نبي حصر لاحسن اغراض العزبة (كلن يشارك يالربع)

[البدراني11]

السلام عليكم
البركة الامطار والخير

ناوي على عزبة طبخ هالايام بدون قهوة وشاهي والكلام في هالموضوع طويل وفيه مواضيع قديمة كتبوها الشباب لكن في هالموضوع غير :

ابي كل واحد يكتب احسن شي من اغراض العزبه اللي هو يشوفها يعني اسم الماركة او المكان اللي تباع فيه حسب الاغراض اللي ابا اكتبها بعد شوي بس شرطي ان كل واحد منكم يكتب بشكل مرتب مثل :
الكاتم - سب
القدر - ابو تاج
الصحن - ... الخ
علشان في الاخير ابا اسوي احصائية لاكثر الاغراض ترشيح من الاعضاء ....يالله نبدأ باهم شي :

سلة العزبة ( )
الكاتم ( )
القدر ( )
الصحون ( )
علب المعاميل( )
السكاكين ( )
الدافور ( )
الذراية ( )
مقلى ( )
صاجه ( )

وسلامتكم

[S.i.e.r.r.a]

شنطه عزبه - السنيدي تنزاني
انا مجرب الشنطه تنزاني ماشا الله
انت روح السنيدي تلاقي الي يعجبك و برق الحيا لاكن السنيدي افضل
وفي اشياء في السنيدي تعجبك في العزبه

[البدراني11]

شنطه عزبه - السنيدي تنزاني
انا مجرب الشنطه تنزاني ماشا الله
انت روح السنيدي تلاقي الي يعجبك و برق الحيا لاكن السنيدي افضل
وفي اشياء في السنيدي تعجبك في العزبه


اخوي ودي تعطينا رايك في باقي العدة ....
على العموم جزاك الله خير ماقصرت
ننتظر الباقين :cool:

[بوسدن]

والله يا إخوان أنا عندى وجهة نظر
فعلا التجهيز للرحله و الكشته ممتع وهو أحد أجزاء الفرحة بالكشته
ولكن عندى وجهة نظر وهي الخفة يعني الأجانب سبقونا بخفة الأشياء وبساطتها
مثلا بإمكانكم تكشتون بأغراض خفيفة ..مثلا الفطور يكون خفيف جبن. قشطة. عسل.بيض. وبدون طبخ فقط للبيض إذا كان هناك رغبه أو (فوح) البيض بالماء
والغدا والعشا يكون مشوي جاهز مثل الكباب المثلج أو البرغر أو برغر اللحم، أو صوصج.... مع خبز وصمون(ولا أحد يقول هذا أكل مو مرغوب)لأن الرز والطبخ كل يوم ناكله في بيوتنا .. طبعا هذا إذا كانت الكشته قصيره يعني يوم أو يومين....
وفي هذه الحاله تحتاجون فقط شبك شوي ومقلاة للبيض وفحم فقط ودبه صغيره للشاي والقهوه وتوفرون عفش
إلا إذا كان الهدف من الطبخ هو التمتع والفرح وليس الهدف منه الأكل وهذا شي راجع لكم...

[البدراني11]

والله يا إخوان أنا عندى وجهة نظر
فعلا التجهيز للرحله و الكشته ممتع وهو أحد أجزاء الفرحة بالكشته
ولكن عندى وجهة نظر وهي الخفة يعني الأجانب سبقونا بخفة الأشياء وبساطتها
مثلا بإمكانكم تكشتون بأغراض خفيفة ..مثلا الفطور يكون خفيف جبن. قشطة. عسل.بيض. وبدون طبخ فقط للبيض إذا كان هناك رغبه أو (فوح) البيض بالماء
والغدا والعشا يكون مشوي جاهز مثل الكباب المثلج أو البرغر أو برغر اللحم، أو صوصج.... مع خبز وصمون(ولا أحد يقول هذا أكل مو مرغوب)لأن الرز والطبخ كل يوم ناكله في بيوتنا .. طبعا هذا إذا كانت الكشته قصيره يعني يوم أو يومين....
وفي هذه الحاله تحتاجون فقط شبك شوي ومقلاة للبيض وفحم فقط ودبه صغيره للشاي والقهوه وتوفرون عفش
إلا إذا كان الهدف من الطبخ هو التمتع والفرح وليس الهدف منه الأكل وهذا شي راجع لكم...

