المساعد الشخصي الرقمي

مشاهدة النسخة كاملة : ((((جيكيتات الجيش والحرس))))


abu_nayf
09/12/2009, 08:26 AM
السلام عليكم ورحمة الله وبركاتة


اسعد الله اوقاتكم جميعاً وحياكم الله جميعاً


انا الموضوع محيرني وممكن ان فيه ناس كثير تسأل عنه الى وهو هل لبس جيكيتات الجيش والحرس او اي جاكيت عسكري يعتبر ممنوع ومخالف للقانون ؟؟


وماهي العقوبة المتخذة اتجاهه ؟؟


اتمنى مشاركة الجميع لتعم الفائدة لان مثل هذه الجاكيتات انتشرت في الايام الأخيرة


وتقبلو تحياتي
اخوكم ابو نايف
خشم العرمة
09/12/2009, 09:05 AM
ان شاء الله لاحيرة ولا هم يحزنون والموضوع بسيط وانا اخوك
اللي ممنوع لبس البدلة العسكرية لكن لبست جاكيت على ثوب او بسطار هاذي مافيها شي ولو رحت لمحل ملابس عسكرية تقدر تاخذها لان المنع من لبس المدني للبس العسكري على شان انتحال الصفة الامنية والعسكرية.
بالنسبة لي ماطلع البر الا وانا لابس بسطار تكرم لانة دافي وآمن من القوارص واكرفة كرف وسعره رخيص .
abu_nayf
09/12/2009, 09:21 AM
ان شاء الله لاحيرة ولا هم يحزنون والموضوع بسيط وانا اخوك
اللي ممنوع لبس البدلة العسكرية لكن لبست جاكيت على ثوب او بسطار هاذي مافيها شي ولو رحت لمحل ملابس عسكرية تقدر تاخذها لان المنع من لبس المدني للبس العسكري على شان انتحال الصفة الامنية والعسكرية.
بالنسبة لي ماطلع البر الا وانا لابس بسطار تكرم لانة دافي وآمن من القوارص واكرفة كرف وسعره رخيص .


مشكور يالغالي على ردك وانا مثلك ماعمري كشت الى ومعي جيكيت الجيش لاكن قبل امس واحد شافة معي وقال لي انتبه تراه ممنوع واستغربت وقلت ابطرح الموضوع للتأكد
الصمان 2
09/12/2009, 09:26 AM
اتوقع انه غير ممنوع


وهذه صورة للجاكيت العسكري

http://www.mekshat.com/pix/upload03/images133/mk140290_fgg.jpg


من العضو العزيز : ksa--505



.
abu_nayf
09/12/2009, 09:34 AM
اتوقع انه غير ممنوع




وهذه صورة للجاكيت العسكري



من العضو العزيز : ksa--505





.



بارك الله فيك ياغالي ومشكور على مرورك وردك
راعي الطلعات
09/12/2009, 09:51 AM
عادي البس الجاكيت ما عندك مشكله ولو تمر على تفتيش ما يقولون لك شي لكن لا تلبس بدله كامله وبالتوفيق
Raselny
09/12/2009, 10:44 AM
بالنسبة يا اخوان للبسطار تكرمون
من وين تجيبونه وكم اسعاره

لأني مالقيته في محلات الأحذية وانتوا بكرامه

واللي يعرف محل بالرياض يدلني عليه.
صافي المشرب
09/12/2009, 11:14 AM
طيب وش رايكم اني وقفت عشان قبع عسكري وواحد من الشباب ركبوه الجيب عشان الجاكيت
الطير040
09/12/2009, 01:14 PM
بالنسبة يا اخوان للبسطار تكرمون
من وين تجيبونه وكم اسعاره

لأني مالقيته في محلات الأحذية وانتوا بكرامه

واللي يعرف محل بالرياض يدلني عليه.



السلااااام .......

شف محلات بيع الملابس العسكريه يبيعون وياكثر المحلات في الرياض مثال في شارع الاربعين في النسيم مليان محلات طب وتخير
القنـاص2008
09/12/2009, 01:36 PM
فعلا الجاكيت العسكري غير ممنوع
خشم العرمة
09/12/2009, 01:36 PM
طيب وش رايكم اني وقفت عشان قبع عسكري وواحد من الشباب ركبوه الجيب عشان الجاكيت

مدام الجاكيت مايحمل اي شعار بس انه جاكيت عادي مافية مشكلة بس يمكن انت حظك طحت في ناس فاهمين غلط
معليش يعني ترى بعض رجال الامن الله يهديهم تعاملهم غريب شوي فطبيعي تطيح في واحد مثل كذا
خشم العرمة
09/12/2009, 01:36 PM
السلااااام .......

شف محلات بيع الملابس العسكريه يبيعون وياكثر المحلات في الرياض مثال في شارع الاربعين في النسيم مليان محلات طب وتخير
:good2::good2::good2:
خشم العرمة
09/12/2009, 01:44 PM
بالنسبة يا اخوان للبسطار تكرمون
من وين تجيبونه وكم اسعاره

لأني مالقيته في محلات الأحذية وانتوا بكرامه

واللي يعرف محل بالرياض يدلني عليه.

