صاحبي أدعيه على هدد ولا يدعيني

[هياط]

السلام عليكم
عندي أسئلة وأتمنى منكم الإجابة لأن نظام القنص يختلف من منطقة لمنطقة
يمكن يقول البعض هذي أسئلة بسيطة وكلن يعرف إجابتها وأنا معكم ولكن لحاجتن في نفسي
س1/ فلان قلت له لك الهدد والحبارة وأنا طيوري جاهزة هل ملزوم يردها لي .ولو هد وما صاد طيره فهل هو ملزوم يردها لي
س2/ فلان قلت له لك الهدد والحبارة وأنا طيوري غير جاهزة هل ملزوم يردها لي .ولو هد وما صاد طيره فهل هو ملزوم يردها لي
س3/ فلان قلت له لك الهدد بس والحبارة لي وأنا طيوري جاهزة هل ملزوم يردها لي .ولو هد وما صاد طيره فهل هو ملزوم يردها لي
س4/ فلان قلت له لك الهدد بس والحبارة لي وأنا طيوري غير جاهزة هل ملزوم يردها لي .ولو هد وما صاد طيره فهل هو ملزوم يردها لي
س5/ فلان قلت له تعال اردف في حالة ان طيوري ما بغت أو غير جاهزة مرة فهل هو ملزوم يردها لي .وفي حالة انه أردف وصاد طيره هل الحبارة لي أو له .
س6/ فلان دايم أدعيه يردف واصفطله الردف عن غيره خصوصا في أول الوقت واطيوري ما كانت جاهزة بالحيل وحصل من وراي خير فهل هو ملزوم يدعيني على هدد ويردها لي وهل هو بنفس عدد الحباري إلي دعيته يردف عليها ويهد ويصيد .
ذكرتكم بأسئلة المدارس
في انتظار ردودكم على أسئلتي البديهية .لكن تهمني مشاركتكم لشيء في نفسي
تحياتي....

[alkreze]

وعليكم السلام
حيالك الله ياهياط

(تراى راس مالها حبارى لا تخسر خوييك على شانها )

وإذا كانت الحبارى عنده كأنها عندك
وإذا هي عندك كأنها عند خوييكـ

[kroz]

وعليكم السلام
حيالك الله ياهياط

(تراى راس مالها حبارى لا تخسر خوييك على شانها )

وإذا كانت الحبارى عنده كأنها عندك
وإذا هي عندك كأنها عند خوييكـ
مافيه احلى من الرد هذا وبيض الله وجهك على هرد وذا تبي اجوبه ترى يبي يسير زعلا بينك وبين خويك وخصوص ان خويك يمكن يبي يدعيك على الهدد بس خوياه واجد او مايبون احد الخ............... وسارت من ناس ماتوقعناها مهم والله كريم وانا خوك

[قناص ابن غنام]

على الحسب راعي الطير الي دعيته اذا انت داعيه وطيورك جاهزوصافطها له انا اتوقع ملزوم يردها لك
وفي حالة طيورك مو جاهزه وصادها وخلصها لك افضل ولا يصير مطلوب لك لهدد لحبارى و الثانيه اذا كان معه ناس قنوص هم الي بدين قانصين معه من ناحيه الهدد والتلحيق مو حلوه في حقهم تكلم احد يجي يلحق وطيورهم معهم ليش قانصين مع بعض الا انكم خوة نشاما وهدد وناسه ومن المفروض من صفطلك بهدد وطيورك صايده انك تردها له وتعلمه وهذا راي وتقبل مروري

[ابوغزاي]

ا لسلام عليكم ورحمة اللة وبركاتة
باختصارشديد يااخونا هياط:confused: اذاعطيت العطية لاتدوروراها جزية
تقبل مروري بشكل رحب

[@السيف@]

نعم اذا اعطيت لا تدور وراها شي

[استيعاب]

يا اخوك احرص على الصديق الوفي اللي ما يهمه الريش و لا تهتم للريش المهم هي الوناسة والتفريج عن النفس وهذي هي طرات العمر ، وكل ما ابتعدت عن الماديات ترتاح النفس لا تطلبه ولا يطلبك ان جا منه شي والله وانعومك وان ما جا منه شي يا اخوك كله ريش والله يرزقك اخير منها

[قرناس شماالي]

فادوك الاخوان

[حر الجوف]

