لا تغركم هالدفوه...........اذا

[خشم الحصان]

الاخوه الغالين
السلام عليكم
اخواني في الله ارد الله سبحانه ان حنا نطلع كشته او عبارة تمشي علي هالبران القريبه من الرياض وكان خط السير الرياض. حريملاء.ثادق.تمير.ثم عبينا بنزين من مبايض وتقضينا من محلات(مكشات) لي في المحطه ثم واصلنا السير الي الشعب ثم الي الدهناء وبعد ذالك قررنا ان حنا نمرح في التنهات وكان الجو زوين ويوم وصلنا لي التنهات ونتشطر عنها شرق شمال يم النفود ونشب النار ونزل العده ويالله من فضلك
ويوم جينا ننام ولا احد الاخوان الله يغفر لنا وله جايب فراش شرشف يعني صيفي وشذا الله يهديك قال ابد شفت الجو دافي قلت ماله داعي اكثر خلقين قلت وانت لي بتشيلها علي ظهر او الموتر الحين ابحل بعمرك ويوم جت الساعه
12 و نصف يوم تغير الجو وبرد وقام خوينا يرقل تقول سلف دوج عيا لا يشتغل وكل شوي قايم يالربع انا كلني البرد المهم لي ابقوله لايها تغركم الدفوه لي حاصله الحين اذا نويت تطلع للبر يعني اذا حصل تقلص الدالوب
تراه احسن من رقلت الضروس
اخوكم
خشم الحصان

[عبد الله الفايز]

كل كلامك صح ولا عليه منقود الله يجزاك ووالديك الجنة

بعض الناس يروح للبر كنه رايح فندق والى جو الناس يمرحون بدا يشحذ من هذا وسادة ومن هذا فروة والا تكفا يابو فلان أبدخل معك تحت هالبطانية . ويضيق على الناس ...

الحاصل ياخيي كلامك زين بس انك زعلتن يوم انك تقول سلف دوج هالحين أنا باز بكسرة هالدوج معي

وتجي تقول هالكلام وانا مال من ابوي كل ماشاف السيارة قال ( الدوج دجوا أهله باسبوع )

ما أقبل عذرك إلا تدور لي همر لو مستعمل شوي مايخالف والا أزعل عليك

[خشم الحصان]

الاخ الغالي
عبد الله الفايز
السلام عليكم
اخي الحبيب الله يغفرلك عموم ياخيي هذا لي حاصل مع بعض الاخوان اذا هو طلع مع الناس والسبه ياهو عجز منه او عدم مبالات او انه معكم معكم ويحلها الحلال واذا وصلت اما تشحذ او اندس معك تحت البطانيه ولا يليته يزيه شوي ثواني ولا سنه رول فاكس طاوي البطانيه وانت ماعليك شي والله خوش ولا ازعجك بها الشخير تقول سير مرتخي عموم حياك الله يابعدهم علي مرورك والمشاركه الله يثيبك
اخيي والله اني مادريت ان موترك دوج لكن ياولد الشايب صادفت :redcar: ياربيه مت من الضحك الله يغفر لنا ولك يومك تقول ان الوالد يعيرك..................(( الدوج دجوا أهله باسبوع ))
اكملها خذ
الدوج دجوا هله باسبوع .......... عجزو عن التتن يشرونه
والدوج حيثه حسين طبوع......... ديم(ن)يمشي علي هونه
وبشر يابعدهم
اخوك
خشم الحصان
اقول ياخيي طف نور موترك الله يغفرلك لايا لبطاريه تقضي ............ولا دوج :j

[ريف النشاما]

http://www.mekshat.com/pix/upload/images6/mk8178_d33rdf.gif

http://www.mekshat.com/pix/upload/images6/mk8178_d33rdf.gif

[المترو]

السلام عليكم ورحمة الله وبركاته

هلا وغلا بالعم خشم الحصان ابو جراح
تسلم على النصائح وفعلا كلامك صحيح 100% عدم تقدير الامور وللامبالاه هو البلاء


محكمات مكشاتيه

هالحين تقول مادريت ان سيارة الرجال دوج وموضوع من 7 صفحات او اكثر عن سيارات الاعضاء بمكشات لاخوي القصمنجي وبعد حاط اكالت الجح ام ثغا !!! الظاهر انك ما تمر على كل الخيام وكل المواضيع الجديده نبي نسوي لك تحضير يومي بمكشات والتوقيع عند عبد الله الفايز عذيه يسامحك هو ودوجه ؟؟؟؟؟؟ والا ما يمنع ولو يكون مشوي ترى ما نبي مندي !!!

تقول
اذا حصل تقلص الدالوب
تراه احسن من رقلت الضروس ؟؟؟؟؟؟؟؟ بأحد مواضيعي مسوي على المبروكات اللي تلامع حمله مناهضه ؟؟ وتقول جايب دولوب الملابس طيب طيب كفشتك هالمره !!!!!!!!!!!
هذا كله فزعه مع راعي الدوج وابي احجرك ههههههههههههههههه

تصدق عاد اني لي موضوع جديد ومصور بدون المبروكات بس عشانك وعسى ما تلقى هالمره شيء تعلق عليه
بس والله لك مكانه خاصه حبيب قلبي حكيم المكشاتيين خشم الحصان

المزوح تجي وتروج
والسلام عليكم
الرحال2003

[دله وفنجال]

السلام عليكم ...

