المساعد الشخصي الرقمي

مشاهدة النسخة كاملة : !!!...قصيده في احوال القنص هذه الايام....والرد عليها...!!!


((( الحر)))
03/10/2004, 05:12 PM
بسم الله الرحمن الرحيم
*******
*****
**
هذي قصيده ارسلها لي احد الاصدقاء وهو الشاعر/ ابراهيم العبدالرحمن من اهالي الفيضه بالسر
وهي تتحدث عن معانات اهل الصيد في المنطقه والعقبات التي يواجهونها
وحال القنص عموماً في بعض المناطق...!!!
وقد قمت بالرد عليه .... واليكم القصيده والرد عليها ....
ارجو ان ترتقي الى اذواق اخواني
الاعضاء والزوار...!!!
*********
****
**



بدينا بذكر اللي لما بالورى يعلم=له الناس تسجد طالبينٍ لغفرانه
الهي طلبتك يارحيمٍ لنا ترحم= اذا جاء الحساب وكل وزنٍ بميزانه
واسلم على اللي للقصيده سمع واهتم= سلامٍ بريح عطور بقشان واخوانه
لفانا سهيل وقالو الربع قم واغنم= ترى كل طلحه باصفر الريش مليانه
تشوف الصفاري والقميري وهو مشحم = توكل على الله وادحر ابليس واعوانه
ترى الفجر موعدنا بعد ماتصلي قم= نبي نمكنه من قبل يكفخ بجنحانه
واخذت ام خمس مصرحه وارد المقنم= وشد الفشق مكتوب رقمه وعنوانه
ركبنا على الجكسار الابيض وقلنا تم= نبي نطرد الصيد المذكّر بشعبانه
مشينا ولفّينا ودخنا وزاد الهم= نشوف الشعيب ولا وصلنا لشجرانه
عقومٍ تخاطم وابترمنا عليها برم = من الحرص كل صك شبكه وبيبانه
واذا عاملٍ ينفخ واذا عاملٍ يرجم= وكلٍ علينا يرفع الصوت بلسانه
وش الراي قالو للعصل نربط المحزم= معه وادي الشوكي به الناس شبعانه
وقالو نبي نمشي ولاضننا نندم= ترى الصيد بالشعبان يعنى على شانه
وصلنا والى العالم تقل داخل المرجم= وكلٍ معه بندق والاعصاب تلفانه
واذا جت قميريه والى اللي وراها كم=ثلاثين كلٍ يمها مد علمانه
ويمر الفشق من عند راسك تقول اسهم= ولا تعرف الرامي ولا وين مسكانه
لقيت السلوم مضيعه والطريق اظلم=سلوم القنص ضاعت وضعنا بميدانه
وصوّت ياربعي مشينا تراه اسلم= قبل لايجي خبلٍ تصيرون نيشانه
نبي نمتنع عن صيدٍ اغبر وكله غم= وابيّع سلاحي لو يجيب اقشر اثمانه
واعّود للوحاتي وابحط لي مرسم= واقول الهوايه رسم بالزيت والوانه
وصلو عدد مالاح وسط الخضيرا نجم =على الهادي اللي خصه الله بقرآنه



الشاعر/ ابراهيم العبدالرحمن.... الفيضه بالسر
يتبع الرد
((( الحر)))
03/10/2004, 05:19 PM
رد

اخوكم


...((( الحر)))...




