فزعتكم ياراعين الجموس والشفر

[ابو عبدالإله]

السلام عليكم ورحمة الله وبركاته


اخواني الكرام قبل تقريبا شهر من الان رحت للبر بسيارتي التاهو موديل 99 دبل
وجاني غراز وتعلق الموتر ، صار مايمشي لادبل ثقيل ولاخفيف نافع ، المهم نزلت من السيارة
ابغا ابرح لها وانسم الكفرات وفجأة ومن غير مقدمات طفت السيارة حاولت اشغلها مافيه فايده الى أن
فضت البطاريه فزع لي ولد عمي وسحب الموتر من الغراز وسحبني الى الورشه صاحب الورشه
شحن البطاريه وحاول يشغل نفس الشيء شيك طرمبة البنزين لقاها تحقن بنزين يعني كويسه
بعد كذا فتح غطا صغير في ماصورة مثل ماصورة تشييك الفريون وشيك لقاها ماتجيب بنزين قال هذي
الطرمبه نزل التانكي وفتح الطرمبه حصل ماسوره في الطرمبه منكسره وجبنا له طرمبه جديده وركبناها اشتغل الموتر ،
المشكله مو في الكلام هذا المشكله انه بعد مااشتغلت السياره صرت أول ماأعشق القير يصير فيه نتعه قويه
سواء قدام او ريوس وإذا مشيت اول تبديله ينتع بقوه لكن مو على طول بعض المرات
وبعض المرات اذا استمريت بالمشي ينتع الموتر بقوه على ورا كأن شيء يسحبه بقوه
شيكت كمبيوتر عند ترايستار قال لي منظم دخول الهواء إلى المكينه خربان ، المنظم هذا
يجي لونه اسود مستطيل الشكل وراكب في ماصورة قربة الهواء قريب عند فلتر الهواء وقال لي
فيه حساس عند الديلكو احتمال بعد يكون منه طلعت من عندهم رحت ابشتري المنظم لقيت سعره
خمسمائة ريال وماشريته غيرت زيت وفلتر ونفس الشيء مااستفدت ، المهندس اللي في ترايستار طلع عيار
زيت القير وشمه قال لي هذا ريحته محترق احتمال فيه خراب داخل القير لكن انت روح اول غير
اللي قال الكمبيوتر انه خربان اللي هو المنظم حق الهواء والحساس اللي جنب الديلكو ويمكن يصلح
أنا ماغيرتهم والحين طالب فزعتكم اذا احد مرت عليه هالمشكله من أول أو يعرف يحلها لايبخل علي
والله يوفقه ان شاء الله دنيا وآخره ومايشوف مكروه لا في عياله ولا سيارته

[ابو عبدالإله]

ماشاء الله تبارك الله المشاهدات 36 ولا واحد رد

تكفون ياالربع ردوا علي تراني طفشت من هالموتر

وعلى فكرة نسيت أقول لكم ان لمبة check engine اشتغلت بعد هالسالفه

[سرا]

اخي الكريم انامعي يوكون 2002 وكان فيه نفس الخلل الي ذكرت وبعداهمال مني خبط القيرووضبته عندترايستاروكلف حدود4000 ريال

[ابو عبدالإله]

للرفع لكي يشوفونه الخبراء ويفيدوني

[بدوي جنوبي]

اولا حياك الله بمنتديات مكشات
وخاصة قسم السيارات


ثانيا
هذا اللى تقصد
http://www.mekshat.com/pix/upload03/images140/mk32037_img.jpg


صرت أول ماأعشق القير يصير فيه نتعه قويه لما تحصل النتعه وقتها ضغط المحرك مرتفع او هادئ ،، يعنى تشغيل طبيعي



وإذا مشيت اول تبديله ينتع بقوه لكن مو على طول بعض المرات
وبعض المرات اذا استمريت بالمشي ينتع الموتر بقوه على ورا كأن شيء يسحبه بقوه هذا عطل يحصل دائما فى القير وهو من احدى الحساسات داخل مخ القير

