( .. دعـوهـ لنقاش الهادف والجاد .. )

[راعي فجر]

السلام عليكم ورحمة الله وبركاته


كيف حالكم انشاء الله بحسن حال .. !


حاب اتناقش معاكم بموضوع مر علي بمجالس الشيبان الكبار اصحاب السلق


وكان النقاش ساخن وبصراحه اعجبني وحبيت انقله لكم هنا


الموضوع كان يدور حول افعال السلق ومواصفاتها وبعضها وصفه يهول


بس الفعل (خرطي) والعكس ومن المواقف الي ذكرها احد الشيبان


يقول كنت طالع انا ومجموعه معي كلنا اصحاب سلق واردا سلوقي معنا طارح خمس ارانب نهار


يعني سلق فاعله


يقول ومره طالعين ولقينا ابا الحصين حزة العصر وشافته السلق وهديناهن عليه


يقول الرجل الكبير والله ثم والله يا السلق مابهن الي عطا الحصني مرد واحد نهائي لين خلاهن.!!!



والقصه الاخرى عن اشكال السلق والوصف


يقول كنا طالعين مقناص ارنب ومعنا سلق طيبه واحد من اخوياهم جايب سلوقي شكله يضحك


ضعيف ومواريه معدومه ولا ياخذ من ورا اصبعين من شدة ماهو عديم الوصف



يقول الرجال نقص قص ارنب والسلق معنا ويوم نفجناها لسلق والله ثم والله


ماخذنا الا وابو اصبعين يردد بالارنب قبل السلق كلها ومرهن وكنهن واقفات..!!


هذي المواضيع الي سمعتها وكنت جالس بالمجلس الي انحكت فيه


واتمنى من الاخوان المشاركه بفوائدهم والي ماعنده اي خبره يكتفي بالاستفاده والمشاهده


لكي لا تمتلئ الصفحه ردود خارجه عن الموضوع


بارك الله فيكم


وعطونا ما لديكم

[مدهـوش]

قد قيل المجالس مدارس

نعم .... فالشيبان الاولين حينما يسردو عليك قصصهم وخبرتهم تجد الفائده الداله على كل ماهو مطلوب

فالكثير يهتم بالشكل ولا يجد فعل

فالخبيرين من المقانيص الاوله قد فهمو وعرفوا مالم نعرفه في وقتنا ونجهل بعض الامور في السلق وغيرها

ولك الشكر على هذا الموضوع الرائع والقدير وان شاء الله نجد ردود الاخوان

[صقار الوحش]

صدقت الشكل ماهو دليل علا القوة والفعل
شكرا لك يا راعي فجر على السوالف

[العسكري]

