اخبار سوق بريدة او حراج بريده بالاصح

[عنـاد]

السلام عليكم ورحمة الله وبركاته

الاثنين الماضي رحت يم حراج الطيور اللي في بريدة وخبركم انا منيب يم طيور ولا غيرها
بس ابقولكم اللي شفته

جا العديد من الحرار بعضها معها علومها اللي صايد اربع واللي صايد ثنتين
وجا شيهانتين جبليات وحدة صايده حبارى على قول راعيها وسيمت بثلاثه ونص واختها سيمت بالفين وخمس

طبعاً ماصار فيه بيع في الحراج نظرا لقلة المشترين
جء حر شكله غريب ريشه مرنقش وفيه اكثر من لون اول مره اشوف مثله وشكله مهوب عريض مثل باقي الحرار جاي شكله مطاول مثل شكل اليمامه بس انه طويل بالحيل وعمره حسب ما سمعت انه يا رابع او خامس وصايد ومنومس راعيه بس عيبه الصياح كل ما قرب منه احد صاح الطير هادي ما يتحرك ولا شي لكن يصيح

وجا فرخ وحش وحدوه بثلاثه لونه احمر مغاتير
وجت وكريه ولا احد ناظرها
وجا حر قطامي حسب كلامهم ولا منيب افرق القطامي من غيره انا وسيم بحوالي 3800 ولا بيع

هذا ما شفته في الاثنين الماضي والاثنين هذا كاني مريت من يم الحراج نقلت لكم علومه كلها ان شاء الله


واللي عنده اي استفسار او اي شي يبلغني



تحياتي عنـــاد

[قشاع الرمث]

السلام عليكم ورحمة الله وبركاته


هلابك اخوي عناد ..لاكن عندي ملاحظات
ارجو انك تا خذها بصدر رحب.



وجا فرخ وحش وحدوه بثلاثه لونه احمر مغاتير ؟؟؟؟؟؟؟
وجا حر قطامي حسب كلامهم ولا منيب افرق
القطامي من غيره انا وسيم بحوالي 3800 ولا بيع ؟؟؟؟؟؟؟؟

ما ادري رايح لسوق الطيور والا سوق الحمام

:confused: :confused:

ارجو التاكد من الاسعار .
مع الشكر ..

[عنـاد]

وعليكم السلام والرحمه والاكرام


هلا اخوي قشاع الرمث

وملاحظاتك ما تزعل وش دعوى ؟

بس انا جبت اللي شفته لان السوق كان راكد وبالنسبة للوحش الصراحة كان جرمه صغير مهنا هاك الكبر اللي يسوى جرمه صغير يمكن انه حول البحريات

اما القطامي انا ما اعرفه عن غيره بس سمعت اللي يحرج يقول انه قطامي واعتقد فيه علة ولا ما خلوه الصقاقير بس مدري ويش هي و ابشرك محد ناظره في السوق كله كانو لاهين مع طير ثاني مدري وش علومه ومع الجبليات

وترا السوق حق بريده لك عليه شوي اغلب اللي يجون يجون يوسعون صدورهم بس وانا واحد منهم لاني العام سالت كل اللي في السوق كنت ابي لي وكرية من حقات الجزاير الشقح وكلهم قالو ما نخبر لك شي مع اني قد سمعت ان الوكريات حقات الجزاير مهيب هاك الندرة اللي تعجز تلقاها عند صقاقير منطقه معينه


ترا سوق الطيور كان سوق حطب منول :)

وانا هذاي ابروح اشوف اسوق عقب شوي وارد عليكم وش صار فيه وابتاكد لك زود عن اللي جا الاسبوع اللي راح

اتمنى انك ما تاخذ على خاطرك مني اخوي قشاع الرمث بس خبرك عليمي انا ونقلت اللي شفته وسمعته واذا تبون صور علموني واصور لكم من عيوني الثنتين واعرضها لكم واعلمكم الاسعار


