أفضل الملابس الشتوية (جاكيتات - ملابس داخلية - فراء ..الخ - استفسار)

[الفنيع]

السلام عليكم ورحمة الله

مع اقتراب فصل الشتاء _ نسأل الله أن يلطف بنا وإخواننا المسلمين - أود أن استفسر عن :
- أفضل الجاكيتات ومكان البيع _ لايهم السعر _ المهم الجودة .
- أفضل فروة
- أفضل الملابس الداخلية .

ماترونه مناسبًا لهذا الفصل من الملابس.

حفظ الله الجميع ,,,,,,,,

[الضاحي]

وعليكم السلام ورحمة الله وبركاته

اولا: اذا انت في الرياض فابشر بالخلقان في كل محل
عندك سوق الزل للفرا والجاكيتات المبطنة والصديريات والبجامات والشرابات وغيرها

وعند سوق العويس وعندك البطحا وعندك وعندك وعندك .... عد واغلط

هذا طبعا اذا تبيها للبر والمشبات والطلعات

اما اذا تبي شي رسمي ودلع فعندك الف محل في العليا العام والله يعينك على الاسعار الخيالية (بالطو بستة الاف ومنها)

الله يوفقك وييسر امورك

[مسامرالليل]

ماقصر ابو فهد
فقد افادك واجاد بالوصف
واذا كنت بالغربية وضح مدينتك وابشر بالوصف
---
الا يابو فهد واين احصل البالطو الزين هذا ابو ستة الاف :D
وتهقى يدفيي فى المربعانية
محبك: ابو ثامر

[الفنيع]

بيض الله وجيهكم

هل يمكن ذكر أسماء

[القنـاص2008]

الاخوان افادوك

[الضاحي]

بيض الله وجيهكم

هل يمكن ذكر أسماء



ذكر أسماء ايش بالضبط؟؟؟

المحلات والا الماركات والا ايش؟

[الضاحي]

ماقصر ابو فهد

فقد افادك واجاد بالوصف
واذا كنت بالغربية وضح مدينتك وابشر بالوصف
---
الا يابو فهد واين احصل البالطو الزين هذا ابو ستة الاف :D
وتهقى يدفيي فى المربعانية

محبك: ابو ثامر




اهلا ومرحبا بالحبيب ابوثامر

والله يالغالي اني واقف على جاكيت مهوب بالطو وان اللبناني اللي يبيع في المحل يقول لي: هايدي الإطعة مافيه منًا بالسعودييه الا تنتين وبعد الخصم بتصير بتمانية ونص

وانا اقول في نفسي: يا مال المرزبة اللي تخرط لسانك :mad: لعنبوك الفروة الطفيلية بالف

يا حبي لك يا ابوثامر
كورك لافة تذكرني بريفيلينو حق الهلال من اول :D

[الفنيع]

أخوي الكريم الضاحي

أسأل عن أسماء المحلات والماركات

كذلك الفروة الطفيلية الأصلية أين مكانها ؟

[غربي هواوي]

عليك بالفروة والحق اهلك

ثلاثة نظام بالشتاء لحاف وتذريك من البرد وكشخة عالثوب ههههههههههههههه

[بيرق العزة]

ياخوان الاخ يعلم ان في كل مكان خلاقييين ولكن هو يبحث عن الممتاز والي مافيه منوه على قولة اللبناني ......................
اخوي عندك بعض محلات سوق الزل في الديره بالرياض واسواق البطحاء وسوق عويس وسوق حجاب بالنسيم الزاويه الجونبيه الشرقيه منه يوجد عندهم خامه ممتازه يبيلك ما تستعجل تبحث بركاده وتقارن الاسعار وخاصه في الفرو والجاكيت اما البجامات فالجوده ترجع لبلد الصنع وهو ايضاً درجات مثال القطن المصري فيه الممتاز وفي اقل بكثير من ذلك والغالب في السوق الصيني وافضلها برومان
اتمنى لنا ولك والتوفيق

[الكونترولCONTROL]

إذا تبحث عن الجودة و لا يهمك السعر فلا تتعدى
شركات Next و debenhams ( نكست و دبنهامز )
فروعها في أسواق صحارى و المملكة و غرناطة
فيها جاكيتات و فنايل و - أعزكم الله - جزم لا يعلى على جودتها
لكن فعلا .... لا تسأل عن السعر !!

