ابي رايكم في ماطور كهرباء من ساكو لمن سبقني بتجربته واسمه Firman

[اكزت]

الاخوة الكرام
السلام عليكم ورحمة الله وبركاته

اشتريت قبل ثلاثة أيام ماطور من ساكو وهو صناعة صينية واسمه firman وقبل ما اشتريه بحثت في المنتدى وفي قوقل عن هذا الماطور ولم اجد ما يفيد ، فقررت الشراء وبتجربتي البسيطة له وجدت أنه جيد ، لعدة اسباب
منها أن الكهرباء التي يصدرها منتظمه جداً
والصوت هادئ إلى حد ما
وبسؤالهم عن الوكيل افاد البائع ان الماطور عليه ضمان لمدة 6 شهور من ساكو وأن له وكيل هنا يوفر قطع الغيار اللازمة
وقوة الماطور كيلو ومائة وخمسين ، وسعر الشراء 799 ريال ، وفيه مقاس اكبر منه بسعر 2800 ريال ، سؤالي هنا لمن سبق وان جرب هذا الماطور وخاصة لفتره طويله عن اداء وقوة الماطور ؟ لان تجربتي له لا تعدوا تجربه منزليه ، وأن شاء الله اوافيكم بالمزيد عنه بعد تجربته لوقت اطول بعد إفادة الاخوة ممن سبقوني بتجربته .
شاكراً للجميع

[صقر شمر]

هج عنه ما كمل اربع شهور الا هو مخبط وصلحوه بضمان خرطي ودفعت 250 ريال وبعد ست شهور خرب مره ثانيه انا مجربه يالغالي 2800 وات..ورميناه وشرينا من هوندا ماطور اصلي الحمدالله شغال الان له شهرين زي اللوز؟؟

[S.i.e.r.r.a]

انا ما جربته لكن الصيني معروف
ويمدحون هوندا

[علي ابونواف]

دامه صيني ابعد عنه وانا اخوك والعب على المضمون الياباني وبسسسسسسسس

[الهيلا_511]

غير مواطير هوندا لا تدور


واما الصيني انحش عنه

تحياتي

[خشم العرمة]

http://www.hondapowerequipment.com/Images/Models/EU2000i_250x250.jpg

غير هالمزيون لاتدور المواطير هوندا وحط راسك ونم توكل عليه بعد الله

[السيد-99]

http://www.hondapowerequipment.com/Images/Models/EU2000i_250x250.jpg

غير هالمزيون لاتدور المواطير هوندا وحط راسك ونم توكل عليه بعد الله
كم سعره اخوي . وهل هو بنزين ام ديزل

[راعي الطلعات]

المشكلة انه صيني قطع الغيار اوكي متوفرة لكن البلاء في كثرة خرابه

اذا كانت يد وحده تشغل فا ان شاءالله ما راح يجيه خراب واجد سبق ان كان معي ماطور صيني شاريه بـ600 ضمان سنه والقطع غيار متوفرة بس كلا يشغله بطريته الين صار اخو الورش

بس موب كل صيني يخرب واعرف اني ضيقة صدرك شوي بس مادام قطع الغيار موجوده فما عليك ان شاءالله

والله يعطيك خيره ويكفيك شره

[خشم العرمة]

كم سعره اخوي . وهل هو بنزين ام ديزل
بنزين وهاذي مواصفاتة
مواصفات الماطور
1- ياباني أصلي قطع وتجميع
2- كاتم للصوت ( يعني يشتغل وصوته خفيف لا يكاد يسمع )
3- سهل الحمل ( حيث يوجد عروة لتسهيل حملة )
4- وزنة في حدود 15 كيلو
5- يشتغل على البانزين
6-يوجد علية ضمان سنة من وكيلة هاشم
7- قوتة 2 كيلو (أي ما يعادل 2000 شمعة أو 2000 وات)

وسعرة في حدود 3000 ريال

[ونش]

طيب انا ليش اشتري ماطور هوندا ب 3000 يعطي كهرباء 2000 واط ويوجد بالسوق محولات كهرباء ارخص بكثير واخف حمل وتعطي 2000 واط وتشتغل على بطارية السياره لان فرق السعر كبير واخف

