ومعك اشقرٍ لاطار اسبق من الجير

[ابوسالم]

السلام عليكم ورحمة الله وبركاته
كل عام وانتم بصحه وعافيه
نعود اليكم بعد انقطاع كنت انا الخاسر فيه بهذه المشاركه عسى ان ترضيكم عنا
هذي القصيده رد على صديق عزيز علي جداً يقول في مطلع قصيدته

شفت السحاب وذكرن خوة الطير=وخوة خويٍ مايخلي خويه
عاد ومسك السريع بالعتاب
عاد رديت انا بهالقصيده اللي ارجو ان تكون في مقام هذا الصرح الشامخ المكشاتي
وارجو ايضاً ان تنال على لو بعض اعجابكم

رقيت في عالي رفيع المواكير=وابديت به ماكان يطري عليه
من واقع الدنيا عرفنا التصاوير=ومايدمر الرجال ياكود غيه
واقدر اللي لي يسوق التقادير=ومن لايسلم مانرد التحيه
واعين واعاون وفا دون تقصير=واترك كثير القول وابدي شويه
وخلافها ياللي طريقك تياسير =فوق اشهبٍ للقار يطويه طيه
من مصنع اليابان شِد المسامير=ويم البريمي نحتريه بمجيه
جيبٍ إلامن حرك ودور السير=ياكنه اللي جا يرد الحميه
يسوي سواة مقبعراة المعاصير=لامن مشى والقاع له مستويه
وياراكبه خذلي معك كم تقرير=شوق ومعزة للسنافي هديه
واليا وصلت بديرته حزة عصير=ميل عليه ولاتردد مجيه
تلقا دلاله عامراةٍ مباهير=خذلك ثلاثٍ وارشفه في رويه
والياسترحت وطاب كيف المسافير=قله يقول وبلغه بالتليه
ياصاحبي الله يمسيك بالخير=وعساك طيب يوم جتك التحيه
وانا خويك بالليال المعاسير=ولاخير في رجلٍ يخلي خويه
وانا يمينك لانويت المشاوير=انا يمينك لوها مهمهيه
والله يعيده ماذكرته على خير=والقاع تبذر والوسم به سقيه
ونشوف عشبه بالفياض المزاهير=من كل صنف وكل نوعٍ زهيه
ونلقى الحباري في طرفها مخامير=ماهي ذِكر بالعين شفناه حيه
ومعك اشقرٍ لاطار اسبق من الجير=واسبق من الشيهان فرخ ابحريه
مغتر شقر به باقيٍ تالي انجير=هجر وجليل وريشته فارسيه
حلو الطبوع ولايجي منه تنكير=صافي ظهر للعين به جاذبيه
والراس كاشف والثنادي مزابير=ادقاق ريشه يعجب المشتريه
يبري خفوقٍ مدمياته مذاوير=زرق الغلب لاجنبته البقيه
لاقام يوعد..وارتكز...واطلب السير=شره على شرد الحباري منيه
تلقى غلبها بالهوى له مباذير=دااااااايم ونفسه للهدد قابليه
ومما طرالي جيت اسوق التعابير=مما بنفسي نفسي المبتليه
وصلاة ربي عد مارفرف الطير=على النبي وعداد وبل برديه
[line]
مع خالص امنياتي لكم بدوام الصحه ............. ابوسالم

[عبرود]

صح لسانك على هالقصيده الرائعه

[ريف النشاما]

ابو سالم حياك ربي وبياك وياهلابك بين اخوانك واحبابك وانشاء الله مافيه مخاسير

وتشكر على هذه الرائعه والرد الجميل الذي أعتقد بأنك قد ابدعت به وبردك على خويك الله يجمعكم واياه على الهدى والتقى
والخير

شكرا لك على هذه الرائعه وبارك الله فيك

ولاعاد تخت منا ولا منا

وتقبل تحيتي

[ابوسالم]

حياك اخوي عبرود وصح بدنك واشكر لك مرورك الكريم
[line]
ريف النشاما ...كفو والله عند شاربك
عموماً الله يبقيك ويخليك لعينٍ ترجيك وبالنسبه للخساير فعدم التواصل الدائم خساره لما في هذا المنتدى
من مواضيع متجدده تلمس نقاط مهمه في حيات الكشات .
هذا من لطفك عزيزي
بس الخته لابد منه :)
سرني مرورك الذي حفر نيشان على صدري شكراً

[تالي الاولين*]

.



صح لسانك يايوسالم


.

[ميراج]

صح لسانك اخوى ابو سالم

وحياك الله ومن طول الغيبات جاب الغنايم