تكفون ياشباب من عنده فكره عن المنقل اللي يجي داخل المشب

[خيال الغلبا]

ابحث عن ورشة حداده بالرياض تسوي منقل ثقيل سحاب يوضع على رمان بلي داخل المشب
واخاف اطيح بغشيم مايعرف

اللي يعرف لي احد متخصص يدلني جزاه الله خير

[سرهيد]

ابحث عن ورشة حداده بالرياض تسوي منقل ثقيل سحاب يوضع على رمان بلي داخل المشب
واخاف اطيح بغشيم مايعرف

اللي يعرف لي احد متخصص يدلني جزاه الله خير


هلا بك والله

ابشر بسعدك انا كنت مسوية للمدخنة في الخيمة عند محل وما شفت منه خلاف

امهلني ابحث عن رقمه في البيت لاني الآن خارج البيت

وبسأله اذا ما زال يصلح وكم الاسعار

وحاضرين طال عمرك

[خيال الغلبا]

سرهيد بيض الله وجهك

وجعل والديك بالجنه

[ظل الماء]

المنقد اللي على كفرات سهل تنظيفه لأن وزنه معقول ... الثقيل هذا وش بينظفه

[برق4]

حياك الله اخي الغالي /خيال الغلبا
ابشر بعزك انا توني مركب المنقل اللي انت تتكلم عنه وحديده قوي وشبيت فيه ومجرب وصاحب الورشة يقول انه مضمون خمس سنوات اي انثناء في المشب من النار رجعه وهو عبارة عن منقل على كفران حديد صغيرة متحركة على مجرى حديدي بالطول اللي انت ترغبه وهو موجود بجميع المقاسات علما"ان المحل متخصص بالمشبات ....
انا شريته مع مجراه مع شبكين اللي توضع على المنقل للشوي والخاص بالقهوة بمبلغ 160 ريال
الوصف :ـ
وانت جاي من الدائري الشرقي وكأنك متجه للسويدي من عند مخرج 18 المتجه للخرج اتجه يمين الى حراج ابن قاسم عند وصولك حراج بن قاسم اللي بغرب الرياض بعد ما تتعدى الحراج ديور اعمل يوتيرن من عند الكبري اللي بعده كأنك راجع على طريقك مرة ثانية راح يجيك على يمينك ورش متخصصة بالمشبات وهم عارضين مشباتهم على الطريق انا شريت من اول ورشه طبعا يوجد العديد من الورش على يمين ويسار الدائري بأمكانك انك تشوف وتسعر على راحتك ..
ارجو اني اكون قد افدتك ...
تقبل تحياتي

[راعي الطلعات]

اغلب ورش الحداده يصلحون لك على حسب الشكل والمقاس الي تبيه بس نصيحه خذه معك وخله يشوف مقاس الوجار الي عندك ومقاس 2 ملي ممتاز جداً لك وللزمن

واذا بغيت محلات متخصصين في الوجار فيه عندك عند مخرج 20 و 21 بجانب محلات الشتل الزراعية واشارة حراج بن قاسم وفيه ورشة قبل المقبرة الي قبل المحطة بتحصله على يدك اليمين جنبه محل لبيع توانك وخزنات الماء هذا اضمنه لك ان شاءالله انه يصلح لك وبالتوفيق

[سرهيد]

السلام عليكم

هلا بك اخوي الكريم

اتصلت على الهندي وقال انه من زمان ما يسوي

وما ذكره اخوي برق نفس ما قام به العامل واشوف سعره حتى مناسب جدا

فاذا انت بعيد طال عمرك كفيتك العنوة ومريت عليهم وسألت عنه وصورته لك وعرضته

بس انت عطني الاطوال طال عمرك او الرسمة بالتحديد وامرهم واقولهم

تامر امر فديتك

محبك

ابو عبدالله

[مدمن الكشتات]