وعليكم السلام
حيالك الله ياهياط

(تراى راس مالها حبارى لا تخسر خوييك على شانها )

وإذا كانت الحبارى عنده كأنها عندك
وإذا هي عندك كأنها عند خوييكـ

:good: :good: :good: :good: :good:

[المغتر2]

وعليكم السلام
حيالك الله ياهياط

(تراى راس مالها حبارى لا تخسر خوييك على شانها )

وإذا كانت الحبارى عنده كأنها عندك
وإذا هي عندك كأنها عند خوييكـ
:good: :good: :good: :good: :good:
انا معاك

[صاحب نوماس]

ياخوي هياط

المراد ماهو طير من اللي صاد المراد الوناسة

وبن جدلان يقول

(يدك لامدت وفاء لاتحراء وش تجيب )

[منصور بن محمد]

ياخوي هياط

المراد ماهو طير من اللي صاد المراد الوناسة

وبن جدلان يقول

(يدك لامدت وفاء لاتحراء وش تجيب )


:good: :good: :good:

واضيف على كلام اخوي

( مايفسد المعروف غير كثر الممنه )

[راعى شاهين]

سو خير وقطه بالبحـــــــــــــــــــرلاتفكر وش الى يجيك من الناس

[عارف الشمري]

وعليكم السلام
حيالك الله ياهياط

(تراى راس مالها حبارى لا تخسر خوييك على شانها )

وإذا كانت الحبارى عنده كأنها عندك
وإذا هي عندك كأنها عند خوييكـ

:good: :good: :good: :good:



حسبي الله على الحبارى الي تفرق بين الرجاجيل

علي الحرام لا امصع راس الطير ولا اغث خوييي

[راعي جالود]

الهدد معرووف

كانك .. لقيت جرتها وخليت خويّك يهد فـ هذا أنك متجمل فيه وشايم عنها له


أما الارداف أنت لو مع خويااك .. وعندكم حبارة .. وتهد طيرك .. ويبرّد أنا أول من يردف عليك . :) حبارة وفـ الجو .. ما تحيّرها لـ أحد

وبعدين .. المقناص خوّه وجماله .. وطيب بينك وبين خوّيك

والله يوفقك .. وعلمنا لا لقيت حبارى وش شسويت .. !


:)

[هياط]

بيض الله وجهكم على الرد الطيب وما قصرتوا وكلامكم عين الصواب
أنا صراحة ما يوم قلت له عطيتك هدد ليه ما تعطينن علشان ما يقول إني أمن عليه بس الشي في نفسي... عطيته هدد على ثلاث وردف ثلاث ... ومره طلبني أعزله وحده حيه وعزلت له وعقبه شريت فرخ وصاد أكثر من وحدة ولا عزلي شي وهو يدري عن فرخي
الصراحة أحس إنه أناني ومستغل طيبتي وأني أخجل بسرعة
عشان كذا أحس إني شايلن عليه
أنا ماهو شفقه على الحباري أو الهدد الحمد لله عندنا وعندكم خير بس أحس أني أقدره وهو ما يقدرني
وش شوركم يا جماعة

[مطامر]

السلام عليكم
والله ياخوي الطيب احسن من الردا والطيب صعب ومايسويه غير اهل الطيب واهل عزة النفس
والردا حاشاك انت والقراء الكرام سهل جدا ومايسويه غير الاستغلاليين والانانيه ولي ماعندهم عزة نفس
انت اخترت الطيب ولا تحسف عليه وهذا يدل على طيب معدنك وفي القران {ولا تمنن تستكثر}
وخويك خله يختار من اي نوع يبغايكون ولا تعلمه الصح لان هاذي الاشياء ماتنتعلم وهي بالدم
انت عملت بقول الرسول صلى الله عليه وسلم {حتى تحب لأخيك ماتحب لنفسك }
والمؤمن كما ورد في الحديث {كيس فطن } ولا يستغفله احد اويستغله احد على طول
وفيه شاعرين الاول يقول .
ترى الردي لو طاب طيب قليل """""""""" يحسب انه طاب طيب ماوراه
والثاني يقول
الطيب لاتستغربه من هل الطيب """"""""" اللي لهم بالطيب باعن وخبره
اوسع على الجواد من فيض الشعيب """""" واضيق على الانذال من خرم الابره
الله يوفقك لما يحب ويرضى ويهدي خويك المقصر ويرد الاحسان بالاحسان .....................