تحياتي

[عنـاد]

توي جاي من السوق الساعه خمس وثلث العصر جاء طيرين واحد لونه اشعل
وانفتح باب السوم بالفين من صاحب الحراج اللي هو الشريدة بعدين وصل 3100
ووقف السوم عليه وراعيه يمدحه بالحيل يقول يلعب على الملواح لعب يروّع ماشاء الله تبارك الله
وجا طير ثاني لونه اجهم شوي وحش وانفتح باب السوم بالفين وميه وجيت وهم يحرجون عليه ولهم يجي ربع ساعه يحرجون عليه ولا احد زاد عليها :)
وجت شيهانه جبليه وصارت لها سالفه وطلعت من السوق
هذا اللي شفته ذكرته


وصار فيه تعديل يبي يصير السوق ليلة الاثنين في الليل

ويلاحظ ملاحظة في سوق بريدة عدم الركود يعني يوم يصير الطلب عالي ولا فيه عرض ويوم يصير العرض ولا فيه طلب

واللي عنده اي استفسار لا يرده الا لسانه وكما قلت لكم تراي عليمي بنمرة واستمارة نروح نتفرج في السوق ونجاذبهم الاحاديث كود نتعلم

[خبير الصقور]

السلام عليكم ورحمة الله وبركاته


مشكور اخوي عناد, لاتصدق كل مايقال في الحراج

[عبكري]

السلام عليكم ورحمة الله وبركاته.
مشكور أخوي عناد على هالموضوع والظاهر أني شايفك الأسبوع اللي راح.....
بالنسبه للطير اللي تقول طويل ومرنقش هذا طال عمرك تفريخ وعمره خامس ولا ذبح إلا وحده العام درج وكان قبل العام مع أحد الأمراء لكن والله مدري منهوهذا بالنسبه للطويل
أما الثانيات كلها معيوبات واحد منهن اصبعه الصياد منقطع وريشيشتين من الذنيبه موسرات والثاني فيه طال عمرك قلاع وديدان يعني مايسوى ولا ألف ريال على أن الطير مزيون بالحيل.

الله يجيب الخير لديار الخير

[عنـاد]

اشوا جاء احدن باخص يفزع لي ويأكد كلامي ان الطيور اللي جت زينه بس شكلها معيوبه ولا ما كان عافوها الصقاقير :)

هلا اخوي خبير صقور والله يالغالي انا لا صدقت ولا كذبت انا نقلت اللي شفته وسمعته بس :)

هلا اخوي عبكري اشوى انك جيتا تفزع لي تلاقطوني الشباب معد ادري انا في يد من :)

مستغربين من كلامي وكانك الاسبوع اللي راح جاي للسوق يمكن انك شفتا شلون العرض كان واجد والطلب نادر مع ان بعضهن معهن علومهن و بصراحه مالي بالطيور ولا غيرهن مجرد ناقل فقط لما رأيته فقط

[البريكي]

يعطيك العافيه اخوي عناد على نقل الصوره المباشره عن سوق الطيور بعنيزه بس الاحظ انه مافيه طيور

مطروحه انزلت السوق ونبي اخبار الوحوش جم اسعارها عندكم سواء فرخ ولا خلوي

ونتمنى انك تستفيد من هالتجربه ونشوفك صقار

[قشاع الرمث]

السلام عليكم ورحمة الله وبركاته

والله انا استغربت من الاسعار المكتوبه
ولانك ما ذكرت اي عيوب في الطيور
والطيور الي وصفتها تسوى كثير .
وبعد التوظيح من اخونا عبكري
صارت معقوله وحتى لو الطير فيه
ديدان وقلاع
وما اقول الا ما قصرتو والعذر
والسموحه اخوي عناد ان كان كلامي ازعلك .

اخوك قشاع الرمث .

