جنزير الدبل (سفاري 98) <<ماننحرم من افادتكم لاهنتوا

[ابوخالد 9]

السلام عليكم ورحمة الله وبركاته

مثل ماهو واضح بالعنوان الله لايهينكم عندي جنزير الدبل يفرط كم مرة واصلحه ولا نفع ونصحني كم واحد اني اقصرهـ ، لكن نبي نشوف شوركم وباي ورشة تنصحونا .

الموتر سوبر سفاري 98 قير عادي

الصراحة غيرته مرتين ولانفع يجلس فترة تمام وبعدها يفرط

وانا والله ماهنا ذاك الجور على الموتر استخدام عقال .

وعندي الله لايهينكم الرجة بعد اي مطب او حفرة يرج الدركسون رحت به لميزان المجد وكبس لي العمود اللي تحت ومدري والله وش صلح فيه وجلس فترة تمام ورجع لمرضه الاول

نبي شوركم خاصة اني ماهنا خبرة في امور المواتر

_ _ _ _ _ _

وبخصوص اليايات نصحني واحد بالاسترالية لكن انا ابي شي مايرفع الموتر نفس رفع الوكالة نبي نشوف شوركم لاهنتوا





ادري اني طولت لكن تحملونا :D

والله يبيض وجيهكم

[سوبر VTC]

و عليكم السلام و رحمة الله

حياك اخوي الكريم

عندنا ببريده يركبون دبل استخدام ياباني :good:
من التشليح
سعره ب800ريال مع الرجيع
و بعضهم يركبه ب1000 مع الشغل

مر على ورشة ابو صالح التركي بالصناعيه القديمه
متخصص بالنيسان
بجانب مركز ترايستار

بالنسبة للرجه
كبس الاذرعه + تدبيل مساعد الدركسون :good:
مساعد امريكي اي سي ديلكو
عندنا ببريده يركبونه مع شغل اليد ب150ريال
التشييك على ربلات عمود التوازن
ترصيص
التاكد من تيله العكس تكون راخيه
و تسبب رجه
تاكد من كراسي القير و المكينه
بالنسبة للياي
يركبون رقم 2 مقاس 865
ياي وسط بين اللين و القوة

هذه بعض الردود



اقتباس:

ياخوي فيه امور كثيره تسبب الرجه منها الترصيص والكفرات نفسها وعمود الدبل وعمود الكردان وعندك الشياله اللي تجي بين عمود الكردان والدفرنس وعندك ذيل الجربكس مع العمود احيانا يكون فيه فراغ بسيط ويسبب رجه وعند كراسي المكينه وعندك كراسي الجربكس فلازم تشيك عليها وحده وحده والله يعينكويستحسن لو تسوي تربيط كامل


اقتباس:
إذا كنت ما تسد شحمت عمود الدبل .. فهو قد يكون السبب حتى لو شحمته .. لأن داخله سنن وإذا راح الشحم تكسرت .. وما يتحرك مثل وهو فيه شحم .. فيصير فيه فضاوة .. ويرج
قد يكون من صليبات عامود الدبل .. أو قد يكون من مساعد الدركسون ..
إهمال التشحيم مشكلة يقع فيها أغلب أهل الجيوب


اقتباس:
السلام عليكم
اخواني الأعضاء والزوار:
بالنسبة لموضوع الاخ السائل ،سبق وان حصلت لي هذة المشكلة وليست مشكلة ولله الحمد
اذا الرجة بين سرعة80 الى 100 اكيد عمود الدبل
اذا تبي تتأكد فك العمود وجرب
انا سارت معي فكيت العمود واختفت الرجة ودورت في تشليح الدمام مالقيت واتلها للرياض واروح لميزان المجد والعضيب مافية فائدة ويدلوني على ورشة صغيرة لواحد سوري اوفلسطيني اسمة وحيد الصفدي تخصص اعمدة كردان جميع انواع السيارات على طول شرحتله المشكلة قلي عمود 100% واروح للوكالة 2180 بعد الخصم :eek:
ولقيت عنده اعمدة مجددة ضمان شهر 1000 ريال
والحمدلله الأن تقريبا سنة زي اللوز
واسف عاى الاطالة ولكن للفائدة


