وين اوقف طرادي في دبي

[مهندس بحري1]

السلام عليكم ورحمة الله وبركاته





اخوكم من الخليج، وحاليا مقيم في دبي

نويت اشتري طراد للنزهة صغير 27 قدم لغرض استخدامه في صيد بالحداق





بس ما عندي اي خلفية عن كيفية ايقاف الطراد في المارينا فأتمنى منكم المشورة:





كم عدد الاماكن التي ممكن استخدمها في ايقاف الطراد في دبي؟ واين تقع



سمعت ان اغلب اهل دبي يوقفون طراريدهم في الممزر، او الشارقة او حتى خورفكان..بس ما اعرف كم بتكون التكلفة؟ فاذا عندكم اي معلومات تفيدني، حتى لو بسيطة، لا تبخلون على اخوكم، ولكم مني صادق الحب وجزيل الدعاء

[أبوالقروش]

أخوي ان كنت ناوي الصيد من ورا شراك للطراد فأهم شي تختار منطقه فيها خير مو مدعوسه وان كانت بعيده عنك لان مشوار السياره اهون من مشوار الطراد واذا كنت تدور النزهه فما تفرق معاك حطه باقرب مكان لك.......

[sniper112]

السلام عليكم
ومبرووك عليك الطرااد اخوي وربي يعطيك خيرة ويكفيييك شرة
بخصوص سؤالك اخي الكريم
تقدر اتحط القارب في الممزر وهو مجانا بس لاتتركة فترة طويلة لانه معرض للسرقة
ولايخفى علينا السرقة في كل مكان وخاصة وسائل النقل البحرية ومستلزماتها
واذا تبغى الأمان حطة في نادي بحري ويكون الموقف محسوب عليك بالشهر تقريبا يطلع فالسنه فوق الـ 20 الف درهم
واذا بتوقفه في اي من موانئ الصيادين ترا اهم شي تحصل لك مكان تحط فيه طرادك وطبعا كل شي مجانا ولا تحتسب عليك رسووم
واتمنى اكون فدتك اخي الكريم وعسى ربي يحفظ لك مالك وبالتوفيق اخوي

[nimo_makkah]

السلام عليكم ورحمة الله وبركاته .
اخوي سنايبر والله انا سمعت من ناس عندكم بقولو لو بتحط طرادك في المرسى لازم تكون تعرف احد من اصحاب الأبوات ولا بتلاقي طرادك في وسط البحر . ـــ يعني مسوين رباطية . آمل منك توضيح الأمر .

[sniper112]

هلا فيك اخوي
شووف كلامهم سليم هذا في حالة انك ربطت طرادك في مربط احد الصيادين ولو تعرف تسوي لك مربط خاص فيك في مكان بانك لاتضيق على الناس ويكون مربط متمكن وثابت محد راح يكلمك ولكن اذا انت ماتروح البحر غير في ايام محسوبة ومعدودة مانصحك لانه الطراد راح يطلع له نو من تحت ويصير ثقيل مما يحتاج للتقشير بعدين
والشي الثاني اذا عندك تريلر اللي تحط عليها الطراد
وقف الطراد في الميناء ومحد راح يكلمك بس اسال وين اتوقف لانه فيه موانئ كثيرة للصيادين ويختلف من مكان لآخر
والشي الثالث اذا تخاف على طرادك من السرقة انا عندي خطة
اكتب على الطراد للبيع وحط رقم غير مستخدم هنا اللي حاط ف باله بيسرق الطراد لانه واقف من مدة طويلة راح يفكر انه القارب متابع من قبل الاشخاص وانه معروض للبيع وهنا راح يبعد عنه النية الخبيثة ولايخفى علينا انها موجوده عند بعض ضعاف النفوس
واي سؤال او استفسار اخي الكريم انا حاضر

[مهندس بحري1]

مشكور اخوي ابو القروش بصراحة معك حق

والف شكر يالغالي سنايبر على المعلومات القيمة
بس بصراحة خوفتني من سالفة السرقات
بس ال20,000 وايد غالية

ما تعرف اندية بحرية ثانية في دبي او بجوار دبي؟ ممكن معلومات عن اسماءها و مواقعها

ورجاء لا تبخلوا عنا بأي معلومات عن موانئ الصيادين لأني ما أعرف ولا واحد

[sniper112]

السلام عليكم
بخصوص النوادي البحرية موجود في جميرا نادي بحري
وفي الشارقة موجود عند قريب من منطقة الميناء اللي قريب من حديقة منتزة الجزيرة بس الطرف الثاني على ماعتقد
وبخصوص موانئ الصيادين في الممزر من جهة دبي بتحصل ومن جهة الشارقة بتحصل وبخصوص السرقة انا ما اجزم انه بينسرق ولكن المال السائب يعلم السرقة
بس توكل على الله وحط طرادك ومايصير الى اللي ربنا اراده وبالتوفيق عزيزي