صيدنا هذا الاسبوع... [الأرشيف]

مشاهدة النسخة كاملة : صيدنا هذا الاسبوع...

lone

26/09/2004, 11:05 AM

السلام عليكم ورحمة الله وبركاته...

هذي بعض الصور لصيدنا هالاسبوع من منطقة ام حويض. الصيد كان جيد والحمد لله وهذي الصور هي حصتي من الصيد فقط. يعني حنا ثلاثة اشخاص وكل واحد طلع له نفس الكمية تقريبا...

ارجوا ان تنال الصور على اعجابكم... وهيه شئ بسيط مقارنة بالعمالقة المتواجدين في المنتدى...

http://www.mekshat.com/pix/upload/images6/mk9343_PICT01199.jpg

http://www.mekshat.com/pix/upload/images6/mk9343_PICT01200.jpg

http://www.mekshat.com/pix/upload/images6/mk9343_PICT012111.jpg

معمرها

26/09/2004, 11:20 AM

......)(بسم الله الرحمن الرحيم)(........

.............)(السلام عليكم ورحمة الله وبركاته )(.............

ــــــــ:: يعطيك ألف عافيه اخــي

(((( lone))))

على الصور

شـــكـــراُ

صقر

26/09/2004, 12:24 PM

حياك الله اخوي lone

صور رائعة وصيد وفير

والله يهنيكم بصيدكم .

وودي أسألك عن منطقة ام حويض .. أين تقع ؟؟

بارك الله فيك.

lone

26/09/2004, 12:54 PM

اخوي معمرها... الله يعافيك وجزاك الله الف خير على مرورك...

اخوي صقر... الله يحيك ومشكور على المشاركة...

بالنسبة لمنطقة ام حويض... هذي سلمك الله طريقها عسر شوي لكن تقدر تدخل لها من جهتين حسب علمي. الجهه الأولى عن طريق العقير، يعني توصل الى ميناء العقير القديم وقبل ما توصل المينا تجيك سليته على اليمين تاخذها وتمشي مسافة ساعة ونصف تقريبا تقطع فيها منطقة الزخنونية وبعدين تجيك منطقة ام حويض على الجهة اليسرى... بس الله يعينك على الخط... تراه وعر شوي.

والجهه الثانية عن طريق دوحة حماة وهذي مشوار شوي...

وبالتوفيق انشاء الله...

mox600

26/09/2004, 03:08 PM

والله السبيطي يوسع الصدر
تسلم على الصور

عاشق الدحروج

26/09/2004, 03:23 PM

مشكور على الصور الحلوه بالعافيه اخوي

lone

26/09/2004, 04:09 PM

الأخوة mox600 و عاشق الدحروج...

الله يعافيكم ، وجزاكم الله كل الخير على المرور والمشاركة...

اخوكم
Lone

استكوزا

26/09/2004, 09:52 PM

السلام عليكم ورحمة الله وبركاته
جعله الله هنيئا مريئــا .....ويعطيك الف عافية على الصيد والصور.......

lone

27/09/2004, 07:35 AM

اخوي استكوزا...

الله يعافيك... وجزاك الله كل الخير على مرورك...

أبو مقص

27/09/2004, 08:37 AM

صور جميلة .. بالعافية عليكم

:cool:

طفاحي

27/09/2004, 10:16 AM

الأصل كُتب بواسطة أبو مقص
صور جميلة .. بالعافية عليكم

:cool:

بس بغيت اسألك
صيدكم كان بسنارات ولا خيوط ولا شبك .
وبعدين وشلون الغزر هناك (العمق).
فيه دواب مثل الزخنونيه.
هي بعد الطينه او المطينه ولا قبل .

ومشكوووووووووور وما قصرت علىالصور

اخوكم:-
طفاحــــــــTFAHEــــــــــي.

lone

27/09/2004, 11:02 AM

مشكوووور اخوي أبو مقص على المرور والمشاركة وبارك الله فيك...

اخوي طفاحي... حياك الله...

بالنسبة للصيد كان بسنارات وخيوط ومد...

المد كان كله حواقيل... والشعري اغلبه كان بالسنارات... والسبيطي ظارب على سنارتي ... ولك ان تتصور ايش سوى فينى على ماجبته... مكينة السنارة دخنت على ما وصل...

وبالنسبة للمكان... كله فشوت، واذا تدعم قدام الفشوت شوي يجيك غز ما تقدر توقف فيه...

والموقع بالضبط، بعد ما تنزل من سلاح الحدود اللي على الجبل تمشي الى ان توصل السيف وتاخذ يمين وبعدين تمشي الى ان تجيك ارض رمله ، تقطعه حتى تنتهي وعبقها شوفلك اي مكان على السيف ووقف...

وعلى فكرة ... المكان يحتوي على انواع عديدة من الاسماك منها الشقر والبياح والينم والنيسر والشعوم والشعري والسبيطي ... لكن الغريب ما صدنا ولا هامور ؟؟؟

اذا فيه احد خبرة هوامير ... يفيدنا الله يفيده...