اخوي اذا كان التجهيز للعدة ممتع ....فالطبخ امتع لانك انت اللي تطبخ مهوب ام العيال وهذا تغيير ;)
بعدين ترا اغلب حقين البر ما يحبون البرغر في الديرة فضلا عن البر والناس اذواق
بعدين ابا اعلمك شغله ....اذا الواحد قضى كشتته في طبخ ونفخ صار للطلعة طعم , اما اذا جهز اكله بسرعة وش يسوي باقي الوقت .؟ يمل
على العموم كلن له وجهة نظر وشكرا على المشاركة

[بوسدن]

شاكرلك يا البدراني على إبداء رأيك على تعليقي

[شمالات نجد]

علب المعاميل يفضل استيل ولكن أغلب اللي في السوق تكون استيل وغطاها قزاز أو تكون غاليه جداً

المهم البديل والأفضل والمجرب علب المعاميل اللي تجي بلاستك مائي وغطاها أحمر أو بيج وصناعتها هندية وتتحمل

سلام

[البدراني11]

(اللي تجي بلاستك مائي وغطاها أحمر أو بيج وصناعتها هندية )

وينها فيه ذي اخوي شمالات ؟


غريبة ولا واحد سوى التصنيف اللي اقول :mad: :mad:

[عسم الغربية]

سلام عليكم ورحمة الله وبركاته
أولاً شنطة العزبه وتكون وسط عشان ماتضيق السياره<< سيارته سفاري ربع ويعاني من الشنط الكبيره ههههههه
ثانياً البراد الأصفر حق الشاهي ويستحب يكون صغير
ثالثاً الدله ويستحب تكون رسلان والا السيف صفرا صغيره
رابعاً براد القهوه ويفضل الفضي
خامساً القدر وأنتبه لازم يكون خفيف انتبه من الثقيل عشان تخلص الطبخه بشوي
سادساً الغضاره (سحله,طاسه) ويكون عدد 3
سابعاً العلب حقت الشاهي والسكر البلاستك اللي غطاها أحمر
ثامناً علبة القهوه البلاستك اللي غطاها أحمر وحافظة الهيل والعويدي يكون استيل أحسن عشانه يذوب البلاستك
تاسعاً الصاجه حقت الخبز عشان تسوون الخبز الجمري عقب الفجر
عاشراً شبك للشوي
الأحدى عشر الصحون ويفضل أثنين
(أما الصناعات أختر النوع الزين فيها , وياليت ماتشتري العزبه جاهزه عشان أغراضه مستحيل تناسب الكل وهي أصلاً غالية ,ياليت تجمعها من الأسواق حقت الجمله لأنها رخيصه)
أسألوا مجرب لقيت العزبه عند أحدى المحلات بـ 950 ريال
وجمعتها أنا بـ600 ريال وعلى ماأبي من نوعيات ومن مقاسات
تقبلوا مروري

[فهد العيد]

وعليكم السلام ورحمة الله وبركاته

وشلونك اخوي البدراني

انا بفيدك برايي والناس اذوق ولولا اخلتف النظر بارت السلع

بسم الله نبدا :

سلة العزبة ( السنيديوتكون ملبسه من داخل ببلاستك )
الكاتم (الالمانيا تيربو )
القدر ( ابوتاج الهندي)
الصحون ( استيل )
علب المعاميل(استيل )
السكاكين (السيف )
الدافور (بريومس العنكبوت )
الذراية ( وسط )
مقلى (......... )
صاجه (تي فال الفرنسي )