هلا بالذي صـاغ المعاني لنا واحكـم=هلا بالـذي يطلـب رضى الله وغفرانـه
هلابك عدد ماطاف بالبيت والمحـرم=وعدد ماشهـر بالجـو حـراً وشيهانـه
وارد السـلام بمثـل ماقلت يامسلـم=تحيـه بريـح عطـور ورده وريحانـه
واقول انتظر ياصاحبي قبـل لاتنـدم=تـرفق تـرى للخيـر دربـه وبيبانـه
اشوفك تبي تكسر ومن دون ماتجـزم= وفعل الجزم يسبق على الكسـر قرآنـه
اذا الصيـد مايذكر وفي دارنا يحـرم= ولا نقنص الا مـن شريـده وخيفانـه
وكل الدروب الـي ذكرته تجيب الهـم=تباعد وخل الـدار لابليـس واعوانـه
وجهـز لنا جيبٍ على الدرب مايرحـم= جديدً مـن اليـابان رقمـه وعنوانـه
موديله من التسعين وزوده ثمانً تـم= ونوره علـى الطـرقه يقـدي لعميانـه
ومشيـه مع السكه مثل مشيت مقـدم=وما عـد طبلونه يجيب اخـر الخانـه
وراعيـه بالبـران جـزمً ولا يفحـم= يساوي طريقه بين سهلـه وحصيانـه
وجهـز امورك تالـي الليل للمجهـم=وعند الفجر مابيـن صلبـه وصمانـه
ديـار حـلاها الله ومن خيرها ننهـم= خِليّه وفيها الصـدر تستـاسع اركانـه
دليلتـك قـرمً باخصً بالدروب اشغـم= يميـز طـريقه بيـن حـزمه وجيانـه
وتلقى الخباري مستديره كما الدرهـم= ومطلبـك في سدر تمـايل به اغصانـه
وهذاك جول طار وهذاك جول اقـدم= وهـذاك جـول يـدّرج وسـط ميدانـه
تعصب على راسك وفي وسطك المحزم=وبندقك من عبرودها الخمـس مليانـه
عليك الرمي ياعل يمنـاك ماتهـزم=علشان مـن مثـلك بخيـصً بنيشانـه
فوارغ رصاصـك ما نعده ولا تعلـم=وضرب الفشق ينفض عن السدر غِبرانه
ترى ما تشوفه صدق لا تحسبك تحلـم= وخلك مـن الاسـراف زوده بنقصانـه
ولا شفت نفسك طاوعت والحمام احجم= وصيـدك تعـدى ما هقت نفسك بشانـه
تريح وشب النار للكيف زد واكـرَم=بدلـه مـن الرسـلان ختمـه بجيلانـه
ترى ذي طرات الروح والنفس والمغنم=وكلً علـى ليـلاه ينّشـد مـن الحانـه

!!!...((( الحــــــــــــــر)))...!!!
ريف النشاما
03/10/2004, 08:05 PM
الله الله عليكما


عزالله ماقصرتوا يالشاعر المستخبي أثاريك منت بسهل

أشهد أنك حر على أسمك

صح لسانك ولسان الشاعر ابو عبد الرحمن الي صدق بوصفه

سلمت على هذا الأبداع وقد شربكت نفسك بالفخ ووقعت بمصيدت مكشات

وعليك كل أسبوع قصيده بس;)
الهلالي
03/10/2004, 08:35 PM
صح لسانكم يا الشعار . وعز الله أنكم ما قصرتوا . وأنت يالحر حليتها .
ابو عمر اللاحم
04/10/2004, 09:41 AM
صح لسان الشاعر وصح لسانك يالـ (((مغباء))) هذا اسمك بعد اليوم وكل هالسنين ومسكت مالك حق .

تقبل تحيات اخوك نهار والله يعطيكم العافيه ،،،،،
نقا هشال
04/10/2004, 09:51 AM
يعطيك الف عافيه بالفعل قصيدة ورد ولاااروع

صح لسان الجميع ولاهنتو
هاوي مقناص
04/10/2004, 10:31 AM
الأصل كُتب بواسطة الهلالي
صح لسانكم يا الشعار . وعز الله أنكم ما قصرتوا . وأنت يالحر حليتها .
((( الحر)))
04/10/2004, 11:52 PM
هلا بالعزيز الغالي .... وين ياعمي هذا بعض ماعندكم ماشاء الله... الله يزيدك...!!!

اشكرك كثير على التنسيق الرائع.... وهذا المشرف ولا بلاش;) ولا يهون اخوي ابو عايد وراعي الكحيله...!!!

سالفة كل اسبوع قصيده ...فكره حلوه... يعني كل شهر اربع قصايد... وكل سنه ثمانيه واربعين قصيده... يعني كل سنه ديوان ...يعني خمسين ديوان خلال حياتي ...حلو يابو النشاما هذي ماجابها ولا الفرزدق وجرير :D :D

وافر التحيه الخاصه................((( الحر)))...!!!
طير رمان
05/10/2004, 12:54 AM
السلام عليكم ورحمة الله وبركاته

صح لسانك أخوي الحر وصح لسان خويك أبو عبد الرحمن...

ونريد منك كل يوم قصيدة أكيد أنك مليان قصيد بعد اليوم..

ولاتبخل علينا...

