(( وجدنا الحل لرجة الدركسون في السفاري )) لا تدبيل ولا ترهيم ....!!

[ALBDRANE]

اخوي الي فكه فقط الفليورات الي فوق الي تحت ما قربها وباقي كلامك صحيح

[ابو عبدالملك 2]

جزاك الله الف خير على الافاده انت والشباب

انا عندي الرجه على الثمانين واذا تعديتها راحت بس المشكله اذا وطيت حاجه عيون قطط او الطريق كان مهوب مظبوط تجي النفاظه الله لايوريك يعني نفس الشباب
وانا قاعد استفيد من خبراتكم وماني مستعجل حتى اعرف الحل اللي مافيه ضرر على السياره
بيض الله وجهك

[عاااشق الشمال]

ممكن رقم الصمعاني ورشة في بريده التشليح او رقمه او وصف للورشه

الله يعطيكم العافيه ويجزاكم كل خير

[ابوقاسم2009]

والله يمعي باترل ٩٨ لرج من قوت ارجه شوي ابيطيرني مع ادريشه ورجه لاوطيت عيون القطط او اطريق مو مضبوط خضني خض معااااااااااانات ×

[ابوقاسم2009]

فيه برضو ورشة الملحم في محافظة المجمعة يسوونها وتختفي رجة الباترول مع كفرات البالون
وقيمة الشغل كلها 100 ريال وانا كان عندي باترول وسويتها عندهم وراحت الرجة كلهاااااا

الملحم ما وراهم الا ادجه وديته وهو صاح وخربوه

[بن عايد]

موتري فتك 2004 كان فيه رجه، وكفراته لك عليها.

غيرت الكفرات وركبت دانلوب، والحمد لله اختفت الرجه.

[تميم2222]

جزاك الله الف خير

[ابونجم 1]

الله يوفقك ياراعي الموضوع وكل من شارك في الموضوع بقصد الفائده لأخوانه
أفدتونا الله ييوفقكم

[ALBDRANE]

الله يوفقك ياراعي الموضوع وكل من شارك في الموضوع بقصد الفائده لأخوانه
أفدتونا الله ييوفقكم



يكفينا دعائكم ونحن في خدمة الطيبين شرواكم ....

[عبدالرحمن.1]

تكفى رقم الورشة ترى الرجه ذبحتني او تعطيني وصف للورشة

[بن شطيف]

انا عندي باترول 90 وامشي عليه خطوط طويله أول ماأخذته احس شوي اذأ ضغطت الفرامل بعدين سويت ترصيص وبعدها ولايعرف ويش هي الرجه الى الان ولله الحمد

[النداوي1]

الحل الأسهل والأفضل لمشكلة الرجة في دركسون السفاري بدون ترهيم ولا تدبيل!!




بعد البحث والتحري عن مشكلة الرجة في السفاري والبحث في الانترنت والمواقع التي تهتم بمثل هذه الأمور لم أجد حل مقنع واقرب ما اقتنعت فيه هو تدبيل مساعد الدركسون كما ذكره الأخوان مثل راعي الهدد والأخ Nissan وغيره من المجتهدين في حل هذه المشكلة وذكرو ورشه في بريده وذكرو ورشة مرات وقد ذهبت إلى ورشة مرات في الصناعية القديمة في الرياض عند اليماني مبارك وقال لي انه يركب مساعد الجبريل تدبيل ولم أقتنع بهذا المساعد لان الجبريل أطرافه عبارة عن مسامير باتجاه واحد وتركيب مثل هذا النوع اعتقد انه قوي على العمود ويثبته أكثر من اللازم مما يتسبب في تلف أطرف عمود الدركسون وخاصة الجلد والمفصلات واحتمال يطول الضرر الدودة .



ما أطول عليكم المهم اليماني دلني على ورشة النويصر ولقيتهم مالهم بالدركسون ودلوني على ورشة وقد وجدت ضالتي عند هذه الورشة مع العلم إني رحت لميزان العضيب وأوجعني راسي من كلامهم وكتبولي قائمة من القطع تقول مقاضي أخر الشهر ...... جيت الورشة لقيت سوري أسمه ( امجد قاعد يعسل ;) ) وقالي حلها عندنا فقط وكل يوم نصلح سيارة سيارتين طبعاً سفاريات بحكم أن الخلل هذا مصنعي في السفاري منذ مبطي... وشلون ياولد قال هذي شغلنا من سنين طويلة وإذا رجعت الرجة خذ فلوسك وش بتسوي ؟ قال لي بنفك الفليورات ونوديها المخرطة ... وبدت الشكوك والتفاكير تراودني وش بيسوون وش بيحطون !؟ المهم حسيت أن العمال والمدير ( أمجد ) ما يبون الطريقة توضح لي ( سر المهنة على قولتهم ) مع العلم أن حاولت على خفيف أن أكتشف لأكن ما وصلت لشي إلي شفته أنهكم فكو الفليورات إلي يجي فيها رمان ومكانها بعد الفك واضح في هذه الصورة ::