[الفياض***]

الله يعطيك العافيه

[قرناس نجد]

والله بالنسبة لي انا سويت جكيت جيشي من عند

حق الملابس العسكرية ومبطن فرو يحبه قلبك
وسعره 200 ريال يا بلاش بلا لبناني بلا خرابيط

اجل يقول 800 لو اشريه با السعرهذا ما لبست حطيته قدامي

اخف يجيه شي والمشكله ما تضمن انه اصلي
لانه يفصلونها هنا ويحطون استكر على انه
جاي من الخارج
مثل ما قالو الاخوان سوق الزل ممتاز وانت تحدد الي تبي

شي رسمي شف المحلات الرسميه او الماركات اما للبر

فا اعتقد انه تاخذ شي وسط

[ساقان]

البوليستر هو الدفااااااا

[جمـر الـغـضـى 11]

جزاك الله على طرح الموضوع وهنا نبي نفيد ونستفيد وانا اعتقد فهمت قصد الرجال وش ازين الماركات وش الماركات الشينه علشان نفيد بعضنا .. وانا عن نفسي اقسم بالله ماعمري سألت عن الماركه اعاين الفروه واخذها واسال عن الصناعه بسسس

[(((.ابوتميم .))))]

اقول يا شباب الجكيت الجيشي تنصحوني به والا لا وهل هو يدفي مره ؟؟ والا خرطي وهل افصل في اي محل البدل العسكرية لان فيه واحد قريب من عندي في حي الشفا شارع الستين هل فيه احد جرب شغلهم ؟؟
انتظر الرد تكفوون ..

[(((.ابوتميم .))))]

>>>>>>>>>>>>>>>>

[رأس الزعامه]

جاكيت العسكريين الامريكي مامثله ابد

[عاشق تويوتا]

وين نحصله
الجكيت العسكري الامريكي
ومحلات تفصيل البدل العسكريه
يفصل لك عادي؟
اخبر لازم البطاقه العسكريه ولا

[فيصل التميمي]

مافيه مثل الفوزان في الملابس الداخلية برومان
ام الفروة فعليك بمصنع بريدة تراه زين وسعرها معقول
ام الجاكيتات فعليك بالبطحاء فيها اشياء زينة ومعقولة
وافضل منهن كلهن البشت وسوق الزل عندك طب وتخيير

[طرقي سدير]

بخصوص الجاكيتات صراحه لاتدور غير جاكيتات العسكر الجديده الي داخليها بلوستر وحبذا لو يكون بالطو حق الحرس ترى مامثله .. بس عاد دور احد ربعك يشتغل في اي قطاع عسكري ويدبرها لك .

اما الملابس الداخليه صراحه افضل شي هو البجامه الانجليزيه وبعدها يجي برومان

والفراء طبعا الطفيلي لايعلى عليه

[AL-Hadbani]

لا أخفيكم سرً ...

جابلي والدي الله يحفظه ثوب مغربي ...في إحدى مكاشيته للمغرب

طبعاً لايوجد به مخابي وهو مثل الفروة ويمكن أدفأ منها بس ميزته :

يلبس فوق الثوب أو البدلة
يسمح لك بالتحرك على راحتك كأنك لابس ثوب ...عكس الفروة
دافيء جداً
يمكنك لبسه وقت الأعمال الحركية حيث يمكنك رفع الأكمام وما شابه ذلك


سوف احضر لكم صور بإذن الله

[قريش]

بالنسبه للجاكيت عندك جاكيت جنزومن جوا فروخذيته العام الماضي من معرض بحي المروج بـ120ممتاز ويدفي ويجي على الثوب والبدله .
بالنسبه للفرو عندك سوق الزل وعليك بالطفيلي وخلك حريص تراهم احيانا يغشون.
البجامات بالدرجه الأولى الصوف الأنجليزي والقطن بجامة الكنج مير لاند صناعة مصريه وتحصلها بنفس المعرض.
اتمنى اني قدمت ما تريد.
تحياتي,,,,,

[النوخذة الأحسائي]

طيب بالشرقية وين نحصل هالاشياء اللي ذكرتوها

[مخاوى ابوه]

كانك تبي شي على سنع
عنك دبنهامز
والعبد الكريم
بس لا تسال عن السعر

[الضوء الرقمي]

موضوع مهم !
وهذا وقته !