والله انك صدقت اخوي الغالي خشم الحصان . كنك دارين عن بكشتتنا الخميس الماضي لاكن ابشرك لقيت الله يعزك ومن يقرا شراريب من الشتا الماضي وجاكيت زايد عن الحاجة وحلينا المشكلة.

[المربد]

ما اقول لك انت حكيم المنتدى
مرة من المرات مريت على واحد من الربع علشان نطلع للمخيم ، قلت له وين بشتك او كوتك او فروتك قال ما يحتاج ..!!
قلت يا بو .... حنا عند بابكم رح جب فروتك.. ما رضى يجيبها
ويوم طلعنا وصار بالليل وهب الشمال قمت اصلح لي حاجة ورجعت لقيت اخونا ساحب بشتي ولابسها قلت له انا ماني بردان لكن اعطني البشت ابي اقعد عليها عقوبة لك ... (طبعا عقب شوي اعطيته البشت)

اشكرك يا بو يراح على هالتـنـبـيـهات الحلوة

[ابو شكاع]

هههههههههههههههههههههه

جازت لي سلف الدوج :D ....تسنك قبل شوي معنا بالبر ....اعوذ بالله برد برد

حنا صرنا تقل قدور بليلا اذا فتشتهن تبي تبيع على احد مغير هالبخار من افامنا ....ودرجة الحرارة 8 درجات ....ما بقى الا نحط الحطب بحجورنا

ومنا لكل من لا ياخذ احتياطاته بالبر ...

بيني وبينك ... دف اطرافك ..وبترتاح

تسلم يابو جراح

[خشم الحصان]

الاخوه الغالي
السلام عليكم
وحياكم الله كلن بسمه
الله يغفر لنا ولكم ويجمعنا في مستقر رحمته ويدخلنا فسيح جناته امين يارب العرش العظيم
.......................
الاخ الغالي
ومشرفنا الفاضل
ريف النشاما
ياخيي ماجاك شد عضل علي هالضحك وبعدين ذكرتني بولد (باببي) ماله الا ضرس واحد
الله يجزاك عنا بدخول الجنه علي مرورك ومشركه يابعدهم
احوك
خشم الحصان
......................
الحبيب
رحال 2003
هلا بك وياحبك لتعقيد الشوش ياخيي الله يرفع قدرك الرجال قبل العذر وانت :director: تلقلق تبيه يثور علي
الحين جيبي صار (الجح ام ثغا ) لا وبشرك قام يجتر :D
الحين يالله نبزا توقيع الدوام تبي تنشبنا في توقيع المنتدي اقول اخيي الله يغفرلك (لا يدري السبير(السمح) اخاف بسويها ثم من كثر التاخر بيطردوني
الرحال وش ذا(والتوقيع عند عبد الله الفايز عذيه )يليتها علي المبروكات كان زين........شف,,,,,,,(عذيه)..........
قصدك..........(غديه) :D :good2:
الاخ الغالي
عبد الله الفايز دوك وش يقول( يسامحك هو ودوجه ؟؟؟؟؟؟ ) وش قصده :confused:
اخوي الرحال انا قلت (اذا حصل) يعني في البرد الحين بس انت قالصه في الصيف الله يعفو عنا وعنك امين.................. لقيتلي منتق :good2:
اخيي اكتبه خلاص معاد اقول شي.........................ايه هين تبي تطيح
بس والله لك مكانه خاصه حبيب قلبي حكيم المكشاتيين خشم الحصان
الله يرفع قدرك دنيا واخره امين ياخلفهم
اخوك
خشم الحصان
.........................
الاخ الغالي
دله وفنجال
ياخيي هالمره لقيت............... بس منهو لي يضمن المره الاخري.............متسوا الونونه الصخونه اذا دخلك برد الله يرحمنا ويرحمك برحمته امين يالغالي.................تدف
اخوك
خشم الحصان
............................
الاخ الغالي
المربد(ال ملبد)
هلا بك ياخيي .............قلبك حنين خابرك الله يغفر لنا ولك ولا يومنه عند بابهم ورا ماجاب خلاقينه الله لايهينه مهوب اذا جينا في البر غدا سنه حقين الاشارت مامدك توقف الا جا يطر............. وبعدين ورك ترد البشت له
سان خليته سنه عصفور راشه ماء في المربعانيه.........هلشان اذا جاء يطلع معك مره ثانيه يتلبد من الخلقين لين يغدي سنه دوشق مطوي ميقوي يقعد من البجايم والثياب والشرريب والشمغ يالله ياسود تحاكيه :director: بمقرفون من كثرهن علي اذنيه
انت الحين ورا ماتفكنا من قواميسك
اخوك
خشم الحصان
.................................
الاخ الحبيب الغالي
ابو شكوع
هلا بك وشلونك وش اخباركوعساك بخير الله يغفر لنا ولك يابعدهم
ياخيي اخاف اقولك ثم تقول قوبه و مبالغ في الوصف هالخميس هذا انا في التنهات في النفدان حول نقا التنهات ويوم جت الساعه 12 في الليل ولا ماش النار معاد تدفي ولا خشة الواحد سنه شكمان مكينة نخل (بلاكستون 28 )اول ماتشتغل برد تجمد شحمة القلب منها والله ياخيي لوك شايفنا سان تقول هذولا من فصيلت القنافذ مهوب من الاوادم
من البرد
والخشم غادي سنه طماط محمي لو يطقه شي انكسر
ياخيي لبسني كل رجل شربين واليدين مانقول نثني الاصابع من الدسوسوس ولا عاد الارض ممطوره والسماء صافيه سنها عين ديس والدخان تقول سنه سارية علم مهنا هواء جمده تعرف جمده سنك داخل ثلاجة(المنجم تبي تاخذ كرتةن دجاج)هذا يوم الخميس
عموم الله مير محييك يابعدهم
اخوك
خشم الحصان