أخواني ... السلام عليكم ورحمة الله وبركاته.. على طاري موضوع السلق مره من المرات بغيت المقناص ولكن ما عندي سلق قلت يا ولد أمر على النعيريه وانشد عن القناصة اللي في النعريه لعلي القى عندهم سلق دخلت النعيريه وأدور وأنشد وفجـأه أشوف لي سلوقي أبيض عادي لا يحمل من الصفات الا اسمه قاطع الشارع يركض ناصي له بيت شعبي قديم جدا وقدام البيت فيه خيام قديمه مرميه جنب جدار الحوش من بره ويجي السلوقي ويطمرعلى الخيام ويربض فوقها وأنا اللى أحول من الجيب وأطق الباب على راعي البيت ويطلع لي رجال محترم وسلمت عليه قال لي : يا ولد أقلط قلت له : الله يكثر خيرك قلت له : العلم لك خير أنا رجال راعي مقانيص وأدور لي سلوقي والا سلقه وشفت السلوقي الابيض اللى رابض على الخيام ووقلت أكيد أنه لكم وانا أبغاه بشيمه ورد علي : يا ولد السلوقي يفداك وهذا السلوقي ما نبغاه ازعجنا الله يقطعه ما غير يجمع الجعرعند بيتى وما تسمع في الليل الا هرش وهريش ما خلتتنا ها الجعر نرقد الا خذه وفكنا منه وتراه له شهور وهوعندنا لا قناصنا به ولا ندري عن فعله ولكنا عيال جيراننا ياخذونه يطردون به الجراببع. الحقيقه أني أستحيت أنشده عن تفاصيل أخرى عن السلوقي وقلت الحمدلله رزقنا الله بسلوقي مشعاب ليل والباقي على الله .المهم يا أحبابي اتصلت على واحد من ربعنا رجال كبير في السن مخضرم في الاحساء أسلم عليه وأطمئن عليه وقلت خلينى أنشده عن الصيد خارج الاحساء ورد علي وقال لي : أبشر لك بجرة أرنب قريبه غرب عن سكة القطار وقال لي في سياق كلامه : عسى معك سلوقي والا سلقه تلحق ترا ألارنب مهوب لاحقها الا السلوقي الراهي السبوق رديت عليه قلت خير أن شاء الله . ثاني يوم الصبح بدري توكلت على الله الى الاحساء وانا في طريقي من النعريه للاحساء شفت سياره متعطله جنب الخط وراعيها واقف عندها يأشر رجال كبير في السن بدوي لحييته بيضاء وكله وقار وانزل من السياره وأسلم على الشايب وينشدنى وانشده واصلح له السياره المهم يا أخوان المفاجئه أن السلوقي نزل من سيارتي يقلقص يلعب عند رجلي وعند رجلين الشايب وبدون مقدمات يا أخواني الشايب قعد يطالع في السلوقي وعلى طول من غير ما أسأله "والله هذا اللي حصل " قال لي : السلوقي سبوق ولحوق هذه الكلمات اللي قالها فقط ولم أعلق على ما قال , بعدها لزم على بالغداء تعذرت له بأننى معزوم في الاحساء. معلومه (الشايب البدوي الكريم من قبيلة المره) . في تلك اللحظات التى أعقبت كلام الشايب فرحت لأنه أعطاني أمل في السلوقي بأنه سبوق خاصة أن الشايب من قبيلة المره وهم أهل فراسه ومعرفه بالأبل والخيل والطيور والسلق الطيبه . المشكله يا أخوان أنا قانص للأحساء والشايب اللي في الاحساء بيطلعني للأرنب اللي غرب سكة الحديد وهو اللي بيقوم يقص الجره وهو قصاص ماهر وأنا خايف أن الشايب ينفج ألأرنب ويشوفها السلوقي ويهد عليها ويطردها رد والا ردين ثم تروح على السلوقي ثم بعدها الفشيله مع الشايب لأن جهوده وتعبه في قص جرة ألارنب بتروح بلاش والشايب بيقعد يعلق علي وهوعادعيار وبيقولي هذا سلوقي ؟ هذا جعري وبيعكر المزاج . مختصرا كلامي وصلت الاحساء وبعد صلاةالعصر حضرنا أنا والشايب غرب سكة الحديد في منطقة العمليات وننزل من السياره وقال لي: يا ولدي ما فيه وقت يا الله ... عموما وصف لمنطقة المقناص القاع غرب سكة الحديد قاع سهل تقول كف فيه قشع متفرق وشمال القاع زباير وجنوب القاع جبال تروع مساحة القاع السهل زينه وحلوه لطرد السلق. بدأنا بالقص الشايب متحمس وأنا قلق وشعوري ممزوج بالفرح والخوف خايف لا يفشلني السلوقي , اكثر من ساعة وحنا ندور وبدأ الشايب يحمق وينفعل وبدأ يسب بعفويه ويقول وينها الملعونه ..لا يا الكلبه.. نعل أبوها شرمه . قلت الله يستر كيف لو ننفجها وتروح على السلوقي لا والله رحنا فيها أنا والسلوقي بيقعد الشايب يسبنا لبكره اللهم أستر. المهم يا أحبابي الشايب قص جرتها في الزباير والزباير صعب طردها للسلوقي الا أذا شافها السلوقي من قريب جدا وملكها وردها للقاع السهل غصب عن الأرنب . حنا ألان في الزباير نقص ما دريت الا الشايب يناديني بصوت خافت : قرب السلوقي الأرنب حولنا ما قال كلمته هذه الا بطمرة الأرنب قدمنا هاجه لا حولها لا سلوقي ولا لوقي وأراد الله أن الشايب يحذفها بالعصا وتضرب العصا قدام الارنب وتكع الارنب وتغير اتجهها اللي تبغاه وسبحان الله واتجهت مباشرة بأتجاه السلوقي وهي ترقى من زباره في زباره ما درا السلوقي الا الارنب نازله عليه من الزباره وجها لوجه وهي تروغ عنه وهويستلمها من قريب ويغزها من زبارها في زباره قلنا ها لحين بضيعها ولكن عندما شعرت الأرنب ان السلوقي ضايقها عودت على القاع تبغى الفكة والله يا إخواني عندما طلعت على القاع السهل حطت أذانيها على رقبتها وظهرها تبغى المزبن "الجبل" وهي تروح مثل الكوره ولسان حالها يقول " أن كان فيك خير يا السلوقي يا ولد السلوقي الحقني" في تلك اللحظات الارض زينه للسلوقي وفرصه للسلوقي السبوق الراهي وكانت المفاجئه التي كنت انتظرها السلوقي يركض بكل ثقه وقوه واندفاع يردها غصب الرد على الرد وهي تبغى" الجبل" جنوب القاع ويردها السلوقي عن "الجبل" غصب وهي ترجع مره ثانيه مشمله راجعه للشمال تبغى الزبايرالمزبن الاخير, طبعا أحبابي أنا والشايب واقفين فوق الزباير على طرف القاع من الجهة الجنوبية نشاهد المطاردة القوية وسرعة الارنب والسلوقي الذي لم يعطي الارنب فرصه الارنب عند خشمه وأنا اصيح "أنهم" على السلوقي يح ..يح ..يح وأنا من الفرح والسرور ودي أعدي وأركض مع السلوقي يوم اقبلت الارنب على الزباير بأمتار بسيطه ويلقطها السلوقي وما تشوف الا الغبره, والله يوم طرحها السلوقي والشايب يركض للسلوقي ويأخذ الارنب من السلوقي ويجلس يحب السلوقي ويحب الارنب وهو في قمة السعاده وأنا مسرور جدا وقمت وصلحت للشايب القهوه والشاهي وقلت الحمدلله سلمنا الله أنا وسلوقيي من سب وشتم الشايب وتعليقاته. أتمنى ان تعجبكم هذه القصه وقد أختصرتها بقدر المستطاع والهدف مشاركتى للحبيب راعي فجر.بارك الله فيكم.

