طرح الكويت

[لهاب]

السلام عليكم ورحمة الله وبركاته

مرحبا يالنشاما وكل عام وانتم بخير وعساكم من عواده :

من تقريبا ثلاث أيام تم طرح طير فاخر في الكويت ويقولون الي شافوا الطير ان لهلحين من أنطرح اخوه

على مستوى الخليج ويقولون عن مواصفات الطير انه ( فارسي وانه قرناس بكر والراس عازل والريشه ريشة القوبعه ).

وراعيه باعه بنفس اليوم على الشاعر حمد السعيد بقيمة 7300 دينار ومن أخذه حمد ضاعت علومه

فيالربع الي يعرف شي عن الطير الله يجزاه بالخير يخبرنا او نبي صورته اذا امكن.

مع التحيه والتقدير للجميع.

[أبو رداد]

بسم الله الرحمن الرحيم


السلام عليكم ورحمة الله وبركاته



الاخ العزيز لهاب مشكور على هذا الخبر ... ومبروك على الشاري وعلى البايع ... يستاهل الشاعر .. يعرف من اين تؤكل الكتف ...هههها .. الله يهني في طيره ..

[سنافي]

السلام عليكم ورحمة الله وبركاته

يستاهل الطير من شراه
وهل سيحتفظ الشاعر حمد السعيد بالطير .... أم ..... ؟

[العتيبي......]

بسم الله الرحمن الرحيم
السلام عليكم ورحمة الله وبركاته

مشكور الاخ لهاب على هذا الخبر ويستاهل الشاعر حمد السعيد الطير وهو صقار معروف وله خبره في الصقاره.


اخوكم:العتيبي.

[ابو عايد]

السلام عليكم ورحمة الله وبركاته


يستاهل الطير من شراه

وهل سيحتفظ الشاعر حمد السعيد بالطير .... أم ..... ؟

[فارس العجمي]

السلام عليكم
اخوووي لهاب الخبر صحيح والطير انعرض في السوق وقبل لا يرفع برقعه وصل 3500 دينار وشراه السعيدي 7300 دينار والطير الي شابك 6 رياجيل من الشيابين من العتبان في شمال الكويت ويوم وصل بيته الشاري الي اهووو الشاعر حمد السعيدي لحقه سكرتير صاحب السمو الملكي الامير سلطان ابن عبدالعزيز وقال الطير يبه الامير واهدها الطير وبعد يوم وصله شيك 100000ريال سعودي والخبر صحيح

[عبد العزيز العجاجي]

مشكور على الخبر والله يبارك للشاري والبايع

[الدافور]

السلام عليكم و رحمة الله و بركاته...

ان اجيبلكم السالفه بالتفصيل و ترا السالفه مؤكده:

(( هذا طال عمركم فيه خويا طالعين للمطلاع يدهلون طيورهم و على مسافه ليست بعيده شايب موقف سيارته

و جالس مع وغدانه بظلال السياره و معهم حمامه عليها شبكة>> يعني طواريح عليميه << لان الطاروح

يقوم بالبحث عن الطير و ليس ينتظر الطير ينبطح قدامهم و يقول اشبكوني...مالكم بالطويله و الخويا يدهلون

طيورهم و لا هكالنداوي الاشقر يمر قدامهم و ياخذله مشوار و يوقع على عقم يبي قرب الطيور فقام الشايب

هو ووغدانه و قطوا للطيور الحمامه و يجيك طير شلوى و يبلش بالشبكه و ياخذولهم 5 دقائق و يطرحونه

وسيم الطير من الهدب الحسيني ب 7300 دينار كويتي و جاء حمد السعيد و فرق السومه ب 200 دينار يعني

الطير انشرى ب (( 7500 دينار كويتي لا غير ))

و الله يرزق البايع و الشاري

اعذرونا على الاطاله لكن حبيت اوضح السالفه و امنع الالتباس عليكم

تحياتي...

[لهاب]

بسم الله الرحمن الرحيم:


أحب أشكر اخواني أبو رداد وسنافي والعتيبي وأبو عايد وقرناس الجزيره والمرشد والدافور ولهم مني كل تقدير واحترام ...

وأرجومنكم ان تعذروني لقلة تواجدي معكم والسبب هو المقانيص والرحلات الكثيره .

اليوم قلت لنفسي ودي اشوف مكشات شنهي علومها لأني بالحيل مشتاق لها ومثلكم عارف هالوقت أقفى المقناص ولا بقا غير دعو الطيور للوناسه ومن خلال زيارتي للمواقع شفت هالموضوع اللي انا كاتبه ومع الأسف أن اللي ردوا على الموضوع ماجابوا العلوم الصحيحه ابدا.

وبالنسبه للطير اللي انا ذكرته يقول اخوي قرناس الجزيره ان الطير أنعرض بالسوق وهذا الكلام غير صحيح لأن الطير أنطرح العصر وبعناه العشويه (عندنا بالديوانيه ) والسوق يفتح من الصبح حتي الظهر وهذا أول دليل....والثانيه اللي شبك للطير اثنين أولهم ( أنا وولد خالي ) وحنى ......العنزي و.......العنزي (الشليخي ) ماهو عتبان وهذا الدليل الثاني.....وحمد السعيد صح انه شرى الطير ب( 7300 )لكن شراه عندنا بالديوانيه بعد ماساموه الرجاجيل ووقفوا عند(7200 )وجاء حمد متأخر وفرق السوم وأخذه ب7300 وهذا الدليل الثالث. أما بالنسبه لسكرتير الأمير لحقه ايضا غير صحيح لأن الطير طلع من الديوانيه ووداه حمد لخاله الدبوس وهناك واجه حمد مندوب الأمير عند خاله ( وبعدين يالربع تعرفون الأمير وتعرفون عطاياه يعني اللي انا اقصده أن قيمة الطير بالكويت 7300 = 100000 ريال وهذا غير صحيح لأن الأمير سلطان يعطي الدبل بالقيمه وهذي موغريبه هليهم ولا يعطيه نفس القيمه.

وأما اخوي الدافور بس حبيت أصحح معلوماتك مع أحترامي لك .

الطير أنطرح العصر صحيح وكنا على طريق السالمي وليس المطلاع رايحين ندعي الطيور وبالمدعى رزقنى الله بالطير
ولاكان هناك شايب ولا ورعان.
والهدب فتح باب الطير ب2000 ووصله إلى 6000 تقريبا طبعا مع الناس السوامه .

هذي علوم الطير يالربع وأعذروني على الأطاله بس حبيت أصحح هالمعلومات.

[ابو عايد]

تستاهل الخير يالغالي ومشكور على إيضاح السالفه

وانشاء الله مقناص خير

وتقبل تحياتي // العاشق الولهان