[المترو]

شرفت ابو جراح وينك يا شاب كم يوم وانت مختفي عسى خير وين انت مدحدر له !!
حبيب قلبي خشم الحصان انا قلت معليش عبد الله الفايز هم قلنا معليش ولو انك محاسبن على نقطه زاحفه شوي من العين الى الدال (عذيه) وانا اقصد غديه)

بس تجيبها مطلبه وتقول عن شيخ من شيوخ مكشات(( (لا يدري السبير(السمح)))) وتقول عنه انه السبير ؟؟؟؟؟؟؟؟ بس ما قلت هو تعليق والا سطب لكسز هالحين طلع روحك وساعتها انا اروح لابو تركي غديه يسامحك

مزوح تجي وتروح الزعل ممنوع

اخوكم الرحال2003

[خشم الحصان]

الاخ :mad:
الرحال2003
السسسسسسسسسسسسسسسلام عليكم
الحين انا قلت السبير مقام وليس العمر يعني فكنا من لعبة الشطرنج :director: انت توحي
اخوك
:hot: خشم الحصان

[العود الازرق@]

اخوي خشم الحصان كلامك صحيح 100 / .

[العود الازرق@]

اخوي خشم الحصان كلامك 100 /. ..................بعض الربع الله يصلحهم بفكرون اللبس الصيف في الشتاء شطاره . والسالفه الله يسلمكم الاسبوع الماضي طلعنا للصمان حنا 4 الخامس فرض نفسه علينا وسكتنا بيني وبينكم غير مرغوب فيه غثيث ولا يقدر للكلام وبثر المهم حنا يا المجموعه معنا فرش وفراء الخ معه بطا نيه واحده . يوم جاء الليل خوينا ما معه فروه (قلنا له خذ فروه ودف عمرك يقول بكل غطرسه هذا برد العجز) شبينا الضوء وقمنا نسولف قلت يافلان وش رايك ببرد العجز ما رد وكان ينتفض من البرد قلت البس البطانيه وخلك حول الضوء . المهم تعشينا وجاء وقت النوم وانا اراقب خوينا الرجال فرش فراشه ومعه بطانيه واحده ماش رفيقنا يتقلب .حنا يا الباقين كل واحد فك السحاب (واندعس في وسطه) المهم ان الرجال مارقد طول الليل .قلت احسن اقولك دف نفسك وخذ فروه تقول برد عجز وسلامتكم .

[klko]

أنا أعاني من هالنوعيات قبل أسبوعين طالعن ومعي كيس نوم وبطانيتين ماخذ احتياطي
ويوم جيت أرقد الا والأخوان كل واحد ساحب له وحده وانا ابتلشت بالبرد والمشكلة اني موصي عليهم قبل كل واحد يجيب أغراضه لكن ما احد يسمع
الحل مع ذولي تسحب البطانيات وتخلي البرد ياكلهم

[خشم الحصان]

الاخ الغالي
العود الازرق@
السلام عليكم
وانت بعد صح 100 / .
اخوك
خشم الحصان
................
الاخ الغالي
العود الازرق
السلام عليكم
اخي الحبيب هذا وجع خيطان لي يحسب ان طلعة الصيف مثل طلعة الشتاء واذا طلع معك جاب لك الطلوع في سبدك
اتحدك تعد عدد ال(ع) فوق :)
المشكله هالي يقول برد عجز ورا مخليتوه ويشوف برد العجز وش يسوي في الشباب المستهتر
قلبك حنين يالعود الازرق مكشاتي الله يغفرلك
اخوك
خشم الحصان
...........................
الاخ الحبيب
كي كو
السلام عليكم
اخي الاولين يقولون في المثل(محد يعير* مرزامه وقت السيل) وفهمها يالغالي الله يغفر لنا ولك
اخوك
خشم الحصان
يعير* اي يسلف او يعطي