http://i792.photobucket.com/albums/yy206/ALBDRANE/sss.jpg



وأعطوها احد العمال ثم وداها إلى المخرطة على سيارته علشان ما أشوف الشغلة يعني الدعوة متكتكة ومتمرسين في مثل هالامور كل واحد عارف شغله .
بعد ربع ساعة جابو الفليورات وشحموها وتأكدت أنها حقت سيارتي بس ما أدري وش سوو فيها يمكن غيري يكتشف الدعوة كانه راعي بخص وبعد ركبوها حطو السيارة على الميزان لقوها تمام ما تحتاج وزن.


نجي للسعر بعد المكاسر( 350) ريال مع أن الشغله ما تعدا قيمتها الحقيقية (150) ريال من وجهة نظري لأكن قال لي الشغله محتكره وتوفر عليك وجع الراس وقال لي أن واحد معه نفس سيارتي ركب عند ورشة مرات مساعد أصفر ولا طلع بنتيجة وجاهم وفكو المساعد وضبطوها مثل ما سوو في سيارتي وضبطت سيارته .


المهم حاسبت الرجال وطلعت والحمدلله اختفت الرجة إلي أهل السفاريات يعرفونها حتى أصحاب موديلا 2009 عندهم المشكلة وقال لي لابد أنك تغير الصوف حقت العكوس لأنها متأثرة من الرجة بس إنا أجلتها لان التهريب عندي خفيف جداً .


نجي الحين لاسم الورشة وانا خايف أذكر أسمها وأسوى لهم دعاية مجانية لأكن إلي ملزم منكم يعرف أسم الورشة يرسلي رسالة على الخاص وأعلمه باسم الورشة واتمنا من إلي يسويها عندهم يحاول يكتشف وش إلي يسوونه بالفليورات بطريقته واجتهاده على شان نستفيد .


في النهاية أرجو أن لاأكون طولت عليكم بس أنا متأكد أن إلي عندهم المشكلة بينبصطون من سرد تجربتي في البحث عن حل لهذه المشكلة والتي تعب منها الكثير من أصحاب النياسين وهي أفضل من شغلات الترهيم واللحام ووجع الرأس:looney: حيث أن الاظافات والترهيمات قد تتسبب في أحداث ضرر على السيارة ولو على المدى البعيد .




تقبلو تحياتي والسلام عليكم ALBDRANE




لا أسمح بنسخ الموضوع أو بنقله للمواقع الأخرى دون ذكر المصدر،،،:no2:

السلام أن كانه أمجد(البطة) أذكره قبل ثمان سنين بميزان نجد بالصناعيةالقديمة تتجه ورشتة جنوب فهونصاب ولي تجربه معه الله ستربغينا ننقلب من شغله كذالك بالرجه يقول أنه يركب نحاسات ويكبسهن بالمخرطة أنبه الجميع عنه0

[عابر سبيل 2]

اخواني الافاضل
ازيدكم من الشعر بيت . كان معي باترول ربع 99 شاريه وكالة بعد فترة صارة تجيه النفاضة اذا دعست عيون القطاوة او مطب خفيف حسيت اني باطلع من الدريشة
المهم رحت الميزان وكبست الاذرعة ووزنتها وبعدها كل شي تمام الين بعته ماشي فوق 200000
ومن متابعتي استنتجت ان هناك رجة وهذه تعتبر خفيفة ومزعجة ولكن ليست مثل النفاضة في شدتها وخطورتها
وكل واحده منهم لها اكثر من علاج ويعتمد ذلك على سبب المشكلة
اي انه يمكن يكون المشكلة في الكفرات او الجنوط او مساعد الدركسيون او الفرارات اوحتى في العمود او الاذرعة.
والحلول الناجحة التي ذكروها الزملاء صحيحة ولكن كل حل يختص بنوع المشكلة التي تعرض لها مع ان الاسم واحد وهو رجه الباترول .
تحياتي

[faahoodi]

يعطيك العافية

[الحرفي..]