والسلام عليكم ورحمة الله وبركاته

اتمنى اني افدتك اخوي البدراني

محبكم فالله / فهد العيد

[شمالات نجد]

(اللي تجي بلاستك مائي وغطاها أحمر أو بيج وصناعتها هندية )

وينها فيه ذي اخوي شمالات ؟


شارع السباله بالرياض

[برق الشتاء]

لا بغيت تكشت حط بالك هالأغراض

السيارة : جيب لاندكروز تايوتا ( خوي بمعنى الكلمة ) وان ماحصل اي سيارة دفع رباعي البقية كلها مثل بعض :D مع الاعتذار الشديد لغير ملاك مفخرة الارض لاندكروز

صندوق العزبة : يستحسن صندوق السنيدي المبطن بنايلو عشان تقدر تمسحة لاجاه سجم من القدر والا الدلال وابريق الشاي . كذلك يستحسن ان يكون الصندوق بلاستيك مهو حديد عشان الوزن كذلك الحديد فتحاته كبيرة ومع وزن الأغراض تحمل على القماش وينقطع اما البلاستيك ارضية الصندوق مليانه مافيها مربعات فاضية .

عدة القهوة : الدلال بغداديات او رسلان
............ البكرج وهو اللي تفوح القهوة فيه ويستحسن يكون كبير عشان ما تطوش القهوة على النار
........... فناجيل القهوة من القديمة المخططة وتكون كبار
........... حافظات القهوة والهيل والقرنفل ويستحسن الاستيل وانحش عن البلاستيك لأنه لاقرب حضو النار ذاب
..........المشخل وهو الشبك الناعم اللي تسل القهوة فيه .
......... البيز ودور اللي طبقتين عشان يوقيك عن حرارة الدلة والبراد
......... النجر عاد النجر اي نوع من الاصفر ولا يكون كبير عشان يوفر مكان بالصندوق

عدة الشاهي : البراد الهندي اللي معدنه توت هذا افضل براد من حيث طعم الشاهي وكذلك يعيش معك وانتبه لاتاخذ اللي عروته بلاستيك ترا تذوب مع النار والله يعين يدك :D
كاسات الشاهي حط بالك بادريق طيبة وقزازها قوي
حافظات السكر والشاهي زي ماقلنا بالقهوة الاستيل طيبة وما تذوب .
ملعقة حديد عشان تسوط الشاهي فيها .
معشرة وهي صحن الفناجيل والكاسات ويستحسن تكون حديد ولاتاخذ اللي مقابضها بمساميل لأنها تنفك مع الاستعمال خذ من اللي مقابضها منها فيها .

سطل صغير لغسل الفناجيل

طبعا فناجيل القهوة وكاسات الشاهي لابد تكون في شنطة الكاسات وتكون من النوع اللي مبطن باسفنج عشان ماتنكسر الفناجيل مع سير السيارة .

عدة الطبخ :

القدر : التيربو الألماني ممتااااااااز بس ثمنة غالي الـ 6 لتر بـ 525 ريال والسيف زوين وشعبي ويعيش ويستحسن ماتركب المسكات الجانبية عشان ماتزحم صندوق العزبة وكذلك لو تفك مشد الغطا وتلحم حديدة عرضية اقوى من المشد البلاستيل .
ملعقة الطبخ لازم تكون من النوعية اللي ماتلين تكون صلبه عشان تاخذ راحتك في تقليب الطبخ.
السكين ( تيربو ) ام مسن رهييييبه بس انتبه لاصيبعاتك وانا اخوك لأنها حااااادة
الصحون خذ استيل تعيش ولاتاخذ كبار عشان ما تبلشك وتزحم صندوق العزبة .
ولا تاخذ قدر صغير ويستحسن من الصناعة المصرية طيبه وتعيش وهذا لقدر لخلط السلطة والا لغرف المرقه إذا الربع بغو مرقة قبل تحط الرز :D
طياس الطاسه مهمة بالعزبة لشرب الما وكذلك تغسل فيها الرز وكذلك للوضو مهمة جدا

