب الرواق صح والخير مركب لويجي مطر قوي انحستو والفرشه الي جنب الخيمه شكلها مصلى اطوو الفرشات الا خلصتو من الصلات والعده نطل وشياب يشتغلون---- والاجابيات هطلعه الحلوه والجو العليل والوجيه الي ماتنكره تقبلو تحياتي فردا فرد

ابن نجد .

24/10/2010, 05:13 PM

اخي علي العمري

واخي ابا مجاد

واخي سفير الشمال

الف شكر على مروركم

ولكن الى الان لم تصلوا الى ما اقصد

بانتظاركم

والله اعلم انه من اكبر السلبيات انك اتقطع قلوب الزوار والأعضاء ما تجاوب على السبب الي براسك عطنا السبب وإلا تراي ابرميك الصراحه :Dابطيت ماجاوبت معقوله ترصهم فوق السنه ما تجاوب ما صارت تراي ابراسل المدير علشان توحش :D

باث2002

26/10/2010, 02:49 AM

لا طلعتكم كاملة ومكملة ومالكامل الا هو سبحانه

انا من الموضوع صراحة شكيت انكم من الجيل الجديد جيل ماشفت زيه وصراحة ينعاف البر من عقبهم واللي مو مصدق يمر علي بالشتاء وواريه على الطبيعة اشياء ماتنتصدق هههههههه مثل السخانات والحمامات اكرمكم الله والدش والمواطير كنه ساحب بيتهم معه
بس الحمد لله للحين فيه ناس من الجيل اللي خذ الخيمة ويالله
وبصراحة شوقتني لهيك طلعات ومن زمان عنهن

اورنس الشرق

26/10/2010, 05:16 AM

السلبيات

ان العزبه والخيمه كلها اجار من محلات تاجير الزل والخيام

وبعدين يبدوا انه لا يوجد تعاون بين افراد الرحله

لن الشايب قاعد يشب النار والي قاعد قدامه واضح انه صغير فى السن

المفروض احترام الكبير وتقديره

وايضاً الشرابات الي منشورات على طنب الخيمه لو جا مطر اكيد بيتبللون

وعدد النعال وانت بكرامه اكثر من عدد الموجودين بالصوره وهذا يعني

انهم كسالا لن الوضع حوسه ولا يوجد ترتيب وكلن متكل على الثاني

اكتفي واقول الفراغ شين

نفود حائل

26/10/2010, 05:39 AM

الاخوان ماقصروا ماشاء الله

ننتظر الاجابة

الدمرداش

26/10/2010, 11:39 AM

منظر رائع جداً لكن يا حبذا يكون فيه ترتيب للأغراض لأن الاغراض إذا صارت مبعثره تضيق الصدر

المصمم76

26/10/2010, 01:20 PM

مرحباً مشرفنا الحر
ملاحظاتي
ما ادري وش اللي مكدر خاطركم ويمكن اكون غلطان
وهاللي جالس ومعطيك ظهره ورا ما يقوم ياخذ الملقاط والمنفاخ ويعطيها الشايب
ودبة الغاز ورا ما دفنتوها
وجلستكم المفروض داخل الخيمة يمكن تمطر في اي وقت والزل اذا جاه مويه ماينشف بسرعة فالبرد
والأغراض في هالحالة المفروض تكون قليلة اذا بغيتوا تجلسون برا
واهم شي وين سواليفكم ما اشوف احد يسولف
وسلامتك

عليم العطش

26/10/2010, 03:57 PM

اذا خواياك نشاما فلا يوجد سلبيات ابد.
والحوسه وعدم الترتيب من ميزات الرحله لكسر الروتين والنظام الممل.
انا اقول انها رائعه وحلاتها حوستها
دمتم بود

mishal544

27/10/2010, 05:42 AM

ما شاء الله

طلعه تونس القلب

يا مال العافيه

...

1من الناس

27/10/2010, 06:19 AM

اللي لفت انتباهي اثنين معطينك وجيهم وثنين معطينك ظهورهم وسلامتك
يالحر
ونفس الوقت جالس وواقف وواقف وجالس
لحسة مخ :D:D:D

شاهي معتق

18/05/2011, 10:51 AM

ماشاءالله منظر جميل ويازينه زيناه

ماجد الشمال 1

24/05/2011, 02:55 AM

هههههههههههههه ياكثر الحوسة يبي لك عشر افغانية يرتبون الحوسة
الى لفت انتباهي الهوز متدلي من قربة الماء الى فحوض السيارة
هذا ممكن يضيع الماء

الهواوي_1

24/05/2011, 04:44 AM

الايجابيه انهم مطلعين الشايب معهم يوسعون صدره.....
التوقعات انهم بيشدون وان المطر قد رشهم ومامعهم شراع والدليل الشرابات الله يكرمكم المعلقه في الحبل تنشف هي والزل اللي ورا الخيمه ...والرماد اللي حول النار يبرهن انهم مبطين ....بس ودي انهم شبوا النار للشايب ودفوه تقديرا لسنه بدال مايشب هو