الميزان اسمه ميزان الباديه وامجد راعي زغلول ودب هو بس حراميه قبللك خذو علي 400 ريال وراحت الرجة عشان فك وردات مدري وجيه

[ALBDRANE]

والله ما ادري وش اسمه نسيت المهم انه صلح الرجة الي في السيارة حتى لو خذا مني 350 بس ارتحت يبن الحلال اهم شي راحت الواحد وادري انه زايد علي المبلغ والشغله ماتكلف 150 ريال بس اهم شي وصلنا للحل .
ووقت كتابتي للموضوع ما كان فيه احد قد توصل لحل الرجة واتحدى تجيب موضوع تكلم عنها قبل تاريخ موضوعي هذا
وبعدها شفنا الردود الي يقول صلحتها 150 والي يقول عندر الورشة الفلانية وانت ماشي .


*وبعدين معروف ان السواريه يضربون في السعر مقارنة مع غيرهم . والحمد لله الى هذا اليوم والأمور تمام في سيارتي وأحسب من تاريخ كتابة الموضوع .وتحياتي

[قناص مزاجي]

اي خلل في السياره لازم يعلمك المهندس انه صلح الخلل ويخليك تشوفه اما كلمت سر المهنه فهذا نصب واحتيال
ولك الحق ماتحاسبه
النظام يقول كذا

[الدولار دز]

الحل عندي مو كبس ولا شي سواها باكستاني قدامي وقال عطني ميه ريال واذا رجعت الرجه اصلحه بلاش وفعلا ما رجعت ع شاص 2001 وكان ينفض نفض الموضوع يفك رمان الركب ويحط ورده حديد عشان يضيق المجرى فقط لا غير ودعواتكم لي واللي يبي يصلحها يكلمني في الخرج 0557797009

[حاميش]

جميع العمالة نصابين وحراميه

والرجال طرحوك

لا عملو خرط ولا شي الرجال أخذ لفه ورجع

اللي عملوه إنهم شالو الوجه المعدني وبس

و أنت موضحه بالصورة

وإذا بغيت تتأكد من كلامي لف الكفر وتأكد هل فيه وجه بعد التركيب ولا لا

وهذا هو حل الرجه حتى بالربع التويوتا

[ALBDRANE]

كلمة طرحوك مالها اي داعي حفظك الله

واذا كان تقصد انهم اخذو مني مبلغ الاصلاح فهو حلال عليهم وابشرك انا بخير وياك ولم يجبروني على الدفع انا من ذهبت اليهم بارك الله فيك

وبعد ان ذهبت المشكلة الا الابد ....... ازيد واقول حلال عليهم 350 ريال .

ياما دفعنا في شغلات ولا تيسرت .

واتضح لي من الردود ان المشكلة ليست في النيسان فقط مادام انك تقول في الربع تايوتا

[سعود27]

بيض الله وجهك على الموضوع والصور والحل وحﻻل عليهم المبلغ مادام رتحت من الرجه ولي يقول الطرحوك تراه ماقاله اﻻ انه مطروح قبلك بنفس الرجه وعرف ان الوضع لفه

[حاميش]

بيض الله وجهك على الموضوع والصور والحل وحﻻل عليهم المبلغ مادام رتحت من الرجه ولي يقول الطرحوك تراه ماقاله اﻻ انه مطروح قبلك بنفس الرجه وعرف ان الوضع لفه


أبشرك أني أنا ميكانيكي ولا عانيت من الرجه

و أنا أصلح بنفسي واللي يحتاج مخرطه أنا أوديه للمخرطه

[تركي98]

