المساعد الشخصي الرقمي

مشاهدة النسخة كاملة : عبارة " ضغط الزيت منخفض " السياره جمس 2003 وش الحل ؟


Fmejrad
09/11/2009, 12:34 AM
السلام عليكم ورحمه الله وبركاته

كيف حالكم اخواني ؟

اخواني عندي جمس 2003 وفيه مشكله الله يطول بعمركم الا وهو رساله " Oil Pressure low " اذا كانت السياره بارده ماتطلع العباره هذي لو ادعس البانزين كله لكن لما اطول عليها مشوار مثلاً ساعتين 3 ساعات وادعس البانزين كله تطلع لي العبارهـ هذي واحس عزم السياره ينخفض
مع اني سويت غسيل للمكينه ومانفع ,,
ياليت تفيدوني اخواني لان ناس كثير قالوا لي هذي طرمبة الزيت وناس قالوا يمكن الحساس وناس قالوا نظف بخاخات ,, مع العلم انها ماتطلع دائم ,, بعض الاحيان تطلع ,,

وجزاكم الله خير
ابونواف 999
09/11/2009, 12:39 AM
السلام عليكم
اول شي افصل اصبع البطاريه لمدة نص ساعة ثم ركبة وشف.
اخوي اذا فيه صوت طقطقه في المكينه فل العطل من طرمبة الزيت حصلت معي .
رح لاي ورشه عنده كشف بواسطه الكبيوتر ويعطيك الخبر الاكيد .
Magellan
09/11/2009, 01:49 AM
هذا الخلل عادة يكون كثيرا في السيارات المستوردة بسبب إهمال مالكي السيارات من تغيير الزيت بصورة منتظمة بالإضافة لإستخدام زيت ذا كثافة عالية
طبعا المشكلة تكون من الجلبة أسفل طرمبة الزيت ويتم تغييرها وتضميدها بتيب أبيض حتى مايصير تهريب فيها...
أنصحك إنك ماتستخدم إلا زيت كاسترول GTX 10W30
أو أي زيت بس تكون لزوجته 10W 30
وأقرأ هذا الموضوع لمثل حالتك

http://mekshat.com/vb/showthread.php?t=237142
سوبر VTC
09/11/2009, 02:07 AM
و عليكم السلام و رحمة الله

عندي الجمس م2001
انبير الزيت له 3سنين يلعب اذا كان الموتر واقف
و اذا مشيت على سرعه 130 الانبير يضرب فوق النض :good:
لكن
قبل اسبوعين اذا وقفت عند اشارة مثلا
تجيه حاله باليوم 3مرات
و هي
ان انبير الزيت يطيح على الصفر :no:
همن بعد 5ثواني تسمع المكينه تطقطق صوت التكايات و البلوف
طبعا في هذه الحالة ادوس بنزين مره وحده
فيرتفع الانبير الى النص و يروح الصوت :good:
اللي حصل
اني غيرت طرمبه الزيت + سيلة ماصورة الكرتير اللي تركب على الطرمبه
+ وجه كرتير + وجه صدر المكينه + صوفه الصدر
قطع الغيار كامله ب750ريال
شغل اليد ب500ريال
للعلم غالبيه الورش قالوا
ب1500 :mad: و الاخر قال ب1800 :mad:
و اخر قالي شغل يد ب800ريال
و رابع قالي شغل يد ب800ريال
الان الموتر ما شاء الله الانبير ثابت على النص اذا وقفت
سابقا
اذا شغلت الموتر و هو بارد ما يوصل الانبير الى النص او فوق النص
و انما بعد التشغيل يبدا يلعب و يكون تحت النص
طبعا قالوا الاخوان غير سيلة ماصورة الكرتير حقت الطرمبه
لكن انا قلت نغير كل شي مرة وحده و لا نتخسر بعدين
مره ثانيه
للعلم
سمعت ان بعض ورش الرياض يفكون بلف الطرمبه و سبرنق
و يمغطون السبرنق عشان يثبت الانبير على النص (حيلة)
و هذا غش :mad:
طبعا الانبير يثبت على النص
لكن المكينه ما تاخذ كفايته من الزيت :no2:

(اهم شي اذا طاح انبير الزيت)
(هل يطلع صوت للمكينه ام لا؟؟؟؟؟؟؟)

