الفزعة الجيب يدخن الصباح فقط لو تكرمتوا [الأرشيف]

mr.hanx

16/12/2009, 09:33 AM

:f

السلام عليكم و رحمة الله

عندي الجيب لاند كروزر الصباح يدخن دخان ازرق
لمدة قصيرة ثم باقي اليوم تمام التمام

غيرت جلد بلوف و اصلاح كلبليتر و تعبت من الورش و التردد عليهن
و مازال على حاله http://www.albrari.com/vb/images/smilies/surrender.gif

وش الحل الله لا يهينكم وشاكر لكم مقدما

mr.hanx

17/12/2009, 12:36 PM

طيب سؤال ثاني

هل اقدر اصلح الشنمبر بدون فك المكينة و كيف ؟؟؟

يعطيكم العافية

اتفاق الطائف

17/12/2009, 02:37 PM

في الغالب ان اذا دخن اول التشغيل فقط والسيارة باردة

تكون جلد البلوف ولكن انت تقول غيرتها !!!!

السؤال هل غيرتها عند شخص ثقة ومتمكن ؟؟؟

بالنسبة للشنبر الشغلة غير مكلفة لكن من الافضل اذا كانت المكينه منتهية انك توظب كامل لك وللزمن

لانه تغيير الشنبر فقط لا تستمر السيارة بحاله سليمة فترة طويله وقد تنتكس الحاله من جديد

اتمنى لك التوفيق

ابومعزي

17/12/2009, 03:04 PM

عليكم السلام ورحمة الله
اخوي اذا كان الجيب ما ينقص فما عليك منه واعتقد المشكلة عندك ان الصباح تكون جلد البلوف ناشفة واذا لحقها الزيت تلين وتضبط واهم شي انه يكون ما ينقص وماعليك من الدخان خصوصا انه ينقطع

mr.hanx

18/12/2009, 01:53 AM

السلام عليكم و رحمة الله
اخي اتفاق الطائف حيّاك الله / نعم غيرتها عند مخرطة معروفة و كبسوها كبس جيد
حتى الميكانيكي قبل تركيب الرأس للمكينة يقول شغل المخرطة تمام و هو لا يعرف أي مخرطة رحت لها . و المكينة نظيفة جدا .
السؤال كيف ان شغلة الشنمبر غير مكلفة ؟ يعني كيف اصلح الشنمبر بدون فك المكينة ؟
شاكر ومقدر تجاوبك و رعاك المولى
==========================

اخوي ابومعزي اهلين وسهلين
انا ذكرت اني غيرت جلد البلوف و خرطت الرأس عند المخرطة .
المشكلة ان الزيت ينقص حوالي علبة في الشهرين , و الدخان يفشل و مزعج للناس إللي يمشون وراي لأنه ما يوقف الدخان إلا بعد ما اقطع كيلو أو كيلو ونص .
اخيرا تسلم يالغالي على تجابك و شاكر لك جدا

سوبر VTC

23/12/2009, 04:14 AM

طيب
كل 5000الاف كيلو كم ينقص ؟؟؟
اذا نقص علبه او اقل
لا تلمس المكينه لاتفكه
عندك ضعف شنبر البستم

abo tayyar

23/12/2009, 04:33 AM

افااااا يـدخـن ..!:eek:
انصهه وأن شاء الله يهديه الله :D :D <<مسوي ينكت

شّدني عنوان الموضوع .. بس مبين أن جيبك فيه خير يدخن الصباح بس :D << زودهااآ

أن شاء الله يفيدونك الشباب وتلقى الحل ويتوب ولا يدخن مره ثاانيه ..

escape_man

23/12/2009, 08:13 AM

دامه ينقص فمثل ماقالك مشرفنا سوبر فتك

هذي بداية ضعف بالمكينة .. خلها لين تخبط وترفق عليها وبتمشيك ان شاء الله

جلد البلوف التجارية هي الي تدخن الصبح ولكن بدون نقص ملاحظ على الزيت

سوبر VTC

23/12/2009, 01:51 PM

mr.hanx

23/12/2009, 07:47 PM

طيب
كل 5000الاف كيلو كم ينقص ؟؟؟
اذا نقص علبه او اقل
لا تلمس المكينه لاتفكه
عندك ضعف شنبر البستم

هلا و غلا بمشرفنا الغالي و تو ما تبارك الموضوع بمرورك

المشكلة ياطويل العمر ان الزيت ينقص حوالي علبة في الشهرين , و الدخان يفشل و مزعج للناس إللي يمشون وراي لأنه ما يوقف الدخان إلا بعد ما اقطع كيلو أو كيلو ونص و الفشيلة شينة يالغالي .