اقتباس:
احيانا اذا قلبت الكفرات او بدلتهن من موترثاني
تروح الرجه قد يكون السبب من الجنوط
فك عمود الدبل و امش بدون دبل
اذا اختفت الرجه فالمشكله من عمود الدبل مطعوج او يبي صليبات ربما
تقدر ايضا انك تفك العمود الخلفي الكردان
و تمشي على الدبل الخفيف و تشوف الفرق
تاكد من كلام اخوي محيسن بخصوص العكس و هل الكفر يتحرك ام لا
احيانا تكون المشكله من مساعد الدركسون + ربلات عمود التوازن
بعضهم يدبل المساعد يركب مساعد اي سي ديلكو اقتباس:
اذا كان رمان العكس راخي يسبب رجه


اقتباس:
عندك مخرطة وحيد متخصص بالا عمده ومجربه قبل بوزن عمود دبل جمس وعمود دوران باتر ول.
موقعه الصناعية القديمة.دوار الخرج ,شارع الأمير سلمان باتجاه الشرق, ثاني دخله على اليمين قبل العيسى باتجاه الجنوب, ثاني دخله يسار باتجاه الشرق, ثاني محل على اليمين.
وشوف ا لرسمه يمكن تنفع


http://www.mekshat.com/vb/../pix/upload02/images83/mk20888_wahed1.jpg

اقتباس:
أول نصيحة أنصحك فيها ابعد عن كفرات البالون كل البعد ،، تراها ماتنفع إلا بالرمل فـــــــقـــــــــط ،،

ثانيا سبب الرجة 90% من مساعد الدركسون اللي تحت المكينة !! غيره بواحد أصلي وترتاح ،،

أما إذا كانت الرجة خفيفة وملحوظة على الدركسون بس تراها طبيعية جدا بالباترول في كل الموديلات وإذا سويت ترصيص تروح وترجعلك بعد شهر أو شهرين علشان كذا مافيه ورشة تعطي الباترول ضمان بعد الترصيص ،، اقتباس:
سولة ترصيص ارضي عند المجد او اليرموك وتروح
الرجة هذي بكل الباترل انا عندي باترل 2003جنوط كرم وسويتلة ترصيص وراحة