مثل ماقالك اخوي الطير موجود في اي محل ملابس عسكرية خصوصا شارع الاربعين في النيسم مليان
واسعارها بحدود 85 ريال
وفية نوع ايطالي اسمة رامبو وسعره في حدود 250
وفية نوع ب 150
وابو 85 عندي افضل ممتاز وشكله حلو وفية سحاب جانبي ودافي وعندك منه نوعين نوع قماش بيج ونوع جلد اسود
~ V T A C ~
09/12/2009, 03:03 PM
يااخوان

انا ابي اتكلم من واقع تجربة

الي يقول مو ممنوع <<<<كلامة غير صحيح

وانا مرة وقفت في تفتيش

وقام يناظر بالموتر المهم لقا الجكيت العسكري

وقال اركب الموتر

يارجال وش السالفه قال

اللبس العسكري

ممنوع قلت ياخوي جاكيت بس

قال ان شاء الله كاب مو جكيت

وركب معهم وعلى طول لقسم الملز

ويعطوني تعهد اني معاد البسه

....................................

المهم انه ممنوع

وجاي تعميم فيه
abto93
09/12/2009, 04:06 PM
انا اتوقع مافيه اي شي
لاني شفت ناس واجد لابسة جكيت جيشي
صافي المشرب
09/12/2009, 07:03 PM
يااخوان

انا ابي اتكلم من واقع تجربة

الي يقول مو ممنوع <<<<كلامة غير صحيح

وانا مرة وقفت في تفتيش

وقام يناظر بالموتر المهم لقا الجكيت العسكري

وقال اركب الموتر

يارجال وش السالفه قال

اللبس العسكري

ممنوع قلت ياخوي جاكيت بس

قال ان شاء الله كاب مو جكيت

وركب معهم وعلى طول لقسم الملز

ويعطوني تعهد اني معاد البسه

....................................

المهم انه ممنوع

وجاي تعميم فيه



هذا الكلام واللي مهب مقتنع يلبسه وينصى اقرب تفتيش والوعد بالقسم
نـجم الـشمال
09/12/2009, 07:20 PM
واحد من الشباب من اهل الثقبة يقول وقفت عندنا الدوريه وحنا واقفين نسولف تدرون وش السالفة ان واحد من الشباب لابس كوت او جاكيت عسكري بغو يركبونه معهم لكن تركوه يوم عرفوا ان هالرجال عسكري
رأس الزعامه
09/12/2009, 07:32 PM
انا البسه لي 3 سنوات وامر من عند التفتيش ولا يقلون شي
mohammad2008
09/12/2009, 08:50 PM
السلام عليكم
من ناحية الجاكيت الجيشي انا لاقيه عند السنيدي في بريده واتوقع انه عاادي لبسه والاكان ماتشوفه عند محلات الرحلات وسعره عندهم بـ 65 ريال .....
بدراان
10/12/2009, 12:48 AM
السلاام عليكم . .

مره كنت لابس جاكيت الاخضر مموه وعند تفتيش رماح سئلني انت عسكري ؟

قلت لا وطلب اثباتي والوقوف وعقب طلايب وحب خشوم مشاني

ولاكنت بمرح في ابو زعبل http://www.mekshat.com/vb/images/icons/icon10.gif
abu_nayf
10/12/2009, 12:52 AM
اشكر كل من رد على الموضوع

ولاكن نبغى العلم الأكيد اذا هو ممنوع ولا لا

عشان الواحد يعرف يحاج اذا سأل
طلال الحربي
10/12/2009, 01:13 AM
على ماقالوا الاخوان دام انه مايحميل لا شعار ولا رتبه فما اتوقع انه ممنوع


ياخي ياما شفنا ناس واجد لابسينه

والله يامره اني شايف راعي طاق جاكيت الحرس


بس والله ياهووو دافي :)
عاشق تويوتا
10/12/2009, 01:43 AM
ممنوووووووووع
محلات التفصيل العسكري
اذا جيتها يبيعك بدون بطاقه عسكريه؟
أبو ونيان
10/12/2009, 02:11 AM
السلام عليكم
من ناحية الجاكيت الجيشي انا لاقيه عند السنيدي في بريده واتوقع انه عاادي لبسه والاكان ماتشوفه عند محلات الرحلات وسعره عندهم بـ 65 ريال .....

صادق أخوي موجود بعد بالسنيدي بالرياض والناس تشريه وواحد أعرفه مشريه بس ما أدري إذا صار له مشاكل من وراه بس لو به مشاكل كان ما شفته لبسه وفك نفسه علشان جاكيت ،،،
أبو فيصل فهد
10/12/2009, 03:27 AM
حياك أخوي


وبالنسبة للجاكيت ممنوع ارتدائه لانه حصلوا بعض العماله ترتدي بعض من اللباس العسكري


وبالنسبة للتفتيش على حسب العسكري اذا كان بيعقد الموضوع صادر الجاكيت ( حسب النظام ) لكن الاغلبية يمشون عارفين ان الناس تدور الدفأ.