لاتنسا تحط بالعزبة لفة سفرة
كبريت ويستحسن تحط العيدان في قارورة مربا وتلصق المشاخط بالغطا من الداخل عشان ما يخرب لو جاه ماء


نجي الحين لموقد ( النار):f
خذ قز من اللي له عينين وانحش عن الدوافير الصغيرة ام سبيرات مافيها فايدة ياكم ورطتنا خذ وانا خوك دبة غاز حجم كبير وحط لها ساعة غاز واللي من الايطالي عشان ما ينقطع مع الاستعمال .
الذرا فيه نوعيه وسط لاهي خفيفة مرة وتنعفت مع الاستعمال ولاهي متينة ويكون وزنها ثقيل بالعزبة وحط بالك المرتفعة .

الفراش : بالفراش حط بالك اللي لا طبقته حجمة صغير ولا فرشته يكون كبير واسع وهذا النوع شفته بالفرش اللي توزعت صدقة مكتوب عليها صدقة خادم الحرمين الشريفين :D دورت مثلها ولقيت نوعية تقارب لها رهيبة حجمها وهي مطبقة صغير ولافرشتها والا هي كبييييرة .
المراكي خذ ثلاث من النوع اللي ضغطها قوي وحجمها صغير عشان ماتاخذ حيز بالسيارة .
فارش النوم لاكثر اللحف خذ من ابو سسته المبطن بفرو وحط بالك اللي ينشد بحقتين تراه طيب وخذ وسادة حطها وسط الفراش ونصيحه بعد لف الفراش حطة داخل كيس زبالة من السود عشان ما يتبلل لو هربت جكات الماء ترا كم مرة اكلتها :D

وان كانت الكشتة ربيعية وبتمرحون بالبرد وبغيت تشرون خيمة يمدحون الصباحية والباكستانية طيبة بعد وحط بالك القماش يكون قوي
الرواق خذ ابو متر ونص ارتفاع وطوله ما يتجاوز عشرة متر

جكات الماء ان كان السيارة مافيها تانكي ماء خذ من الجكات السود وخذ وصلة لي نوعية طيبة وخذ كباس اللي فيه مغناطيس يلصق ببدي السيارة

اوووووووووه نسيت دبة الماء اللي هي ابريق الماء للوضو وحط في مصب الما نقاصة لتوفير الماء والنقاصة هي اللي ينسبك فيها لي المكيف الصحراوي أو ضيق مخرج الماء بحجرة .

والسائل لوكس مهم وطيب بس حط العلبة داخل كيس نايلو لا يحوس صندوق العزبة وان اخذت تايدي فرغة داخل قارورة ماء صحة عشان ما ينشق الكرتون ويحوس العزبة

والله مدري انا نسيت شي والا لا لأني اتذكر عزبتي واكتب ان ذكرت شي يلحق ان شاء الله :)

موفقين خير :good2:

[برق الشتاء]

http://sub3.rofof.com/img3/012nyhil10.gif



:good2: :good2: :good2: :good2: :good2: :good2: :good2:

[البدراني11]

سلام عليكم ورحمة الله وبركاته
(أما الصناعات أختر النوع الزين فيها , وياليت ماتشتري العزبه جاهزه عشان أغراضه مستحيل تناسب الكل وهي أصلاً غالية ,ياليت تجمعها من الأسواق حقت الجمله لأنها رخيصه)
تقبلوا مروري

اخيرا :D :D انت اول واحد يرد على موضوعي بكل الفقرات
اما سالفة العزبة الجاهزة ...انا ما خذت شورك انت والربع الا منحاشين من الجاهزة :good2:

وتسلم اخوي

[سرهيد]

السلام عليكم ورحمة الله وبركاته

ويحيك ربي اخي الكريم

في البداية : لا انصح نهائيا بتلك الشنط التي تحتوي على عدة طبخ ولو كانت ببلاش ؛ لأن غالبية ما فيه من اواني من النوع التجاري اللي ما يقعد معك مدة طويلة .

