اصحاب الVXR لاهنتوا واهل الخبرة بالتويوتا

[وين يبون بنا]

السلام عليكم ورحمة الله وبركاته

الله يمسيكم بالخير جميعاً.. وهذي اول مشاركة لي معكم وان شاء الله ما تكون الأخيرة ..

معي جيب VXR 2001 والمشكلة هي وجود صوت مع المطبات سواء بالزفلت او النفود اوالارض العادية مثل صوت خشخشة المفاتيح وبالتحديد يظهر الصوت من منطقة الهوبات الخلفية وما حولها وخاصة الجهة اليسرى ...

دخلته الوكالة وسمعتهم اياه وحاولوا وفككوا وركبوا وخف الصوت بصراحة شوي ومحطوا مبلغ وقدرة حق فحمات وما فحمات ..

الآن رجع الصوت مرة ثانية وبلشت:(

اذا فيه احد الاخوان مر عليه هالموضوع من قبل والا عنده خبر يفيدنا مشكوراًً ...

وكل عام والجميع بخير والشهر عليكم مبارك .. وعذراً على الإطالة ..

[محتاار]

اخوي وين يبونبنا الحال من بعظه لاكن الصوت ماهو من الهوبات ولا من الفحمات الصوت من الجلنط والدليل اسحب الجلنط والصوت يروح وايضن هنالك صوت الكليبرات لاكن خفيفة مره ولاتطلع الا اذا اكلتلك مطب قوي او جرف والحل مادري لاني مثلك اعاني من هلمشكلة .










اخوك ابوحسين

[وين يبون بنا]

هلا وغلا ابوحســـــين ... وترا يبي يصير لك معزة خاصة كونك أول واحد يرد ..:D

مشكور وماقصرت وننتظر الفزعة من باقي الاعضاء ولايهونون المشرفين ممن لديهم خبرة عن الموضوع ..


تحياتي لكم كل ابوكــــــــــم ...

[محمد العتيبي]

حقيقه انا موتري باترول

لاكن يمكن الصوت من السبير اذا كان تحت

[وين يبون بنا]

مالك لوا أخوي محمد

موتري اسبيره فوق ..

شاكر لك حسن ذاتك..;)





يالله انك ترزقنا باللي معه الحـــــل .. :looney:

[بركان]

اخي/ وين يبون بنا

السلام عليكم ورحمة الله وبركاته

انا عندي نفس الموتر ونفس الموديل وبعد سبير معلق فوق. سبحان الله .
واعاني من نفس المشكله
نفس مشكلتك
واقسم بالله انني اقرأ مشكلتك وانا احك رأسي نفس المشكله حرف حرف.

اخي الكريم
انا لم الاحظ الأصوات الا بعد ان قمت بشد الجلنط بعد ارتخائه وقد شديته بشدة. وقد اشار الاخ ( محتار ) الى ذلك جزاه الله خيرا فبعد اطلاعي على رده تأكد لي ان هذا هو سبب المشكله فعندما عدت وارخيت الجلنط قليلا خفت الأصوات ولكنها لم تختفي ولانشغالي لم اواصل في اصلاحها وسأواصل قريبا وسأخبرك بما يستجد وانت كذلك اخبرنا لكي تعم الفائده.

تحياتي وتقديري.

[وين يبون بنا]

هلا وغلا أخوي بركان ...

انا موتري خمسيني لاتقول مثلي بعد.... ههههههه امزح ..

شكراً على تكرمك بالرد .. وأمس واحد من العيال يقول يمكن من فحمات الجلنط :confused:

هل الجلنط له فحمات ؟؟

شاكر للجميع اللي شاركوا واللي ما شاركوا ..

[al-nashmi]

[QUOTE]الأصل كُتب بواسطة محتاار
[B]اخوي وين يبونبنا الحال من بعظه لاكن الصوت ماهو من الهوبات ولا من الفحمات الصوت من الجلنط والدليل اسحب الجلنط والصوت يروح وايضن هنالك صوت الكليبرات لاكن خفيفة مره ولاتطلع الا اذا اكلتلك مطب قوي او جرف والحل مادري لاني مثلك اعاني من هلمشكلة .

عفاك الله اخونا محتاار.........


اخونا وين يبون بنا.........


انا عندي نفس المشكله ونفس الموتر ونفس المديل ...وهي مثل ماقال اخونا محتار الصوت من الجلنط ..وتحديدا من وايرات ون الجلنط
لان الجلنط له فحمه خاصه ومستقله وزنه مستقل ..... اكيد الجلنط عندك طويل ...بمعنى انك اذا وقفت ترفع الجلنط بقوه ومع ذالك الموتر يتحرك شوي ما يثبت في مكانه... شد على وزنيه الجلنط وتروح المشكله.............................. بس بعد فتره تبي ترجع!!!!!!!!!!!!!!!!!!