طيب ياخوان انا معي فتك 2007 ...مافيه رجه الحمدلله لكن فيه نفظه تروع من سرعه 120 وفوق اذا صار الاسفلت فيه ميلان ولا كلت لي حفره صغيره ماتذكر ولا وطيت عيون القطط ينفض لدرجه اني يالله امسك الدركسون ماتسمى رجه تسمى نفضه ,,,الاخوان هنا كثير منهم ذكرها لكن محد قال هل حل اخونا البدراني يحل هالنفظه؟؟؟ ولا الحل هذا فقط للرجه اللي من 90 الى 110 تقريبا..؟هذي رجه مو نفظه اللي من 90 الى 110 وتجي من غير سبب...فاهمين علي؟؟ولا ماعرفت اشرح؟؟ :)
المهم اني فجاه لقيت حل في موتري للنفظه هذي ...اذا بغيت امسك خط احط الهواء في الكفرات 40 او 45 وتختفي النفظه بشكل شبه نهائي امشي 180 ماعندك مشكله ...لكن اذا صار الهواء في الكفرات ناقص عن 40 ينفض نفضه تروع !!! وش السالفه؟؟ وش العلم ؟؟ مدري!! المشكله اني ماقدر اخلي الكفرات 40 ولا 45 يصير قاسي واحس اني اذا وطيت عيون القطط كنها ترن براسي ..
للمعلوميه كان على موتري كفرات دنلوب ... وغيرتها لهانكوك ونفس الشي ماتغير الموضوع ..ازود الهواء تروح النفظه .. انقصه عن 40 ينفض !!! اللي عنده معلومه ولا عنده حل يفيدنا الله يجزاكم خير.

[راعي الصنف]

شيك على مساعد الدركسون ...

[تركي98]

اخوي راعي الصنف مشيك على مساعد الدركسون والجلب وكل ارضيه الموتر سليم ومربطه بعد وميزان العضيب شيكوا عليه من الى وانا معهم واقف وكلش سليم وقالي بوجهي والله مادري ماعندنا حل كلش سليم ههههه

[ابوسند9]

اخوي
تركي شوف ها الرابط وان شاء الله تنحل مشكلتك
والربلات هذي بالوكاله ما تباع لوحدها يباع العمود كامل
لكن شوف لك موزع معتمد وراح تحصلها وعددها اثنين وبسعر 220 ريال اصلي وانتبه من التجاري
http://www.mekshat.com/vb/showthread.php?t=565745

[البارق الاصلي]

انا مطلع موتري وكالة موديل 98 وكان فيه رجة وصلحته عندهم اللي هو ميزان البادية معروف هو اللي يحل المشكلة وحتى الأن معي الموتر تمام بس فيه رجه عادية بس من الزمن والكرف

[ALBDRANE]

انا مطلع موتري وكالة موديل 98 وكان فيه رجة وصلحته عندهم اللي هو ميزان البادية معروف هو اللي يحل المشكلة وحتى الأن معي الموتر تمام بس فيه رجه عادية بس من الزمن والكرف

كلام سليم ونفس المشكلة الي الكثير ماهو عارفها حتى مع الشرح يجيني واحد يقول غير مساعد الدركسون .

[درب داب]

ابيض وجه يالبدراني وليتنا نتخاوى ذا اليومين

[ابن المهد]

جزاك الله خير ي البدراني
والله يرحم والديك

[ابو حطبة]

شيك على الصليب

[اااالنداوي]

السلام عليكم ورحمة الله وبركاته ...
اخوي البدراني اسال الله لك التوفيق والسداد وان يرزقك من حيث لا تحتسب وان يرفع قدرك في عليين ..
وخير الناس انفعهم للناس وانت ماقصرت وسعك الحلم على كثير من الناس في هذا المنتدا المبارك طوال هذه السنوات وانت ترد عليهم بحلم وحكمه بارك الله فيك وزادك حلم ...
وهذا يدل على معدنك الطيب الاصيل واخلاقك العاليه....
حفظك الله وسدد خطاك ..

[حمدان91]

السلام عليكم يعطيك العافيه على الموضوع حتى عندنا في الشرقية في الثقبه فيه محل يسوي نفس الي ذكرته بس بدون فك هوبات مدري وش يسوي بضبط هو بكستاني وسعره 400ومن بعدها تنسى الرجه

[sgl2002]

على كثر ما استخدمت باترولات مدري وش الرجه اللي تتكلمون عنها ولا بد صادفتني الا يوم خربت جلب السحب حقت الدفرنس الامامي وترى مايجيب الرجه الا تركيب اكبر الباترولات للبالون والجنوط التجاريه

[آلصيآد_1]

جزاك الله خير

[HAMAD554]

جزاك الله خير الجزاء

[روق الرياض]