رسيس نجد

24/05/2011, 04:53 AM

الايجابيات \ طلعه وناسه وكشته ترد الروح 0
السلبيات \اني ما طلعت معهم 0

galawy1

24/05/2011, 01:43 PM

بتغدى وارجع ارد عليك ولا برد الحين الرحلات حلاتها كذا

شفت

24/05/2011, 02:01 PM

لا تعليييييييييييييييييق

ابو فله

24/05/2011, 02:13 PM

أشهد انك تورطت لكن الصوره كثرت عفوش وعدم ترتيب وكبر الخيمه

عادل بن جابر

24/05/2011, 02:20 PM

ما عليها كلام

لكن الحنثويل مطشر في كل مكان

تحياتي

22ابوعبدالله

24/05/2011, 02:22 PM

ماشاء الله

طلعه ولا احلى

السلبيات جوالين الماء

وكبار السن هم الايجبيا ات

درجلان الشمال

24/05/2011, 05:19 PM

كثر القش واشوف الجلسه والمعاميل والخيمه فاااااضيه

روحي بحايل

24/05/2011, 06:13 PM

أولا : فوووووووووووووووووووووووووضى أغراض مبعثرة
ثانيا : كل هالعفش بسيارة وحدة ::: زنقة زنقة

ابوسلطان66

24/05/2011, 08:10 PM

والله حلوووه الجو والطلعه ونااااااااااسه هذا حلاتها

حسن الشمالي

24/05/2011, 08:14 PM

ماشاء الله

كلها زين على زين
واللي يقول فوضى وش يبي؟؟؟

البر وش كبرة نطل قشك في كل محل
الترتيب في المكان الضيق فقط فقط

مخاوي دابذريع

24/05/2011, 08:44 PM

الطلعه بخوة نشاما مافيها شي ,,, لا تدقق يابن الحلال ........ز

YUKON_GMC

24/05/2011, 09:44 PM

200 رد ماكفوا لتفصح عن هذا السر يامشرفنا ...!!

خلاص قول ملنا ماهو هذا اللغز

النمرالأليف

24/05/2011, 10:09 PM

يازين هاللقطه بس المشكله في الطلعه تنثير العفش على الفرشه بهذه الطريقة ترفع الضغط

الجو ربيع

24/05/2011, 10:14 PM

مشاء الله منظر يثلج الصدر

الطرس ممدوح

24/05/2011, 10:43 PM

ماشاء الله على الجو والله هالطلعه شكلها طيبه
1/كثر العفش
2/قاعدين عن الجادة

* ابو باسل *

24/05/2011, 11:04 PM

16/10/2009, 01:38 AM

ياشباب شوفو التاريخ قبل سنه ونصف والى الحين مارد الاخ الحر على الشباب وش الي يقصده بالضبط من طرح الصوره والموضوع .

راعي طفات

24/05/2011, 11:11 PM

يمكن قصده ياخذ رايكم فقط

mjjjed

24/05/2011, 11:38 PM

الظاهر ان ابومحمد نسي موضوعه هذا من كثر المواضيع والاشعال او ان واحد من اللي في الصورةمهدده لايطلع السلبيات ههههههههه
دمتم بود

سوبر152

25/05/2011, 01:11 AM

الجو حلو وجمعة مباركة
ولكن السلبيات هي :
1ـمكانكم بوسط اسكك السيارات خطر الدهس والصدم ليلا
2ـمكان الخيمة مائل جدا لذلك تكون الجلسة فيها غير مريحة
3ـالرواقات تركيبها في الخيمة غلط نظرا لوجود الزاوية في الوسط
4ـشكلكم متعاندين ماتتعاونووون
5ـوشلون الهايلوكس شالت كل هاالعفش الكثيييييروخاصة الفرشات <قصر أفراح>
6ـ الباااااااااااب ماله داعي فتحه
والباقي ماقصروا الجماعة بالردود

((القناص))

25/05/2011, 08:32 AM

ماشاء الله عليك يالحر
صوره رائعه جدا
بس لوانه اصعب لغز في العالم راح تلقى الاجابه بالردود السابقه
بس خل عنك والله انه سوال صعب وبنفس الوقت دسم
شكل مشرفنا نسى الموضوع حقه له سنه ونص ماحد جاوب...

((القناص))

25/05/2011, 08:37 AM

ماشاء الله تبارك الله
صوره ولقطه جميله جدا
لو انه اصعب لغز بالعالم راح تلقى الجواب بالردود السابقه
بس خل عنك بالحر صراحه لغز صعب وبنفس الوقت دسم
معقوله سنه ونص ماحد جاوب...