اقتباس:
علاج الرجه للحبيب القلب الباترول

1- شد رمانات العكوس الين تروح الفضاوه
2- ادبل مساعد الدركسون
3- اعادة كبس الذراع اذ كان فيه فضاوه
4- الترصيص الجيد+ جنوط سليمة
اقتباس:
انا عندي باترول 2004 فيه رجه كان فيه بالون 900 لكن ركبت مساعد دركسون وبعد فترة رجعت الرجه .
الحل عندي فيه ورشه ببريده تصلحه على الضمان عند ابو عبدالله الهبيش العنوان جنوب بريده شارع خضيراء اسأل اي واحد عن الهبيش يعلمك عنه ومن عندي مضمون انا امصلحوه لي 8شهور ولافيه رجه ولاهم يحزنون الكفرات بالون900 ولو فيه اكبر من هذا المقاس لركبته .ولك تحياتي انا امصلحه 250ريال فقط .
اقتباس:
يقول المثل اسأل مجرب ولا تسأل طبيب كان معي 2003 وكانت الرجه مطلعه ريحتي ماخليت شي ماسويته الاشي واحد وهو ركبت مساعد دركسون امريكي جبريل لونه احمر طبعا هو مايركب على الباترول الا بالترهيم وارتحت حتى بعته وشريت سوبر سفاري ((قديمك نديمك)) 93خليجي بس طبعا الرجه موجوده ركبت اربع مساعدات استرالي مع مكينة 4800فتك ومساعد دركسون اي سي ديلكو ترهيم والحمد لله لا رجه ولا يحزنون الموتر يلاعب الهوا علما ان الكفرات دنلوب grand trekوالحمد لله
اقتباس:
انا عندي سفاري معي نفس المشكله
رصصت الكفرات ( ترصيص عادي )
شديت رمانات الفرات
غيرت مساعد الدركسون
( راحت الرجه القوية لكن ما زال فيه رجه خفيفه )
اقتباس:
فك عمود الدبل و امش على سرعه 130 و لاحظ الفرق
ثم ركب عمود الدبل و فك العمود الخلفي و اشبك الدبل الخفيف و امش على سرعه 130
طبعا اامش على السرعه اللي يطلع عنده الصوت
و لاحظ الفرق
المشكله قد تكون من الصليبات لكل العمودين
او نفس العمود الخلفي مطعوج
ارفع الموتر من الخلف
هذه الطريقة تحتاج لشخصين شخص يدوس بنزين و شخص يفحص العمود بوضع مفك من عند الجنب
وامش على سرعه 40 او 50 و حط مفك على حد العمود الخلفي من عند نص العمود ثم من عند نهايه العمود من عند القير و من عند الكارونة
و لاحظ العمود هل يفتل ام لا
بمعنى هل يبعد و يرجع مره اخرى للمفك ام لا
و هذه الطريقه احسن من المخرطه لان دورة مكينه المخرطه بطيئة جدا و لا تبين لك المشكله
اذا كان الدركسون يرج او ينفض
شيك على ربلات التوازن الاماميه + ربلات مساعد الدركسون و اذا كان المساعد رخو او خفيف غيره و ان حصل ادبل المساعد حط بجنبه مساعد اي سي ديلكو
اقتباس:
المخرطه ما تبين :no2:
لان سرعه دوران مكينه المخرطه ضعيفه جدا جدا :no:
و هذا كلام خبره اهل ورش
و افضل حل تطبيق ميداني :good: يرفع الموتر من الخلف
خصوصا عند فحص العمود الخلفي
اما الدبل يمسك خط و يجرب اقتباس:
وحل المشكله 1/ بأن الرمان مرتخي فلذالك تحس بالرجه ولمعرفه الرمان هو شاد اول لأ ارفع الكفرات الي قدام كانك تبي تغيره لارفعته من دون تفك الصواميل رجه كانه رج معك فأن الرمان يبيله شد جرب الثاني (( لاتخافون لو يرتخي الرمان له تامين بس راح تكون به رجه بس ))

2/ الربطات الي قدام رح لم الميزان هو الي يعلمونك
مع العلم بأن كانت عندي رجه وغيرت كراسي المكينه والقير والي معدمهن الربطات الي قدام



اقتباس:
عانيت من رجه بموتري عندما تكون السرعة بحدود 110 تقريبا وغيرت الكفرات وقمت بترصيص الكفرات ( ارضي ) و مريت كثير من الورشات وكانوا يقولون لي إما من الذارع ( وخاصة أنه كان فيه فضاوة ) أو من العمود ..... وشيكت على عمود الدبل وعمود الكردان عند أحد المخرطات المشهورة وكانوا يقلون المشكلة عندك من العمود .... السالفة طويلة مع الورشات
المهم أنني مريت الصمعاني في تشليح بريدة و أول ما قام بقيادة الباترول قال لي المشكلة بسيطة
وكانت المشكلة من الرمان ولم يقم بتغييرهن بل قام بفك وجيه الرمان ( الوردات ) ورماهن وقام بإرجاع الرمان و تركيب الكفرات والحمد لله ذهبت الرجة وقام بكبس الذارع ولم يأخذ إلا 150 ريال ..... جزاه الله خيرا
اقتباس:
احد الربع مسك طريق حائل طالع من بريده هو ميكانيكي :good:
و معه باترول سلقه بنصف المسافه صارت عنده رجه
و قف الموتر و مسك االكفر الامامي الايسر من الاعلى و حركه للداخل و الخارج
و حركه مره ثانيه لكن هذه المره من عند الجنب حصل فيه فضاوة
المهم مشى ووصل حائل و مر اقرب ورشة
و فكوا له الكفر
المهم هو بنفسه فك العكس او راس العكس
و حصل المسمار او التيله راخيه
اضربه بالشاكوس الين تكت و راحت الفضاوة
و انضبط الموتر :good:
يعني المطلوب منك ارفع الموتر من الامام
و حرك الكفرات الاماميه شف بهن فضاوة ام لا
اقتباس:
اخوك كان له نفس المشكلة والاقتراحات المذكورة. واحترت ايش اسوي..؟؟
طبعا بديت باقل الخسائر وهي..تغيير المساعد وهو الموجود عند محل الرماية (المساعد الاصفر)..النتيجة..خفت الرجة بشكل بسيط ولكن غير مقنع..