ان شاء الله في الايام القادمه راح انزل موضوع عن الطرمبه بالصور

موفق
حكم ساحة
09/11/2009, 02:20 AM
اخي العزيز انخفاض ضغط الزيت غالبايكون من طرمبةالزيت المديلات الحديثة طرمبة الزيت المنيوم وتتلف بسرعة انصحك بتغيير الطرمبة قبل تلف السبائك استعمل زيت 10-30 كاسترول لأنة افضل للمديلات الحديثة
ابومعزي
09/11/2009, 02:17 PM
اخوي اعتقد ان مشكلتك والله العالم في طرمبة الزيت
لازم تغيرها وترى فحص الكمبيوتر ما يطلعها والله اعلم
عموما اذا كانت الطرمبة انصحك تغيرها باسرع وقت ممكن وتراها مشهوره في الجموس الموديلات هذي
Fmejrad
09/11/2009, 05:44 PM
يعطيكم العافيه اخواني

بس الي ملاحظه ان الزيت تمام ماينقص ولا شي ولا فيه تهريب وغير كذا انا استخدم الزيت 30-10 نفس الي مكتوب على الغطاء ,,

وعندي صوت تك تك تك ,, بعض الاحيان اشغل السياره واروح واتركها نص ساعه وهي تشتغل انساها هههههه يعني تكون محتميه وكل شي تمام واذا مريت من جنبها اسمع صوت تك تك تك ,, هل هذي صوفه او اغير الطرمبه كامله ؟!

وهل الطرمبه لها دخل بالعزم ؟

بعض الاحيان السياره تكون مررررررررررررررررره ميته اذا دعست دعسه خفيفه تكون تمام لكن لما اقوي الدعسه شوي تكتم السياره وحتى عداد ضغط المكينه مايتحرك يكون ثابت على 4 او 5 مثلاً والسياره ماتمشي وتطلع لي العباره المذكوره فوق واول ماشيل رجلي عن دواسه البانزين تختفي العباره

هل هذا برضوا يدل على ان المشكله من طرمبه الزيت ؟
أبوفهد7
09/11/2009, 06:21 PM
اقول لاتزين الا شي واحد غير الطرمبه
جمس الوالد كان كذا وغير الطرمبه والحين ماعندك احسن منه
بدوي جنوبي
09/11/2009, 10:34 PM
ان شاء الله العطل من الطرمبه
ترا ما ادعى عليك

لان اذا حددت العطل من قطعه معينه افضل من الحيره
تقعد ايام تبحث عن العطل من وين

وامكن تخسر المحرك وانت تبحث

الله يعينك غير الطرمبه ،،، لان اصبح ضغطها ضعيف

بالتوفيق
علي بن جبر
09/11/2009, 10:53 PM
طرمبةالزيت وانا اخوك بدلها
صارة معي وبعد قيل وقال توكلت على الله وبدلته وصبح الجمس من احسن مايكون
محمد-الرس
10/11/2009, 12:29 AM
استفدت منكم صراحه
بدوي جنوبي
10/11/2009, 12:54 AM
استفدت منكم صراحه

اخى محمد الرس
دام انك استفدت
اغلب مشاكل الطرمبات
اخص السيارات الحديثه
والاستخدام الامريكي
زيتها يكون لزوجته منخفضه

مثلا كان عندى يوكن 98
مكتوب على غطا الزيت 5W-30
ومن النادر تلقاه عند البناشر
فالاقرب له واللى غيرته هو 10W

ان شاء الله تستفيد اكثر

وفقك الله
سوبر VTC
10/11/2009, 07:02 AM
وعندي صوت تك تك تك ,, بعض الاحيان اشغل السياره واروح واتركها نص ساعه وهي تشتغل انساها هههههه يعني تكون محتميه وكل شي تمام واذا مريت من جنبها اسمع صوت تك تك تك ,, هل هذي صوفه او اغير الطرمبه كامله ؟!

وهل الطرمبه لها دخل بالعزم ؟



اذا الصوت عند ماصورة البخاخات
فهو من التاكايات/صبابات البلوف
جرب دس بنزين مرة واحده من عند بنص المكينه عند اللهاة
اذا زاد الصوت من عند ماصورة البخاخات
فهو من الصبابات و يحتمل واحد منهن مكسور :no:
طيب جاوب على السؤال !
انبير الزيت اذا كنت واقف وين يوصل ؟؟
الطرمبه ماله دخل بالعزم