[مجنون نحم]

عندك next وعندك zara العليا العام واذا انت كااش رح لرباعيات بس حط في جيبك 10 وفوق

[مكافح هم]

روح للعبدالكريم جميع موديلات الجاكيت والملابس الداخليه والشال والدسوس والجوارب بس قبل نفاذ الكميه انصحك فيه بقوووه شغل نضيف واصلي غير الصيني المنتشر في الاسواق يعني لك وللزمن

[هاوي البر]

وين العبد الكريم ذا فيه
وصفه

[كايد]

اهلا بالجميع

بالنسبة للفروة (اذا كان الواحد قاعد) ===> لكن فالبر اكيد تتحرك

انا اشوف
البس ثوبين فوق بعض والثوب الثاني يكون واسع ويفضل لو كان ثوب نوم شتوي
خذلك شال حق الافغان مهم جدا تتيح لك الحركة
اذا الجو برد وجمد الماء دور لك كوت جلد (اذا تخبر لك احد في باكستان في كراتشي الف مصنع وكللللللللللللل الاكوات الباكستانية اللي عندنا خرطي)

ودمتم

[الضوء الرقمي]

روح للعبدالكريم جميع موديلات الجاكيت والملابس الداخليه والشال والدسوس والجوارب بس قبل نفاذ الكميه انصحك فيه بقوووه شغل نضيف واصلي غير الصيني المنتشر في الاسواق يعني لك وللزمن

اين محل العبدالكريم ؟

[الضوء الرقمي]

اين محل العبدالكريم ؟

ما زال السؤال قائم ؟!

[awod]

حياكم الله جميعا
والله فيه محل اسمه سوق الخير في ام الحمام الشارع العام
طب وتخير في جميع انواع الملابس بلا مبالغة فيه كل ما تحتاج من خلاقين اما الاسعار جدا جدا معقولة وبتدعون لي.

[الفلك]

اهم شي البجامة هي الي تدفي

[ksa--505]

السلام عليكم ورحمة الله وبركاته


بالنسبة لي انا ما اقدر استغني عن جاكيت عسكري جاني هديه من اخوي الله يحفظة


جدا رائع مبطن بالفرو وصراحه لا يعلى عليه بالبرد :)


http://www.mekshat.com/pix/upload03/images133/mk140290_fgg.jpg

[الضوء الرقمي]

السلام عليكم ورحمة الله وبركاته



بالنسبة لي انا ما اقدر استغني عن جاكيت عسكري جاني هديه من اخوي الله يحفظة


جدا رائع مبطن بالفرو وصراحه لا يعلى عليه بالبرد :)



http://www.mekshat.com/pix/upload03/images133/mk140290_fgg.jpg


من خلال ما قرأت من مشاركات اعضاء المنتدى يمدحون الجاكيت العسكري !

[طير المحبه]

الدفا تلقاه بالزنجبيييييييل قدام الضويّه .. ولا حليب بالزنجبيل :d ..

أمزح معك يالغالي .. حبيت اوسع صدرك :d

[راعي نضر]

عزالله الشباب ماقصرو بالرد وانا من رايي انك تلبس لبس عسكري وتلف راسك بشماغ وتحط في رجولك شرابات ودبلها وتلبس ثوبين واحد ضيق واحد وسيع وتشرب زنجليل
تدور ماركات في موقع مكشات

[nyhhhh]

لااحد يضحك

انا استخدم شال كشميري طبقتين لفه على الثوب او اللبس وانسى البرد جاني هديه من عامل كشميري

[خالد الشمري20]

السلام عليكم ورحمة الله وبركاتة

الجاكيت للحركة

اما الفروه للجلسات و للبرد القارس

[كوكيان]

السلام عليكم ورحمة الله وبركاتة
درجات الملابس الدافيه :
1. الفرو ( جاكيت مبطن فروا من الحيوانات التي تعيش في المناطق القطبيه دب ، ذيب ، ثعلب .......الخ ) لا اعلم عن الحكم الشرعي في لبسه اخبر ان فيه كلام .
2. جاكيت محشي زغب الوز او البط طبعا من النوع الي يعيش في المناطق القطبيه ، والزغب افضل و اغلى من الريش .
3. الصوف و يتدرج حسب الجوده و السعر من حيوان الالباكا و اللاما الي يشبه البعير ولكن اصغر ويعيش في جبال الانديز امريكا الجنوبيه الي الصوف الكشميري ثم الخرفان النيوزلانديه .......الي اخره
4. جاكيت الجلد المدبوغ ولازم يكون مبطن صوف إذا ما هو مبطن تراه للكشخه فقط ما يدفي.
ه>ا علمي وسلامتكم والي عنده علم يفيدنا .