ملاحظة :
طيب لو اسوي اختبار للبساتم السته عن طريق البواجي ( فحص كل بوجي لوحده و نشوف السواد و الزيت اللازق فيه ) و بعد تحديد أي بوجي , اصب فيه كمية بسيطة من القاز يمكن مقدار ( بيالة )
لعل الشنمبر يفتح اذا مقفل أو مسكر كل هذا قبل فك المكينة .

ابتظر رأيك و شورك بارك الله بك و فيك

شاكر و مقدر كل من شارك و من مر من هنا

سوبر VTC

25/12/2009, 01:47 AM

الله يحييك
بعضهم اذا كانت البساتم عاضه ماسكه
خصوصا المكاين اليابانيه
يحط زيت كولينا
لكن اتوقع اذا احتمى الموتر تفك الشنابر
جرب منتب خاسر شي لكن لازم تخليه لوقت اطول
عشان يفك
لكن و العلم عند الله ان شنابر البستم عندك ضعيفه
كم ماشي ؟ وش موديله ؟
قد يكون الموتر جايته حرارة من قبل
لك رسالة على الخاص

mr.hanx

25/12/2009, 01:01 PM

مرحبا بك مشرفنا السوبر الغالي
قرأت الرسالة لكن مشاركاتي عددها قليل لا تسمح بالرسائل الخاصة .
السؤال : من هو ابوخالد و وين مكانه ؟

(( كم ماشي ؟ وش موديله ؟ ))
لاند كروزر 96 ماشي حوالي 260 الف فقط

لك صادق الدعاء على التواصل و التجاوب المستمر
و نلتقي على خير

فايق ورايق

25/12/2009, 09:14 PM

هلا اخوي بالنسبة للردود انا اشوف من وجهة نظري انسب شي تسوية

انك تحط زيت كولينا مثل ماقال لك اخونا سوبر Vtc

ماراح تخسر شي
================================================== ===================================
واذا كنت بتوضب الماكينة احرص على الفني الممتاز عشان ماتخسر فلوسك اذا دلوك الشباب على ميكانيكي صح وضبط لك الشغل افضل مية مررره من شراء ماكينة من التشليح ماتدري عنها .

تقبل مروري

كبسولة2

06/03/2010, 03:13 PM

أو زيت ستوب الثقيل

يخفف شوي من الدخان

أكبر من ألقاب

11/02/2013, 01:38 PM

مثل هذي الحالات لاتحرك فيه شي تبلش مادام المكينه قديكون السبب بسيط تافه جدا وصعب الميكانيكي يعرفه وانت خسرت فلوسك ومكينه من كثر التصليح بحث عن العطل
ع العموم فيه زيت بور لوب في ساكو معتمد من جامعة ملك فهد

أكبر من ألقاب

11/02/2013, 01:44 PM

ممكت تعلمونا حسب خبرتكم الورش والميكانيكين الممتازين للباجيرو وغير بشكل عام

ls1.5700

11/02/2013, 08:55 PM

ياصاحب الموضوع المشكله اللي بموترك ماهي من الشنبر
حتى لو فيه ضعف او فتحه مايسوي كذا
يبقى يدخن على طول مع الدعس على البانزين بقوه يبين
المشكله عندك من جلد البلوف ماضبطوها زين فيها فضاوه وتهريب زيت على البستم بشكل بسيط جدا
يمكن كم نقطه بس
ارجع لهم مره ثانيه ويغيرونهم على حسابهم لانهم هم السبب في خسارتك على الفاضي ويتحملون التكاليف كلها
وانت شيك على البواجي قبل تروح لهم وفك على واحد واحد اذا مافيهم زيت موترك تمام مافيه شنبر

BLAZER91

12/02/2013, 08:56 AM

السلام عليكم ورحمة الله وبركاته

يخوي مااتوقع الشنبر ضعيف ابدا
اول شي ماشاء الله مشي السياره قليل جدا على موديلها
اذا كان العداد صحيح وغير ملعوب فيه
اتوقع جلد البلوف ماهي اصليه مع ملاحضة ان الجلد الاصليه ماتجي الا مع طقم وجيه وصوف المكينه كامله
وممكن تكون القايدات حقت البلوف فيها فضاوه تسبب الدخان في الصباح ايضا

لكن الله يعينك يبيلك مكانيكي ممتاز وفاهم في المكاين هذي علشان يحدد العطل

أحمد محمد1429

12/02/2013, 09:21 AM

اخوي ابيك تجاوبني على هالاسئله
1ـ ماسبب خرطك للرأس
2ـ الدخان هل إستمر معك بعد خروج السياره من الورشه أو إنقطع ورجع وكم المده اللي رجع فيها