وتقبل تحياتي
عزوز 2005
10/12/2009, 04:21 AM
لبس الجاكيت العسكري غير ممنوع
لبس القبوع العسكري غير ممنوع
لبس البسطار العسكري غير ممنوع
الممنوع هو لبس البدلة العسكرية كاملة وبرتبها وهي ليست لك سواءً كنت مدني أوعسكري
ابن مجدوع
10/12/2009, 11:44 AM
الجيكيت العسكري اللى نسمع عنه انه ممنوع ..
abodolim
10/12/2009, 02:03 PM
الجاكيت العسكري ممنووووووووووووووع
اما البسطار عادي
(((.ابوتميم .))))
10/12/2009, 08:46 PM
طيب هو يباع تفصيل والا جاهز
almogheerah
10/12/2009, 08:55 PM
تلقاه عند السنيدي ب65 ريال وعلى الكيس حقه طبعة حرس الحدود وعند محلات الخياطه العسكريه
العراب الاول
10/12/2009, 09:04 PM
السلام عليكم
اخواني الاعزاء الملابس العسكريه ممنوعه طيب عندي لكم حل بدل متشتري جاهز فصل الجاكيت بنفس القماش الداخلي ولكن اختر القماش الخارجي علي كيفك بس مايكون عسكري واذا تبون انصح لكم مصنع العبدالكريم للملابس يفصل جاكيتات ممتازه ..طيب شرايكم نحط علي الجاكيت شعار مكشات او اي استكر .
وانا مازلت البس جاكيت العبدالكريم اكثر من ثلاث سنوات.

بعد التجربه ارجو الدعاء للوالد
دمتم سالمين
بدوي جنوبي
10/12/2009, 09:05 PM
يا كثر الملابس العسكريه فى البطحاء
عند حقين البسطه السعوديين
بعد موقف الخرج على اليمين

بعضها جديد وبعضها مستعمل
وتلقى انواع لجميع القوات المسلحه
بريه وجويه ودفاع جوى هههههههههههههه

انا مستغرب محد مانعهم من البيع
وفعلا اى قطعه عسكريه ممنوع لبسها

اذا جيت تفتيش نزل الجاكيت ،،، واذا سئلك قل اخوى عسكرى
المهم تصرفـ،،،

انتبهوا لا يضحكون عليكم الهنود يبعوها بأسعار خياليه
اعرف بعض اخوياى تجيهم صرفيه جاكيتات وبدل
مقاساتها xxL ويبلش فيها
البدله يقدر يقيفها اما السويتر صعب شوى
بعضهم يبيعه على المحلات وبعضهم يستبدل

والجاكيت اللى فى الصورة السابقه تراه يدفى وضد المطر لكن لفتره قصيره

بالتوفيق
بن نقا
10/12/2009, 09:20 PM
اللي أعرفه إن لبس البدلة كاملة للي مو عسكري سجن ست شهور .. والله أعلم . واللي يبي يلبس علشان البرد يلبس في البر مو داخل البلد .... يعني الباب اللي يجيك منه ريح سده واستريح ... إستعد >>>> عسكري الآخ هههههه
فتى النخيل
10/12/2009, 09:49 PM
ليش ما فيه شي؟؟؟؟
انا اشوف انة منضير غير لايق لان هذا الزي خاص برجال القوات المسلحة البواسل الذين يدافعون عن ارض الوطن الغالي وليس من المنطق ان يقوم بئرتدا هذا الزي من هو ليس بكفوآ له .

ولقد رئينا بعض الفئه الظاله تقوم بلبس هذا الزي كتمويه على رجال الامن
أما رايي الشخصي حول هذه الضاره انها غير حظاريه ويجب ان يحاسب من يقوم بئرتدائه خارج الدوام من منسوبي هذا القطاع ومن غيرهم من المواطنين
abu_nayf
10/12/2009, 10:05 PM
ليش ما فيه شي؟؟؟؟
انا اشوف انة منضير غير لايق لان هذا الزي خاص برجال القوات المسلحة البواسل الذين يدافعون عن ارض الوطن الغالي وليس من المنطق ان يقوم بئرتدا هذا الزي من هو ليس بكفوآ له .

ولقد رئينا بعض الفئه الظاله تقوم بلبس هذا الزي كتمويه على رجال الامن
أما رايي الشخصي حول هذه الضاره انها غير حظاريه ويجب ان يحاسب من يقوم بئرتدائه خارج الدوام من منسوبي هذا القطاع ومن غيرهم من المواطنين


اخوي اشكرك على ردك ,, لاكن انت عممت على ان من يلبس هذه الجاكيتات وهو ليس عسكري بأنه ليس كفو وانه من الفئة الضالة ,, كلامك هذا ليس منطقي وانما يعبر عن رأيك الشخصي ,, فالموضوع يتكلم عن هل هو ممنوع ام لا ,, فلم نتطرق لمن يلبسو هذا الجاكيت هل هم كفو او غير ذلك ,, وليس من هو غير عسكري او رجل أمن ليس غيور على وطنه ولا يدافع عنها كلنا نحب وطننا وندافع عنه وكل شخص حسب عملة ,,

كنت اتمنى ان تفهم الموضوع قبل الرد
بـدر
10/12/2009, 10:50 PM
معقولة على كثر اللي ردو ولا واحد يشتغل في أحد القطاعات العسكرية ويجيب العلم ؟؟
Mr.3BDULMAJED
10/12/2009, 11:06 PM
صراحه شي محير مثل ما قال صاحب الموضوع .. انا هذا لي 3 سنوات وانا البسه ولا احد قالي شي لكن .. كلام الاخوان خلاني اتخوف وانا عطني مخالفه ولا يستقعد لي العساكر في نقاط التفتيش ..