قبل فترة (8 اشهر) مريت على راعي ورشة يماني يشوف لي العلة...جزاه الله خير قال لي والله يا اخي انا ما افيدك ولا اعرف احل المشكلة..لكن.. مر على محل ميزان قريب من السجن بالثقبة ويعطيك شوره.
اول ما قلت له السلام عليكم عندي مشكلة الرجة في السيارة الا وقالي "صديق جيب سيارة فوق حفرة" واول ما مسك العمود الا وهو يتحرك بسهولة.!!
قال- لازم مخرطة يسوي كبس!! قلت روح!
قال لازم بعدين يسوي ميزان!! قلت روح!
قال لازم بعدين ترصيص ارضي!! قلت كم كل اللي قلت عليه ؟؟
قال 450 ريال وشغل ساعة--ساعة ونص.
اخذت لي لفة ورجعت... ولله الحمد السيارة الى اليوم ولا احلى ما شاء الله تبارك الله.:good:



اقتباس:
اخوي انا كانت عندي هذي الرجه او بالاصح ( رعشـــه ) او ( حــره )

اقتباس:
وكان سببها الأول عمود الدبل وتم تغييره بواحد من التشليح ولم ينجح الأمر
وتم تركيب ( فــــرارات ) وخفت المشكله ولم تنجح 100%
وبعدين لقيت المشكله الثانيه بعمود الكـــردان وتم تغييره بواحد من التشليح
ولم ينجح الأمر !! ... قلت أجل مالي إلا أشوف جديد وكان سعره 2600 ريال بالوكاله
وقلت أجل مالي الا أرصص العمود ... والحمد لله رصصت العمود عند مخرطه
متخصصه بترصيص جميــــــــــع أعمـــــــــــــدة السيــــــــــــــــــارات
وعندهم جهاز يخلي العمود يمشي سرعة 120 كيلو ويوضح الرجه
وبعد الترصيص جربت الموتر وماشاء الله تبارك الله :good::good:
ضبط إلى 98% وقلت أجل أبكمل الباقي بالترصيص الأرضي للكفرات
ورصصت ارضي للكفرات ورجع الموتر نـــــــــــــــاعـــــــــــــم بالمشي 100%
الترصيص الأرضي كلف 120 ريال
ترصيص العمود كلف 150 ريال عند مخرطة العوفي في المدينه المنوره ( صناعية القبلتين )

اقتباس:
الحل عن ميزان اليرموك او المجد او العضيب يكبسون لك العمود ب150 ويرصصون ب80 وبعده عال العال ...
انا صارت معي قديم في نفس الموديل ...

