النجاح لتجربة تقوية الارسال بنصائح الخال شقران

[الخبير]

السلام عليكم ورحمة الله وبركاته
فيه كلمة تقرقع بخاطري وهي ( ياهوه ) ، و الله يا جماعة الخير انا الصراحة ما توقعت ان التجربة و التحسينات إلي قال عنها شقران انها تبي تحسن الارسال في السيارة.
المعدات المستعملة :
جهاز ايكوم 8000
كيبل RG 8 موصل بانتل لارسن اصلي .
انتل درقلاند ( قصير ) مع الكيبل المعروف عند الناس في سيارتهم.
محول بين الاناتل يخليني احول بين الانتلين بدون فك و تركيب .
تأريض.
كنت اراسل شباب في الرياض على انتل درقلاند وكانت استقبلهم من 2 إلى 4 ابراج ، ثم حولت على الارسن لقيت الارسال صفق عندي من 9 إلى 11 برج :eek: ماشاء الله
الصراحة طار عقلي ، ويييييييييييين و الله ما توقعت اني ابي اراسل راعي عنيزة وهو بعيد عني بحول 300 كلم ، الصراحة شئ خلى قلبي يقرقع من سعة الصدر .


تصدقون إن انتل درقلاند هالقصير ذا كان يراسل احسن من الدايموند و الارسن وحتى الكومت. لكن الحركات إلي علمني عنها شقران خلتني اقول ( شكلي ابي اخلي سيخ الدرقلاند للشوي و بس )
بيض الله وجه شقران و عز الله انه بحر.

[راعي عنيزة]

مشالله تبارك الله
هذي والله بركه ابو سليمان وبركة توجيهاته طال عمره
وانه لمن دواعي سروري ان اراسلك وانشالله انك بتركب الامبي وتلحط الي عندي بالقصيم :)

بس لو تطاوعني وتجرب دايموند ستيشن سيار اصلي وتقارنه مع اللارسن كان تحط اللارسن عصا مهشة ذباب :D
ياخي فرق كبير بين 6.5 ديبي وبين 3.5 ديبي وانا مجربهن بنفسي وارسال الستيشن دبل اللارسن ولو تذكر اول مره راسلتكم فيها ترا كانت على الاستيشن السيار

[الخبير]

طيب يا اخوي كم سعره ، و هل يبي له قص ؟؟؟؟؟؟؟؟ مثل الارسن

[راعي عنيزة]

سعره يا طويل العمر 250 ريال
ومسئلة القص هذي يفتيك فيها ابو سليمان ولو ان الي عندي ما قصيته وهذاني اراسل فيه الرياض :)

[شقران]

الخبير
ذلك فضل الله يؤتيه من يشاء .
ماشاء الله ومبروك ياغالي وبالنسبة للقص أي اريل له مقاسات واطوال للوزن على تردادت مختلفة ونعم حتى الدايموند الأستيشن حق السياره يكون له وزنية قص حسب الكاتلوج المرفق معه.
راعي عنيزه :
مسيك بالخير يابعدي أيه قلنا لك ياغالي ارسله واقصه لك (اللارسن) واخليك تراسل به الرياض وبالفعل الرجال سمعك وبانت علومه بدووووووووووووووووووووووون امبليفاير وش عاد لو ركب امبي. ياحبي لك يارعي التايمنوركشن:D :D :p :D :D :p :p
تحيات اخوكم شقران

[هاوي]

لو تكرمتو اعطونا صور هالأرايل اللي تقولون واسماءها والله تشكرون على كل حال.

[شقران]

راجع هذا الموضوع
اضغط (http://www.mekshat.com/vb/showthread.php?s=&threadid=2347)

[أبو ناصر]

[size=3] السلام عليكم ورحمة الله وبركاته

أخوي الخبير

انت تقول إن الارسال صار قوي :
هل القوة ما طلعت إلا يوم غيرت الكبيل أو الانتل ؟

أنت ذكرت محل اسمه سترا ، هل هو في الرياض ، ممكن تعطيني وصفه ورقم تلفونه ؟
طيب وش رايك في الانتل الصغير الانتكنس ؟

[الخبير]

السلام عليكم
انا كنت في السابق اراسل ابعد شئ حول 20 كلم لكن بعد التعديلات وصلت للمواصيل إلي شفت.
محل استرا موجود في حي السليمانية شارع الدشوش ولكن رقمة مهوب موجود معي للاسف.
انتل الأنتنكس الصغير ما قد جربته ولكن واجد يمدحونه

[أبو ناصر]

حياك الله أخوي الخبير
وشاكر لك حسن تجاوبك معي

أنا سألت عن الكيبل 8أرجي في المرسلات عند العامة المتر بـ 3 بدون تركيب الكنتكرات ، وكان شكل السلك من الداخل تقريبا 3أسياخ نحاسية أو أكثر . وسألته هل هو الأصلي قال مكتوب عليه أمريكي وأن المصنع في الصين ، والخال شقران يقول الاصلي سعر المتر من 10ريال إلى 13 تقريبا . ومحل زنر قال سعر المتر بـ 2.5 مع تركيب الكنتكرات .