لكن سوالي / ما الحكمه من منعه وهو لا يحمل اي رتبه عسكريه ؟؟؟؟
(((.ابوتميم .))))
11/12/2009, 01:22 AM
معقولة ولا واحد عسكري هناا
الظافر
11/12/2009, 02:06 AM
اعتقد انه ماهو ممنوع لانه موجود عند السنيدي
سوبر VTC
11/12/2009, 02:21 AM
سؤال يطرح نفسه ؟
العذر على السؤال :)
وش اللي يخليكم تسالون عنه ؟
وش اللي حادكم عليه ؟ => يدفي ؟؟؟
هل المقصد لفت الانظار مثلا ؟
اكثر ما يلبسه الشباب لدرجه ان بعضهن يحطه زينه على مرتبة السواق !!!
فيه بدائل عنه و تدفي :good:
جاكيت او بالطو طويل صيني
بشرط ان الجاكيت من الخارج يكون من مادة البولستر :good:
ضد الطفل و ضد الماء و ضد البرد :good:
abu_nayf
11/12/2009, 02:29 AM
سؤال يطرح نفسه ؟
العذر على السؤال :)
وش اللي يخليكم تسالون عنه ؟
وش اللي حادكم عليه ؟ => يدفي ؟؟؟
هل المقصد لفت الانظار مثلا ؟
اكثر ما يلبسه الشباب لدرجه ان بعضهن يحطه زينه على مرتبة السواق !!!
فيه بدائل عنه و تدفي :good:
جاكيت او بالطو طويل صيني
بشرط ان الجاكيت من الخارج يكون من مادة البولستر :good:
ضد الطفل و ضد الماء و ضد البرد :good:






اتشرف بمرورك اخوي سوبر بالنسبة للجاكيت الي نتكلم عنه الجيشي او العسكري انا عن نفسي ارغبة لكثرة الجيوب (المخابي) الي فيه التي تكاد تصل الى 8 مخابي وكل مخبى يشيل خيشة رز هههههههه
سفير الندى
11/12/2009, 01:43 PM
عندي العلم الأكيد

النظام يقول ممنوع لبس اي منشئة عسكرية
وهذا الخبر متأكد منه من مصدر موثوق
وترجع على مزاج العسكري الي يوقفك
:)
(((.ابوتميم .))))
12/12/2009, 09:43 PM
السلام عليكم ورحمة الله وبركاتة
يا شباب انا ناوي افصل جكيت جيشي وعندي بعض الاسئلة
1ــ وين المحلات الي يفصلونها با الرياض ؟؟؟

2ــ هل لازم تكون معك بطاقة عسكرية والا عادي ؟؟؟ حتى لو ادهن سيرهم :d

3ــ وش افضل انواع الفرو الداخلي ووش اسمة ؟؟؟؟

4ــ الاهم هل هو ممنوع لبسة ؟؟؟؟؟؟؟

5ــ هو يدفي وقوي والا خراط ؟؟؟؟
سرهيد
12/12/2009, 10:04 PM
السلام عليكم

هلا وغلا بك اخوي الكريم

شارع الوزير بمدينة الرياض فيه عدة محلات تفصل البدلات العسكرية والجيشية

واعتقد والله اعلم ان لم يكن عليه اي رتبه فلا يحتاج الى اي اثبات وهذا اجتهاد مني

تقبل احترامي
سسته
12/12/2009, 10:04 PM
يفصلونة محلات الملابس العسكرية .... وبالنسبة للتدفئة مثل الجاكيت العادي ويمكن اردى بعد .... لكن كثير من الناس يحسبون اذا طلعت البر مايصلح الا الجاكيت العسكري مدري ليه

تخبر الواحد اول مايطيح في الاغاني مايسمع الا بشير والفنانين الثانين عييييب بس بشير حق العرابجا .... اتمنى لك التوفيق .... وتراه مايحتاج بطافة جكيت بس مايحتااااج بطااااافة
(((.ابوتميم .))))
12/12/2009, 10:12 PM
^^^^^^ مشكورين ما قصرتوو
m1m2m3m4m5m6
13/12/2009, 04:30 AM
سسته انت شكلك مطقوق بسسته على راسك ....

قعدت ربع ساعه ابي اربط بين جكيت الجيش وبين بشير عجزت ......