اخوكم
Lone

راعي الفُلك

27/09/2004, 12:03 PM

السلام عليكم ورحمة الله وبركاته

ماشاء الله تبارك الله

أخي العزيز الهامور يكون في الغزير وليس في العاري .

lone

27/09/2004, 12:55 PM

حياك الله اخوي راعي الفُلك، وجزاك الله كل الخير على المعلومة المفيده...

لكن حنا قد صدنا بواليل وهوامير في رقوق من قبل؟

ياليت تفيدني افادك الله...

الكشاح

27/09/2004, 01:18 PM

السلام عليكم ورحمة الله وبركاته

اخي العزيز....lone......صيد طيب والله يزيد ويبارك

وعلى طاري ام حويض ان خابر من زمان منطقه في الدمام..مقابل الناصريه اسمها ام حويض

فسبحان الله احيانا الاسماء تنقل من منطقه الي منطقه...واحيانا يكون الاسم يطلق على المنطقتيين

فعندك مثلا ولاية( صور)العمانيه اخذ الاسم واطلق على منطقة( صور) التي في لبنان

لك منت التحايا...وتحفنى بالجديد

lone

27/09/2004, 04:06 PM

اخوي الكشاح... يسعدلي مساك وشرفني مرورك ومشاركتك... وجزاك الله كل الخير على هالكلمات الحلوه...

انا صراحة ما رحت لبنان ولا اضن اني بروح... بس عمان انا شفتها وسبحان اللي خلق وفرق بن (صور) عمان و (صور) لبنان... ما فيه وجه مقارنه!!!!!!!!!!!!!!

ترى هذي مزحه وانا اخوك... ولاجيت للحق، انا ماشفت مثل كرم وطيبة قلب العماني.

اخوك
Lone

MARINE

27/09/2004, 10:54 PM

ما شاء الله ايش هذا الصيد اللي يوسع الصدر
ياسلام السبيطي يصلح فيليه اما الشعري مقلي
بالعافية ان شاء الله اخوي lone
ومشكور على الصور الرائعة
بس عندي لك شئ اذا كنت تعرف تغوص
وتبي الهوامير دور تحت الصخور انا اشهد انك بتعين خير اذا كان فيه هوامير بكثرة في
هذه المنطقه
اخوك
MARINE
:heart:

lone

28/09/2004, 08:46 AM

حياك الله اخوي MARINE ، ويشرفني مشاركتك في الموضوع...

وانت الصادق... السبيطي كبسنا عليه والله وكيلك مابقى الا العظامة... والشعري شي انقلى وشي مازال مثلج... للأسف!!!!!!!

وجزاك الله كل الخير على نصيحة الغوص... بس للأسف اخوك ماله في الغوص. جربته كم مره بس بدون اسطوانات وكان متعب شوي بالنسبة لي لأن عندي مشكله في الاذن وخفت انه يزيدها علي...

لكن ما ادري اذا كان يختلف بالنسبة للغوص بالاسطوانات والا لأ. وعلى العموم انشاء الله يجي يوم ونجربها...

بارك الله فيك اخوي MARINE على مشاركتك، وهذا بعض مما لديكم... خاصة صوركم في ابو قميص...

اخوك
Lone

MARINE

28/09/2004, 06:30 PM

حياك الله اخوي lone
كيف حالك ان شاء الله مبسوط بشرني عنك
اما بالنسبه للغوص فأنا اقصد هوز ونظارة وزعانف بس
انا صحيح غواص وبإمكاني استخدام عدة الغوص بس
وقت الصيد مانحتاجها لاني ما اغوص في اعماق كبيرة
وجرب تراك منت خسران شئ
اخوك
MARINE
:heart:

طحنون

28/09/2004, 09:24 PM

السلام عليكم ورحمة الله وبركاته
هلا اخويlone
ماشاء الله السبيطي المطلوب
والشعري ماشاء الله متربع سمين
الله يوفقك اخوي
بس تراام احويض منطقه خطره انتبه منها
جميع انواع الزواحف حتى (الصل ) تراه موجود والكوبرا
اختو تصريح والا لا
السبيطي وش ظرب عليه
بالتوفيق
اخوك طحنون

gulfhunter

29/09/2004, 10:20 AM

السلام عليكم ورحمة الله وبركاته

ماشاء الله صيد طيب مثلك

وبالعافيه الكبسه

lone

29/09/2004, 01:06 PM

الاخوة MARINE و طحنون...

حياكم الله واسعد الله صباحكم... استبيحكم عذرا للتأخر في الرد لأني ما ادخل على النت الا من العمل لأنه سريع شوي، فغالبا ما اكون متغيب عن المنتدى في الليل... فالعذر والسموحة...

اخوي MARINE ... ماشاء الله عليك... باين من الصور اللي من رحلة ابوقميص انك راعي غوص ومسدسات ... والله يرزقنا نتعلم الغوص انشاء الله...