[الحربي حاتم]

الفروه لحاف وعباه ومخده ورخيص

[الوسم2]

السلام عليكم ورحمة الله وبركاته
عندي مشروع كسوة راعي أبوزعة على الرعاة بالبر وحبيت أسأل عن محلات الجملة بالرياض أبشري جيكيتات
ماهو الجاكيت المناسب حسب خبراتكم

[بدران الدوسري]

^
حياك الله

كان قصدك تبي تكسو العمال الي في البر وغيرهم

فيه حساب في تويتر يبيع بجامة وقبع وشال وأتسوس بسعر رمزي للي حاب يتصدق

كانك تبي الحساب عطيتكياه

[ابوعبدالعزيز6]

اسدح حسابه ياذيبان
البرد على الابواب والعمال في حاجه

[Hagaanaf]

يالله انك تحفظه من كل مكروه وآول المكروه اخذه للفحة برد
شف يالحبيب
رح لشارع الأربعين بالنسيم حول مطعم النافوره ، وهناك ستجد محلات خياطه ملابس عسكريه خذ اي ثوب لك تلبسه وتجد مقاسه يناسب لك ، واختر نوعية القماش الي تبي وقل فصلو لي عليه ثوب مقاس هذا الثوب
وان بغيت جاكيت ، او بنطلون
وستجد عندهم مطلوبك ، من جميع الأصناف ، مثل الفانيله العسكريه الصوف صناعه امريكيه وأروبيه غربيه وبنطلونات تفصلها تفصيل حسب طلبك والشراب والدسوس ، والساعه البريه الليله وكل مايخطر ببالك من ملابس شتويه
هناك سأضمن لك انك ستجد مطلوبك
كل ما اريدك ان تعرفه ان هذا القماش لايتأثر بالهواء او البرد ، ومع ذلك هو لك وللزمن وكد ومد واضمن لك انك تاتموت ما ابليته
اسئل اخوك
ولكن لاتنسان من الدعاء

[تخاريف]

يالله انك تحفظه من كل مكروه وآول المكروه اخذه للفحة برد
شف يالحبيب
رح لشارع الأربعين بالنسيم حول مطعم النافوره ، وهناك ستجد محلات خياطه ملابس عسكريه خذ اي ثوب لك تلبسه وتجد مقاسه يناسب لك ، واختر نوعية القماش الي تبي وقل فصلو لي عليه ثوب مقاس هذا الثوب
وان بغيت جاكيت ، او بنطلون
وستجد عندهم مطلوبك ، من جميع الأصناف ، مثل الفانيله العسكريه الصوف صناعه امريكيه وأروبيه غربيه وبنطلونات تفصلها تفصيل حسب طلبك والشراب والدسوس ، والساعه البريه الليله وكل مايخطر ببالك من ملابس شتويه
هناك سأضمن لك انك ستجد مطلوبك
كل ما اريدك ان تعرفه ان هذا القماش لايتأثر بالهواء او البرد ، ومع ذلك هو لك وللزمن وكد ومد واضمن لك انك تاتموت ما ابليته
اسئل اخوك
ولكن لاتنسان من الدعاء


السلام عليكم ..

انت تقصد يفصلون لك من الاقمشة الخاصة بالبدل العسكرية او قصدك شي ثاني وانا اخوك ..؟

[Hagaanaf]

السلام عليكم ..

انت تقصد يفصلون لك من الاقمشة الخاصة بالبدل العسكرية او قصدك شي ثاني وانا اخوك ..؟

نعم يحفظك الله
إذا تبي مموه فأضنه سيكون اغلى في السعر
اما إذا على الصامت وهو في نظري الآفضل سيكون ارخص
على العموم هناك سوف تحتار