تحب الكشتة عائلية ام شبابية

[عشق الفيافي]

السلام علكم ورحمة الله وبركاتة

يا ربع وش تفضلون تكشتون مع العوائل مثل الاهل والخوال والعمام او شباب ولماذا

[عروان]

مرحبا بك أخوي عشق الفيافي

مرحبا بك ضيف علينا

سؤالك حلو صراحة, و أنا من الناس اللي يستانس مع أهله أكثر. يصير فيه ذكرى طيبة مع أهلك كل ما أجتمعتو على خير تتذكرونها و تضحكون على المواقف الطريفة فيها.

أما مع الاصحاب تموت الذكريات مع أفتراق الاصحاب بسبب ألمشاغل الحياتية.

أطيب تحي لك عزيزي

[العودالازرق]

كل طلعه ولها ميزه مثلا مع الاهل جيده في الاعياد او مناسيه اجتماعيه مثل تمائم او غيره . لكن مع الشباب واحيان يكونون قرائب اخوان عيال عم . الطلعه مع الشباب اولا تكون خميس وجمعه او اسبوع او شهر . اذا معك شقرديه بتستانس وتنبسط وتسفهل . والعكس ............... نرجع للموضوع كل طلعه ولها ميزه

[تبريزة]

كل طلعة وله مميزاته

بس انا من ناحيتي اميل للطلعات الشبابيه سواء مع الاقارب ولا الاصدقاء

وهذا رأيي واختلاف الرأي لايفسد للود قضيه

الله يعطيك العافية على طرح الفكرة المميزة

ودمتم
اخوك
تبريزة

[الربذي]

السلام عليكم ورحمة الله وبركاته
احب الطلعات العائلية لان مامثل انك تشوف اولادك مبوسطين الى يلعب والى يركض والي يتمشى
لان البنون من زينة الحياة الدنيا

[عبد الله الفايز]

أنا بالنسبة لي

أحب أكشت مع أبوي واخواني وعمامي .... رجال فقط في الدرجة الأولى ومع الأصدقاء الدرجة الثانية

بس ماأنسى أهلي وأسرتي ... أقصد الحريم والبزران

يعني ثلاثة أسابيع شباب والرابع للأسرة نكشت بهم على قدهم.... قريب .... يوسعون صدورهم ، ويلعبون ويشبون ضو.... لاآآآ .. ونطبخ لهم بعد أو نشوي لهم ونقهويهم ونجمع لهم حطب يعني نريحهم تمام . ونكسب دعواتهم وشكرهم خاصة العجيزات الله يخليهن لنا

ومثل ماقال الأخ الربذي حنا بعد توسع صدورنا وخاصة إلا شفنا الوغيدان مبسوطين

[فـ(الجـوف)ـتى]

[align=center]اما انا :


احب الكشاتات الشبابيه 0

[طحنون]

السلام عليكم ورحمة الله وبركاته
بالنسبه لي افضلها شبابيه علشان الواحد يأخذ راحته
من جميع النواحي ولا ياتي البزارين وين راح ووين جاء وألاجالس يتعبث بأغراضك اويتعبث بالسياره
واجلس ياولد وانتبه ياولد يعني حاله يرثى لها
يروح وقتك وانت صاير مرشد طلابي :D

[ابواسامه]

يابن فايز وشي وغيدان
في اعتقادي ان الطلعه الشبابيه افضل
لاكن مايمنع انك تطلع اهلك كل بين فتره وفتره
توسع صدورهم







ياعبدالله الفايز من فايز سدير ولا القصيم ولا رغبه

[المترو]

فعلا الكشات مختلفه لكل وحده وقت يعني بالمربعانيه مع الربع الاصدقاء افضل من طلعة العائله خارج الديره وهذا صفقه برد وهذا جاه نزله برد

وقت الربيع كل له حقه علينا وانا صراحه احب الثنتين وان كنت اميل قليلا للربع اكثر من العائله للخروج الروتين العائلي

وسلامتكم الرحال2003

[نقا هشال]

يازينها اذا كشت ومامعك الاقروووووووم

[عشق الفيافي]

يعطيكم العافية اخواني على مروركم الطيب وكل كشتة لها حلاوتها

[ابو شجاع]

السلام عليكم ورحمة الله وبركاته:

مساكم الله بالخير يالربع وفطور هني وفية العافية ان شاءلله:o

بالنسبة لي احب الكشتات مع الاهل لاكن بشرط مايجون الا بعد ترتيب المخيم من جميع النواحي علشان متعلك

وحدة من هالحريم بزري مريض دخلونا للديرة نبي كذا ولا كذا؟؟؟؟ وانتم عارفين طلباتهم اللي ماتخلص حتى وا

وانت اللي تشتغل عنهم في( طبخ ونفخ ) وغسيل مواعين وشبة الضو لهن الله يخليهم لنا اذا صار معهم

اميمتك جالسة ومددة كراعينها قدام النار تدور الدفاء وتحجي على هالبزارين مرتن يضحكون:D ومرتن

خايفين:eek: يازين زواليفهم ويازين صجة الماطور معهم:p


وانت يابو اسامة الا تعرف اي الفايز اهو ؟

تراي زعلت عليك لايش ماقلة ( رغبة ) اول شيء:cool:

[المكحل/ابو]

ذكرو الاخوة
العود الازرق
الرحال
ان كل طلعة لها وقتها ومناسبتها
بحيث تعطي رغباتك مع الاصدقاء ولا تحرم اولادك من المواسم الطيبة مثل الربيع وطلعة الفقع
لاان المدة طويلة ويمكن تحقيق كل انواع الرحلات
مشكور لصاحب المقال

[SilverSniper]

أنا أفضلها شبابية... ولكن ما يخالف ان كانت عائلية... لكن أحياناً تلقاني طالع للبر وشاب الظو وحاط البريز ( البريق بالسديراوية الفصيحة ) وأتقهوى لحالي.. ما حولي المندر ولا المكدر.. والله من مرة طلعت أصيد في الشعبان لحالي.. ما يخاويني إلا شوزني وخرازتي..

[عبد الله الفايز]

الأصل كُتب بواسطة ابواسامه
يابن فايز وشي وغيدان
في اعتقادي ان الطلعه الشبابيه افضل
لاكن مايمنع انك تطلع اهلك كل بين فتره وفتره
توسع صدورهم







ياعبدالله الفايز من فايز سدير ولا القصيم ولا رغبه



الوغيدان جمع وغَيد وهو مصغر وغد في لهجتنا قبل الاختلاط

الوغد يعني الطفل .. البزر ... الخ

وبعدين اسمي هذا حركي <===== صارت منظمة التحرير

المهم مع احترامي لأسر الفايز جميعا فلست منهم كلهم

أما البلد فقصمنجي

[راعي الكيف]

والله يا شباب انا ماخبرتها إلا شبابية لأن الاهل مشيبين = شيبان مالحقت علة كشتات معهم ...


وأنا بصراحة عزوبي ملحط من الدرجة الذهبية ما تأهلت وللأسف :( :( :(


لكن الكشتة بكل أنواعها حلوة ويكفي من أسمها كشته من يوم اسمع هالكلمة يستاسع صدري وانبسط !!!!