يالربع الفزعه طيري مدري وش فيه

[suspict]

السلام عليكم

انا شريت وكريه ولا هي وحش ويقول راعي لها اسبوعين ونص طالع من الربطه

بس اللي انا مستغربه اذا فرعت عنها البرقع وجيت اداهلها تقوم تعض وحتى من ورى البرقع

ثاني شئ اذا ربطته بسبب ووريته الحمام يطير ويوقع بعيد عنها وش العلم يالربع

مع العلم انها العام صايده كراوين وارانب .. وكلام راعيها ثقه ..:(

[راعي البرقه]

لاتقصر عنها

وحاول تنقلها بكثره وتعلفها وهي بدس

واذا بتدعيها ادعها من مسافه قريبه

وشكرا

[suspict]

بيض الله وجهك وماقصرت ..

انا اسوي هالطريقه الحين ..
بس مشكلة العضه وش فيها تعض لانها تبي علف ولا ايش حتى لو علفتا تسوي كذا :(

[مدورالحباري]

السلام عليكم من جهة العض مو من العلف نقص اوزود ذي طبيعه في بعض الطيور وكثر من نقلتها في مجلس فيه حركة ناس علشان يطيح من اللي في راسها وشنذرها وان شاء اللة تعجبك تقبل تحياتي

[راعي البرقه]

حاول تعلفها وهي على الدس

وتقطع معها وتنتف الريش علشان تحس انك قاعد تعاونها وماتعضك

[راعي الخريب]

بيض الله وجهك وماقصرت ..

انا اسوي هالطريقه الحين ..
بس مشكلة العضه وش فيها تعض لانها تبي علف ولا ايش حتى لو علفتا تسوي كذا :(
كلام اخوي راعي البرقه صحيح كثر من نقال الطيرر دوم واقصر العلف عنه اشوي بس لاتنقضه واجد وكثر من المساح عليه وان شالله بتروح هالعادة

[suspict]

بيض الله وجيهكم يالربع .. طيب الشنذرهـ لازم ؟؟

[راعي البرقه]

انا من وجهة نظري مايحتاج انك شنذره

سوا اللي قلناه لك وهم شئ لاتقصر عنه العلف وخصوصا في هذي الفتره

سؤال كم عمر الطير اذا تكرمت

[suspict]

والله وانا اخوك ما ابخص بالعمر واحد قالي قرناس رابع وانا ماعلم ..

هذي صورته وانا اخوك قلي وش قرناسه ترى والله انا توني جديد فيهن

http://up.arb-up.com/i/00073/rfrd6ajhvrrj.gif

[راعي البرقه]

مشاءالله تبارك الرحمن

الطير اذا ماخاب ظني ثنو داش برابع

تاكل من صيده

مثل ماعلمتك يالغالي لاتقصر عنه العلف وكثر من نقله وبتشوفه ان شاءالله بكبد السماء صايد

[suspict]

بيض الله وجهك وماقصرت وجزاك الله خير يالغالي

لك تحيتي

[راعي البرقه]

وجهك ماسوينا شئ الناس لنا الناس والكل بالله

[شمر عزوتي]

ما شاءالله طير طيب

وخذ القصيده


مطروح في فارس .. عليه العلامه
شـدوده تـبـيـن .. وقـحـفـه .. و عينه
ما هو مهجن .. من طيور المزارع
اللي مـفـقـس بـيـضـهـا .. في مـكـينه
لو ان فـيـهـا .. مـا يـبــرد غـلـيـلـــــك
لـكـنـه حب .. مشلوحــن .. شابكينه

[suspict]

صح لسانك يالذيب

[بعيد الهقاوي1]

يا اخي الكريم

انقل الوكريه على يدك وبقول لك شي أي طير لما يدخل المربط ويطلع منه يصير وحش

حنا طيورنا تهد معنا وتصيد حباري لكن بعد المربط ندهلها من جديد ولما تهدا نجردها ونقنص فيها

وبالنسبه للوكريه اذا جيت تمسحها لاتخاف منها امسحها ماعليك منها خلها تعض حاول انها تعض باطن يدك

عشان مايغرز منقارها في اصبعك وتعورك كل ماتحس انها بتعض حط لها بطن يدك مع الايام

لما تمسحها ماتعض لانها تدري انها ماراح تضرك وبعدين كثر من نقلها واذا عندك بزارين بالبيت فرّع فيها

وخلهم يلعبون حولها لين يطيح اللي براسها

بعدين يالغالي اربطها بخيط فيها وفي الحمامه وخلها تشوفها من قريب وتهد عليها

وباليوم الثاني نفس الطريقه وخل الحمامه على آخر الخيط وراح تهد عليها ان شاء الله

وفي اليوم الثالث اذا حسيت ان الوكريه آمنه وماعليك منها اربط بالحمامه خيط بس الحمامه تكون منتوف منها وتطير على خفيف وهد عليها وان شاء الله تصيدها وبعدها ياطويل العمر هد لها حمام عادي بدون خيط

وخلاص خلك على هالطريقه لمدة اسبوعين الى عشرين يوم عشان يصير فيها لياقه وهد بعدها حمام سليم

وسبوق عشان يجردها زياده ويمرنها اكثر وخلاص كذا تكون جاهزه وانتظر الكراوين عاد وتحدى فيها الصقاقير

والله يوفقك ان شاء الله أي شي حاب اوضحه لك انا حاضر

[suspict]

الله يجزاك خير يالغالي

بس المشكله سويت اللي قلتوه ولا فاد فيها ماتبي الحمامه

ووديتها لصقار له في الصقاره 10 سنوات قالي طيرك مغتني ويبغاله شناذر ويومين بالكثير وتشوفني العب طيرك على الملواح

وبصراحه الرجال موثوق منه ..


ابي رايك

[wtwat]

اذا تبي العضه تروح دهلها وانت منت خايف منها اذابينت لها انك خايف بتعضك

وانشا الله تفيدك

[بعيد الهقاوي1]

شنذرها ورآح تضبط ان شاء الله

بس الخطوات اللي قلت لك عليها لازم تطبقها سواء قبل الشناذره او بعد الشناذره

لاتحسب انك اذا شنذرتها تهدها على طول ههههههههههههههههههه

الخطوات اللي قلت لك ضروريه ضروريه ..

[ابوناهض]

ياهلابك يخوي انت شاريها من محل شليويح العتيبي اللي يبيع فيه واحد يقاله بكر والطيره مع التعلوم تبا تجي زي الحلاوه وعلفه على يدك ه من مكان قريب متر الا متر ونص ونقزه وعلى هالطريقه لين توالفك

[فيصل بن محمد]

لاهنتوا جميعا علي النقاش الثري جدا
وتسلم يا سسبيكت علي الطرح
والله يبارك لك في الطير
تقبل فائق تقديري