:f نصيحة :f
:l :r :l :r :l :r :l :r :l :r :l :r :l :r :l :r

1-الثقيل أحسن من الخفيف لأنه ما يتأثر بالحرارة ، وتنظيفه سهل وهو في مكانه تشيل الرماد .
2-مثل ما قال أخوي جيبت العامل للبيت ضروري عشان المقاس وخاصة الارتفاع بحيث يكون على مستوى ارتفاع الوجار المبني .
3-انتبه :l ترى فيه بوية خاصة للوجار ما تتأثر كثير بالحرارة .
4- لازم يحط مجرىحديد بالأرض للرمان بلي لكي يمشي عليه الوجار .
5- والمكان مثل ما سبقوني الإخوان بعد حراج بن قاسم وأنت متجه غرب يجيك على اليمين جنب المشاتل ، والصناعية اللي بالسلي أيضاً فيه واحرص على المعلم السوري . :lr

[خيال الغلبا]

ظل الماء : نعم احسنت كلامك دقيق وصحيح

برق 4 : جعل والديك بالجنة وياليت جوال الرجال ان كان عندك

راعي الطلعات جزاك الله خير وبيض الله وجهك

سرهيد : ابو عبدالله : انت ماقصرت وبيض الله وجهك ... ولا انسى سرعة تجاوبك معي الله يجمعك بمن تحب في الفردوس الاعلى من الجنه

مدمن مكشات احسنت احسنت افدت واجدت وساستفيد من ملاحظاتك بيض الله وجهك

[خيال الغلبا]

طيب ياشباب بقي شيء وهو :

سقف الوجار كيف احميه واحافظ عليه من اللهب

اجاركم الله من لهب جهنم

[خيال الغلبا]

للرفع ....................

[سرهيد]

طيب ياشباب بقي شيء وهو :

سقف الوجار كيف احميه واحافظ عليه من اللهب

اجاركم الله من لهب جهنم

طبعا من سؤالك عن الوجار المتحرك واضح ان عندك مدخنة

ومسألة الدخان هذي صعبة الفكة منها يعني الدخان بيكون فيك فيك ، لكن الحرص على جعل الوجار المتحرك داخل المدخنة حتى يجمر يحمي السقف من الدخان

مع اني رأيت وجار عند احد الاخوة بني بطريقة مختلفة وهو شكل مدخنة العادة لكن بدل ما يتحرك الوجار يكون هناك حديد فوق الوجار هو من يتحرك ويكون يغطي الوجار كامل تماما ويمنع طلوع الدخان الى الغرفة بحيث تجعل النار موقده داخله حتى ترا الجمر ثم بعد ذلك تفتحه

وهذي صورته

http://www.mekshat.com/pix/upload03/images137/mk40450_3128039055_3fff11e4fe.jpg

http://www.mekshat.com/pix/upload03/images137/mk40450_3196310167_3bdce4a739.jpg

http://www.mekshat.com/pix/upload03/images137/mk40450_1103731299834.jpg


هذا اذا لم تركب الوجار الى هذه اللحظة

تقبل احترامي

[خيال الغلبا]

ابو عبدالله جزاك الله خير

الوجار منتهي منه ومبني وخالص

[اصيل نجد]

[SIZE="4"]هلا باخوي انا صلحت مشب واحد سوري معلم مشبات صراحه شغله ممتاز وتعامله ومصداقيته ممتازه جدا نرجع محور حديثنا بالنسبه لنفس المشب هو خيرني بين نوعين من الصاج وقال فيه خفيف وثقيل قلت ابي الثقيل وسعره اذا ماني ناسي بحدود ٢٥٠ ريال طبعا هو يصلحها عند حداد بس عزالله شغل تمام واحرص علي الحديد المفرز اقوى والمشب له الان اكثر من اثناعشر سنه تبارك الرحمن كنك مركبه اليوم لا تعوج ولا غيره . . تحياتي للجميع /SIZE]