قصتي مع دينمو التعبئه بالفتك 2005

[فتك 2005]

اسعد الله مساكم اخواني جميعاً انا معي فتك سوبر سفاري 2005 وبداية قصتي عندما اشغل السيارة تطلع لي ريحه كانه ريحة السيور وصارت دقة السلف ضعيفه مو قوه يعني ضعف ملحوظ وبعد فترة بدا الموتر اذا دعست على دعسة البنزين ما يمشي لو تدوس لاخر شي واذا ولعت النور سوا نفس الحركة واذا طفيت النور يرجع يضبط وبعد شوي ترجع العله المهم استمرت معي فترة ولا كنت اعرف وش علته وبالنهاية قطع السير المهم جبت ميكانيكي وقالي عندك الديمنو حق التعبئة فيه مشكلة المهم فكيته وبعد الكشف عليه اتضح انه المشكلة من الكتاوت حق الدينمو ما لكم بالطويله طبعاً معروف الكتاوت ما يغير رحت واشتريت ديمنو جديد 3000 ريال وركبته والحمد لله ضبطت الامور ...

بس عندي مشكلة الان بعد كل التركيب ولعت عندي لمبة المكينه وابي اعرف وش السبب افزعو لي يالربع مع ان الموتر ولله الحمد عال العال ولا فيه شي يمشي مضبوط وسويت الطريقة اللي هي تفصل اصباع البطارية ونفس المشكلة ما طفت ابي منكم حل بالربع ...

[الوسم]

من كلامك أستنتج إن السير لم ينقطع إلا مجبراً

كيف ذلك ؟؟

ثقلت بكرة الدينمو من قلت لزوجة الشحم في رمانات الدينموا أو نحاساته

وبالتالي يقل إنتاج الكهرباء وبالتالي يقل المخزن في البطارية لزوم تشغيل السيارة وباقي أجزاءها الكهربائية

عسى بس دينموك الأول معك ؟؟؟؟

أنصح إذا كان معك أنك تتأكد منه عند كهربائي آخر ولا تحسف على الدينمو الجديد وخل الأول إحتياط عندك

وبالتوفيق

[فتك 2005]

اخوي الوسم حياك الله بالنسبة للدينمو كشفت عليه عند ثلاث كهربائيين وكلهم اجعو ان الكتاوت هو المشكلة والمكره اخوي زي العسل حقت الدينمو الاول لانه تدور بشكل سليم وطبيعي وكشفت عليه كمبيوتر علشان اتاكد قبل ما اشتري الجديد وبعدها توكلت على الله واشتريت الجديد بس مثل ما ذكرت المشكلة عندي الان لمبه الماكينه مولعه عندي وابي اعرف وش حلها مع انه الموتر الحمد لله ما فيه شي ..

[مقلع الرمث]

سيارتك بحاجه اعاده برمجه فقط رح لا اقرب فحص قله ب 80 ريال الى 100 ريال قل وش سبب تشغيل المبه واذا خلص متفلسف عليك قله طفها وتوكل على الله

[العشة]

اخوي انت فاصل عداد الكيلوات

[الوسم]

الحمد لله على السلامة

وأشوى إن السيارة الآن ما فيها مشكلة 00 إلا 00 ها اللمبه

وإضاهر إن المشكله مثل ما قال أخوي مقلع الرمث الآن يبيله إعادة برمجة

وإستفهام أخوي العشة !! تراه في محله 00 شيك عليه على دربك

والله يكتب لك الخير والخيرة

[سوبر VTC]

حدد موقعك
عشان ادلك على ورشة متخصصة بالباترول
سواء بالرياض او بريدة

موفق

[فتك 2005]

حياكم الله كل واحد باسمه وبيض الله وجيهكم على تفاعلكم بالنسبة لعداد الكيلوات لا افصله ولا جيته وموقعي اخيي بالقصيم

واللي له خبره بالله يفيدني هل ترهيم بطاريه اضافية للثلاجة والكهرباء والخ ... يعني مستقله وتشحنها البطارية الاساسية هل لها دخل باحتراق كتاوت الديمنو حق التعبئة افيدوني تكفوووون

[سوبر VTC]

حياك اخوي

اكثر الربع سواء بالرياض او منطقة القصيم او الشرقية
مركبين بطاريات اضافية للباترول
و لا عندهم اي مشكلة
اكثر ما يذبح بالموتر العوكاس العواكيس
عموما
عندك ورشة الكهربائي العثيم بصناعية الرواف
تخصص نيسان و تويوتا و امريكي
ان بغيت الوصف او الرقم علمن


موفق

[فتك 2005]

بيض الله وجهك اخوي سوبر Vtc وما قصرت وبالنسبة لورشة ابو ابراهيم معروفه وما شاء الله عليه والله يرزقه يارب وانت اخوي ما قصرت والله يسعدك دنيا واخره ...

[مخاوي البر9]

أخوي فتك 2005 .......روح بالسيارة للوكالة عندهم جهاز كمبيوتر يركبونه على جهاز كمبيوتر سيارتك ويطفي اللمبه للسيارة على طول وفي نفس الوقت ، لأن الحركة صارت معي وسويت نفس الطريقة رحت للوكالة .
- نصيحه / النيسان وخصوصاً السفاري لاتوديه أي ورشه لأن وكالته أخبر به .

[Emoo]

تسلم اخوي مخاوي والله يسعدك دنيا واخره يارب

[فتك 2005]

مساكم الله بالخير اخواني جميعا اخوي نفس اللي حصل معك حصلي وفعلاً اشتريت دينمو جديد بنفس السعر وللمعلومية سيارتي نفس موديل سيارتك وعليها مرهم بطارية اضافيه ومن هالكلام يعني اقولك كل اللي حصل معك صار لي وكل يقولي رح ابو ابراهيم والثاني يقولي الوكاله المهم مالك بالطويله الحل ،،،،،

شد على سير المكينة شوي وشف اللمبة اذا قصدك اللمبة اللي بالطبلون البرتقاليه حقت المكينة ولله الحمد الان من شديت السير لي سنه ولا رجعت والله يوفقك يارب