جايب مثال من اااااااخر الدنيا عشان تبين ان ماليلبسه الا العرابجه ؟؟؟

انا اذكر لك ميزاته ,,
الاصلي اللي هو الامريكي ,,
*يدفي الى ابعد درجه
*كثرة المخابي فيه وتسكرها بسحاب
* قوة قماشه ولا يتأثر بشوك الشجر او يتمزع بالسحب ..الخ
* لونه مناسب لراعي البر ولا يتوصخ للونه المميز
*ساحباته وازراره قويه

ما ادري باقي شي ولا لا ,,,
لكن مسألة انه ماينلبس الا عربجه هذي استنتاج مدري من وين جايبه ,,,


وحتى لو ماله اي ميزه ياخي الناس اذواق ,,,

بس على طاري الاغاني شكلك انت معاني من ذا المشكله طحت في الاغاني وقعدت تهايط ببشير ,,,خخخخ
أخت البنات
13/12/2009, 05:16 AM
القماش الجيشي تشعر فيه بالقوه


وجداً ذوق


وموجود في محلات الملابس الجاهزة وللنساء بعد


وانا شخصياً عندي لبس جيشي بس غيرhttp://www.alfaris.net/smiles/smilies/winking0008.gif

واعتقد اختيار رسم القماش الجيشي


يمثل البيئة اللي حول المحارب من أرض وتلال وجبال ولايلفت نظر العدو


لكن اللي استغربت منه ان فيه محلات خياطة كثيره تخيط بدل عسكريه بكل انواعها


ومادري عن شروط الخياط ؟؟؟


مااظن الكل يقدر يخيط لو ماكان برتبه عسكريه


ياليت اللي يعرف يرد علي..http://www.alfaris.net/smiles/smilies/rolleye0006.gif
السابقي
13/12/2009, 05:43 AM
دع مايريبك الامالايريبك
F . A . D
13/12/2009, 06:01 PM
سلام عليكم

اسمع كثير عن الجاكيت الجيشي يمدحونه

ودي اعرف وين احسن مكان يفصله .. و ان كان زين ترا السعر ما يهم .. اهم شي يكون زين
و اللون هل يوجد منه اسوود سادة ؟؟ و الداخليه ( بطن الجاكيت ) وشو ؟؟ لاني ما احب الفرو ..
اتمنى تفيدوني .. لان كل اللي سمعت عنه .. انه تفصيل فقط ولا اعرف شي ثاني عنه

و آسف ما لقيت للموضوع مكان
راشد الخلاوي
13/12/2009, 06:17 PM
أخوي افضل جاكيت أعجبني لقيته في الكويت في الهدف صناعته روسي ولونه الخارجي جيشي وليس مثل الجيشى اللى عندنا بس قمة في الشكل وسعره 35 دينار حوالى 480 ريال ويتحمل إلى 7 تحت الصفر .

ولك تحياتي

أخوك الخلاوي
F . A . D
13/12/2009, 07:09 PM
أخوي افضل جاكيت أعجبني لقيته في الكويت في الهدف صناعته روسي ولونه الخارجي جيشي وليس مثل الجيشى اللى عندنا بس قمة في الشكل وسعره 35 دينار حوالى 480 ريال ويتحمل إلى 7 تحت الصفر .

ولك تحياتي

أخوك الخلاوي

انا بالريآض.. و جزاك الله خير
همي رضى ربي
13/12/2009, 07:14 PM
يمدحون المعيقلية وأشتر لك فروه اصرف لك :)
أبو^أحمد
13/12/2009, 07:53 PM
رح لسوق الزل العام شريت منهم جكيت خارجية وبر وداخلية فرو بصراحة حلوو ما عليه كلام..
صاحب خير
13/12/2009, 11:32 PM
ما دام الجكيت بيدفي البسه ولا عليك من التفتيش واذا سالوك قل ناسيه ضابط معي




عاش مصرف
شامخ ألهيلا
13/12/2009, 11:42 PM
السلام عليكم
اخواني انتبهووووووووووا
ترااه ممنوع
اي قطعه عسكرية تلبس
سوا جاكيت ولا بنطلون

وحسب العسكري الي بيوقفك
اذا صار ذاك اليوم ام العياال مزعلته
حط حرته فيك
واذا مبسوط مشااك
3 من الزملاء اتوقفوا في منطقة تبوك العسكرية ولا طلعوا الا بتعهد
والسبب رايحين للبر بجاكيتاات الشبااب الي في الشقه معهم وهم بالاساس مدرسين

