فرشك حق البر وش مواصفاته

[عاشق4500]

السلام عليكم
السلام عليكم

فيه بعض الاشياء التي لايلقي بعضنا لها اهتمام وهي قد تكون مهمه فمن هذه الاشياء
فراش االنوم الذي لايستغني عنه أي كشات ويجب ان يكون هذا الفراش له مواصفات
معينه مثل
ان يكون حجمه اذا فليته كبير وتاخذ راحتك فيه (ترى فيه فراش نفرين للمتزوجين)
ان يكون حجمه اذا طويته صغير ووذيف اهم شيء ما ياخذ مكان
ان يكون القماش الخارجي من النوع الجيد الذي يدوم معك لأطول فترة مثل
التنزاني الأصلي
ان يكون القماش الي داخل له سحاب تقدر تفصله عن الفراش اذابغيت تغسله
(لاتوهقون مثلي )
وتختلف نوعية القماش الي داخل فبعضنا مايداني البرد وهذا ياخذله فراش
فرو من داخل لأنه دافي (بس الله يعينه على الريحه)
وفيه النوع الثاني الي يجك قماش حاشينه الظاهر بقطن وهذا زين ودويفي
بس على حسب القماش الخارجي
وا لفراش الي عندي نوعيته ممتازة ودافي وصابر علي الى
هالحين وله معي سبع سنوات ماخذة من التوافق ب250
بس عزا الله انه فراش
والسلام عليكم

نتقبل الأاء والردود والنقد وأي شيء عندك هاته!!!!

[ريع الدياب]

بسم الله الرحمن الرحيم
السلام عليكم ورحمة الله وبركاته

مشكور عاشق4500 على الموضوع المفيد والطريف

فراشى للبر هو كيس نوم القاضى حجم كبير أبو مخدة تنفخ هواء بالفم

وهو عملى وخفيف وله كيس حافظ بسحاب بعد صفطه

سعره فى حدود 200 ريال (+/- 20 ريال)

[يزيد2002]

موضوع جدا رائع

وانا استخدم السليب باق

[يزيد2002]

أخوي ريع الديــــــاب

بغيت اسألك وين القا المخده اللي تفخ بالفم فيه

[عاشق4500]

شكرا لك اخوي ريع الدياب على مرورك على هالموضوع والمشاركه فيه
بس ها الفراش الظاهر انه يمسك البرود بس تراه عملي وصغير اذا طوي
اخي يزيد 2002 اشكرك كذلك ومعليش اذا تلقفت وقلت ان هالمخد كد شريتها من ساكو
الي على خريص صغير وزينه وبخمسه ريال فقط$$

[عنـاد]

اما انا فراش نومي من نوع كول مان جايبه من برا بس قد شفته هنا وسعره مهوب غالي بالحيل في حدود 400 ريال صح انه صغير شوي ولا يمديك تقلب على راحتك بس انه مقاوم للمويه واذا رقدتا فيه تسنك ممرح في تنور وخفيف وصغير مره لا سفطته يمكن يجي ا كبر من مركى الونيت اللي يركب شوي التنزاني كبره اربع او خمس مرات :)

عنـــاد

[ولد وايل]

..
..
..
..
..
انا فراشي طربال وحاط به بطانيه ومخده ومدلع نفسي...
..
..
..
..
..
ولكم تحياتي

[ممتر البران]

السلام عليكم ورحمة الله وبركاته
فراشي تنزاني من حقين الخيام الي بالغرابي قديم له تقريبا 5 سنوات بحدود الميتين ان كنت منيب واهم
وانشاءالله بطق لي واحد على جيت هالبرد
وبسويه مثل حق واحد من العيال شاريه القطن الي ملبس بقماش مدري وش يسمةنه غطا او بطانيه المهم
نوع زين ومطرز من النص ومع كل مكان عشان ما يجمع القطن مع التقلب والغسل في مكان واحد زي الي معي الحين
وبلبسه بتنزاني من الغرابي
ودمتم

[ABU-AL-3eeS]

مواصفات الفراش
القماش الخارجي : تنزاني اصلي

من داخل: فرو

وفيه جيب سحاب تحت مكان المخده<<<ميزه اساسية بالنسبة لي

وسعره بحدود 200ريال تزيد 20 تنقص عشرين


اخوكم/عاطل:)

[خوي النشاما]

افراشي ياخوان مسميه الكاتم وهو سليب باق الاخضر العرض 90 سم
وطول 220 سم وصغير الحجم جداجدا الى صفط وسعره رخيص 65 ريال
ولى شفته تستهين فيه لكن بلعكس وذا جك طلوله مادريت عنها ولى قمت قام
يصب طلوله وميزته ماينزل من الموتر وجربو وسبوني ولا ادعولي وتحياتي



خوي النشاما
____________

[الوايلي]

السلام عليكم ورحمة الله وبركاته
يا اخوان انا فراشي شريته من حايل من عند سنام ب 370 وشريت بعده حدود اربع اكياس تدرون ليش
كل شوي اخذ واحد علي الكيس يعني مره طلعنا للبروالجو برد والخال معه كيس عليك به المهم نام بكيسي
وراح الكيس وقت البرد ما تدري فيه برد والى لا والفرو ما له ريحه مره يعني لك ولزمن
وشكرا

[أيمن]

بارك الله في الجميع ..
لإثراء الموضوع ولاستفادة أشمل ..
موضوع سابق لنفس الموضوع :
http://www.mekshat.com/vb/showthread.php?s=&threadid=5606

تحيتي

[أبو فراس]

السلام عليكم ورحمة الله وبركاته

انا فراشي من المرباع ولا ابيع به ولا اشتري ولا اعطيه احد

حتى عيالي رحت وشريت لهم نفس النوع لاني مجربه ومرتاح معه

وسلامتكم