مشكلة في الكابرس تخووف ... الفزعه يا اصحاب الأمريكي

[العابر2222]

السلام عليكم ورحمة الله وبركاته

أخواني انا معاي كابرس 2006 ومحافظ عليه غيار زيوته وكل شي المهم قبل امس وانا امشي صاح الكمبيوتر ويطلع على الشاشه (شيك على الزيت) واصفط عند محطه ألا انواع الأصوات في المكينة كأن السبايك متطلقه
قرشعه وصقع واطفي السيارة ... واشيك على الزيت وحصلة تمام لا ناقص ولاشي
المهم قلت خلني اغير الزيت والفلتر عن الشكه واغيره يوم فك العامل الفلتر الى الزيت وصط الفلتر ما ينزل للمكينه قلت هذا ليش قال عادي

المهم غيرنا الزيت والفلتر وشغلت السيارة تمام ما فيها لا صوووت ولا شي وامسك الخط امشي طبلونها ما فيها اي شي ابد ... المهم واجلس اتمشى حول الصناعيه قلبي مو مرتاح شوي صاح الكمبيوتر مرة ثانيه (شيك على الزيت) وطلع صووووت بالمكينة قوي قرقعه وصفق وصفيق .. المهم طفيت السيارة وشغلتها راح الصوت وراح كل شي ..وصارت تجي بين فترة وفترة عزززززززم الموتر قوووي ولا حرارحه ولا شي

يطلع انذار شيك على الزيت ويطلع صوت اطفي واشغل يختفي


رحت للورش بعضهم يقول توضيب و بعضهم يقول جنزييير وبعضهم يقول بلوووف وبعضهم يقول شدادات وبعضهم يقول طرمبة زيت لا تحرك الموتر ترى بيخبط

والله مدري وش اسوي وتوضيبه مهوب سهل

ونبي الفزعه منكم يا اخووووان بالراي او احد حصلت معااه او ورشة طيبه وصريحين

[سوبر VTC]

و عليكم السلام و رحمة الله

طرمبة الزيت للجمس و الكابرس من م2000 الى م2006
نفس بعض
مشكلتك بصوفة ماصورة الطرمبة
غالبية الجمس دايم يلعب انبير الزيت تحت النص احيانا على الربع



عندك 4احتمالات
1
انبير الزيت خربان نفس الدينمو
2
اذا شغلت الموتر و هو بارد و كان الانبير ضارب فوق النص
همن اذا احتمى يطيح الانبير
فاحتمال الخراب من ساعة الزيت بالسلندر
3
صوفة ماصورة الشفاط تهرب زيت
4
بلف الطرمبة معلق دايم يكون فاتح ما يسكر

فيه ناس غيروا انبير العداد ب150 ريال و ضبط الموتر :good:
طبعا جمس
و فيه ناس اذا وقف الموتر تسمع صوت طقطقة
لتكايات البلوف الصبابات
اذا داس بنزين اختفى الصوت
بعضهم يغير سيلة او صوفة ماصورة الطرمبة
و البعض الاخر غير الطرمبه وزانت

دام موترك اذا وقفت مافيه صوت لا تحرك ساكن :no2:


عندي الجمس م2001
انبير الزيت له 3سنين يلعب اذا كان الموتر واقف
و اذا مشيت على سرعه 130 الانبير يضرب فوق النض :good:
لكن
قبل اسبوعين اذا وقفت عند اشارة مثلا
تجيه حاله باليوم 3مرات
و هي
ان انبير الزيت يطيح على الصفر :no:
و تولع رسالة بالطبلون ضغط الطرمبة منخفض لمبة حمراء
همن بعد 5ثواني تسمع المكينه تطقطق صوت التكايات و البلوف
طبعا في هذه الحالة ادوس بنزين مره وحده
فيرتفع الانبير الى النص و يروح الصوت :good:
اللي حصل
اني غيرت طرمبه الزيت + سيلة ماصورة الكرتير اللي تركب على الطرمبه
+ وجه كرتير + وجه صدر المكينه + صوفه الصدر
قطع الغيار كامله ب750ريال
شغل اليد ب500ريال
للعلم غالبيه الورش قالوا
ب1500 :mad: و الاخر قال ب1800 :mad:
و اخر قالي شغل يد ب800ريال
و رابع قالي شغل يد ب800ريال
الان الموتر ما شاء الله الانبير ثابت على النص اذا وقفت
سابقا
اذا شغلت الموتر و هو بارد ما يوصل الانبير الى النص او فوق النص
و انما بعد التشغيل يبدا يلعب و يكون تحت النص
طبعا قالوا الاخوان غير سيلة ماصورة الكرتير حقت الطرمبه
لكن انا قلت نغير كل شي مرة وحده و لا نتخسر بعدين
مره ثانيه
للعلم
سمعت ان بعض ورش الرياض يفكون بلف الطرمبه و سبرنق
و يمغطون السبرنق عشان يثبت الانبير على النص (حيلة)
و هذا غش :mad:
طبعا الانبير يثبت على النص
لكن المكينه ما تاخذ كفايته من الزيت :no2:

