طلبااااااااااات بسيطه لا هنتوااااا

[صالح بن محمد]

السلام عليكم
مساء / صباح .. الله بالخير

انا جديد للمنتدى ولاكن دايم ادخله
لاكن توي افكر اسجل لاني تحمست


ودي بطلبات شوي اذا ما عليكم كلافه...

1- أبي أشتري عزبة طبخ .
2- الاشياء المهمه فيها.
3- ابي قدر ظاغط يكفي من 5-8 أشخاص بس مايكون غالي
4- ابي اشتري فراش نفر ونص وين احصل النوع الزين وسعره معقول .
5- رواق طول 8 متر ارتفاع 120 سم .النوعيه الزينه


وفي الختم أدعوا الله اني ما طولت عليكم
والله الله بالاجوبه لا هنتوا :D

[الفتله]

وعليكم السلام

اخوي صالح كل الي طلبته اشياء تجدها في محلات الكشتات البريه

والتي اظنها لاتخفى عليك

كل ماذكرته واكثر تجده في محل واحد

وساذكر لك بعض المحلات التي تحظرني الان

برق الحيا : مخرج 15 اتجاه الشرق بعد الاشاره الاولى تجده على اليسار

البريه:

السنيدي:

[صالح بن محمد]

لا هنت يا الفتله بس ابي الاشياء الزينه واسعارهن معقوله

[عزبة بر]

هلا اخوي
الله يحييك بيننا
:)
::
بالنسبة لعزبة الطبخ
خذ لك الحجم المناسب
اشتر العزبة من السنيدي
او اذا كنت تبغى ارخص منهم
سوق الخيام في الغرابي
::
واهم شي الدبة الزينة
خذ لك بريموس سويدي اذا كان يتوفر
وبريموس الهندي لا بأس به وهو جيد
::
بالنسبة لقدر الضغط والله
اشوف الاخوان يمدحون ستب الاسباني >> كذا اسمه على ما اظن
وانا استخدم حق السيف والى الان مضبوط معي ولله الحمد
::
فراش قصدك سليب باق
انا كان قصدك كذا
فهي كثيرة جدا وانواعها مختلفة
لكن كان بتروح لسوق الخيام اللي في الغرابي
فهي ارخص بكثير بكثير
واذا بغيت يفصلون لك علت مزاجك
::
بالنسبة للرواق
انا عندي واحد طوله 120 سم وعرضه 6 م
حق السنيدي
الى الان ما شي معي حلاوهـ
::
اتمنى اني افدتك
:)

[برق الشتاء]

هذي القرنبع حقتي انقل منها
القدر السيف 11 لتر
وحط بالك براد الشاهي الهندي التوت وليس الاصفر
والدلة البغدادية والا الرسلان
هذي القرنبع حقتي وانت ابخص وموفق خير
http://www.mekshat.com/pix/upload02/images100/mk137237_a1a.jpg

[ابوراس الدحمي]

ما نزود على كلام الاخوان اللي فيه الخير البركة ...

ولاتنسى تانكي الماء وتجهيزات الكهرب

تحياتي

[الشرطه]

بالنسبه للقدر
جربت حق السيف الصيني و SEB الفرنسي
طبعآ الفرنسي سعره غويلي شوي بس طعم الأكل تحس أنه ألذ أو كما يبدو لي ;)
لا تاخذ الألمنيوم (أخذ الستانليس ستيل) يجي مكتوب على الكرتون


والعزبه تقدر تشتري الجنطه وتاخذ اللي ترغبه قطعه قطعه من أباريق وطوس واللي ودك...


وبالتوفيق للجميع.

[maxim]

نصيحه لوجه الله
لا تقعد تشيل عزب واغراض وفي الاخير ماتحتاجها
اجمع الاشياء الضرورية اللي تحتاجها وعندك المنتدى مليان بالمقارنات بين الجيد و غيره ... وما يعجبني ممكن ما يعجبك

مثال على عزبة شاي
براد شاي وحافظة 1لتر للسكر و500 ملل للشاي
فواحة قهوة..... دلة .... حافظة 750 ملل للبن و 150 ملل للهيل ولا تنسى البيز

عزبه طبخ... اصغر عزبة وتزد عليها اللي تبي
قدر كاتم (تقدر تستعمل الكاتم كقدر عادي بدون الغطاء فماله داعي زود عفش)
صينية تقطيع
سكين خضرة ولحم
ملعة وسط للتحريك وللغرف
صحن للغرف و صحون للايدام
شبك وماعون بلاستيك للغسيل والرز وخلافه