ونرجع ونقول حسب النقطه والعسكري

بس دع مايريبك الا مالا يريبك
Storms Hunter
14/12/2009, 03:08 AM
أخي الكريم
هل تعلم أنه يمنع الرجل العسكري من لبس البدلة العسكرية أثناء المثول أمام المحاكم سواء مدعياً أو مدعى عليه أو شاهداً في خصومات عسكرية.
اذا العسكري نفسه يمنع بالنظام من لبس اللباس العسكري وفي مكان له هيبته الإدارية كالمحكمة فما بالك بالمدني إذا لبس جاكيت أو اي لباس عسكري والذهاب للنزهة والدخول فيه في الاماكن العامة.
فهل تجد من المنطقي ان يترك المدني دون عقوبة..؟
للمعلومية أن هناك نظام للملبوسات العسكرية اقرته الدولة واليك الرابط
http://www.ncda.gov.sa/media/low16/2.pdf
لاحظ أن هذا النظام يخص العسكري ومتعلقاته من الملبوسات العسكرية...ورغم ذلك وضع النظام باب كامل عن المحظورات في اللبس...لذا
إقرء الباب السادس
المادة 17
الفقرة (ح) من (ثانيا)
التي تنص على أنه يحظر على العسكري إرتداء أي ملابس أو تجهيزات خلاف ما صرح له.
أي أنه يحظر عليه لبس جاكيت شتوي مثلا على ثوب ليتقي البرد لأن ذلك محظور.
هذا على العسكري...فما بالك بالمدني..!
فهل من المنطقي مثلا أن نقوم بلبس ملبوسات مهنية لفئة معينة إحترمت ملبوساتها واقرت له نظام صارم لمجرد أنها تقي أجسامنا من البرد مع أن السوق مليء بأجود أنواع الملبوسات الشتوية وباسعار مناسبة.
أما العقاب...فهو موجود ويطبق دون النظر لاي حالة إستثنائية لذا عليك الحذر...والله اعلم
Storms Hunter
14/12/2009, 03:10 AM
http://www.aawsat.com/details.asp?section=43&issueno=9611&article=289402&feature=
الرياض: «الشرق الأوسط»
أقر مجلس الشورى السعودي أمس نظام الملابس والتجهيزات العسكرية الذي طرحته لجنة الشؤون الأمنية، ومن أبرز ملامح النظام الذي يتناول بالتفصيل الرتب العسكرية وهيئة اللباس العسكري في مختلف الحالات وعدد من المحظورات التي تعالج ما يحدث من سوء ممارسة او استخدام. ويحظر النظام الجديد على العسكري نزع غطاء الرأس عند مقابلة كبار المسؤولين والقادة العسكريين وخارج مباني الإدارات والقيادات والمعسكرات أثناء قيادة السيارات والآليات وأثناء الحفلات الرسمية، كما يمنع ارتياد المقاهي العامة بالملابس العسكرية ويمنع من حمل السلاح الشخصي إلا بموجب أوامر وارتداء البدل العسكرية أثناء المثول أمام المحاكم الشرعية سواء كان مدعيا أم مدعى عليه أو شاهدا في خصومات قضائية كما لا يسمح بارتداء الملابس العسكرية أثناء التسوق.
وشدد على أهمية منع إهداء الملابس أو الشارات والتجهيزات العسكرية الفردية أو بيعها أو إعارتها أو التخلص منها برميها في صناديق النفايات وغيرها.
وحدد النظام هيئة الإمدادات والتموين في وزارة الدفاع والطيران وما يماثلها في القطاعات العسكرية الأخرى للقيام بالإشراف على إعداد إجراءات البيع والصرف الخاصة بمراكز بيع وصرف الملابس، حصر احتياج القطاع العسكري من الملابس والتجهيزات العسكرية الفردية والمشاركة في تأمينها وحفظ وتحديث مواصفات الملابس والتجهيزات العسكرية الفردية.
وسيحل النظام الجديد الذي سيتم رفعه إلى خادم الحرمين الشريفين بعد أن تم التصويت على مواده البالغة 28 مادة، محل نظام الملبوسات والمهمات الصادر بتاريخ 6/5/1376هـ ويلغي ما يتعارض معه من أحكام. كما واصل المجلس برئاسة الشيخ الدكتور صالح بن حميد رئيس مجلس الشورى مداولاته حول مشروع نظام الطيران المدني حيث ناقش مشروع النظام الذي يقع في 176 مادة سبق للمجلس البدء في بحث مواده في جلسات سابقة وسيستكمل المجلس مداولاته حول الموضوع في جلسات مقبلة.
abu_nayf
15/12/2009, 02:38 AM
أخي الكريم
هل تعلم أنه يمنع الرجل العسكري من لبس البدلة العسكرية أثناء المثول أمام المحاكم سواء مدعياً أو مدعى عليه أو شاهداً في خصومات عسكرية.
اذا العسكري نفسه يمنع بالنظام من لبس اللباس العسكري وفي مكان له هيبته الإدارية كالمحكمة فما بالك بالمدني إذا لبس جاكيت أو اي لباس عسكري والذهاب للنزهة والدخول فيه في الاماكن العامة.
فهل تجد من المنطقي ان يترك المدني دون عقوبة..؟
للمعلومية أن هناك نظام للملبوسات العسكرية اقرته الدولة واليك الرابط
http://www.ncda.gov.sa/media/low16/2.pdf
لاحظ أن هذا النظام يخص العسكري ومتعلقاته من الملبوسات العسكرية...ورغم ذلك وضع النظام باب كامل عن المحظورات في اللبس...لذا
إقرء الباب السادس
المادة 17
الفقرة (ح) من (ثانيا)
التي تنص على أنه يحظر على العسكري إرتداء أي ملابس أو تجهيزات خلاف ما صرح له.
أي أنه يحظر عليه لبس جاكيت شتوي مثلا على ثوب ليتقي البرد لأن ذلك محظور.
هذا على العسكري...فما بالك بالمدني..!
فهل من المنطقي مثلا أن نقوم بلبس ملبوسات مهنية لفئة معينة إحترمت ملبوساتها واقرت له نظام صارم لمجرد أنها تقي أجسامنا من البرد مع أن السوق مليء بأجود أنواع الملبوسات الشتوية وباسعار مناسبة.
أما العقاب...فهو موجود ويطبق دون النظر لاي حالة إستثنائية لذا عليك الحذر...والله اعلم