صوره:
http://www.mekshat.com/pix/upload03/images121/mk32037_dsc06460.jpg


قد يكون احد الحساسات خرب عليك
اثناء شحن او عمل اشتراك للبطاريه

لان الحساسات ،،،،، حساسه جداااا لزيادة الجهد الكهربائى
يعنى لابد ان تشييك على الحساسات وتقريبا عددها 6 حساسات

وان شاء الله القير سليم من الناحيه الميكانيكيه
وللحديث بقيه

ينقل لقسم الاعطال

๑×۩۞۩๑ اذا سيارتك قير اوتوماتيك وصار فيه خلل هذه بعض النصائح๑×۩۞۩๑ ‏ (http://www.mekshat.com/vb/showthread.php?t=221402) ‏

[ابو عبدالإله]

جزاك الله كل خير أخوي بدوي جنوبي بردت على قلبي لأنك بس رديت علي على الأقل ألقى أحد يواسيني ويوجهني حتى لو مافادت الحلول ، الله يعطيك العافيه ويجعله في ميزان حسناتك آمين يارب العالمين





لما تحصل النتعه وقتها ضغط المحرك مرتفع او هادئ ،، يعنى تشغيل طبيعي



ضغط المحرك يكون هادئ مايرتفع




قد يكون احد الحساسات خرب عليك
اثناء شحن او عمل اشتراك للبطاريه


لان الحساسات ،،،،، حساسه جداااا لزيادة الجهد الكهربائى
يعنى لابد ان تشييك على الحساسات وتقريبا عددها 6 حساسات


طيب أخوي كيف طريقة تشييك الحساسات لازم نفتح القير والا كيف ، ودي اعرف علشان لما اروح ميكانيكي مايلعب علي ، وأحب أضيف انو بعد ماصار اللي صار طلع صوت مثل الونه حتى والسيارة واقفه وإذا عشقت أحس ان الونه تزيد وإذا طفيت السيارة برضو اسمع صوت الونه واضح جداً في نهاية انطفاء المحرك مثل الاحتكاك او صوت تنسيم هواء . طبعا انا انخميت وغيرت المنظم اللي انت حطيت صورته وكذلك غيرت حساس الديلكو اللي يكون جنب الديلكو مو داخل والمشكله ماانتهت الان ان شاء الله ابتبع وش تقول لي بالحرف والله يجيب الخير

[بدوي جنوبي]

فيه طريقتين
الاولى بكمبيوتر خاص بالقير
لكن اعتقد مش متأكد انه غير متوفر الا عند الوكيل

الثانيه بطريقه تقليديه
شفتها انا بنفسى عند ورشة
وهى تتغيير الحساس المشكوك فيه بواحد مستعمل متوفر لدى صاحب الورشه
بعد ما يركب المستعمل ،،، يتم تجربة القير اذا مضبوط
يطلب منك جلب واحد جديد
ومو لازم يفك القير بالكامل ،،، يكتفى بفك الكارتير
بيكون المخ واضح امامه وكذلك الحساسات
وبأمكانه تغيير الحساس المطعوب
http://www.mekshat.com/pix/upload03/images121/mk32037_dsc06460.jpg

وبكذا انحلت المشكله بسرعه وبأقل الخسائر

لكن الظاهر ان المشكله تطورت للأسوء
ظهور الصوت هذا غالبا يكون من الطنجره او البطيخه
واسمها العلمى الصحيح (محولة العزم )

الان اتجه لورشة قيرات
لاكثر من ورشه وشوف اغلبهم اين بيحدد العطل

وبعضهم يستغل الوضع ويقولك توضيب كامل
عشان يحصل على اكثر فلوس
واتمنى يكون الخراب بسيط
اذا جت على الطنجره امرها بسيط وما تكلفك كثير
http://www.mekshat.com/pix/upload03/images121/mk32037_mk32037_transmission.jpg
انت افحص السياره وشوف المشكله وين ؟