بعض الاحيان السياره تكون مررررررررررررررررره ميته اذا دعست دعسه خفيفه تكون تمام لكن لما اقوي الدعسه شوي تكتم السياره وحتى عداد ضغط المكينه مايتحرك يكون ثابت على 4 او 5 مثلاً والسياره ماتمشي وتطلع لي العباره المذكوره فوق واول ماشيل رجلي عن دواسه البانزين تختفي العباره



طرمبه بنزين او بواجي او حساس الهواء
تطلع عبارة الزيت منخفض
لان الطرمبه به تهريب سيلة او صوفه
(ضغط الطرمبه منخفض بسبب التهريب)
و بالتالي تطلع الرسالة من الحساس
باثفايندراوي
10/11/2009, 07:21 AM
طرمبة الزيت تتبدل و خلصت مشكلتك للأبد بإذن الله
ربي يوفقك
أبوحمييد
10/11/2009, 04:08 PM
انا عندي نفس المشكلة واذا شغلته وهو بارد يكتم شوي واحيانا يطفي واشغله مره ثانيه ثمن يكتم شوي ثمن يزين وودي الله يحفظكم بورشة في الرياض تظبطه...

يعطيكم العافيه....
Fmejrad
10/11/2009, 04:23 PM
يعطيكم الف عافيه اخواني ,, وجزاكم الله خير
Fmejrad
10/11/2009, 04:27 PM
اذا الصوت عند ماصورة البخاخات

فهو من التاكايات/صبابات البلوف
جرب دس بنزين مرة واحده من عند بنص المكينه عند اللهاة
اذا زاد الصوت من عند ماصورة البخاخات
فهو من الصبابات و يحتمل واحد منهن مكسور :no:
طيب جاوب على السؤال !
انبير الزيت اذا كنت واقف وين يوصل ؟؟
الطرمبه ماله دخل بالعزم

الله يستر بس ,, خوفتني والله :eek:

وبالنسبه لانبير الزيت للاسف خربان :p


طرمبه بنزين او بواجي او حساس الهواء
تطلع عبارة الزيت منخفض
لان الطرمبه به تهريب سيلة او صوفه
(ضغط الطرمبه منخفض بسبب التهريب)
و بالتالي تطلع الرسالة من الحساس

انا عندي الطرمبه خربانه اصلاً ,, لانها اذا احترت الطرمبه تبدا السياره تقطع ,,

وانا واقف عند الاشاره تجيها نفضه خفيفه واذا كنت واقف فتره ودعست بانزين تحس السياره ماتمشي ,, ثانتين او 3 ثواني وتمشي تمام

هل معنى كلامك اذا كانت طرمبة البانزين خربانه هل تطلع عباره الزيت منخفض بسببها ؟

مع العلم ان ماعندي تهريب بزيت المكينه ابد




ولاهنت سوبر فتك
سوبر VTC
13/11/2009, 09:48 PM
لاهنت اخوي

يلزمك اذن
فحص كمبيوتر + ميكانيكي يشيك على المكينه

هذي ورش من الاخ ماجلان

للجموس






اقتباس:
اقتباس:

اقتباس:

عندك تشليح آل موسى في الصناعيه القديمه
فيه لبناني مسيحي دكتور كارونات للجمس فقط ويوزن الكوارين بالمللي
ادخل شارع العنوز وجهك شرق وخل السالم على اليسار وتعد اول محطة يبي يجيك مطعم بخاري على اليمين فيه شارع مقابله من شمال ادخل معه يجيك التشليح يسار...

والقيور فيه هندي بصناعية الخليج
دكتور قيور جموس وشفر اسمه صابر رقم الورشة 217
كاسره بالسعر لو فيه مشكلة توضيب

وفي عندك ورشة مشعل العتيبي على شارع الريم بالصناعية القديمة تخصص قيور جمس من 40 سنه

وفي عندك صناعية ام الحمام ورشة القحطاني رقم 11 سوداني فلته في الكهرباء



موفق



شف هالاخوان برابطه الجمس الحوض يدلونك على ورشة زينه :good:
مايقصرون شقرديه و خبره

رابطة مـــــلاك الجموس الحوض (http://www.mekshat.com/vb/showthread.php?t=147000)


رابطة ملاك (اليوكون , دينالي , تاهو , السوبربان ,z71) (http://www.mekshat.com/vb/showthread.php?t=171953)


ما يمنع تمر ورشة البريدي رجال كبير و فاهم :good:
شرق معارض النسيم على نفس الشارع العام


موفق
Fmejrad
14/11/2009, 05:48 PM
الله يجزاك خير يالغالي