انا بالاخير طنشتها ولا انا الظاهر مافيه احد احس مني بالنسبه للاصوات تزعجني بشك كبير........ بعت الباترول عشان هالسبب...... ولا والله الباترول موتر ما ينباع..............

وسلامتكم....

اخوك النشمي

[وين يبون بنا]

مشكور وماقصرت اخوي النشمي ..

شكلي بغير فحمة الجلنط كلها .. لأني بصراحة كرهت موتري أحس اني راكب ( دينا ) محمله حديد ..

وننتظر المزيد .. :burnout2:

[صالح البصير]

السلام عليكم ورحمة الله وبركاته
أنا عانيت من نفس المشكله لاكن اكتشفته

وهو أنه يكون هناك فراغ بسيط بين الفحمات والكليببر الذي يحوي اصلاح الفحمات والدليل عندما تاكل مطب وأنت حاط رجلك على الفرامل لو خفيف ما تسمع أي شي من القرقشه وأن هذه الأصوات لم تحدث الا بعد تغييرك للفحمات .
علماً أن هذالايسبب أي مضاعفات على الأجزاء الأخرى حيث أن هذه الحاله معي لها أكثر من أربع سنوات
ولعلاج هذه المشكله الغير مهمه هو تغيير طقم اصلاح الفرامل للجهه التي يوجد بها القرقشه.


الصوم جنه

[وين يبون بنا]

هلا والله ابوصلوح ..

مشكور وماقصرت على الرد ..

وش تنصحون بورشة زينه للتويوتا لأني بصراحة مليت من نهب الوكالة ..

فيه مركز بالصناعية القديمة اسمه ( مركز عبدالحكيم العضيب ) احد جربه والا سمع عنه ؟؟ لأنه متخصص بالتويوتا واللكزس بس ..

مشكورين وان شاء الله تتطور الخيمة وتصير بيت شعر :)

[al-nashmi]

السلام عليكم ورحمة الله وبركاته...


اهلا بك اخونا وين يبون بنا.........


بركان صباح الخير.........

اخي الكريم تصدق بالله اني في ردي السابق كنت ابكتب فيه ( وينك يابركان افزع للرجال)!!!!!!!!

لاني متقوع ان عندك نفس المشكله...............



اخي ابو البراكين..........

انت قلبت راسي:no:....... انت تقول ان ماحسيت في الاصوات الا بعد انشديت الجلنط...... ونا اذا شديت الجلنط راحت الصوات............. شككت في !!!!!! لا كن الاكيد ان المشكله حول الجلنط ووايراته وفحمته ماهي في المساحات


:D :D :D

[بركان]

اخي الغالي/ النشمي
اللي صار اني وديتها لميكانيكي زول ومتعافي
واثناء ما هو يشد جته مكالمه بالجوال وهو طبعا في الحفره
وهذه من علامات الساعه ميكانيكي وفي الحفره ويكلم جوال وبعد زول!!!
المهم الرجال واصل الحديث بالجوال وهو يشد في الجلنط المسكين حتى كرب والدي والديه الين بدى يطقطق جعل حنكه يطق!!!
ويم جيت اجرب الجلنط والا تقول واير حديد يسحب له رصاصة مغرزه.
بعدها بدأت معاناة اخوك .

يمكن اثناء الشد الزايد وبعد ارخائه اوجد فراغات في بعض القطع داخل الهوب اللي كنها مكينة ساعه بس على شكل كبير.
معلوم يازول والا اوضح اكثر.!!!! هههههه تراني امزح.

لك تقديري واحترامي.

[وين يبون بنا]

هلا بالنشمي ولا يهون بركان ...

والله اللي ماوديت موتري لسوداني لو اطمع انه رزقي ..

مرة وديت فورد لسوداني وكان الفورد مايشتغل ولا يدق سلف حتى .. ويوم كشف قال يبيلك تغيير راس المكينة .. قلت والله راسك اللي يبيله تغيير ..

وبالاخير طلعت المشكلة بواحد من اسلاك الظفيرة .. :mad:

.....

دبروا لنا ورشششششششششه يالربع الشتاء جاي .. :hot:

[al-nashmi]

اااي..... فهيمتا


داير شنو.... يازول....


بركان الزول يكلم!!!!!! ومتحمس...... واخذه الحماس وشد زياده....

وانت جايب من البوفيه اللي جنبه 5 ساندويش؟ و7 فلافل وتفرم فيهن والزول يشد والحديد يطقطق وانت مديها
ولا تدري وش السالفه......... تراي ما امزح...................كخخخخخخخخخخخخخ....ههههههههه هااا

[وين يبون بنا]

سلام عليكم ..