بالتوفيق

[ابو عبدالإله]

السلام عليكم ورحمة الله وبركاته


اشكرك اخوي بدوي جنوني على تفاعلك معي مما كان له الاثر في تخفيف مصاب هالسيارة عني


وأحب ابشرك ان الامور طيبه وديتها ورشه عندنا في صناعية الأحساء وعطيته السالفه كلها قال لي ابا افحص كمبيوتر قلت له انا فاحص من قبل عند ترايستار وقال لي غير حساس منظم الهواء وحساس الديلكو الخارجي وغيروهم ومافيه فايده قال لي اوكي انا ابفحص ثاني مره كمبيوتر وباذن الله بتنحل مشكلتك خليت الموتر عندهم واتصل علي العصر وقال لي لما فحصنا طلع لنا ان القطع اللي حطيتها شغاله اوكي لكن فيه مشكله ثانيه ، الكمبيوتر مايوصل كهرباء كافيه للقير وشيكنا الحساسات طلعت سليمه قلت له والحل قال لي عندك خيارين الاول وهو مكلف انك تغير كمبيوتر وهذا سعره اربعة الاف ريال قلت له والثاني قال نعمل إعادة برمجه للكمبيوتر Reset وهذا بيكلفك سبعمائة ريال قلت له ماتنزل لنا شوي قال هذي اسعار اللي يبرمجون واذا تبغا تعال خذه واعمل له Reset بنفسك عندهم وبنفس السعر وبعد البرمجه بإذن الله بيضبط موترك لكن مااضمن لك ، واذا ماضبط الله يعينك تنزل القير ونشوف وش المشكله لكن باذن الله بيضبط مع البرمجه قلت له توكل على الله وفعلا عملوا له برمجه ودق علي اليوم قال لي تعال خذ سيارتك المشكله انحلت وبالفعل اخذته والمشكله ماشاء الله تبارك الله ما كأنها كانت والحمدلله وانتهت فصول مأساتي مع الزبالات اقصد السيارات الأمريكية وقررت ابيعه واتخلص منه واخذ لي ياباني نيسان باترول قير عادي وانسى المشاكل واعيد واقول لك جزاك الله خير اخوي بدوي جنوبي وماقصرت وربي مايوريك مكروه لافي حلالك ولا عيالك قل آمين

[نطوان]

بدوي جنوبي افدتنا جزاءك الله كل خير انت والاخ ابو عبدالاله على طرح الموضوع

[بدوي جنوبي]

، المهندس اللي في ترايستار طلع عيار

زيت القير وشمه قال لي هذا ريحته محترق احتمال فيه خراب داخل القير لكن انت روح اول


داسما هذى اساليبهم
يحاول يوهم صاحب السياره بان القير يحتاج توضيب

وتجد المشكله بسيطه

وهذا انت ما شاء الله
حليتها بأقل الخسائر
والاعطال هذى تحصل وتعتبر طبيعيه
والتاهو 99 من افضل السيارات

نصيحه
فى المرات القادمه
لا تترك سيارتك عند صاحب الورشه
حتى لو اضطريت تتركها اجلس عندهم وشوف شغلهم
واذا طفشت ،، او طفشو منك روح وارجعلهم بعد فترة ساعه او اكثر

لان البعض ممكن ياخذ قطع من السياره ،،، كلام اكيد
او يركب قطعه مستعمله ويقول انها جدسده
والامثله كثير

بالتوفيق

[hano129]

ارجوك يا عبد الاله تدلني على هذا الورشة في الاحساء عندي مشكلة في الغير بوكس في الاحساء ولا احد فاهم لها

[مخ سعودي]

شيك على حساس الكرنك وهذه بعض اعراضه