الرجاء الأفاده (الفروة الطفيلية الاصلية)؟

[قناص شدا]

السلام عليكم ورحمة الله وبركاته

مرحبا بكم جميع

أخواني عندي شوية استفسارات عن الفروة الطفيلية الاصلية

ماهي افضل فروة طفيلية لأني احترت فيه انواع كثره زي الموصلية (العراقية) والسورية وغيرها من حيث الدفء والجوده والمنظر؟

وماهو افضل لون يجي عليها؟

واين اجد افضل مكان يبيع الفراء الطفيلة؟


ولكم جزيل الشكر

[باثفندر]

العراقية ،،، اللي تكون من النعيمي العراقي ،،، وتنباع بأغلب محلات الفرا ، موجودة بسوق الدمام ، تفرق عن العادية إنها أخف وزن ، بس الدفا واحد ، وتراها غالية .

[ألنشمي]

السلام عليكم

عليك بالخفيفه الي وزنها 3-3.5 كيلو وابتعد عن الاسود بالون الخارجي.
انتبه للجلد من الداخل لايكون به قطع صغيره وقديمه.

[black panther]

كل ماصار الفرو لهرفي صغير كل ماكان افضل وعليك باللي قطعها كبيرة

[عاشق الفرعه]

مالي علم لاكن يفيدونك الأخوان

[نـجم الـشمال]

والله انا العام شريت سوريه للوالده بس والله تدفي بس عيبه الريح عدك بين غنم بوسط روض ههههههههههه معليه على الوصف بس المشكله تبي الريح تروح واعطتها الشغاله وخذ ياغسيل المهم يوم انشفت الا وهي يابسه تتكسر يعني اذا خذيتها مافيه الاغسيل خاص اللي هو بالبخار زي اللي بشركه مغاسل الدمام ومغسلة الساعة اللي عندنا
وموفق خير يالغالي

[برق الشتاء]

رايي ان الطفيلية اللي من الجاعد الطبيعي ما تصلح لأنها :
غالية
ثقيلة
تطلع ريحه لأن الشعر طبيعي وخصوصا بعد الغسل

يعني بالعربي تعقدك .

ميزة الفروة الطيبة في رأيي :
خفيفة الوزن
دافية
قماشها الخارجي مايتنفش يكون قماش قوي مايتخدش ويتنسل مع الاستعمال والغسيل


افضل فروة مرت علي هي فروة ( ابو ضبي )

وانت ابخص يالرفيق .

[كشات غربي]

عليك بالطفالي وبس
الريحه ماهي مزعجة وهي ريحه طاهرة وليست غير ذلك لأنها مدبوغه
انت يا اخي تريد الدفء من البرد ولبسها عادة في البر وعند النار وفي الهواء الطلق وعليه فلن تنتبه لما ذكر من رائحة الجاعد

[الضباوي]

السلام عليكم
اخوي مر مصنع ريم بالقصيم
ادخل وفصل الفروه على مزاجك فيه انواع فرو كثيرة صناعية وطبيعية
وقماش خارجي انوع والوان وسعر جداً معقول
ويكفي اختيار المقاس المناسب

[سطام vip]

بسم الله الرحمن الرحيم

السلام عليكم ورحمة الله وبركاته

الله يوفقك اخوي صاحب الموضوع وتلاقي طلبك ان شاء الله

بس حبيت اقول عيبمهم في الطفيليه ويصير لاغلبنا

صارت معي مره راجع من بر وفيه جركل ماءما انتبهت انه يهرب

ولما جيت من باكرابنزل الاغراض الا ريحه خايسه واثاريها الفروه

جاها الماء والجلد خاس وعلى طول اقرب زباله الله يكرمكم

هذي من مشاكلها ويجب الاهتمام بها

وبالتوفيق للجيمع

[صقار الهواشم]

عزالله اني مثلك ازريت القالي فرووه طييبه والرجااء من الاخوان الي عندهم خبره يفيدونااا

[غربي هواوي]

بالنسبة للذرى ما يعلا عليها
لكن يعيبها ريحتها

[طرقي سدير]

والله وانا اخوك من ناحيتي سبق ورحت سوريا وفصلتها من هناك على مزاجي بحيث اني اخترت القماش الخارجي نوعيه فرنسيه وهو افضل شي وطلبت تكون البطانه الداخليه نوعيه ممتازه بس نسيت والله اسمها واخذت الفرو الطفيلي نقوه وكان رافعها بالمحل ويصرف غيرها بس نشبت له لين اخذت هالفرو الطيب الي عمره صغير مره وتم تفصيل الفروه كامله هناك وكان سعرها بعد الملاجد والشيل والحط 450 ريال