وان حصل طير اشقر والا حمر صافي
لو كان صغير جرمه وصايد ولحوق وحتى
لو ماهو راكد وفيه دود وقلاع وجدره بالفين
الى ثلاثه . اشره وانا اكسبك بس تراي ابفحصه
عن اي مرظ ثاني ...

:D ;) :D
مع الشكر للجميع

[عنـاد]

هلا اخوي البريكي بالنسبه للسوق كان في بريدة ولا تنشدني عن الفروخ وغيرها لان اللي جاء في السوق كله انذكر في الموضوع


قشاع الرمث :
هلا اخوي عزيز وغالي وش دعوى يزعلني اللي يبي يزعل يطلع من مكشات لان مكشات مكان نقاش راقي

وبالنسبة للاسعار انا اشوفها نازلة وانا منيب اعرف الطيور ابد.
بس اعتقد ان اكثر الاسباب قلة الطلب
وتخبر الحراج يوم واحد في الاسبوع في وسط الاسبوع اعتقد ناس واجد صعب عليهم يجون ثاني شي اعتقد اختصاص شخص واحد فقط بالحراج والبيع ثالث شي قرب مدن الشمال للقصيم نسبياً وهي اكثر الاماكن اللي تطرح فيها الطيور. رابع شي موقع السوق غير واضح ويوم تجي وتلقا حراج ويوم تجي ما تلقا فيه الا الدلال بس.

يعني قبل اسبوع كانت الشياهين ماكلة الجو والحرار ما نيظرت الا واحد او اثنين اللي التفتو لهن ولا حتى التفتو لهن زين يمكن بلاهن معيوبات على كلام عبكري.

من الطرائف اللي شفتها في السوق الاثنين اللي راح جا طير اجهم لونه شوي وفتحو باب الحراج عليه سمعت كلمة من الدلال قالها بصوت واطي شوي عقبها قعدت اضحك يقو بكم يسام السنجاري ؟ صح اني منيب اعرف الطيور بس ولو السنجاري حسب كلام صقاقير المنتدى يصير لونه اسود وشكله مهيب شوي غير علاماته الثانيه اللي ما يعرفونها الا الصقاقير المتمرسين ما يفتح سومه بالشكل هذا وبالفين بعد ؟ :) غير كذا السنجاري لا جاء للسوق تناقزو عليه الدلالة والصقاقير وهذا محدن ناظره وقعد على سومته :)


هذا ما عندي واتمنى الموضوع ما يسبب اي شي واعذرونا على القصور وتراي انقل اللي اشوفه بس واللي اعرفه

[عبكري]

ياهلا ومرحبا بأخوي عناد وأبشر بالشبب وأن أخوك باللي تبي.

أبي منك طلب قل تم..........

























دامك تجي لبريده ياخوي قبل تجي أرسلي رساله على الخاص ونبيك تطب المكان الله يطول عمرك لاتنسى تراك قلت تم.

[عنـاد]

تم ما اقول الا تم الله يعطيك العافيه وطولة العمر وراجع رسايلك الخاصة

[أبوأحمد98]

((عنـاد)) ياليت وصف لسوق .......أو الحراج ..........لي روحه قريبه ان شاء الله لبريده ....:)

[ابو عايد]

السلام عليكم ورحمة الله وبركاته


مشكور اخوي عناد يعطيك العافية

زتقبل تحياتي // العاشق الولهان

[عنـاد]

السلام عليكم ورحمة الله وبركاته

أبوأحمد98 :
السوق طول الله عمرك لا دخلتا بريده اسال عن شارع الاربعين تبي تلقا محلات كفرات واجد على شارع الاربعين من جهته الجنوبية ابد السوق جنبهم واضح جداً بيت شعر في وسط برحة عنده تانكي مويه صغير وشبك طيور تسبير شوي

ابو عايد:
يا حيا الله العاشق الولهان تو ما نور الموضوع بطلتك الله يعطيك العافيه وطلة الاخوان