الله لايهينكم آستفسار شاص 2010

[دار الكرم]

السلام عليكم ورحمة الله وبركاته ..


مساء الخير ..


بفضل الله خذيت لي شاص 2010 سعودي ..


لكن أحس لمن مشيت به أحس الدراكسون به لفه يعني لمن لفــيته يسار شوي أحس آنه يمشي مستقيم مادري أنا أوسوس:( وإلا هو كذا .؟!


على الرغم أني لاصرت واقف وخليت الدراكسون مستقيم مالفيته لايمين ولايسار وشفت الكفر يكون الكفر مضبوط مستقيم بس لامشيت أحس


بالمشكلة ..؟!



ياليت يابعد حيي لوتفيدونن ..

أيضاً لمن مشيت فوق التسعين تقريباً أحس بصوت دخول الهواء ومادري وين مصدر الصوت هل هذه المشكلة موجودة بكل الشيصان أولا وهل أحد عانى منه قبل وماهو الحل له ..؟



الحين الكفرات اللي على الموتر كفرات الوكالة ودي أغيرهن وحط كفرات أخف مطب وأريح شوي وش رايكم وين الأفضل ..؟!


والشكر موصول للجميع :)

[fj44]

ابي اتاكد انت شاااري
شاص ولا كامري ؟؟؟

[لن أمل من العطاء]

يا عزيزي

اللي اعرفه ومتأكد منه
في عالم صناعة السيارات
هناك ثوابت ومعايير يجب ان تلتزم بها كل الشركات المصنعه
ومنها انك في حالة تركت الدركسون تجد السيارة تتجه لجهة اليمين يعني تخرج عن الطريق
وفي نفس الوقت يكون الكفر موزون 100% ولا هناك مسح بالكفرات
لماذا
لاجل السائق اذا نام ما يروح للمسار الاخر وانما يروح لخارج الطريق

ايضا عندما تطبق مراية اية سيارة فمن المستحيل تجد المراية خارجه عن جسم السيارة والا اش الفايدة من التطبيق


ايضا لمبة الاشارة الصغيرة سواء بالرفرف او بالاصطب الجانبي مستحيل تخلوا منها اي سيارة
ولكن ليست العبره ي اللمبة هذه الصغيره وانما في ان صاحب السيارة لو أشر يسار باللمبة فكل من حولة من اي مكان يجب ان يشوف لمبة تاشر

ايضا تانكي البنزين ففي ظروف قياس معينه لدى المصنع يجب ان ان لا يقل المسافة التي يقطعها التانكي بالكامل عن مسافة محدده معترف بها ومحدده عالميا لكني لا اعرف بالضبط كم هي

واشياء اخرى كثيره

ادري طولتها لكن سامحوني

[دار الكرم]

ابي اتاكد انت شاااري
شاص ولا كامري ؟؟؟
لا شاص يابعد حيي ..

[دار الكرم]

في عالم صناعة السيارات
هناك ثوابت ومعايير يجب ان تلتزم بها كل الشركات المصنعه
ومنها انك في حالة تركت الدركسون تجد السيارة تتجه لجهة اليمين يعني تخرج عن الطريق

أنا أختلف معك بالنقطة ..
ودليلي ..

أنت شفت مقطع الولد اللي راكب جيب لكزس ويمشي فوق الميه وتارك الدراكسون حتى آنه راكب وراىآ ومع كذا الموتر يمشي مستقيم ..

وأنت جربه بنفسك خلك بطريق مستقيم وخل الدراكسون مستقيم وشف كيف يمشي الموتر << أهم شيء يكون الطريق فاضي لآجل سلآمتك يالغالي ..



ادري طولتها لكن سامحوني


لآ يابعد حيي لاتقول هالكلام منك نستفيد ..

[دار الكرم]

سبحان الله وبحمده ..

[كشات 1985]

اخوي الغالي الله يبارك في موترك حط الهواء قدام 40 وجرب

ويمكن عادي يحتاج وزن اذرعه اذا جايه رصيف او نط حبوس

[شاص&نص]

السلام عليكم ورحمة الله وبركاته ..


و عليكم السلام و رحمة الله وبركاته

مساء الخير ..


بفضل الله خذيت لي شاص 2010 سعودي ..