بالنسبة للغاز فللشاي تقدر تاخذ دافور وفيه اشكال والوان لكن حاول يكون صغير وحجمه ذف وماياخذ حيز بالعزبة
غاز نص رصل (250 غرام) او رطل بالكثير (450 غرام) اما دبة استعمال واحد او تاخذ دبة زرقاء

وللطبخ فممكن الدافور السابق يؤدي المهمة اذا كان قوته تتحمل او انك تشري دافور ثاني او حتى تولف قاعده لنفس الدافور وتستخدمه للشاي والطبخ
واذا كان فيه طبخ دايم فخذ دبة واحدة للطبخ والشاي وحاول انها ماتزيد عن خمسة رطل لانها بنظري اكثر من كافية للكشتة يومين


ودور بالمنتدى وشوف مقارنات وخبرات الاخوان من قبلك

[سعيد حظ]

حبيبي مسيك بالخير
بالنسبة للعزبة أنت من يحدد محتوياتها حسب استخدامك لها ومتطلباتك وهناك اغراض اساسية مثل :
قدر الضغط وقدر صغير وملاس كبير وملعقة وسكاكين وابريق كبير للتفويح ..... إلخ
وعندي لك نصيحة فيه محل اسمه ( السعر الاخير )عنده تخفيض على بعض لوازم الرحلات
مثل شنطة العزبة اكبر حجم عنده سعرها 53 مثلها عند السنيدي ب85 وعنده رواق 8م ×120سم ب54
وغيرها من الاغراض مر عليهم وخذ ما تريد
آآآآآآآآسف على الإطالة

[عاشق القمرة]

السلام عليكم ورحمة الله وبركاته

أخي الكريم ، بداية حياك الله وياهلا والله وسهلا بك بين أخوانك في متندى مكشات . وأتمنى لك الإفادة النافعة إن شاء الله .

عزيزي تحديد الأغراض والأدوات المراد إستخدامها في الرحلة أمر ضروري ومهم ولكي لا أطيل عليك . أتركك مع موضوع بل بالنسبة لي أنا شخصيا أعتبره مرجع هام لكل رجل مكشاتي يريد معرفة ماله وماعليه من أدوات العزبة ، على الأقل تحديد الضروريات والأساسيات

موضوع مشرفنا القدير وأستاذنا الحبيب / فيصل المنصور

تفضل
http://www.mekshat.com/vb/showthread.php?t=169478

وتقبل مني فائق إحترامي وتقديري

[احساس الصمت]

حبيبي مسيك بالخير

بالنسبة للعزبة أنت من يحدد محتوياتها حسب استخدامك لها ومتطلباتك وهناك اغراض اساسية مثل :
قدر الضغط وقدر صغير وملاس كبير وملعقة وسكاكين وابريق كبير للتفويح ..... إلخ
وعندي لك نصيحة فيه محل اسمه ( السعر الاخير )عنده تخفيض على بعض لوازم الرحلات
مثل شنطة العزبة اكبر حجم عنده سعرها 53 مثلها عند السنيدي ب85 وعنده رواق 8م ×120سم ب54
وغيرها من الاغراض مر عليهم وخذ ما تريد

آآآآآآآآسف على الإطالة



الله يعطيك العافيه على هاالتنويه للأخوان
وحبيت أفيدك عن دبات الغاز(ذات الإستخدام الواحد) مقاس(450غرام) سعرها عنده بـــ(10)ريال وعند غيره بــــ(12)ريال

مشكور مرةً أخرى ياالغالي

[الهماسي]

:f بصراحه اخوي تقدر تسوي عزبه بأقل الاثمان دافور من الحراج بسعر زين خمسين وفيها الباقي خذلك بطانيه غاطين 8 كيلو وعليك بسوق الخيام في الغرابي وفصلها فراش تنزاني بسعر 130 تقريبا مع الكيس الخارجي 20 ريال وصندوق العزبه حسب الحجم الي تبي وبسعر طيب ومر خذلك قدر ضغط السيف والباقي الله يسلم مطبخ البيت واذا نقص شي السوق موجود واتمنا لك تجدها باقل الاسعار

[m1m]

أولا بعطيك نصحة مبدأية ..

وهي أنك تخلي عزبة للشاهي والقهوة .. وعزبة للطبخ ..

الشاهي والقهوة تخليها مستمرة في السيارة والطبخ تنزلها ..

الشاهي والقهوة تكون صغيرة ومختصرة .. عين صغيرة ( كوفيا ) أو دوافير صغار ) ومعاميل الشاهي والقهوة .

النوعيات أحرص على الجيد وما فوق .. لا تاخذ اللي تجي جاهزة.. لأن كلها رديئة ..