[خشم العرمة]

طيب انا ليش اشتري ماطور هوندا ب 3000 يعطي كهرباء 2000 واط ويوجد بالسوق محولات كهرباء ارخص بكثير واخف حمل وتعطي 2000 واط وتشتغل على بطارية السياره لان فرق السعر كبير واخف

محول على بطارية السيارة يعطي 2000 واط؟؟ وين هاذا وانا اخوك ياليت تفيدنا فية اللي اخبرة اقوى محول على بطارية السيارة يعطيك 600 واط ولايعطيك اياها كامله بعد يعني اقل من كذا بس مكتوب عليه 600

[المستوي 1]

محول على بطارية السيارة يعطي 2000 واط؟؟ وين هاذا وانا اخوك ياليت تفيدنا فية اللي اخبرة اقوى محول على بطارية السيارة يعطيك 600 واط ولايعطيك اياها كامله بعد يعني اقل من كذا بس مكتوب عليه 600

المحول يسحب البطارية في اقل من ساعتين متواصلة وهو خطر خصوصا اذا كنت بالبر تفضي البطارية

والصيني معي من اكثر من 4 سنوات لكن استخدام خفيف و مستعمل زيت سوزوكي للخلط وهو الافضل

واذا الاستعمال ثقيل عندك و من دون اي مقارنه ماطور روبن الاصلي الياباني بشارع الريل بالرياض

[اكزت]

الله يعطي العافية الجميع .. وفيتو وكفيتو ..
بس اللي صار صار شريته وقلت بجربه وخاصة ان سعره رخيص ، بس مثل ما قالوا الاخوان ما غير الهوندا ، لانه ياباني والميزة المتوفره فيه وما اعتقد في غيره انه يجي بكاتم صوت وانا اتكلم عن المواطير الصغير ، وبالمناسبة انا عندي ماطور صيني تايجر والله يا جماعه له سنه شغال اللهم الهندل خرب وبدلته ، وزبط والله ثم والله ان له سنه شغال ، وكم مره فكيته وشفت القطع اللي فيه اتوقع للحرفي ما عليه ، بيقدر يصلح ويزبط ، ولكن إلى يبي يوديه لملات تصليح المواطير بيصلخونه بالسعر ، وفي النهاية المسألة توفيق ...

[صقرحايل]

مرحبا اخوى
انا شريته وخرب معى ما كمل شهرين
وشكر لك

[أبوظبي]

مرحبا الشيخ ... غير الهوندا لا تفكر ...

هذا استثمار اقل شي 10 سنين ...

[اكزت]

اخوي صقر حايل اهلاً بمرورك الكريم بس اللي اعرفه عليه ضمان 6 شهور ارجع لهم ويصلحونه غصب واذا ما صلح بيعطونك غيره .
اخوي ابو ظبي صادق لا عدمناك بس كان سعر الماطور مغري ، والهوندا مثل ما قلت سعره فيه ويستاهل
ودمتم بخير

[rav4]

والله يا جماعة جبتوولي احباط .... انا شريت هذا الماطور من ساكو وللحين ما سنحت الفرصه لتجربته .....

بس المشكله لا كنت في البر ومعتمد عليه بعد الله وخرب ..!!! تصير مشكله .. خصوصا اذا الليله ماهي قمرا
:))

عموما نصيحه لاخوي اللي يقول يشبك على بطاريه السيارة ... نصيييييييييييحه خلي السيارة في حالها .. لانها هي سبيلك الوحيد بعد الله سبحانه لاي طارئ فلابد تكون البطاريه شغاله ولا تستهلك منها شي ...

بالتوفيق والله يسهل للماطور المقلب اللي عندي

[معذب الدحاريج]

انا جربت الروبن 650 صوت خفبف وزن خفيف قطع متوفره وانت تقدر اتصلحه بالبيت ما فيه تعقيد وسعره جديد130 دينار كويتي وله عندي خمس سنوات ما شكيت منه(ياباني)

[دل البحار]

ما ينفعك هوه وأبو 240 الي ببنده سواء هوندا غيره لاتاخذ هوندا الاصلي

[awod]

الحمد لله على كل حال
تراه مايعجبك ولازم تخلط مع البنزين زين الدبابات عشان ما يسخن وصوته عالي ولاهو ذاك خاصة اذا جاه غبار .
عموما اذا كرتونه باقي عندك والفاتوره ترى يرجعونه والحححححححححححححححححححححق لا يهونون .
اذا رجعته رجاء رجاء خبرنا على المنتدى .