يعطيك العافية يالغالي فعلاً ماقصرت الف شكر على ما اقتبست
hot_line
16/12/2009, 12:50 AM
الجاكيت العسكري وش فيه ميزه

لا يدفي ولا شكل ولا رسمي مع الثوب او بدله الرياضه

اقرب جاكيت اسود وريحك راسك
صقرحايل
16/12/2009, 01:42 AM
نا دائم البسه وامر من عند نقطت تفتيش
وما يقولون شى الان كلن يلبس الباس هذا وشكر لك
الذيب 30
16/12/2009, 11:46 AM
قبل تقريباً سنتين رحت لمحل تفصيل بدل عسكريه أبي افصل جكيت جيش

يقول ممنوع لازم تكون معك بطاقة عسكرية

بس هلحين مادري هل هو عادي ولا ممنوع
~ شعلة برق ~
16/12/2009, 02:03 PM
طيب وش لون ممنوع وهو يباع في المحلات؟

انا امس رحت لمحلات البدل العسكرية في الخرج

وياكثرهن الجكيت الجيشي ( المموه )

حتى في قماشات جيشية انواع واشكال
منكوش
17/12/2009, 01:03 PM
لا ما فيه شي يا بعدي
صقر نجد99
17/12/2009, 01:11 PM
اعتقد غير ممنوع

البارحة المحلل الحماد في احدى قنوات الرياضه لابس جاكيت عسكري
ابوسلماااااان
17/12/2009, 01:33 PM
السلام عليكم ورحمة الله وبركاتة
يا شباب انا ناوي افصل جكيت جيشي وعندي بعض الاسئلة
1ــ وين المحلات الي يفصلونها با الرياض ؟؟؟

2ــ هل لازم تكون معك بطاقة عسكرية والا عادي ؟؟؟ حتى لو ادهن سيرهم :d

3ــ وش افضل انواع الفرو الداخلي ووش اسمة ؟؟؟؟

4ــ الاهم هل هو ممنوع لبسة ؟؟؟؟؟؟؟

5ــ هو يدفي وقوي والا خراط ؟؟؟؟

افااااااااااااااء تتهم رجال الدولة بالرشوة
غربي هواوي
17/12/2009, 02:36 PM
والله يالناس هاذي تقل تطلب حرش

زي اللي يقول يا ليتهم يمنعونه

خل الناس تدفى

يا اخوي انا عندي واحد من حقات الجيش القديمة اللي كانت تصرف ويجي مكتوب عليها ج ع س او بالانجليزي S.a.a
والله مافي احسن منه بالبرد
abu_nayf
19/12/2009, 12:15 AM
انا الي عندي حق الجيش الامريكي الاصلي الي يالله تشيلة

من مميزاته عدد وكبر المخابي
وهو الي ينفع وقت المطر والبرد
المزعلاوي
19/12/2009, 04:30 AM
السلام عليكم ورحمة الله وبركاته

اللي يرغب بشراء أو تفصيل جاكيت أو يريد شراء شال أو بسطار أو شيء من هذا القبيل أنصحه بشارع عليه العديد من محلات الملابس العسكرية ووصفه :.

الرياض - شارع المدينة المنورة مخرج "27" يكون الدايري الغربي خلفك وبعد ثاني إشاره اللي هي تقاطع المدينة مع شارع حمزة من عبد المطلب تروح سيدا وتجيك صفت محلات على يمناك .

أنا شاري منهم جاكيت بـ 120 ريال . على مقاسي (xxl)
وداخليه فرو راااااااااااائع جدًا

وأما بالنشبة للعساكر اللي في نقاط التفيش فلا يوجد أحد منهم يردك أو يسألك عنه !
أنا من ساكن الرياض وألبسه دائمًا ولا أحد قد كلمني عنه .
أما من ناحية أنه هل هو عادي تلبسه في أي مكان فمن وجهة نظري القاصرة أني ألبسه في الطلعات وإستراحات الشباب أما في الدوام أو العزايم فلا أحبذه أبدًا .




وشكرًا ..
ابو سمسم
19/12/2009, 12:22 PM
الي اعرفه ممنوع لان قبل سنه مريت على تفتيش وانا لبس جاكست عسكري حق الدفاع الجوي بس ماعليه اي شعار او علامه عسكريه وقفني وطلب مني اني اشيله ومعاد البسه
عبدالرحمن السالم
19/12/2009, 12:31 PM
صحيح ان فيه بعضها تدفى .. لكن بعض الشباب يلبسها بس كذا موظه والا مو القصد منها شى ابد
انا والله اقتنى واحد ولا إلبسه الا بالبر واذا دخلت الديره ما إلبسه لان الوالد عسكري وحذرني من هذا الشى
abu_nayf
19/12/2009, 12:54 PM
صحيح ان فيه بعضها تدفى .. لكن بعض الشباب يلبسها بس كذا موظه والا مو القصد منها شى ابد
انا والله اقتنى واحد ولا إلبسه الا بالبر واذا دخلت الديره ما إلبسه لان الوالد عسكري وحذرني من هذا الشى


حياك الله اخوي دحيم اكيد مانلبسة الى فالبر:l ولا داخل الديرة مايصلح الى بشنطة الباث:good2:

تشرفت بمرورك على الموضوع والله يعافيك
نمر الصحراء
19/12/2009, 06:34 PM
ممنوع الله اعلم
hawwamT
19/12/2009, 06:40 PM
ولا هو ممنوع ولا شي...
متصل على قريب لي ...من قلب الحدث..يقول مافيها شي..
abu_nayf
19/12/2009, 08:11 PM
ولا هو ممنوع ولا شي...
متصل على قريب لي ...من قلب الحدث..يقول مافيها شي..