الله يطعمك من خيره و يكفيك شره و يجعله مركوب العافية و أدون ما تركب

لكن أحس لمن مشيت به أحس الدراكسون به لفه يعني لمن لفــيته يسار شوي أحس آنه يمشي مستقيم مادري أنا أوسوس:( وإلا هو كذا .؟!
على الرغم أني لاصرت واقف وخليت الدراكسون مستقيم مالفيته لايمين ولايسار وشفت الكفر يكون الكفر مضبوط مستقيم بس لامشيت أحس


بالمشكلة ..؟!

أبد هو كذا و موجوده في ال 2006 و ال 2010



ياليت يابعد حيي لوتفيدونن ..

أيضاً لمن مشيت فوق التسعين تقريباً أحس بصوت دخول الهواء ومادري وين مصدر الصوت هل هذه المشكلة موجودة بكل الشيصان أولا وهل أحد عانى منه قبل وماهو الحل له ..؟

هذي موجودة بكل الشيصان و السبب تصمي الغمارة الحاد و مع الزمن بتتعود عليه


الحين الكفرات اللي على الموتر كفرات الوكالة ودي أغيرهن وحط كفرات أخف مطب وأريح شوي وش رايكم وين الأفضل ..؟!

هذي ما أدري عنها و لكن الأخوان فيهم الخير و البركة


والشكر موصول للجميع :)

[دار الكرم]

ماقصرتوآ على المرور ربي يجزاكم آلف خير :)

[الدبل الثقيل]

وعليكم السلام ورحمة الله وبركاته....الله يبارك لك فيه
صوت الهواء أتوقع طبيعي
وكفرات بلده اذا هي رمليه خلها تراها طيبة لكن خليك حذر في المطر او الاسفلت الاملس
واذا هي كفرات مقاس 750 الحجرية ركب بالون 900 وأيضا خلك حذر ولاتسرع وانت مركب بالون الله يحفظك ... وفي الصيف رد كفرات شد البلد
ولي سؤال وش انطباعك عن السيارة مقارنه بالموديلات السابقة خصوصا من ناحية المكينه ؟
وجزاك الله خير ..

[fj44]

اخوي مالي كلام بعد
اخي شاص ونص
رده واااافي

[دار الكرم]

الدبل الثقيل ..

الله يجزاك خير ..

والموتر ماجربت به وأختبرت مكينة أختبار قوي لكن ان شاء الله أن المكينة الجديدة تليق بسمعة الشاص ..
Fj44
مشكور على المرور ..

[سوبر VTC]

عليكم السلام

الله يطعمك من خيره و يكفيك شره
كل الجيوب الحوض و الربع
يوجد تنسيم هواء من عند مقدمة الباب من الاعلى
في الزاوية العليا
الحل تحط ربل اسفنج لين من عند الزينات على الباب
و ان شاء الله يخف الصوت
موفق

[دار الكرم]

^^
يعافيك ربي يالذيب ..

على الرد والحل ..

[راعي الفتك 9]

وش فيها لازم تكون الطاره عدال

[دار الكرم]

أبد هو كذا و موجوده في ال 2006 و ال 2010

هذا كلام أخوي شاص ونص ..

[بخيت الدوسري]

بالنسبه للفة الدركسون يمين أو يسار هذا غالبية سيارات تويوتا يجي فيها هالخلل على كلام المهندس اللي بالوكاله يقول حلها بسيط رح لأقرب محل وزن وأوزن عندهم وبعدها ماراح ترجع لك والله يعطيك من خير هالموتر ويكفيك شره

[دار الكرم]

مشكور يابخيت ..

[قطب 999]

الكفرات شد بلد احسن لها خاصه الرمليه خلها على 40
الهوا شفت بض الشيصان تعبثو بالمفصلات حقت الباب راح التنسيم بس الباب لازم تشده بقوهحتى تصكه
وعلى البركه

[دار الكرم]

قطب ..

الله يعافيك على الرد ..

وانا خايف أني أعبث بالمفصلات حقت الباب وبعدين تطلع لي عله ثاني ..