عيوبها بخصوص الريحه الحمد لله مااشتكي منها بس يمكن لو يجيها ماء تفوح ريحتها

العيب الثاني وهو الاهم : مثل ماتعرفون جلد الطفيلي صغير مره عشان كذا الفروه يبيلها اعداد من هذا الجلد ويتم خياطتها مع بعض .. والعيب كان في الخياطه فصارت (تتفتق)

ولاكن الحمد لله هذي امرها بسيط وديتها لواحد بالديره وخيطها خياطه مضبوطه .

ونصيحتي لك اذا تخبر لك واحد رايح لسوريا وصه عليها ومن ناحيتي بخصوص اللون اخترت لون بني صح انه يشهب شوي بالبر بس ماتفرق كلها نفضتين وترجع مثل ماكانت

وبخصوص الوزن خفيفه مره واخف من الفرا الي عندنا .. ولو حولي ميزان كان وزنتها لكم :D

[أبو براك]

حياك الله اخي الكريم

شاهد هذه الروابط لفائده اكثر

افضل انواع الفرى واجودها (http://www.mekshat.com/vb/showthread.php?t=5687)

بشت فروه ضد برد البر (http://www.mekshat.com/vb/showthread.php?t=111299)

[صلفان.نجد]

انا سويتها العام في المصنع (حلب)بسورياء وعن طريق احد الاصدقاء السوريين الذي تربطه مع صاحب المصنع علاقه طيبه ,الصوف الخارجي انجليزي كشميري والشعر طفيلي ابيض صافي ب30000ليره(2800)ريال وفيه انواع كثيره اقل سعر واكثر . لكن تعتبر رسميه تلبسها في مخيم اومزرعه.واخواتها في سوق السلاح بالرياض ب7000ريال..

[الشبل111]

ياخوي والله خذ لك فروه صناعيه

وسحبها بالبر ونام فيها على كيفك

سعرها رخيص وتدفي ةماتحتاج إنك تراعيها

أما الطفيليه تبي مراعاه وسعرها غالي وخساره إنك تسحبها بالتراب

ولو تنفتق أو يجيها جمره وتحرقها يضيق صدرك وتخرب الكشته كلها

هذا رأيي

[ابوخالد2004]

تحصل الطفيلي الاصلي الموصلي بعرعر - سوق السمن - فيه عراقي عنده محل يبيعه

[abu fares]

رغم أني في منطقة معتدلة في الشتاء ولا علاقة لي بالفري
الا ان راي من راي اخوي الشبل

[قناص شدا]

بارك الله فيكم جميع وشاكر لكم مروركم العطر يا اخوان


سالفة ماتصلح للبر هذي ترجع لأستخدام الشخص وبالنسبة للريحه اعتقد الفروة ذات الجوده العاليه ماتكون فيها ريحه او ريحتها ماتكون مزعجه


ياليت يكون فيه توضيح اكثر من الاخوان بخصوص الفروه كنوعها مثلا واسم المحلات وكم تكلفتها وغيرها من المعلومات المهمه


ننتظر رأي بقية الأعضاء أهل التجربة والخبره وان شاء الله تعم الفائده للجميع

[northstar46]

اهم ميزات الفروة ( الطفالية ) وليست الطفيلية ما يلي :
- خفيفة الوزن
- يجب ان تصنع من عدد كبير من الجلود ( طليان صغيرة العمر 1- 10 أيام فقط وهي الاغلى على الاطلاق )
- لا يصدر صوت طقطقة من الجلد ويكون لين مرن
- القباب جوخ انكليزي
- تمتاز بتعدد الوان الصوف وقصره ويجب ان لا يزيد طوله عن 2.5 سم
وللاسف شراء الفروة اصبح بحاجه لخبير بسبب كثرة الغش وتعدد اساليبه
- افضل انواعها الموصلية ولكن اصبحت نادرة جدا ويأتي بعدها الحموية السورية
واهم شي توخي الحذر من الغش

[الضوء الرقمي]

ياليت اهل الخبرة من الاخوان في الرياض
يقولون لنا اين ممكن نلقاها ؟
اتمنى تحديد المحل واسم ونوع البضاعة !
اوجعتنا رؤوسنا من تعدد الانواع وكثر الغش !!