تحياتي.....
العودالازرق
05/10/2004, 11:02 AM
الان عرفنا ان اخونا الغالي (الحر) شاعر بمعنى الكلمه لكن تطلبون منه كل يوم او كل اسبوع قصيده اعتقد صعبه .نخليه براحته ومع ذلك ما نعذره بمعنى كل شهر او شهرين . ويا ليتني شاعر عشان ارد على اللي معرفتهم مكسب وسلامتكم .
أبو رداد
05/10/2004, 11:41 PM
بسم الله الرحمن الرحيم
السلام عليكم ورحمة الله وبركاته


ماشاء الله .. محاوره رائعه ... صح لسانك ولسان خويك يالحر...
((( الحر)))
06/10/2004, 03:01 PM
الهلالي
بارك الله فيك وتسلم ياخلفهم

نهار
ماهناك شي مغبا يابو عمر(( واذا تبي رديه... ترى الوعد مفرق القديه))):D شفت البيت وش زينه

نقاهشال
هلا والله سبحان الله والله اني انبسط اذا شفت اسمك في اي رد لانه مرتبط بالربيع والمطر وهذا فالك يالغالي

الخشف
مشكور على مرورك يالغالي وتسلم

طير رمان
تسلم يالغالي وابشر بسعدك بالي نقدر عليه...

لي عوده للرد على اخواني الباقين
((( الحر)))
08/10/2004, 03:03 PM
العود الازرق
هلا وغلا والله يطيب فالك بعود على اسمك ....تحيتي

ابو رداد
صح بدنك ياخلفهم.... وسعيد بمرورك على المشاركه...تحيتي
الشبح2000
17/10/2004, 07:49 PM
السلام عليكم ورحمة الله وبركاته
اسمح لى ابسميك (((( نابغة مكشات ))))




شاعر ..........




واللى يقول غير كذا عليه حقققققققق ,,,,,
ابو عايد
23/10/2004, 08:32 PM
الأصل كُتب بواسطة ريف النشاما

الله الله عليكما


عزالله ماقصرتوا يالشاعر المستخبي أثاريك منت بسهل

أشهد أنك حر على أسمك

صح لسانك ولسان الشاعر ابو عبد الرحمن الي صدق بوصفه

سلمت على هذا الأبداع وقد شربكت نفسك بالفخ ووقعت بمصيدت مكشات

وعليك كل أسبوع قصيده بس;)
قناص الحبارى
23/10/2004, 09:50 PM
السلام عليكم ورحمة الله وبركاته

جزاك الله خير على هالقصيد وبارك الله فيك على الرد

لا فظ فوك... وصح لسانك

وما أجمل الشعر إاذا بدأ بذكر الله ..

وإالى الأمام يالحــــــــــــــر

أخوك / قناص الحبارى
عبرود
28/10/2004, 09:57 PM
صح لسان الشعار وقصائد جميله وفعلا من معانات القناص هذه الايام
الله يعطيكم العافيه
دنهوشنت
29/10/2004, 07:47 PM
صح السانك يالحر وابوعبد الرحمن
وبعدين الاعضا لا تضايقون الحر يكفي بالشهر مثل هالجوهره
LAND CRUSER
29/10/2004, 08:48 PM
صح لسان راااعى الفيضه وصح لساانك يالحر0


واخذت ام خمـس مصرحـه وارد المقنـم ************* وشـد الفشـق مكتـوب رقـمـه وعنـوانـه

_____________________-----------------__________________________

فــوارغ رصـاصـك مــا نـعــده ولا تـعـلـم *********** وضرب الفشق ينفض عن السدر غِبرانه


يعطيكم الف عافيه على القصيد الجميل والوصف الاجمل لالاهنتووووو0:good:
الحذر
29/10/2004, 10:48 PM
أخذت قلمي وورقتي وحاولت أكتب شعر مثل هالي تفضلوبه هالذيابه لكن خانني القصيد ودريت أن ماني حولهم الله يزيدهم من فضله وصح السانهم لكن هم كفو ووفو وريحونا الله يريحهم بالمال والبنون والعمل الصالح وجنات النعيم:good:
راعي الونيت
09/06/2005, 03:33 PM
[b]عزالله ما قصرت يا حبيبي يا الحر أنت و ابو دحيم على ها القصيد الزين وصدقوا اللي قالوا ان الدكه تخرج شعار