سلة العزبة : انصح بالتنزاني المبطنة من الداخل ويكون حجمه كبير مع الحرص على تلك الشنط التي لا يكون بداخلها بلاستيك او سلة حديد ، لكني تتيح لك اخذ اكثر اذا ازدحمن الاغراض .

الكاتم : بلا شك ما فيه افضل من السب الاستيل ، أو الاسباني الاستيل .
القدر : معروف المعدن ابو تاج لان الغالب فيها تاخذها ام لغسيل الرز او للمرق وغيره .
الصحون : الاستيل ، لان الغضار ، يتكسر مع المطامر ، لكن الاستيل لك وللزمن ، وفيه نوعيات رخيصة وزينة .
علب المعاميل : انصح بان تاخذ شنطة مناسبة للبهورات والملح وغيره .
السكاكين : فيه نوعيات كثيرة ولكن احرص على الاستيل لأنه ما يصدي .
الدافور : انصح بالبريموس او الايطالي المرهم عند البرية فشعلته رائعة وممتاز .
الذراية : فيه نوع حجمه كبير والمنيوم خفيف وما يصدأ .
مقلى : عليك بالتيفال .
صاجه : الاستيل بدون منازع

هذا ما لدي ولكل شخص معاميلة الخاصة

تقبل احترامي

[البدراني11]

وعليكم السلام ورحمة الله وبركاته



وشلونك اخوي البدراني
اتمنى اني افدتك اخوي البدراني


محبكم فالله / فهد العيد


ابشرك طيب الله يطيب فالك ..
وما قصرت ترتيب في الرد على ما ابي

[البدراني11]

لا بغيت تكشت حط بالك هالأغراض
عدة القهوة
عدة الشاهي
عدة الطبخ :

القدر : التيربو الألماني ممتااااااااز بس ثمنة غالي الـ 6 لتر بـ 525 ريال والسيف زوين وشعبي ويعيش ويستحسن ماتركب المسكات الجانبية عشان ماتزحم صندوق العزبة
كبريت ويستحسن تحط العيدان في قارورة مربا وتلصق المشاخط بالغطا من الداخل عشان ما يخرب لو جاه ماء
نجي الحين لموقد ( النار) .
الفراش :
جكات الماء
والله مدري انا نسيت شي والا لا لأني اتذكر عزبتي واكتب ان ذكرت شي يلحق ان شاء الله :)

موفقين خير :good2:

الله يوفقك في الدنيا والاخرة
عقب هالتفصيل ما شاء الله مانسيت شي ...كفيت ووفيت بس فيه اسئلة :
مسكات الكاتم اذا شيلت وشلون تنقل القدر وهو حار !!!
واما الكبريت احس انك حست علبة الكبريت (على شغلها الاصلي احسن)

جزاك الله خير على المعلومات القية

[الكونترولCONTROL]

تعجبني العزبة الخفيفة التي تكفي لأداء القهوة و الشاهي
و الطبخ بأنواعه الثلاثة ( قدر - شوي - مقلقل )
و لا يعجبني وجود أي أدوات بلاستيكية مع العزبة

[البدراني11]

السلام عليكم ورحمة الله وبركاته

ويحيك ربي اخي الكريم

في البداية : لا انصح نهائيا بتلك الشنط التي تحتوي على عدة طبخ ولو كانت ببلاش ؛ لأن غالبية ما فيه من اواني من النوع التجاري اللي ما يقعد معك مدة طويلة .