[Hagaanaf]

:l
:f قناص شدا -- مع التحية :f

مالك ومال الخط المعلق ، اطفيله او ريحة يالله اجوارك ، او تحترق باكر والا عقبه
عليك بالفرو الألماني دفء معتبر
وألوان على كيفك طب وتخير وفصل على مزاجك والقيمة بـ 250 ريال
بأذن الله سوف تدعيلي

[ابو علي 99]

اخي العزيز اذا بتشتري فروه طفيلية لا تشتري الا من صناعة شركة الجاجة تصنع في سوريا
وذا تبي تشتري طفيلية اول شي تشوف الفرو حقها وتفحصه بعينك زين وتمسكة في يدك اذا كانت يابسة او حسيت ان الفرو قاسي شوي ابعد عنها
والطفيلي الزين اذا مسكتة كئنك ماسك قماش تلقاة مرن مرة
الطفيل تراة مايطلع ريحة الي يطلع ريحة الصوف الي فروه طويل شوي وهذا دايم الناس تغلط فية او ينظحك عليها هذا مو طفيلي الطفيلي يجيك فروة صغير مره وناعم زي الحرير
عيب اطفيلي انة يتقطع بسرعة ويبغا عنا ية فائقة عند الجلوس والقيام وهذا المشكلة حلها الوحيد انك تودي الفروه عند خياط وتخلية يبطنها لك ببطانة قوية ويخيط البطانة علي الفرو وتخلية يخيطها خياطة زي شكل شبكة العنكبوت بحيث تكون البطانة لازقه علي جلد الفرو
انا عندي وحدة مشتريها من الجاجة ومبطنها والحين لها عندي اكثر من 7 سنوات ولا فيها اي مشاكل
بشرط انك اذا خلص الشتاء تلفها في كيسة وتخزنها في الدولاب

[yasser-kh]

هذه اول مشاركة لي وسامحوني
انا افضل الفروة العادية على الطفيليه لأني مره شريت لي فروه طفيليه سوريه وبعد ما لبستها في احد الكشتات مرضت والسبب انها دافيه بزياده لدرجة اني لمى احس بالحر اوخرها واذا بردت لبستها وعلى هالحال لين دخل البراد بصدري بعد هالكشته منطوله في الدولاب لها اكثر من سنتين
وشكراً،،،،،

[ابو عنقا]

السلام عليكم ورحمة الله وبركاته

افضل فروة هي اللي تباع في الاسواق سعرها رخيص وتدفي

وهي اللي تصلح للبر

تقبل تحياااتي

[مساءك خير]

العراقية ،،، اللي تكون من النعيمي العراقي ،،، وتنباع بأغلب محلات الفرا ، موجودة بسوق الدمام ، تفرق عن العادية إنها أخف وزن ، بس الدفا واحد ، وتراها غالية .

عفوا يا اخي الكريم
اين سوق الدمام تحديدا..ممكن توصف لنا اين تباع الفراء والملابس الشتويه عموما في الدمام..

[راعي الطلعات]

ياخوي والله خذ لك فروه صناعيه

وسحبها بالبر ونام فيها على كيفك

سعرها رخيص وتدفي ةماتحتاج إنك تراعيها

أما الطفيليه تبي مراعاه وسعرها غالي وخساره إنك تسحبها بالتراب

ولو تنفتق أو يجيها جمره وتحرقها يضيق صدرك وتخرب الكشته كلها

هذا رأيي

عين الصواب :good2: والله يوفقه

[البرفسر]

هذا وقت الفروه تقرير بالتوقيت المناسب

[خشم العرمة]

انا بالنسبة لي فاكني اللة من غثى الفرا وثقلها وغربالها
عندي بشت ( نبية ) عطي اللة بر ديرة كشخة مزرعة نفود ريغا انفض واللبس وامش
البشت اذا صار طيب عز اللة انه ادفى من الفروة

[صافي المشرب]

أنا مجرب الفراء الصناعية ما تنبغى بريال فروها ينكمش ولا تدفي

بعدها شريت طبيعية لكنها لخرفان كبار قيمتها تقريبا ب300ريال من الثقبة وعيبها ريحتها قوية ولا تدفي