[Riyadh City]

بالنسبة للحذفه
طال عمرك أنا خذيت اكورد 2008 وكالة وفيها هالحذفه وقالولي بأن كل الهوندا الجديد كذا

مدري يمكن كلام مشرفنا صحيح

مبروك الموتر يعطيك خيره

[ن م ر]

بالنسبة للحذفة يسار أو يمين راجع الوكيل ويصلحونه على الضمان
ضمانها يصل إلى 3 شهور أو مسافة معينه ( طبعاً الكلام عن الوزنيات مو الضمان العام )
بالنسبة للكفرات ما فيه أفضل من كفرات الوكالة لجيوب تويوتا

أما التنسيم والهواء مع الابواب مثل ما قالوا الاخوان الشاص مهوب معزول عزل تام وموتر تصميمه غير انسيابي فلا تستغرب التنسيم

[دار الكرم]

مشكورين يابعد حيي على الردود ..

[أسد الهيجا]

مافيه إلا كل خير وأنا أخوك

أنا معي 2007 ونفس ميلة الدركسون عندي بس لاتهتم فيها لأنها ماتأثر بشي

قد تكون بسبب ان الشركه يوم صنعت الدركسون ربطت مساميره من جوه بقوه عالاخر عشان كذا صار فيه ميله بسيطه

والله اعلم

[لن أمل من العطاء]

انا مازلت مصمم على كلامي بالاعلى


واحب اضيف ان الطريق وطريقة رصفه عند انشائه ودرجة ميوله له دور

حيث تلاحظون بعض الاحيان السيارة فيها حذفه ولمن تنتقل في طريق اخر يتغير اتجاه الحذفه او يختفه
وايضا الهواء له دور (الرياح)
وبعض الاحيان تجلس ماسك الدركسون على جنب من قوة الحذفه وهو ببب قوة الهواء

[السد الغزير]

النقطة اللي كنت أبي آصل لها باضبط . كلها شرحها الغالي ( لن أمل العطاء ) .

ترى لو تدقق رح مع طريق وطريق ثاني . وفي إتجاه وإتجاه ثاني .بتغير عليك الحذفة من اليمين إلى اليسار

أنا متأكد أن موترك مافيه شي وأنت تقول شاص وجديد يعني أستبعد أن يكون يبي له وزن أذرعة لأنه جديد وأذرعة الشاص قوية ومتينة وجبارة .

وعلى فكرة ترى أدنى هواء من يمينك ولا يسارك يحذف الموتر ميلان بسيط .

تأكد من مقاس هواء الكفر , وإذا كل الكلام مانفع . ولازلت منزعج . بدل الكفر الايمن مكان الايسر الامامي للتجربة . وإذا صارت الحذفة في الاتجاه الثاني . فهو 100%من نوعية الكفر . وليس المقصود أنه نوعية رديئة ... لا . خله معك إذا أنتهى عمره الافتراضي غيره بالون .


ولايهونون الباقين . أبيك تدقق في كلام لن أمل العطاء

[لن أمل من العطاء]

النقطة اللي كنت أبي آصل لها باضبط . كلها شرحها الغالي ( لن أمل العطاء ) .

ترى لو تدقق رح مع طريق وطريق ثاني . وفي إتجاه وإتجاه ثاني .بتغير عليك الحذفة من اليمين إلى اليسار

أنا متأكد أن موترك مافيه شي وأنت تقول شاص وجديد يعني أستبعد أن يكون يبي له وزن أذرعة لأنه جديد وأذرعة الشاص قوية ومتينة وجبارة .

وعلى فكرة ترى أدنى هواء من يمينك ولا يسارك يحذف الموتر ميلان بسيط .

تأكد من مقاس هواء الكفر , وإذا كل الكلام مانفع . ولازلت منزعج . بدل الكفر الايمن مكان الايسر الامامي للتجربة . وإذا صارت الحذفة في الاتجاه الثاني . فهو 100%من نوعية الكفر . وليس المقصود أنه نوعية رديئة ... لا . خله معك إذا أنتهى عمره الافتراضي غيره بالون .


ولايهونون الباقين . أبيك تدقق في كلام لن أمل العطاء


شكرا لك اخي السد الغزير على التعليق

[دار الكرم]

الله يعافيك وبيض الله وجيهكم ..

بس أنا قصدي ..

أن الدراكسون نفسه به ميله يعني ألفه شوي يسار وأشوف الكفرات أثاريهن تمام مستقيمه ..

عاد واحد من جيراننآ مع 2006 يوم شفته أثاري مثلي الداركسون به ميله ..

أثاري مثل ماذكروآ الأخوان من وكالة شكلة كذا وان شاء الله مايضر الموتر ..