سلة العزبة :

الكاتم :
القدر :
الصحون :
علب المعاميل :
السكاكين :
الدافور : انصح بالبريموس او الايطالي المرهم عند البرية فشعلته رائعة وممتاز .
الذراية :
مقلى :
صاجه :

هذا ما لدي ولكل شخص معاميلة الخاصة

تقبل احترامي
الله مير يحييك اخونا المميز سرهيد
ما شاء الله كفيت ووفيت
ابي اسئلك وش ارخص وافضل في الدافور (البريموس والا الايطالي المرهم ) والبريو وينهو فيه ؟
الله يجزاك خير

[سرهيد]

الله مير يحييك اخونا المميز سرهيد
ما شاء الله كفيت ووفيت
ابي اسئلك وش ارخص وافضل في الدافور (البريموس والا الايطالي المرهم ) والبريو وينهو فيه ؟
الله يجزاك خير

هلا بك اخوي البدراني ويحيك ربي

بدون شك الارخص الايطالي ومتوفر والجميع يثني عليه ، انا الحقيقة ما جربته ، لاني مجرب بريموس وشاريها برخيص من الحراج ولله الحمد وشغالة معي زي الحلاوة

وبتلقاها عند محلات البرية مخرج 14 وجهك للشرق نهاية حرف T بعدها تروح يمينك تجيك اشارة رح يمين يجي على اليمين


والبريو وينهو فيه ؟


لم افهم ما تعني بهالكلمة

وابشر بسعدك طال عمرك

اخوك

ابو عبدالله

[البدراني11]

شكرا اخوي سرهيد على الوصف
وسؤالي الثاني جاوبت عنه :p كنت اسال عن محل البرية والحمدلله رميه من غير رامي .

ننتظر بقية الاعضاء .....

[البدراني11]

وين البقية يعلمونا وش الزين ؟

نبي العرض مثل اخونا فهد العيد وبرق الشتاء وسرهيد

[ايه احبك]

خلااااص معاد هي طلعه للبر صارت طلعه للمريخ والا للقمر .
الي يقول لازم تاخذ معك هاك الشي ويفضل يكون والي يكتب لك 20 غرض تاخذه معك . بسكن بالبر انا ؟؟؟ بقعد شهر ؟؟ ترا كلها يوم والا يومين وراجع لاهلك .

والله العظيم طلعه البر الحين صارت كانك رايح رحله استكشافيه كولومبس على عفله .
ياخي خذ اهم الاغراض وانتهينا
دله غوري صحون وقدر دافور هيل قهوه عويدي شاي سكر واغراض الاكل .

الي يشووفكم يشوف الواحد اخذ معه كل وسائل الراحه . اجل ليش البر ...؟ اقعد في بيتكم وخل البر لاهله.

[نبض البوسنة]

تعجبني العزبة الخفيفة التي تكفي لأداء القهوة و الشاهي

و الطبخ بأنواعه الثلاثة ( قدر - شوي - مقلقل )

و لا يعجبني وجود أي أدوات بلاستيكية مع العزبة





نفس الفكرة .....

واحس الامور يكون فيها نوع كبير من الترتيب .


:good2:

[البطر1ن]

ملاعق وسكاكين بجميع الأحجام
أكياس للنفايات
صحون أحجام مختلفة

[البطر1ن]

ملاعق وسكاكين بجميع الأحجام
أكياس للنفايات
صحون أحجام مختلفة

[يكفيني نظرة]

اخوي الغالي البدراني العزبه خذها من السنيدي وباقي الاغراض لاتعدىمحل ( السعر الأخير) هو ارخص محل يبيع اواني منزليه مثل الكاتم والاباريق وغيرها ويشترط على الزبون اذا لقيت ارخص منه ارجع وخذ فلوسك ومكانه شارع الزبير بن العوام وكلية المعلمين يمينك اتجه غرب قبل اشارة عبدالله بن عباس شفه يسارك ...