يعطيك العافية يالغالي ماقصرت
الخيال 1
19/12/2009, 08:27 PM
اتوقع مافيه اي شي .
عيشه قشرا
23/09/2011, 05:21 PM
هل من خبر على الموضوع ودي اطلع جاكيتي بس مدري وش السالفة
الخولاني
23/09/2011, 05:53 PM
يالربع بكل بساطة الزي العسكري ممنوع حتى لو فلينة تمويه لكن احتراما للنظام وتفاديا للإحراج والمشاكل قبل تطلع البر خذ جاكيتك وبسطارك وحطهم في كيس غير شفاف في موترك ولا وصلت البر البس وفلها وعند العودة جمع اغراضك وحطهم في كيس مثل ما سويت سابقا
قرموش
23/09/2011, 08:46 PM
يا خوي البنقاليه يبيعون جميع الملابس العسكرية وعلى عينك يا تاجر
لاتكب البيالة
23/09/2011, 11:00 PM
السلام عليكم
اتوقع ما فيه نظام بهالامور كل الدعوه اجتهادات من العسكري
ولو كان فيه نظام قد يكون ما وصل لاهل الشأن
ولو وصل لهم قد يكونون ما فهموه صح
ولو فهموه قد يزيدون عليه من عندهم
ورد طائفي
24/09/2011, 12:07 AM
استفدت من هالموضوع فكرة البسطار أعزكم الله ..

فكرة طيبه !

أما الجاكيت المموه ، أحد الاصحاب في الطوارئ ويلبسه اذا طلعنـا ..

تصدقون أحيان يحتر وحنا بردانيين وينزله !!

:)

من نحاية الدفاء .. خذ دفاء ..

اما النظام .. فعلى شان تريح عمرك !

البسه .. ومتى ما وقفك أي تفتيش قل ما ادري هل هو ممنوع ولا لا !

واحشره بالطيب ، ينحشر .. وان كانه ردي ! يعينك الله عليه وتسهل اذا وصلت للمركز :)
beerh
24/09/2011, 12:29 AM
البس وعليك بالعافيه وما راح احد يقول لك شي بس لا تحط رتب اذا انت منت عسكري اقصد رتب ضباط للجكيت واذا سألك احد ليش لابسه قل له انا مفصله تفصيل من محل ولا هو عهده واصلا محد سائلك اذا بتروح للبر بجيكت او بسطار اعزكم الله بالتوفيق
* ابو باسل *
24/09/2011, 11:46 AM
شيل الشيلات حقت الرتبه الي هي السبلايتات الي فوق الكتوف قصها قص والشعارات الموجوده على الايدي ولا احد يقولك شي ان شاء الله واذا كان فيه نوع يجي لون واحد افضل من القماش المرنقط الي يبين انه للجيش صحيح فهنا ممكن المشكله .
اصيل نجد
25/09/2011, 12:50 AM
يطول بعمرك اذا كان الجكيت او البدله لاتحتوي على شعار على البدله او البريه او القبوع ولا تلبس قايش يعني الحزام فالبدله مدنيه او بحكم المدنيه
ابوفهد سليمان
25/09/2011, 01:17 AM
بحكم اني عسكري ... وشكلي العسكري الوحيد بينكم :)

فهي فعلا ممنوعه .. وفيها تعاميم .... ولا احد يقول جيب لي تعميم.. لانه برضة ممنوع :)
أبووليد
25/09/2011, 10:52 AM
السلام عليكم اخواني
بالنسبه للجاكيتات او اي زي عسكري
اذا كنت مدني او لابسه وانت في اي قطاع ثاني فهو ممنوع حسب نظام وزير الداخليه رقم 22 - 13-1379/390 مخ
وفي حال ضبط اي شخص راح يحول الى مركز الشرطه وانت وحظك يفكونك او تعهد او حجز
وحسب كلام بعض الاخوان ان اكثر من شخص يلبسه ومحد يقوله شي ( انت وحظك ) وحسب العسكري اللي شايفك

ولاكن كنظام فهو ممنوع نهائياً

هذا للتنويه واتكلم معكم مش من تجربه اتكلم من قرائتي لانظمه ولوائح الخدمه العسكريه - نظام وزارة الداخليه
تحياتي لكم
اخوكم ابووليد
اخو سعود
25/09/2011, 11:55 PM
ممنوووووووووووووووووووووووووووع

لاكن ياما لبسوها العمال