السلام عليكم
انا نفس مشكلتك بس اعلمك وش الحل او الغز اليوم ونا عند واحد من العيال في ورشه طلع ع موتري يبي يخلص شغله جاني بعد شوي يقول موترك فيه رجه قلت ايه ومزعجتني قال بسيطه قلت ع يدك نادا العامل ارفع الكفر باالعفريته فك الكفر ثم فك الاربعه مسامير ثم طلع الوجه الي يجي بين الغطا حق الرمان مثل الي بصوره عندك ثم طبقه بدون وجه وطلع الموتر100% الشغله ماخذت ربع ساعه طبعن كل الجهتين من السياره هاذا هو الغز

[عبدالعزيز4]

فعلاً الشغلة سهله من سنين والناس تعرفها تشيل الوجه او بالأصح الحلق الدائرية الي فوق الرمان زيزبط الموتر وتختفي الرجة يعني الموضوع لا يحتاج مخارط ولا شيء

[ALBDRANE]

السلام عليكم ورحمة الله وبركاته ...
اخوي البدراني اسال الله لك التوفيق والسداد وان يرزقك من حيث لا تحتسب وان يرفع قدرك في عليين ..
وخير الناس انفعهم للناس وانت ماقصرت وسعك الحلم على كثير من الناس في هذا المنتدا المبارك طوال هذه السنوات وانت ترد عليهم بحلم وحكمه بارك الله فيك وزادك حلم ...
وهذا يدل على معدنك الطيب الاصيل واخلاقك العاليه....
حفظك الله وسدد خطاك ..


أشكرك اخي النداوي و الله يوفقك ويجزاك خير دعائك أثلج صدري وهذا الهدف الوحيد الذي نسعى له .
كذلك أشكر الاخوة الذين شاركو وفقهم الله .

وأي خدمة أو أستفسار فأنا في خدمة الطيبين رغم قلة ظهوري في المنتدى .

[سالم النفل]

السلام عليكم كل عام وانتم بخير
ارجو منكم من يعرف ورشة اختصاص في الرجه
يراسلني عل الخاص

[حبيتر]

يالبدراني كسبت العلم الغانم موضوع متميز من سنه 2009 الا الان اهنيك

[aziz1791]

يالربع عندي باترول 4ابواب 92
الموتر ذبحتني رجته تزداد من 80-120 مع العلم الجنوط جديده مراوح صيني ومرصصه والجلب التحتيه مغيرهن كلهن وقص علي حول 3200 مع العلم لاقومته فيه صوت طقه؟؟؟

[آآآبو سعود]

كفراتك بالون

[آآآبو سعود]

البدراني ارسلت لك على الخاص وﻻ رديت ابي اسم الورشه الله يجزاك الجنه ومن يقراء

[aziz1791]

جزاك الله خير


كفراتك بالون

لا الكفرات دانلوب

[ALBDRANE]

الاخ ابو سعود تحياتي والعذر لقلة دخولي للمنتدى

وتم الرد عليك في الخاص .


الاخ حبيتر الشكر موصول لك ولجميع الاعضاء الطيبين .

[جعلوني مجرما]

الاخ البدراني

جزاك الله خير اخوي ولك رساله استفسار بالخاص لاهنت

[ALBDRANE]

لم يصلني شي وممكن تضع أسفسارك في العام ....

[البدر 707]

السلام عليكم
ياخوان انا شلت الوردات وراحت الرجه وجلست تقريبا اسبوع ورجعت مثل اول وش الحل

[ALBDRANE]

شلت الوردات ورجعت الرجة ياسلام هذا رد على بعض الاخوة الي يهونون الموضوع ويقولون الشغلة كلها تشيل وردات .

لابد تسوي مثل ما قلنا لك انا لي سنوات والرجة مختفية من سيارتي والحمدلله .

[بوالجوري]

السلام عليكم جميعا.

هذه اول مشاركة لي في المنتدى ... ومشكور اخوي البدراني على الموضوع المفيد ...

مشكلتي /

عندي سوبر سفاري 2006 ., قبل يومين كنت راجع من الدوام .. وحسيت نفضه قويه في كل البودي انا حسبت ان التاير بنشر من قوة الرج نزلت شيكت التواير مافيهم مشكله ,,, ركبت وكملت مشواري وراحت النفضه .. اليوم الثاني داومت بالفتك مشوار الدوام 75 كيلو وما ظهرت أي نفضه ,,, ولما رجعت من الدوام ظهرت النفضه القويه ,, لما اوقف وارجع امشي تختفي ويرجع الفتك طبيعي ولا كأنه صاير شئ ؟

