المساعد الشخصي الرقمي

مشاهدة النسخة كاملة : وش رايكم في هالطير


$عاشق الحرة$
21/10/2004, 03:42 AM
بسم الله الرحمن الرحيم

السلام عليكم ورحمة الله وبركاته

الله يصبحكم بالخير جميع

وكل عام وانتم بخير

ومبروك عليكم الشهر

وإعذروني عن إنقطاعي عن المنتدى الفتره السابقه

وإليكم صور هذا الطير ((( عزام )))

http://majed15.jeeran.com/images/z.jpg

http://majed15.jeeran.com/images/z1.jpg

http://majed15.jeeran.com/images/z2.jpg

http://majed15.jeeran.com/images/z3.jpg

http://majed15.jeeran.com/images/z4.jpg

http://majed15.jeeran.com/images/z5.jpg

http://majed15.jeeran.com/images/z6.jpg

http://majed15.jeeran.com/images/z7.jpg

http://majed15.jeeran.com/images/z8.jpg

هاه ياصقاقير وش رايكم فالطير

وش تعطونه من علم

ووش تعطونه هو فرخ ولا قرناس وكم رناسه وهل هو كامل ولا لزيز ولا مثلوث ولا تبع (كوبج)

هاه عطونا علومكم يالذيابه

وترى الطير قياسه 16*16

بإستثناء العزيز سنــافــي :D لأن عنده علوم الطير

لكم فائق إحترامي وتقديري

اخوكـــمــ /

عـــاشـــق الحـــرة ((( ابــو فــيــصــل )))
عبكري
21/10/2004, 04:11 AM
وعليكم السلام ورحمة الله وبركاته
حي الله أبو فيصل وعسى الله يطرح بالطير البركه اللهم آمين.

الله العالم أن الطير يا خامس أو سادس ومحاريه أن فيه الطيران الزين إذا مافيه عيب والوجه زين لكن ما أدري عن وسرته لأن شكله مصور والطير ماركد زين......وسلامك يابو فيصل وهذا العلم اللي عندي
امير الرفيعه
22/10/2004, 03:41 AM
اخوي ابو فيصل ....
السلام عليكم ورحمة الله وبركاته....
اول شي ماشا الله على الطير ...
وانا اقول والله العالم انه قرناس رابع او خامس ..والطير والله العالم انه تام ماعليه كلام ....
وماشا الله مره ثانيه ..........
المري
22/10/2004, 05:15 AM
مرحبا اخوي ابو فيصل


عسى الله يطرح في طيرك البركة


والطير قرناس والله العالم بسنه


وان شاء الله انه يقنصك السنه هذه وكل سنة.


وسلامتك
عبد العزيز العجاجي
22/10/2004, 04:39 PM
الله يطعمك من خيره ويطرح فية البركه
خبير الصقور
22/10/2004, 07:36 PM
السلام عليكم ورحمة الله وبركاته


قرموش عود , قرناس بيت , علمه يبان في الميدان ياعاشق الحره , الله يطعمك من خيره
راعي مسكت
23/10/2004, 02:33 AM
الاخ عاشق الحرة الله يباركلك في الطير والله اعلم انه بكر (سنه) اوثنوبالكثير وغير كامل يعني اصغر من الكامل والصوره واضحه لكن على الطبيعه تعرفه هو مثلوث ولا وكري حرار ولاكوبج واستبعد الكوبج من الطير..
ابوسالم
23/10/2004, 05:19 AM
السلام عليكم ورحمة الله وبركاته

حياك اخوي ابو فيصل (عاشق الحره) +++ ولاتخلينا من صيد الحره +++;)
والله يابو فيصل بصراحه الواحد بس وده يشارك ولا الشباب ماشاءالله ماقصروا
عطوك المفيد وزياده .
عموماً الطير ماهو شين يصقر راعيه حسب الشكل العام للسوق
لكن يمكن يساوي قيمة طير طيب حسب علوم الطير لأن الطير علومه في بطنه وعند راعيه
والطير مايحقر فعندك مثلاً عندنا طير شارينه ب17000 ريال والحين يسام 18500 ريال طير يلحق
لكن وسره 16*16 ماهو مشكله الوسر اذا ثبت طيب الطير.
ومن ناحية عمر الطير فالطير ماهو صغير حسب اعتقادي والصور احياناً ماتعطيك بشكل واضح
يعني يمكن انه ماهو اصغر من 8الى9 سنوات والله اعلم . والعمر هذا يلعب بالخبره عاد
والفصيله هذي من الطيور ماتردي وطيبه وبه ميزة الركاده والطلع دايم الا ماقل


هذا الي عندي واهل العرف اعرف وسامحوني على القصور
نقا هشال
23/10/2004, 05:35 AM
الله يعطيك خيره

ماشاء الله
عاشق القطا
23/10/2004, 12:18 PM
الأخ العزيز أبو فيصل

الشباب ماقصروا بس أنا أقول انه رابع أو خامس فمافوق بالنسبه للسن

أما الباقي ماعليه خلاف ان شاء الله

وعسى الله يطعمك من صيدهان شاء الله
$عاشق الحرة$
23/10/2004, 03:28 PM
بسم الله الرحمن الرحيم

السلام عليكم ورحمة الله وبركاته

الله يمسيكم بالخير جميع

ومشكورين على المرور والإطلااع والردود الحلوه

الله مار يسلمك الطير على كلام راعيه مثلوث ولاكن انا اشك انه لزيز (( نص))

والطير يالذيابه السنه هاذي ابو رابع

والطير في مقناص العام معلق حباري ماشاء الله عليه

والطير طلاع وهادي على اليد تكاية السيارة ماشاء الله عليه

الله يعطينا خيره ويكفينا شره

وفالنا وفالكم الحبارى

لكم فائق إحترامي

اخوكمــ /

عــاشــق الحــرة ((( ابــو فــيــصــل )))
سنافي
23/10/2004, 07:56 PM
الأخ / ابو فيصل
السلام عليكم ورحمة الله وبركاته

الله يطرح فيه البركة وفالك طيب.
ابو عايد
23/10/2004, 08:22 PM
الأصل كُتب بواسطة سنافي
الأخ / ابو فيصل
السلام عليكم ورحمة الله وبركاته

الله يطرح فيه البركة وفالك طيب.
winchester
26/10/2004, 12:50 AM
الطير ولاقصور بالربع قرناس خامس وصاد السنه الي فاتت والي قبلها والي قبلها وأنشاء السنه هذي بع وكل سنه وعسى الله يجيب مطر ويذكرون جرته أمس بالدويره !!!
winchester
26/10/2004, 12:52 AM
معذره وهذي السنه بع >>>> بعد وكل سنه نسيت حرف الدال
راعي عريان
29/10/2004, 07:43 PM
السلام عليكم ورحمة الله وبركاته

أخوي العزيز طيرك ماشأ الله عليه راكد واتوقع من ثالث الى رابع ومعروف16*16 هو يعتبر اصغر التام
ويقال انه يسمى الرواق وهو( مابين المثلوث والتام)
ولكن الشكل ماهواساسي اهم مافي الطير طلعه وسبقه وصطاوته وانه سالم من الأمراض وهذامايبين في الصوره وماقول الى الله يطعمك من خيره