اقتباس:
ويا شباب ابشركم حليت الرجة عندي
فكيت راس العكس ولقيته مرتخي
وضربته بالشاكوش والحمد لله ضبط
بس فيه رجة بسيطة يمكن يبيلة وزن اذرعة
ولكم جزيل الشكر
وما راح انساكم
محبكم ابو راشد








هل تعاني من رجه في الدركسون مابين سرعة 80 الى 100 ؟

اذا كان ذلك فابشر بالحل :

اولاً : بعد السؤال والتمحيص في الورش واصحاب الباترولات للاستفادة من معرفة الخلل ، وبعد الابحار في هذا المنتدى حول ماكتب عن هذه المشكلة جزاء الله العاملين عليه والمشتركين والقارئ الكريم كل خير .

توصلت الى التالي :


أ- قد تكون المشكلة من عامود التوازن
ب- قد تكون المشكله من عامود الدفرنش الامامي
ج - قد تكون المشكلة من الربلات في اعمدة التوازن او اصابات في نفس العامود
د - قد تكون المشكلة في مساعد الدركسون
ومشاكل اخرى كثيره ذكرت

ثانياً : اتمنى من الزملاء المشاركين في هذا المنتدى ان يدلو بدلوهم على اساس تجربه و واقع وليس على اساس قال فلان او فلانتان لان ذلك قد يكلف صاحب المشكله الكثير من المال . او ان يقترح علاج لهذه المشكله او مشاكل اخرى ويذكر ان هذا مجرد اقتراح او توقع او مشكله واجهت احد زملاءه .

ثالثاً : بعد توفيق الله عز وجل بدءت بحصر المشاكل والورش التى كتبت في المنتدى وذهبت الى احد الورش في منطقة الرياض التى ذكرت في مواضيع سابقه تخص المشكله ( وان سمح لي الزملاء المشرفين وضعت اسم الورشه )
بمبلغ 720 ريال سعودي فقط تم علاج المشكله على النحو التالي :


تم تغيير جلب الشداد وجلب عامود التوازن وجلب عامود الدركسون وايضاً مساعد الدركسون بمبلغ 350 ريال
والحمدلله تم اصلاح الخلل المذكور والله اعلم هل الاصلاح مؤقت ام دائم والله الموفق .


1- مايقارب من ال 50 % من الاخوان الذين شاركو بما يخص هذا الموضوع قد ايدو تركيب (الفرارات). 2- اما بقية الزملاء فكان هناك تضارب حول عدة نقاط ملخصة فيما يلي : 1- تغيير مساعد الدركسون بمبلغ 140 ريال 2- جلب جديده بمبلغ 230 ريال 370 قطع غيار + 350 قيمة شغل الورشة = 720 ريال اسأل الله العظيم رب العرش الكريم ان يتقبل صيامكم وقيامكم ويجعلنا واياكم ممن يخافه ويرجو رحمته

][/SIZE]

http://www.mekshat.com/vb/images/misc/progress.gif

[quote]طبيعة الباترول يرج عند سرعة 90/100/110 وانت توك شاريه جديد (عيب مصنعي ) ولكن اخوكم شرى باترول 2003 جديد وبعد مضي شهر بدات الرجة وبستشارات اصحاب الخبرة اشرو بما هو اتى :-
quote] 1- كبس الاذرعه الامامي والخلفي0 التكلفه (200) ريال 2- ترهيم مساعد امريكي اضافي مع الموجود 0 التكلفه (160) ريال 3- ترصيص الكفرات ترصيص داخلي لزق0 التكلفه (100) ريال وبعد عمل هذه النصائح ضبط الموتر او راحت الرجه , ارجو من الله اني افدت في هذه المداخلة والله يحفظ الجميع
[/



http://www.mekshat.com/vb/images/misc/progress.gif

[سوبر VTC]

هذي بعض الردود




انا عندي رجه بدركسون مع المطب فقط جيب ربع سلقه 99 ولا خليت شي ما غيرته
من ربلات ورباطات وكبس ركب