وشريت بعدها طفيلية عز الله انها فروة شريتها من سوق الزل من شايب مدري شسم محله لكني بغيت انخدع
بوحده قبلها منتفه بس الحمدلله نجيت منها والطفيلية خفيفة جدا وريحتها خفيفة مرة وشعرها ما يتنتف
وتدفي ما شاء الله تبارك الله وخذيتها ب800 ريال وهذا عيبها الغلا وفي الأخير عجبت واحد
من الربع واهديتها اياه الله يرزقني وياكم بخير منها

[خشم العرمة]

أنا مجرب الفراء الصناعية ما تنبغى بريال فروها ينكمش ولا تدفي

بعدها شريت طبيعية لكنها لخرفان كبار قيمتها تقريبا ب300ريال من الثقبة وعيبها ريحتها قوية ولا تدفي

وشريت بعدها طفيلية عز الله انها فروة شريتها من سوق الزل من شايب مدري شسم محله لكني بغيت انخدع
بوحده قبلها منتفه بس الحمدلله نجيت منها والطفيلية خفيفة جدا وريحتها خفيفة مرة وشعرها ما يتنتف
وتدفي ما شاء الله تبارك الله وخذيتها ب800 ريال وهذا عيبها الغلا وفي الأخير عجبت واحد
من الربع واهديتها اياه الله يرزقني وياكم بخير منها

وشو اللي عيبها الغلا!!!!! ب 800 تراها ببلااااااااااااش
الطفيليات الزين من 3000 وانت طالع

مع اني لست من هواه الفروة بشكل عام

[صافي المشرب]

والله يخوك انا اشوف انها غالية هذي قيمة 3طليان بلحمهم مهب بس جلد

والفروة اللي انا شريتها والله محترمة جدا وش بيجي ازين منها نظيفة وقماشها من برا

نظر وقوي ولا يتوصخ وبه عدة ألوان وبها عيب غير الغلا اللي هو تتشقق لا صرت دفش
لكن ب3000 وش بتكون يعني ؟؟؟

[خشم العرمة]

والله يخوك انا اشوف انها غالية هذي قيمة 3طليان بلحمهم مهب بس جلد

والفروة اللي انا شريتها والله محترمة جدا وش بيجي ازين منها نظيفة وقماشها من برا

نظر وقوي ولا يتوصخ وبه عدة ألوان وبها عيب غير الغلا اللي هو تتشقق لا صرت دفش
لكن ب3000 وش بتكون يعني ؟؟؟

والله انا معك في كل كلامك لكن الواقع شي اخر يعني اللي تقول ب 3000 وش بتكون تكون فروة طفيلي موصلية عراقية وقبابها جوخ انقليزي لا وابشرك بالسعر هاذا تلقاها في سوريا واذا وصلت هنا دبلوها دبل!!
مر سوق الزل واسال عن الطفيلية العراقية.
ولكل شراي بضاعة وسوق

تكرم فية نعال شرقية تشوفها تقول 80 ريال وتخب بعد وهي سعرها 2500 ريال
بتقول ليش بقولك مادري ليش بس فيه لها زباين

[صافي المشرب]

انا مصدقك وادري ان فيه لكن ما تستاهل اذا الطفيلية العادية ب800 قايمة بالواجب لكنها صراحة غالية

وادري ان لها زباينها ولكل شي زباينه يا رجال

على العموم الله يعطيك العافية

[مدغدغ البيفر]

يالله لك الحمد.
والله لو يعطونيه بلاش ما لبستها. من الريحه اعزكم الله كني راقد مع الغنم
والدي رحمه الله ووالديكم كان يحبها وعنده افضل الانواع ولكن لا يمكن تلقى طفيليه ما فيها ريحه واللي يقول غير كذا غلطان

الحمد لله على النعم الكثيره والخيارات متعدده وش يحدني البس لي نعجه
وللناس في ما يعشقون مذاهب

[عزيز النفس 66]

الله يعطيكم العافيه جميعآ حقيقة افدتونا

مشكورين وما قصرتو

[صافي المشرب]

يالله لك الحمد.
والله لو يعطونيه بلاش ما لبستها. من الريحه اعزكم الله كني راقد مع الغنم
والدي رحمه الله ووالديكم كان يحبها وعنده افضل الانواع ولكن لا يمكن تلقى طفيليه ما فيها ريحه واللي يقول غير كذا غلطان

الحمد لله على النعم الكثيره والخيارات متعدده وش يحدني البس لي نعجه
وللناس في ما يعشقون مذاهب



الله يهديك ويصلحك الطفيليات مالها ريحة ريحتها خفيفة جدا سير على سوق الزل وشم لك وحده