للعارفين بافران المندي (صورة)

[asdali]

السلام عليكم ورحمة الله وبركاته

يا اخوان شريت اليوم فرن مندي صغير من احدى المحطات وزنه 22 كغ وعندي كم استفسار لو سمحتوا؟

اول شي النوع صغير يوجد فتحة في الجنب اسفل يقول البايع عشان الهوا للفحم او الحطب لاكن المقاس الاكبر ما به فتحة !! هل اسكر الفتحة ولا اخليها ؟

ثاني هل لازم احط كركم على اللحم او الدجاج عشان يصير لونه اصفر ولا اللون طبيعي من الفرن ؟

http://www.mekshat.com/pix/upload03/images128/mk132664_20091016260.jpg

http://www.mekshat.com/pix/upload03/images128/mk132664_20091016261.jpg

http://www.mekshat.com/pix/upload03/images128/mk132664_20091016259.jpg

http://www.mekshat.com/pix/upload03/images128/mk132664_20091016258.jpg

شاكر لكم جميع .

[ابولولو]

مبروك البرميل وبالعافيه مقدما واول مره اشوف الفتحه وجرب ولان خسران واذا انجحت والا سكره والكركم علشان يصفر الدجاج اوحط زغفران مع اشوي ماء والاخوان يفدونك اكثر

[abo-lma]

بالنسبه لاستفسارك الاول ماعندي خلفيه


وبالنسبه للون الاصفر صبغة زعفران تباع في البقالات وعند العطارين

علبة حمراء مكتوب عليها صفار الزعفران

ملعقة مع ماء كادي وادهن فيها الحم وسم بالله

موفق خير

والله يعطيك خير هالبرميل ويكفيك شره

[جيبي جايزلي]

الله العالم ان الفتحه اللي تحت حقت القز اذا بغيت تستعمل القز من دون حطب

[asdali]

الله يبارك فيكم جميع وجزاكم الله كل خير .,

[دغيم1]

السلام عليكم ورحمة الله وبركاته
حياك الله أخوي
بداية الله يطعمك من خيره ويكفيك شره
بالنسبة للفتحة فهي تهوية للنار وبدونها لايمكن للنار أن تشتعل
لأن النار تحتاج إلى أوكسجين
وفي حال إشتعال الحطب للنهاية يمكنك إغلاقها حتى يحتفظ البرميل بالحرارة
وعند إغلاقها لايمكن للنار أن تشتعل
تقبل تحياتي

[asdali]

السلام عليكم ورحمة الله وبركاته

حياك الله أخوي
بداية الله يطعمك من خيره ويكفيك شره
بالنسبة للفتحة فهي تهوية للنار وبدونها لايمكن للنار أن تشتعل
لأن النار تحتاج إلى أوكسجين
وفي حال إشتعال الحطب للنهاية يمكنك إغلاقها حتى يحتفظ البرميل بالحرارة
وعند إغلاقها لايمكن للنار أن تشتعل

تقبل تحياتي


اللهم آمين وبارك الله فيك

طيب بأيش تنصح اقفل الفتحة بعد ما يجمر الحطب لن ما جا معه شي ,!!؟

الله يجزاك والاخوان اللي ردوا كل خير .

[ابونادر1111]

هذا حق خبز واسمه التنور والعماله حطو لك شبك داخله لجهلهم حق المندي لايوجد
له فتحه ويجب ان يكون معزول جيدا وله غطاء محكم الاغلااق ويكون من الداخل من الحديد افضل.اتمن اني افدتك

[ابوعبدالله9999]

الفتحه لدخول الأكسجين لإشتعال النار بسرعة ... وبعد وضع الأكل إقفلها بقطعة خيش صغيرة مبلولة بالماء.... وعليك بالعافيه.

[كاشخ 24 ساعه]

هذا تبع الخبز وليس للحم

اسمه تنور والفتحه لدخول الاوكسجين

[غريب الدار999]

الله يعطيك خيره ويكفاك شره..
زي ماقالو الأخوان الفتحة للهواء لإشعال النارومافيه داعي تسكرها لأن الجمر
والرماد بالأسفل يقفلها وقت العمل ..
ولكن كما ذكرو الأخوان هذا هو التنور أو عندنا في الجنوب يسمى (الميفا)
وهو لعمل الخبز لأنه مصنوع من الفخار ولا يتحمل الحرارة العالية مع الزمن والحطب
اللي يوضع فيه صغار وهو لتسخينه فقط ولا يمكن اقفاله بشكل جيد
أما برميل المندي مصنوع من الحديد ..
مع العلم أن برميلك هذا يصلح للمندي بس حاول تسكر الغطا بقطع قصدير
وخيش أو قماش مبلل وبالعافية..

[FAURS]

يبيلنا تغطيه منها ياخوي

نبي نشوف نتايجها

شاكر لك

[المكروف]

كلام غريب الدار في محله وانت مخير إما تخبز فيه أو تعمل المندي كلما ماهنالك بعد ان يجمر الحطب قفل الفتحة وقفل الراس وبالصحة والعافية

[القنـاص2008]

مبروك البرميل وبالعافيه مقدما واول مره اشوف الفتحه وجرب ولان خسران واذا انجحت والا سكره والكركم علشان يصفر الدجاج اوحط زغفران مع اشوي ماء والاخوان يفدونك اكثر
:good: :good: :good: :good: :good: :good: :good:

[راعي الطلعات]

هذا يصلح تنور ويصلح للمندي :)

بس لا اوصيك قبل تقفل الغطاء الي فوق عليك بالقصيدر او الخيشه المبلله بالماء

وبالنسبة للفتحه الي بالاسفل هي تقدر تقفلها بأي غطاء والمفروض انه يجي معه غطاء يتقفل ويفتح وقت العازه
اذا كان من اهل الرياض فيه محلات بالشفاء بتشوفها على يسارك وانت داخل الشفاء و انت خارج من الشفاء بتكون على يمينك على الخدمه خذ معك البرميل واطلب منهم يقفلونه لك او يعطونك غطاء يقفل لائن اكثر التفاصيل والاصلاح للبراميل عندهم

وان كانك تبي تخلي اللحم او الدجاج لونه اصفر خذ لك زعفران وحركه مع مويه او كركم اصفر بس لا تكثر ربع ملعقه وتقدر عاد تضيف معه الي تبي ليمون بهرات ثم ادهن اللحم باللون وبسم الله بعد ساعه شوف العجب

اتمنا اني افدتك لو بشي بسيط وأسئل الله ان يعطيك خير ما شريت ويكفيك شره

بالتوفيق

[asdali]

الله يجزاكم خير ويرحم والديكم جميع كفيتوا ووفيتوا وبيض الله وجيهكم وباخذ ان شاء الله بنصايحكم .,

[Abu misho]

السلام عليكم
الله يعطيك من خيره ويكفيك شره
للاسف ما اقدر افيدك بس اعتقد مثل ما قالو الاخوان بعد ما يجمر الحطب تسده بخيشه ولا قصدير
و عندي استفسار للاخوان في الرياض واللي عنده خبر
في الرياض وين القى براميل مندي متنقله صغيره حقت 3-4 دجاجات ولا نص تويس وكم اسعاره
بالتوفيق

[عصاقيل الدخله]

مبروك عليك البرميل ولا تنسى تذوقنا من الطبخه :)

بالنسبه للصفار الكركم على قولتك ،،، ممكن تستخد صفار البيض احسن اذا كسرت البيضه خذ الصفار لحاله وحط معه صلصة طماط وبهارات تطلع على كيف كيفك:good: .... تحياتي