وقبل يومين غيرت كراسي المكينه والقير وخفت الرجه بنسبه 90 بالميه الحمد لله
تدبيل مساعد دركسون اشوف كثير من الشباب يتكلمون عنه وعجزت اقتنع فيه لانه من وجه نظر شخصيه
قابله للصح او الغلط ان المساعد الاضافي يضغط علي دوده الدركسون وتكون معرضه للعطل
ملاحظه رجه الدركسون مع المطب فقط باالباترول تتاثر باي فضاوه لو كانت خفيفه جدا جدا
والرجاء من لديه تعليق ان لا يحرمني من خبرته وتجاربه ولكم مني جزيل الشكر
واشكر صاحب الموضوع لطرحه المفيد وبالتوفيق


ركب فرارات بـ 450 ريال من عند السليماني وريح عمرك ..

اقل صرفية بانزين بالخطوط واريح للموتر .. وتنسى هالصوت ..

ولاتنسى تدعيلي بالتوفيق يالغالي ..





أخواني السلام عليكم ورحمة الله وبركاته يعطيكم ألف عافيه ما أبي أطول عليكم


خاص لأهل الرياض وما جاورها واللي يبي يجي من برا الرياض الله يحيه


بس نزلت الموضوع لأني سمعت أن فيه ناس من الرياض يسافرون برا الرياض عشان يدبلون مساعد الدركسون فأقولهم ليه موجود في الرياض وقديم راعي الشغله هذي يعني ماهو جديد



بالنسبه للي معهم جيوب ومركبين كفرات بالون وفيها رجه على سرعه معينه مثل من / ال 80 كيلو متر في الساعه
إلى / ال 100 كيلو متر في الساعه
في ورشه بالصناعه القديمه صناعية الأمير سلمان داخل الرياض مخرج 17
عندهم تدبيل مساعد دركسون وتربيط وكل شي وشغلهم ممتاز ورخيص مره
دبلت عندهم مساعد الدركسون جبريل طلع علي مع قيمة المساعد مع الترهيم 250 ريال
وكل اللي أرسلتهم لهم أستفادو منهم وعني أنا كذا سياره أشتريها وأسويها عندهم
علماً بأني ما أستخدم غير باترول موديل من 1997 ونازل
وفيه ناس يقولون عند ورش ثانيه معروفه بدون ذكر أسامي مايقل عن 1500 ريال

ومميزاته مافيه رجه وهذا أهم شي ثبات السياره في الخط وغير هذا المساعد الجبريل في تقنية أمتصاص الصدمات المفاجأة يعني لو كنت مسرع مثلاً تمشي 160 كيلو ولفيت الدركسون بقوه مايلف معك على طول لازم شوي شوي وهذا يمنع إنقلاب السياره لا سمح الله



لا تنسونا من دعواتكم وأتمنى الفائده للجميع ،،،،،


اللي يسوي لا يبخل علينا يعطينا ملاحظاته للفائده


وهذي معلومات الورشه
هذا رقم الجوال والثابت والمدير أسمه مبارك ورقم الجوال الموضح تحت له ،،،
الثابت /012955255
جوال / 0506436883

[ابوخالد 9]

الله لايهينك اخوي

والله لو اشكرك من اليوم الى بكره ماوفيك حقك يالغالي

بس بخصوص الدبل انا ابي واحد شغله زين يركب لي الجنزير ويقصره مضبوط

لأني ركبته كم مرة ويفرط

كانك تخبر ورشة ناصح وشغله زين بيض الله وجهك

وانا من سكان الرياض

[ابوخالد 9]

وابي اسال لاهنت عن الفرارات وش افضل نوع وكم تطلع علي مع التركيب الله لايهينك

تخبر الشتا جاي ونبي نخلص من هالشغلات بدري

والله لايهينك اتعبناك معنا وانا اخوك

[سوبر VTC]

جزاك الله خير

لاتتعب نفسك
ركب دبل كامل على الفحص اضمن لك :good:
بالرياض الربع يذكرون ورشة التركي ابو صالح
لو تجي لبريده افضل

بالنسبة للفرار برزايلي A V M



وعليكم السلام
اخوي الفرارت المتواجده بالسوق
نوع برازيلي وكويس وتحصله عند السليماني بالغرابي
وسعره 550 مع التركيب
ومجرب من كم شخص محد اشتكي منه ابد
تقبل مروري






وأنا مركب نفس النوع من سبع سنوات والحمد لله تمام التمام بس كان سعره 450 ريال مع التركيب ومن نفس المحل !!