[yazeid]

يا اخوان المواطير الصينيه جيده ولكن طريقه خلط الزيت تكون غير الي مع الكتلوج روح لاقرب مهندس مواطير ويعلمك الطريقه ويشتغل معك زي الحلاوه بس صوته مو زي هوندا

[الوسطاوي]

اخوي الصيني ماينفع ابد وفتره قصيره ويخرب انا مجرب الصيني متعب بالحيل بس اذا كان استخدامك قليل وغير مجهد ممكن يعيش والصيني حظوظ احيانا يكد واحيانا مايكمل ولا سنه
افضل شي الهوندا كد ومد ومو خساره من وجهة نظري ويمكن تحصل مستعمل ارخص من الجديد
تقبل مروري السريع
دمت بود

[awod]

يا اخوان المواطير الصينيه جيده ولكن طريقه خلط الزيت تكون غير الي مع الكتلوج روح لاقرب مهندس مواطير ويعلمك الطريقه ويشتغل معك زي الحلاوه بس صوته مو زي هوندا


كلامك صحيح اخي العزيز
وبالعاده يكون الخلط 50:1
يعني لتر زيت يخلط معه 50 لتر بنزين وعليك الحساب :eek:

[مبارك ابوعلي]

خل الصيني عنك
وغير الياباني لا تدور
الهوندا او الروبن

[اللورد 2009]

انا جربت الروبن 650 صوت خفبف وزن خفيف قطع متوفره وانت تقدر اتصلحه بالبيت ما فيه تعقيد وسعره جديد130 دينار كويتي وله عندي خمس سنوات ما شكيت منه(ياباني)


انا أأيد كلامك وبقوه لان نفس الماطو الي عندك عند اخوي
شاريه من عام 1418هـ احياناً ياخذه معاه للبر واحياناً اخذه انا
والحين وبعد ما يقارب 13 سنه ماشاء الله شغال بس لو تشوف
شكله ما تاخذه بريال من السنين اللي مرت عليه. تقبل مروري .اللورد.,,

[قاصد الصمان]

الاخوة الكرام
السلام عليكم ورحمة الله وبركاته

اشتريت قبل ثلاثة أيام ماطور من ساكو وهو صناعة صينية واسمه firman وقبل ما اشتريه بحثت في المنتدى وفي قوقل عن هذا الماطور ولم اجد ما يفيد ، فقررت الشراء وبتجربتي البسيطة له وجدت أنه جيد ، لعدة اسباب
منها أن الكهرباء التي يصدرها منتظمه جداً
والصوت هادئ إلى حد ما
وبسؤالهم عن الوكيل افاد البائع ان الماطور عليه ضمان لمدة 6 شهور من ساكو وأن له وكيل هنا يوفر قطع الغيار اللازمة
وقوة الماطور كيلو ومائة وخمسين ، وسعر الشراء 799 ريال ، وفيه مقاس اكبر منه بسعر 2800 ريال ، سؤالي هنا لمن سبق وان جرب هذا الماطور وخاصة لفتره طويله عن اداء وقوة الماطور ؟ لان تجربتي له لا تعدوا تجربه منزليه ، وأن شاء الله اوافيكم بالمزيد عنه بعد تجربته لوقت اطول بعد إفادة الاخوة ممن سبقوني بتجربته .
شاكراً للجميع

تـــــــــــحـــــذيــــــــــر
انصح بعدم شراء
الاجهزة الكهربائية
مهما كان نوعها
تحت ضمان شركة ساكو
الضمان عندهم كلام على الفاضي
وانا لي تجربه معهم
حيث شريت محول كهرباء 1000واط
من 12ف -220ف
ضمان الشركة بزعمهم
وعند الذهاب الى الصيانة
قالو ماله قطع غيار عندنا
ضحك على الناس عينك عينك ،،،،