محب الهيف

12/02/2013, 11:31 AM

نفس موتري مدام المكينة ماتنقص خلها مافية اي مشكلة

رحال7

12/02/2013, 02:04 PM

mekshaat

12/02/2013, 02:24 PM

عشان تتأكد من جلد البلوف فيه الطريقه
المعروفه اللي يسوونها المهندسين شغل
السياره لمدة عشرين دقيقه بدون ماتحركها
وبعدها ادعس دعسه قويه شوي اذا طلع
دخان مره وحده وبعد الدعس مره ثانيه
انقطع معناها جلد بلوف فقط واذا موقعك
بالرياض أرسلتك لورشه فيها فلبينيين
يغيرون الجلد بالزرقينه ويشرف عليهم
مهندس سعودي وبالتوفيق.

mr.hanx

12/02/2013, 02:52 PM

اشكر الجميع على التفاعل و الحرص
و الله ياجماعة الموتر على خبركم و دخنته من قبل كتابة هالموضوع الى الآن
لكن الدخان اكثر في الشتاء و يستمر ممكن دقيقتن الى ثلاث اذا واقف أو امشي
و جربت زيت ثقيل شريت علبه من ساكو سعرها حوالي 25 ريال و ما فيه فايده

و ألآن صابر عليه الى ان الله يفرجها
و عسى الله يوفق كل من شارك و ادلى بالنصيحة
و يجزاكم كل خير و يسعدكم دنيا و آخره

mekshaat

12/02/2013, 05:08 PM

الزيت الثقيل ماهو حل يضر المكينه يستخدمه
واحد عنده المكينه شبه معدومه وناوي يوضب
يعني بشكل مؤقت لكن فيه معالج ثاني ممتاز
يختلف عن اللي استخدمته وباذن الله بيحل
مشكلتك بشكل جذري.

mr.hanx

12/02/2013, 08:06 PM

الزيت الثقيل ماهو حل يضر المكينه يستخدمه
واحد عنده المكينه شبه معدومه وناوي يوضب
يعني بشكل مؤقت لكن فيه معالج ثاني ممتاز
يختلف عن اللي استخدمته وباذن الله بيحل
مشكلتك بشكل جذري.

ما هو المعالج الثاني لو سمحت اخي مكشات
مع كل الشكر

mekshaat

12/02/2013, 08:22 PM

عندك الرسائل الخاصه ماتستقبل
عدلها الى السماح عشان برسل
لك رساله.

mr.hanx

12/02/2013, 10:48 PM

عندك الرسائل الخاصه ماتستقبل
عدلها الى السماح عشان برسل
لك رساله.

ابشر طال عمرك و لك رسالة خاصة مني
و بالتوفيق يالغالي

ذيب خزاز

13/02/2013, 02:16 PM

السلام عليكم اخوي المشكله من بلف التبخير
او بلف البخار اللي نازل من الثلاجة للمكينه
صار معي نفس الحكايه والحمدلله مافكيت المكينه
غيرته وضبط ١٠٠٪
واذا انت بالقصيم اوصفلك الورشة

رحال7

13/02/2013, 02:24 PM

http://img.tapatalk.com/d/13/02/13/anemynyb.jpg

احتمال ??? يكون هذا السبب ويسمى PCV او صمام التبخير
يوجد في غطاء المكينة ،،،لا اعرف اي مكينه موترك سته،ثمانيه 4.7 او ثمانيه 5.7????
وسعره عشرات فقط وتستطيع انت تغيره بنفسك ولكن افضل اذهب لمتخصص لانه احتمال يكون ناشف او مهتري او مكسور فيحدث ان يدخل المكينه شئ منه

الصورة تقريبية فقط
ولا تنسانا من دعوه في ظهر الغيب وفرج الله همنا وهمكم وهم كل مسلم

((((والله لم اشاهد مداخلة الاخ ذيب الا بعد اكمال مشاركتي ،،،يمكن اثناء ما كنت ابحث عن صوره ،،ان شاء الله يكون الصمام السبب)))

سيف111

13/02/2013, 02:45 PM

ما شاء الله

بن الزايد

13/02/2013, 10:07 PM

لا تعب نفس غير طقم بلوف مع جلد وفيها خرط مسلك بلوف

mr.hanx

16/02/2013, 12:37 PM

اشكر الجميع على التفاعل و الحرص
اخوي ذيب خزاز بيض الله وجهك و سوف اشوف البلف .
الغالي رحال 7 رحم الله والديك و مشكور على البحث و المشاركة و المكينة ست سلندر 4500 .
اخوي بن زايد غيرنا طقم جلد بلوف و لا فيه فايده و مشكور

ذيب خزاز

24/02/2013, 09:20 PM

اخوي بشرنا عسئ لقيت الحل

mr.hanx

26/02/2013, 09:12 AM

هلا و غلا اخوي ذيب خزاز
بيض الله و جهك و مشكور على السؤال و الاطمئنان .
المعذره ياخوي كنت هالفترة مشغول جدا و لم افضي للسيارة ، لكن اوعدك بالتفاصيل و الاخبار
اذا حصل أي جديد و مشكور مره ثانية .