(اهم شي اذا طاح انبير الزيت)
(هل يطلع صوت للمكينه ام لا؟؟؟؟؟؟؟)

ان شاء الله في الايام القادمه اذا الله يسر
راح انزل موضوع عن الطرمبه بالصور

هذي ماصورة الطرمبة ماصور الشفاط و لاحظ السيلة او الوجه

http://www.mekshat.com/vb/../pix/upload03/images134/mk53291_vsvsv1.jpg

http://www.mekshat.com/vb/../pix/upload03/images134/mk53291_dbbf11.jpg

http://www.mekshat.com/vb/../pix/upload03/images134/mk53291_gnng2.jpg


لاحظ السيلة او الوجه احيانا من الحرارة تلين و تهرب زيت و يرجع الى الكرتير


http://www.mekshat.com/vb/../pix/upload03/images134/mk53291_dbdf3.jpg


هذي الطرمبة الجديدة الكابرس و الجمس نفس بعض


http://www.mekshat.com/vb/../pix/upload03/images134/mk53291_bdfb4.jpg



http://www.mekshat.com/vb/../pix/upload03/images134/mk53291_bffbf5.jpg



موفق

[العابر2222]

هلا بمشرفنا غالي ... وسررت بمرورك

الكابرس 2006 كمبيوتر مافيه امبير للزيت يطلع على الشاشه شيك على الزيت فقط وبعدها يطلع صوووت قوووي مرة قشع وصقع مهوووب صوت طقطقة بلوووف اطفي السيارة واشغلها يرررروح ويرجع الوضع طبيعي

[سوبر VTC]

حياك الله

هذا مثل ما قلتلك
صوت الصبابات و التكايات و البلوف
صفق حديد بدون زيت
طيب جرب هالحل
اذا طلع الصوت
دس بنزين خل الابنص او الاربي او انبير ضغط المكينة
خله يوصل 1.5
لمدة 10ثواني فاكثر
اذا طفت الرسالة او راح الصوت
فاعرف انه من طرمبة الزيت او سيلة
لانه اذا دست بنزين و رقى الزيت يختفي الصوت :good:

[العابر2222]

بيض الله وجهك اخوي سوبر فتك

هو فعلا المكينة كأن ما فيها زيت ... وبشيك على طرنبة الزيت وبشوف

[سوبر VTC]

جزاك الله خير
اذا دست بنزين و الموتر واقف
همن طفت الرسالة + اختفاء الصوت
فالمشكلة باذن الله
صوفة او سيلة ماصورة الكرتير
او من بلف الطرمبة فاتح ما يسكر
او من صوفة صدر المكينة اللي راكبه على
الطرمبة
و هذا احتمال ضعيف

http://www.mekshat.com/pix/upload03/images134/mk53291_ssv111.jpg


http://www.mekshat.com/pix/upload03/images134/mk53291_gnbdb222.jpg

[اكسبلورر2005]

الاحتمال الاكبر يكون من طرمبة الزيت
الافضل انك تغيرها وبأذن الله تضبط ويختفي الصوت

[ابوبحه القصيم]

السلام عليكم ورحمه الله وبركاته اخوي الغالي احب افيدك من التجربه مع الكابرس اتمنى انك تتواصل معي على الخاص ولك رساله وياليت تتصل على بعد اذن المشرفين على 0533319991

[waledsaleh]

السلام عليكم قبل تغير اي شي غير فلتر الزيت لان غالبية اللي عند البناشر وضروبة وبعدين شف الاشياء الاخراء و السلام

[هايم بالعالمي]

معليش حدي 88 بالنسبه لموترك الله يعطيك خيره ويكفيك شره

وان شاء الله تنحل مشكلتك بدون خساير وتكاليف عاليه

[MZAJE]

وعليكم السلام

اخوي العابر ، انت متواجد في موضوعك هذا

والا انحلت مشكلتك ، ننتظرك يالغالي

[رقم 1]

حبيبي غير طرمبة الزيت والجلدة تبعها وترى فكها من تحت لايطري عليك تفك المكينه وشغل يد تقريبا حدود 800-1200 على حسب الورشة وطبعا لازم تغير وجه الكرتير وجه الصدر وصوفة الصدر وموية اديتر اصلي وزيت الدركسون وبالتوفيق

[العابر2222]

حبيبي غير طرمبة الزيت والجلدة تبعها وترى فكها من تحت لايطري عليك تفك المكينه وشغل يد تقريبا حدود 800-1200 على حسب الورشة وطبعا لازم تغير وجه الكرتير وجه الصدر وصوفة الصدر وموية اديتر اصلي وزيت الدركسون وبالتوفيق


هلابك أخوووي ... الله يعطيك العافيه على ردك

الموضوع قديم يا غالي بعت السياره وشريت غيرها كذا سياره

لاكن للفائده نعم تم تغيير طرنمبة الزيت والصبابات والشدادات لانها تجرحت .. واستمرت السياره معاي 7 شهور الين بعتها ماشيه تمام

والتكلفه كانت تقريبا 3000 ريال