اخوي طحنون... بارك الله فيك وجزاك الله خير على المشاركة...
فعلا زي ما قلت المنطقة خطرة والقوارش اللي فيها كثير... في رحلة قبل هذي احنا ذابحين عقرب يم الخيمة ... وطردي ورا شبث بس فرط منا...
وبالنسبة للتصريح ... تصرح عادي من سلاح الحدود اللي في المنطقة وتراهم سهلين... بس يبيلك سيارة 4X4 ويالة يمديك توصل لهم...
وبالنسبة للصيد ... اغلب الصيد كان على ربيان حتى السبيطي... الخثاق ما يضرب عليه ذاك الزود... بس الربيان خذ شغل... والله يوفقكم اذا لكم روحة قريب...

اخوي gulfhunter ... جزاك الله خير والله يعافيك انشاء الله ... وترى لو ندل لك درب كان عزمناك ولا يهونون الشباب ... بس عاد العذر والسموحة وانا اخوك...

اخوكم
Lone

MARINE

29/09/2004, 07:15 PM

حياك الله اخوي lone وانت ان شاء الله منت lone كلنا معك
وتعلم الغوص من اسهل الامور
واذا معزم على تعلم الغوص انت واحد من اخوياك
عطنا خبر بس
والله يوفقك
اخوك
MARINE
:heart:

gulfhunter

01/10/2004, 07:51 AM

حياك الله أخوي ومشكور وماقصرت وتراها وصلت

هاوي مقناص

01/10/2004, 10:01 AM

الأصل كُتب بواسطة عاشق الدحروج
مشكور على الصور الحلوه بالعافيه اخوي

lone

02/10/2004, 08:13 AM

كفو والله اخوي MARINE... تقول وتطول... وبيض الله وجهك...
وابشر انشاء الله... اول ما احس اني مستعد راح اعطيك خبر...
وجزاك الله كل الخير...

الاخوه gulfhunter و الخشف... بارك الله فيكم وحياكم الله...

MARINE

02/10/2004, 01:30 PM

حياك الله اخوي lone حنا حاضرين للطيبين
في اي مكان وفي اي زمان
انت آمر وحنا نطامر
اخوك
MARINE
:heart:

النوخذة

08/10/2004, 11:12 PM

السلام عليكم ورحمة الله وبركاته
باين على السبيطي انه انثى والسبب الحمرة اللي بالشفايف؟!؟
عندي سؤال واحد بس ...
اللي في قرشة الصحة وش يطلع؟؟؟
مشكور على الصور وننتظر المزيد

المحتسب

09/10/2004, 08:54 AM

ماشاء الله يا .lone. على الصيد وسلمت يدك الله يرزقنا على الأقل عزمتنا ياخوك
....... لا فيه العافيه لكن حبيبي حبيت أسأل هل هي عن طريق مدينة العيون ومن ثم نهاية طريف العقر أتجه يمين مدة ساعه ونصف ولا أنا غلطان ؟
تحياتي لك وللجميع

lone

09/10/2004, 03:52 PM

اخوي النوخذة...
بارك الله فيك وجزاك الله خير على المرور والمشاركة...
وباين عليك خبير في انواع السمك... اما انا حدي اعرف انه سبيطي ولا لأ... لكن هذى معلومة مفيده بالنسبة لي ... ومنكم نستفيد...
اما بالنسبة للغرشة ... فهذا عسل سدر... وبيني وبينك انا مادريت ايش احط يم السمك علشان يبين حجمه... مالقيت الا هالغرشه في وجهي كان احطها... عاد انت لا تدقق وانا اخوك!!!!!!!!!!! ..... :D

اخوي المحتسب...
الله يعافيك وجزاك الله خير على المرور والمشاركة...
وما اقول لك الا زي ما قلت حق اخوي gulfhunter ... لاكن العذر والسموحة وانا خوك...:(
اما بالنسبة للطريق ... فحنا طلعنا عن طريق القرية الين وصلنا الى المفرق الي يطلع يمين على العقير، وبعدين مشينا الين قربنا من مينا العقير وجاتنا سليته على اليمن واخذناها ... ومشينا مسافة ساعة ونصف الى ساعتين تقريبا حتى وصلنا الى منطقة ام حويض... وهناك ردميه تاخذها وتطلعك على مركز سلاح الحدود...
وللتنبيه يبيلك سيارة 4X4 وياله تنزل من المركز الى السيف اضافة الى كلام اخوي طحنون المنطقة خطرة وكلها زواحف ... لكن اعتقد ان الجو الحين زان وانشاء الله تخف هالزواحف...

انشاء الله بكرة او بعده راح احط صور صيدنا هالاسبوع من منطقة رأس الزور...

وجزى الله الجميع خير على المشاركة والاطلاع...

اخوكم
Lone

baracuda

08/09/2012, 10:53 AM

صيد طيب ورزق وفير
الحمد لله

قناص2000

08/09/2012, 11:05 AM

الله يعطيك العافية صيد موفق

accentkool

11/09/2012, 02:43 AM

ماشاء الله تبااارك الله
صيد جدا طيب ورحلة موفقة
ابداااع الشعري والسبيطي
وعليكم بالف عافية

hunter78

12/09/2012, 11:53 PM

يا أخوان الموضوع من ال2004!!!!!!!
وهذي الأيام ما تحصل الشعري إلا من الغزير بالقوارب