رحت الورشه عشان يفحصوا تحت السياره حصلوا كل البوشات والمساعدات تمام .. والمشكله ان لما اوصل للفني تكون المشكله ما موجوده عشان الفني يشوف بنفسه النفضه ... المهم انا بطلت الرمانات ,, اللي فوق قال ما تحتاج تغييرلان حصل فيها جازجيت فرجعها مكانها بدون أي عمل,, راح للي تحت وشال منها الغطاء المعدني وراح المخرطه طبعا ما ادري شو عدل فيها ورجع ركبها من ثاني ... المهم طلعت بالسيارة وقبل لا اوصل البيت رجعت النفضه بس بشكل اقل بشوي ... اليوم داومت في السياره وما ظهرت النفضه ؟ احترت من النفضه لانها تجي وتختفي ؟
فما ادري شو مشكلتي بالضبط ؟
للمعلوميه انا كنت حاط جريز للشفت والدفريشنات قبل اسبوع من وقوع المشكله ؟ فهل تعتقدوا ان له دخل في موضوعي

[طحنون]

طلعت عندي نفس الرجه مع المطب
وغيرت كل شي ولا نفع شي الرجه باقي
فتك موديل 2009
موقعي الدمام اللي يعرف ورشه يحل المشكله علمونا

[ALBDRANE]

أخوي ابو الجوري أسف لتأخر الرد

الصراحة ما فهمت وش تقصد بالجريز ولا اعرف الشفت ممكن توضح
اما الرجه فيلزمك تروح لورشة البادية كما سبق ذكره
لانهم من كثر ما صلحو هالرجة صار عندهم خبرة كبيرة في هالموضوع .

[w115]

الكلام غير صحيح الرجه اكثر شي تكون من المساعد او عمود الميزان تغير جلب

[الصافي9]

شكرا أخي ALBDRANE على إفادتك لإخوانك
سبق أنني عانيت كثيرا من رجة السفاري و ذهبت إلى كثير من الورشات و لم تنحل المشكلة وبعدها ذهبت إلى ورشة و تشليح أبو عبدالله الصمعاني ببريدة و أخبرته بمشكلتي و ترددي على الورشات فأخبرني أن المشكلة بسيطة بعدما قام بفحص السيارة فقام بصلاحها أمامي فكان الحل حتى تذهب مشكلة الرجة أن قام بفك الفليورات إلي يجي فيها الرمان و رمى الوجيه (( الوردات ) و أعاد الرمان إلى مكانه فذهبت المشكلة ولله الحمد فلما ذهبت المشكلة طلبت منه إصلاح بعض الأمور بالباترول ولم يأخذ مني إلا مائة ريال أو مائة وخمسين ريالا على جميع شغله فجزاه الله خيرا .
أخبرني أن من يعرف حل المشكلة يخفيها عن الآخرين حتى يستفيد ..... فسألته لما تخبر أنت الآخرين عن حل المشكلة فقال الرزاق هو الله

جزاك الله خير

[الصافي9]

شكرا أخي ALBDRANE على إفادتك لإخوانك
سبق أنني عانيت كثيرا من رجة السفاري و ذهبت إلى كثير من الورشات و لم تنحل المشكلة وبعدها ذهبت إلى ورشة و تشليح أبو عبدالله الصمعاني ببريدة و أخبرته بمشكلتي و ترددي على الورشات فأخبرني أن المشكلة بسيطة بعدما قام بفحص السيارة فقام بصلاحها أمامي فكان الحل حتى تذهب مشكلة الرجة أن قام بفك الفليورات إلي يجي فيها الرمان و رمى الوجيه (( الوردات ) و أعاد الرمان إلى مكانه فذهبت المشكلة ولله الحمد فلما ذهبت المشكلة طلبت منه إصلاح بعض الأمور بالباترول ولم يأخذ مني إلا مائة ريال أو مائة وخمسين ريالا على جميع شغله فجزاه الله خيرا .
أخبرني أن من يعرف حل المشكلة يخفيها عن الآخرين حتى يستفيد ..... فسألته لما تخبر أنت الآخرين عن حل المشكلة فقال الرزاق هو الله


جزاك الله خير

[كشته وشاهي]

صحيح فيها مخرطه
معي فتك 2016 وديته ورشه الثنيان في صناعه الدائري بالرياض
وفعلا خرط عممود ولا ادري بالضبط وشهو لكن الدركسون صار راااااسي تماما وثقيل