[احمد العبيوي]

والله وانـا اخوك انـا بعد حصلي موقف مثل اخوي العسكـري بس موب مع السلق وانـأ
حبيت اشـارك في هالموضوع لدلاله ع انه مو لازم يكون معروف انـأ كـان عندي شيهانه بحريه
ومسميهـا عزبه لاني دايم مـأ احذفهـا مع العزبه ورا المهم والربع اللي اطلع معهم اهل حر
المهم هذـااك اليوم لقينـا جراة حبـاره جديده المهم فرعنـا طير معنـا وكـان اسمه منصور المهم واحنـا ندور
واله الطير شـافهـا المهم
هد الطير عليها وراعي الطير كـان كله يتعيل ع عزبه الشيهانه مالتي انـا ماخذهـا ونسه المهم قـالي بالجهاز
اردف قلت لا يـاولد جلس يضحك بالجهاز ويقول للابع قايلكم حمامه ماهيب شيهانه انـا ارتفع ضغطي
وقلت في نفسي دام اللي هاد خويي خلني اردف ما فيها عيب خويي وسمحلي اردف قمت وخميتها هي ماتدري
وين انا ناويهلها بس الحمد لله اني كنت معودها ع ملوح حباره المهم اني يوم فرعتها راحت اردفت والطير ما ردلها والربع يضحكون يقولون يشوف بنته معه المهم يوم ارتفعت للسماء ويوم ارتفعت وجات الحبـاره تحتهاا يوم سكرت وانزلت ع الحبـاره واهي معـاهـا المهم راعــي منصور معـاد يكلمني على فعل الشيهانه لانه اشهده
وبعت الشيهانه وثنيتها ع حبـاره

نرد لموضوعنـا
مو مهم السلاله ع ما ضن وحسب النـاس الي تقول انه اهم شي بالسلق او جميع حيوانات الصيد اعزكم الله
التدريب الصحيييح من ايـام الصغر مثل
مايقال التدريب بالصغر مثل النحت ع الحجر

وتقبل مروري ع الموضوع

[راعي فجر]

بارك الله فيكم جميعاً وشاكر لكم القصص الرائعه والي استمتعت بقرائتها معاكم

وبيض الله وجيهكم والقصد المتعه بالمطراد والصيد وفلة الحجاج

واتمنى مشاركة الخبراء اصحاب السلق وادلاء دلوهم معنا!!

شكراً لكم

[ذيب العلايق]

اخي العزيز السلق اما ان يكون فعل ووصف معن اي ان فعلها ينومس وشكلهاحايز على مواصفات الجمال وهي المرغوبه واللي يتعب عليها الواحد واما فعل فقط والشكل ردي واما الوصف زين والفعل ماعندك احد (ومواصفات الجمال عند العرب تقريبن وحده سوا في الخيل او الابل او السلق او حتى في النساء ايضا)

[راعي فجر]

حياك اخوي ذيب العلاايق وشاكر مداخلتك الطيبه يابعدي


وين الاخوه الباقين ولا اصحاب اقتناء فقط..!!

[راعي فجر]

العذر عن انقطااعي لسبب الاشغال

وأين باقي الاخووه اصحاب المواقف والولع..!!

[راعي حمور]

السلام عليكم اذكري لي قصه لها شهرين


يالربع جاني سلوقي من رجال يقول لقيته ويقول ماله فعل هديته ماطرد هديت على الجربوع ماجاه

قلت خير إنشاءالله وانا عندي سلوقي عربي متدرب جيداً قلة خلني بشوف فعله

واالله يالربع يوم شفت فعل السلوقي انهبلت ماشاءالله

السلوقي ماله سد وقصير مره

ماخلى ارنب الى ماطرحه ولله الحمد وهو الحين من اطيب سلقي


والله يبارك لي فيه إنشاءالله

[ابو رهف 222]

مشكورين يا الخوان بارك الله لكم والله قصص ممتعة

[a1Ruwais]

يعطيك الف عافية