[ابو كشتة]

^^^
السعر الاخير ببريدة ولاووين

[محمد الجويسر]

موضوع جميل وشيق ومفيد

متااااااااااااااااابع

[البدراني11]

خلااااص معاد هي طلعه للبر صارت طلعه للمريخ والا للقمر .
الي يقول لازم تاخذ معك هاك الشي ويفضل يكون والي يكتب لك 20 غرض تاخذه معك . بسكن بالبر انا ؟؟؟ بقعد شهر ؟؟ ترا كلها يوم والا يومين وراجع لاهلك .

والله العظيم طلعه البر الحين صارت كانك رايح رحله استكشافيه كولومبس على عفله .
ياخي خذ اهم الاغراض وانتهينا
دله غوري صحون وقدر دافور هيل قهوه عويدي شاي سكر واغراض الاكل .

الي يشووفكم يشوف الواحد اخذ معه كل وسائل الراحه . اجل ليش البر ...؟ اقعد في بيتكم وخل البر لاهله.


هون عليك يا اخوي على الاعضاء :)

بس في الموضوع ما حددنا عدد الايام يومين او ثلاث ، فكل واحد يكتب اللي هو ماشي عليه ولاحددنا وسائل الراحة في البر ....نحن حددنا اغراض عزبة الشاهي والقهوة وعزبة الطبخ بس اهم شي :
يكتبها بالاسلوب اللي قلناه في الموضوع .

عاد ودنا تكتب اغراض عزبتك بنفس الاسلوب السابق الذكر يعني نوع كل قطعة تفضل

وشكرا على المرور .

[البدراني11]

نفس الفكرة .....

واحس الامور يكون فيها نوع كبير من الترتيب .


:good2:


شكر على مرورك

ملاعق وسكاكين بجميع الأحجام
أكياس للنفايات
صحون أحجام مختلفة

اتمنى اخوي البطران تضيف باقي العزبة ونوع الادوات المستخدمة مثل ما قلت لاخونا ايه احبك

ننتظرك ...

[bearKSAlover]

شكرااااااااااااااااااااااااا

[راعي بيشة]

مشاركتي الدافور : البريموس الدبة الزرقاء الكبيرة العادية والعين البريموس العادية
مع البريموس العنكبوت للي يهمه الحجم

[برق الشتاء]

الله يوفقك في الدنيا والاخرة
عقب هالتفصيل ما شاء الله مانسيت شي ...كفيت ووفيت بس فيه اسئلة :
مسكات الكاتم اذا شيلت وشلون تنقل القدر وهو حار !!!
واما الكبريت احس انك حست علبة الكبريت (على شغلها الاصلي احسن)

جزاك الله خير على المعلومات القية

ومن يقول يلقى التوفيق ان شاء الله

القدر لافكيت مسكاته تشيلة بمشد الغطاء يالنشمي

اما الكبريت كل له راي

موفق خير يالعمري

[ذيب الهويمل]

الكاتم الاسباني

القدر والله مدري وشو

والدافور بريمس

والدرايه وسط

[البدراني11]

اخوي الغالي البدراني العزبه خذها من السنيدي وباقي الاغراض لاتعدىمحل ( السعر الأخير) هو ارخص محل يبيع اواني منزليه مثل الكاتم والاباريق وغيرها ويشترط على الزبون اذا لقيت ارخص منه ارجع وخذ فلوسك ومكانه شارع الزبير بن العوام وكلية المعلمين يمينك اتجه غرب قبل اشارة عبدالله بن عباس شفه يسارك ...

ابشرك خذنا عزبة من سوق الشرع ارخص بواجد عن السنيدي
وامس مريت السعر الاخير لقيت عنده كاتم سب 8لتر وانا ابي 5-6 لتر لكن الحق يقال شكله رخيص في بعض الشغلات
شكرا لك

^^^
السعر الاخير ببريدة ولاووين
له فروع واللي رحت له في حي الملك فهد شارع الجامعة

موضوع جميل وشيق ومفيد

متااااااااااااااااابع
شكرا لك اخي محمد على الاطراء والتشجيع والمرور