هاه محد يعرف شي عن مركز العضيب ياجماعة الربع ؟؟

ياحبيلكم بس ..:j

[ABU-AL-3eeS]

صارت المشكلة لجمس مع المطبات

وكان الحل طال عمرك
راح لمغسلة بستم ورشوا اليايات بديزل وبعدها راح الصوت


زي مفاصل الباب يبيلك تدهنها من فترة الى فترة

[وين يبون بنا]

هلا أخوي عاطل .. ..

ياخي الظاهر الصوت مهب لم اليايات .. بعدين مايمدحون غسيل الديزل وانت ابخص ..
:rolleyes:

[ABU-AL-3eeS]

انا ما اقصد رش اسفل السيارة بالكامل بالديزل
رش على اليايات بس
وتقدر تسخدم بخاخ خاص حق الاصوات الصادرة عن التروس ومفاصل البيبان تقدر تسخدمه على اليايات
\



عاطل مع التحية

[المترو]

اخوي وين يبون بنا انت اسم كذا والا وين يبون بنا امزح المهم

اذا كنت متأكد واقول متأكد انها بالهوب فهي احد الامور الاتيه
1-فيه يجي قطع حديد صغيره مسكات مثل المشابك اربع بأطراف كل فحمه اذا هي تكسرت اطرافها تسوي الصوت لانها احيانا تحتك بالهوب واحيانا ترجع لمكانها غيرها انا غيرتها وراح الصوت اعتقد انها 45 ريال من الوكاله قله اصلاح فرامل فحمه او مسكات تجي بكيس بلاستك طقم خلفي
واذا ماهي منكسره ترى احيانا مشكلتها انها تركب حتى لو هي مقلوبه وتسبب المشكله عدل وضعها اذا لحقت عليها ولا تكسرت
2- الامر الثاني الجلنط الفرامل اليدوي نعم له اقمشه وليس فحمات لان الهوب مجوف له جهتين الخارجيه وجز من الداخل لفحمات الفرامل العاديه وبداخله جهه للاقمشه بتاعت الجلنط ويمكن يكون فيه خلل بالقماشات بس احتمال ضعيف لان الموتر ما شالله جديد لكن شيك عليها مفكوكه مكسوره لا سامح الله

الشيء الثاني اذ ا انت غير متأكد انها بالكفر او الهوب يكون شيء بسيط وقد يستغرب البعض صارت معي وما زالت لانها مزعجه بس مطنش لانها ليس لها تأثير والمساعدات ماهي خربانه ولا تهرب زيت
المساعدات الخلفيه تنكسر الغطاء اللي يغطي المساعد يكون مكسور ومع الحركه يطلع صوت بس تقدر تتأكد بنفسك حرك المساعد ويبين الصوت المقصود الغطاء اللي فوق البستم المتدلي الى تحت وهو ينكسر بالسيارات الجديده

امل اني افدتك لانه بصراحه نفس الصوت اللي كان بسيارتي

اخوك الرحال2003
وسلامتكم

[وين يبون بنا]

أخوي عاطل .. شكراً جزيلاً وراح اجرب لعل وعسى ..

أخوي الرحال .. اسمي هذا ماركة مسجلة :D

اشكرك جزيل الشكر على معلوماتك المفيدة وأتمنى انه يكون واحد من اللي قلتهن ..

تحياتي للجميع ...

( ياحلالي موضوعي يبي يطيح :( )

[محتاار]

اخوي وين يبونبنا شكلك ماجربت الي انا قلتلك هذا اولاً.
ثانين . رحت لم ورشه بمدينة الرس وسمه ورشة البطاح الميكانيكي سعودي ويقاله ابو محمد الرجال فك الكفرات الخلفية وفك القفش الي على القماشات وقام يفك ويربط ويقول ان السبب من الجلنط ولاهو أنت اول واحد يشتكي من هذا الصوت. لاكن كان شغلة بلليل ومثلكم عارفين على أخر الدوام الواحد يكون عجل اشوي وحطلي جلب ويربط ألين الصوت خف أشوي لاكن بعد كشته يوم الخميس الماضي رجع الصوت مره ثانية .
وعلى فكرة تراه عطان صور وارقام ألقطع يقولي غيرهن يمكن يكون منهن .
وعلى فكرة أنزل انت تحت الموتر وشف فية عند مربط الجلنط بلهوبات يجي شكله على شكل مسدس حركه ابقوة وتبي اتلاحض ان الصوت منه .واذا سحبة الجلنط على خفيف ومشيت يروح الصوت .

[وين يبون بنا]

هلا وغلا اخوي محتار ...

الف شكر على اهتمامك وقريباً لي خته للقصيم وخاصة للرس وبإذن الله ابروح لم اللي قلت عنه ...

والغالبية اكدوا على كلامك اخوي محتار وان السبب من الجلنط ...

الف شكر وماقصرت ..

COM.وين يبون بنا.WWW

:D :D :D