[alkreze]

السلام عليكم
والله ياخوي الطيب احسن من الردا والطيب صعب ومايسويه غير اهل الطيب واهل عزة النفس
والردا حاشاك انت والقراء الكرام سهل جدا ومايسويه غير الاستغلاليين والانانيه ولي ماعندهم عزة نفس
انت اخترت الطيب ولا تحسف عليه وهذا يدل على طيب معدنك وفي القران {ولا تمنن تستكثر}
وخويك خله يختار من اي نوع يبغايكون ولا تعلمه الصح لان هاذي الاشياء ماتنتعلم وهي بالدم
انت عملت بقول الرسول صلى الله عليه وسلم {حتى تحب لأخيك ماتحب لنفسك }
والمؤمن كما ورد في الحديث {كيس فطن } ولا يستغفله احد اويستغله احد على طول
وفيه شاعرين الاول يقول .
ترى الردي لو طاب طيب قليل """""""""" يحسب انه طاب طيب ماوراه
والثاني يقول
الطيب لاتستغربه من هل الطيب """"""""" اللي لهم بالطيب باعن وخبره
اوسع على الجواد من فيض الشعيب """""" واضيق على الانذال من خرم الابره
الله يوفقك لما يحب ويرضى ويهدي خويك المقصر ويرد الاحسان بالاحسان .....................


حكيم يامطامر:good::good:

وخويك دآمهـ مايقدركـ ويحب نفسه على قولتك بع خوتة بترآبـ
وأهـل الطيب شوراك وشروا من يقرون وآجد مالهم حد خآوهم
وعلى قول الشاعر/ بديوي الوقداني
لا تعمر الدار والقاله تخربها **
بيع الردي بالخساره واشتر الغالي

ويقول الشاعر الثاني
وقت الرخاء تلقاه وإذا احـتجـت خلاك *** ما قدرك يوماَ تجي فازعاً له
ترى الردي وإن طاب في يوم ينساك *** غلطان من حط الردي ساعـداً له

[أبوالحارث]

الشيخ عند الشيخ قدره ذبيحه يعني يخوي ولاهانو الاخوان هي شغلت تقدير وتسامح بين الطيبين

[هياط]

بيض الله وجيهكم عز الله واسيتوني بكلامكم الطيب وبالأبيات الي كلها حكم
جزاكم الله خير

[صقرالخطارة]

حياكم الله يا أخوانى على هذة الردود
على أخوى و أقول له واخوته فى القنص
الله يوفقكم ويطعمكم الله من صيد طيوركم

[عتيج الصوف]

تري خذ وانت تحسب للهات مو شيئ .. الاخوه والوناسه اهم بس بعض العرب عسى الله يهديهم فيهم تسرع .. يعطون وفي نفسهم منه .. انا اقول عط وعط وعط والله يعطيك على قد نيتك

[عتيج الصوف]

:good: :good: :good: ابيات بالصميم



حكيم يامطامر:good::good:

وخويك دآمهـ مايقدركـ ويحب نفسه على قولتك بع خوتة بترآبـ
وأهـل الطيب شوراك وشروا من يقرون وآجد مالهم حد خآوهم
وعلى قول الشاعر/ بديوي الوقداني
لا تعمر الدار والقاله تخربها **
بيع الردي بالخساره واشتر الغالي

ويقول الشاعر الثانيوقت الرخاء تلقاه وإذا احـتجـت خلاك *** ما قدرك يوماَ تجي فازعاً له
ترى الردي وإن طاب في يوم ينساك *** غلطان من حط الردي ساعـداً له

[ابو ليث الحرب]

انا اقول مصادق الانذال لاتغتريبه ترى الصحيب النذل ينكر صحيبه
لو زان مده مايطول بطيبه ينشبك بالدعوه ثم روح وخلاك

[ابو ليث الحرب]

بعيد عنا وعنكم

[الوبلي]

لا تحسف على الطيب يارجل........... احمد ربك.......اسمحلي رفيقك هذا بمجرد ما عرف نوعيته مستحيل اخاويه وبدون زعل وغثا السلام وعليكم السلام الوجه من الوجه ابيض واذا طلع شمال رحت جنوب.

[يدوي الشرق]

اهم شيئ الخوه بينكم لا تفرقكم الدنياء