((القناص))

25/05/2011, 08:38 AM

السلبيات صوره واحده
والايجابيات حسن اختيار اللقطه

الجواب33

25/05/2011, 09:06 AM

المشكلة عندك انكم معلقين الشراب على الخيمة
الله يكرم الجميع
ههههههههههههه الله يوفقكم

GMC 111

25/05/2011, 09:06 AM

ما اشوف الصوره تستاهل ردود مدت سنتين

ابو فرح1

25/05/2011, 09:09 AM

الحوسة اللى صايره ، مالها داعي ، الله يحفظهم كانهم منقلبين من كثر اغراضهم ،
ترى الزود دائماً نقص . يعني كل هالاغراض اكثرها مالها داعي .
نجي للملاحظات طبعا غير الانقلاب والحوسه .
الفرشات - الزل - واجد صافين اربع ،وجهة الخيمة جنوب اللى باين ثنتين !
اسطوانة الغاز هذا اكبر عدوي لي ما احبها بالطلعات .
الفرش بر والخيمه شكلها فاضية !!
جيكات الماء منطله في كل محل وهذي يصعب عليهم ترتيب محلهم اذا مشوا .

لكن الجو خيال الله يوفقهم ويجمعهم عل كل خير واسال الله رب العرش العظيم بان كما جمعهم بالدنيا ان يجمعهم بجناته جنات النعيم .

أبو جمانه

25/05/2011, 09:11 AM

خمسة أشخاص وثمان فرشات ؟؟؟؟؟؟؟؟؟؟؟؟؟

برد الطويلين

25/05/2011, 09:29 AM

ماادري وش القصد من سؤالك بس اعتقد الشي الوحيد هو ليش الشايب يشتغل والشباب يتفرجون عليه

نجم الصداوي

25/05/2011, 09:43 AM

..
.. مــا لا يعجبني .. هــي مســألة رفع مواضيع قديمة .. وفقدان المنتدى للتجديد ..

.. نعم .. نحن مقصرين .. لكنها دعوة للكل نحو التكامل .. والبحث عن الكيفية لا الكمية ..!!

راع البنلي

25/05/2011, 09:46 AM

السلام عليكم ورحمة الله وبركاتة
السلبيات هي. كثرة العفش وقل الأوادم
تقبل مروري...

هايم بالعالمي

25/05/2011, 10:30 AM

لاتعجبني لانه واضح من الصوره انهم ليسو على راي واحد وليس للرحله امير او شخص مسؤول والدليل ان الشايب يبي يشب نار لحاله وفيه نار ثانيه عند العزبه ويبدو انهم مختلفين واتكاليين

سلبيات الرحله

عدم تقدير الشايب
عدم اتفاق على راي واحد بين افراد الرحله
عدم الاهتمام بحاجيات الرحله والتهاون في المحافظه عليها من المطر كالفرشات والمراكي والعزبه وتركه مكشوفه للامطار
عدم تعاونافراد الرحله على نظافة المكان وترتيبه

الايجابي في الرحله روعة الجو فقط

alrsash911

25/05/2011, 10:40 AM

السلبيات : عدم الترتيب والتنظيم .. الشايب عميت عيونه من شب الضو مع العلم ان المنفاخ موجود
السلبية الكبرى : لا يوجد الا سيارة واحدة وهذا أعتبره خطأ

بعدين وشوله باب للخيمة والرواق مفتوح !!!

الايجابيات : هالجو يالله من فضلك

تحياتي ،،،،

شغموم 131

25/05/2011, 10:47 AM

والله ما اشوف فيها الا سلامتكم

بس بعض الناس تحب تفلسف شوي الله يهديها

ووش فيها اذا الشايب شب الضو وجالس عندها

بالعكس ساعة صدره اصلا الا جلس حولها وقام يحورف فيها والباقين ما قصروا قايمين به

القليوبي

19/10/2011, 08:50 PM

مشكوووووووور

تبريزة

20/10/2011, 09:02 AM

هههههههههه انا مستغرب من الرد اللي فوقي، شكله من سنتين يحتري الاجابه ولا لقاه ، وجاء ورفع الموضوع

اهم شيء بالرحله الوناسه ، حتى لو كأنه منفجر بهم لغم

راعي الحدريين

20/10/2011, 10:50 AM

خوش طلعه

يعطيك العافيه

بارق الرمله

20/10/2011, 11:41 AM

ههههههههههه انا فريت الصفحات كلها ابي اللي يقصده الحر بس مالقيته

متى الحلقه الاخيره يامخرج ههههههههههههه

alooosh

20/10/2011, 03:24 PM

ولا أروع بس ناقصهم شي واحد إني اكون معاهم

هبوب الشمااال

20/10/2011, 06:06 PM