أنت وش رايك في هذا الكلام ؟ أتوكل على الله وأخذه وإلا أسأل محل سترا .


هل محل سترا يبيع الكيبل الاصلي اللي أبو 10 ؟
هل داخل السلك سلك واحد متين وإلا مجموعة أسلاك نحاسية ؟
وهل الكنتكرات الاصلية تغير بشكل واضح جدا ؟


ممكن توصف لي وين يقع شارع الدشوش ؟

[أيمن]

أخوي أبو ناصر ..

الله يحييك، بالنسبة للكونيكترات والكيابل فعندي أربع كونيكترات فضة أصلية لا تتأكسد ولا تصدأ مع الزمن وعندي كذا كيبل ومنها الأصلي الذي تم طلبه من أمريكا خاصة إن كان لك نظر راسلني ..

تحيتي

[الخبير]

السلام عليكم
صحيح إن الكيبل الموجود عن محلات المرسلات رخيص ومكتوب عليه انه مصنوع في أمريكا، ولكن نسبة الفقد عالية ةانت ماتبي شئ يضيع من الإشارة! صح؟
انا أنصحك إنك تاخذ كيبل بلدن الموجود عند استرا هذا موقعه عند الإشارة إلى يجي منها القادم من العقارية وقيمة الكيبل ب 10 ريال فقط
أو تأخذ إلى عند أيمن ( لأن عندي منه وانا استخدمه حالياًَ ) لأنه أقل فقد من البلدن.
للتوضيح أكثر إذا قلنا إن نسبة الفقد في الكيابل الموجودة في شارع الإتصالات تاصل إلى 40% تبي تلقاها في البلدن 20% وفي ال LMR أقل من كذا.
يمكن تقول النسبة مهيب شئ لكن صدقني تبي تلقى الفرق واضح.

[سالمين]

السلام عليكم ورحمة الله وبركاته
شباب باختصار ابي اشتري كيبل وابي اغير الكيبل اللي عندي ممكن احد يقول لي اش اخذ مع اني استعمل كيبل rg8 بلدن الاصلي وشكراا.. يعني ابي واحد احسن منه ويكون موجود في المحلات ** وهل هنا نوع من انواع الكنكترات عشان اطلب تركيبه في الكيبل اذا اشتريته انشاء الله ......
افيدونا جزاكم الله خير......
وشكرا اخوكم سالمين.....

[الخبير]

السلام عليكم
يا سالمين ما اعرف كيبل أفضل من البلدن إلا LMR 400 وإذا كان على الكونكترات ترى المطلية بالفضة أفضل شئ، ولكن للأسف ماهي موجودة!
اذكر واحد من الشباب عنده الكونكترات الفضة ابي اشوفها وارد عليك

[almajls]

والله عجيب

[سالمين]

السلام عليكم ورحمة الله وبركاته
شكرا اخوي الخبير على سرعة ردك . لاكن سؤال ال lmr 400 هذا كم سعره يعني المتر بكم واين يوجد وكم فرق الابراج بينه وبين ال rg8 .
وايضا قالو ان ال rg8 فيه انواع وليس نوع واحد . ابي ردك.
وعندي سؤال اخر لو سمحت لي كثرة الاساله عليك لاكن هل عندك خلفيه عن الهنادل او اي محل يسويها ويوصلها رجاء ردك يا غالي وشكراااا.
اخوك سالمين....

[الخبير]

السلام عليكم
يا سالمين مثل ما قلت ال Rg8 انواع كثيرة إلي يباع عندنا نوعية تعبانة ولو قالوا لك إنه أمريكي! ال Lmr 400 هذا طلبته من أمريكا وتقدر تطلبه أنت ( للأسف نسيت الموقع لكن لو ترجع لردود شقران الأوله تبي تلقاه بإذن الله.
إذا كنت تبي نوعية جيدة جداً شفها عند محل يقال له سترا في حي السليمانية بالرياض شارع الدشوش تلقى شعره ب 10 ريال للمتر إسمه بلدن 9913 هذا يغنيك بإذن الله عن ال Lmr.

للأسف ما اعرف احد يسوي الهنادل، لكن لو تراسل على موجه 146050 أو 145850 تبي تلقى من يدلك.

[أبو فراس]

السلام عليكم ورحمة الله وبركاته

والله عندكم علوم سنعة

يبيلكم تفرغ ان شاء الله

[ملك الأيكوم]

والله انك صادق يالخبير.. سويت التأريض بالسياره وحطيت مكان الأريل في المكان المناسب بالسياره

و
النتيجه..

الحمدلله مع اني اراسل بالسياره بأريل دايموند مع قاعده سياره العاديه((سلك نحيف)) وموقعي موب رفيع يعني حولي جبال
الا اني وصلت مسافة60 كيلوا ولله الحمد وبدون امبي

وارجوا التفاعل فب مثل هذي المواضيع الشيقه يااخواني

وشكراً لك أخي الخبير على هذي المعلومه


اخوكم:

ملك الأيكوم
king icom

[ولد الأمارات]

مشكور يا شباب بس وين ممكن نلقى هذا الكيبل في الامارات؟

وشكرا