وتقبل مروري .....


هلا اخوي
مثل ماتفضل اخوي محيسن

شارع الغرابي محل السليماني وفيه نوعين حسب علمي واحد لونه نيكل والثاني اسود انا ركبت النوع الثاني والحمد لله ماشي له الحين سنه تقريبا والسعر 550


تحياتي لك





هذا رابط بالصور لتركيب فرارات للباترول :good:


تركيب الفرارات ...خلال 10 دقائق .... صور للتوضيح (http://www.mekshat.com/vb/showthread.php?t=91709)





رابط اخر لانواع الفرارت جميع السيارات


فرارات الدفع الرباعي (أقفال الدفرنس) أنواعها وأسعارها (مهيلان) (http://www.mekshat.com/vb/showthread.php?s=&threadid=8291)


موفق

[ابوخالد 9]

يعطيك العافية

وبالنسبة للدبل ماعندي مانع اجي لبريدة بس هل الشغلة مضمونة ومجربة

لأن هالسفاري ماله امان ^ــ^

شهر والا هو راجع

وكم التكلفة الاجمالية مع التركيب

لاهنت وياليت رقم جوال ع الخاص او وصف لمكان الورشة لأني والله مادل في بريدة

[اذاني]

شف ردي علي الاخ رعاد يمكن يفيدك بخصوص الدبل


http://mekshat.com/vb/showthread.php?t=231705

[سوبر VTC]

لأن هالسفاري ماله امان ^ــ^
شهر والا هو راجع




ههه :D:p
انت مالقيت اللي يضبط الشغل
عموما
الدبل راكب مع شغله من 800 الى 1000
استخدام ياباني
لك رسالة على الخاص
موفق

[ابوخالد 9]

لاهنتوا

وبالنسبة للرسالة اخوي فتك ماوصلت احتمال لأن عدد مشاركاتي قليل !

عموما بيض الله وجهك وبامر ورشة التركي اللي انت وصفت وان شاء الله تيسر الامور ولك منا الدعاء

[Abu Saad]

اخوي سوبر فتك الف مبروك الاشراف ( توني منتبه :) ) وتستاهل اكثر والله.
وبالنسبة لترايستار تراهم نقلو يعني ( شدو) .
الوصف مضبوط لورشة التركي ابوصالح بعد بنك الراجحي لف يمين بعدين حرف تي خذ يمين ثم اول لفه يسار بعد 200 متر تجي الورشه على اليمين .
ومن الافضل تتصل عليه قبل تروح له.
وبالتوفيق.

[سوبر VTC]

لاهنتوا

وبالنسبة للرسالة اخوي فتك ماوصلت احتمال لأن عدد مشاركاتي قليل !

عموما بيض الله وجهك وبامر ورشة التركي اللي انت وصفت وان شاء الله تيسر الامور ولك منا الدعاء


جزاك الله خير
العذر ابو خالد
شيك على الخاص
موفق

[سوبر VTC]

اخوي سوبر فتك الف مبروك الاشراف ( توني منتبه :) ) وتستاهل اكثر والله.
وبالنسبة لترايستار تراهم نقلو يعني ( شدو) .
الوصف مضبوط لورشة التركي ابوصالح بعد بنك الراجحي لف يمين بعدين حرف تي خذ يمين ثم اول لفه يسار بعد 200 متر تجي الورشه على اليمين .
ومن الافضل تتصل عليه قبل تروح له.
وبالتوفيق.



الله يبارك فيك ابو ((سعد)) :D
لاهنت