اهل الخبره يرجى الدخول للاهميه

[al_sanea]

السلام عليكم ورحمة الله وبركاته
يالربع انا عندي شيهانه بكر وهديتها على كراوين وحمام والحمدلله مافيها الا العافية تصيد
الايام هذي طلعت اهد الا الشيهانه تغيرت قمت اهدها تهد بس ثواني وتترك الصيد وتحوم على سياره علما ان الحمامه قريبه منها حيل وش الحل او مدري وش جاها فحصتها قلت يمكن فيها شي الحمد لله ماطلع فيها شي وش الحل يالربع
فيدوني انا منصدم منها .

[صقار مبتدئ]

و عليكم السلام ... الله يحييك اخي الكريم ترى الطير بعض الاحيان يرغب الحوم وترى كثر الهدد على الحمام يعوف الطير حاول تنوع وترى طيرتك ما فيها الا العافية

[القرناس المهاجر]

إن شاء الله مافيها الا العافيه
اعتقد من حبك لها وفرحتك بصيدها :good:

سرت تكرمها فوق العادة .. والظاهر انها استصنعت

كلما في الأمر اقصر عنها في العلف وبتشوف كيف ترجع لعلومها الاوله بإذن الله :good2:

[ابوسمرى]

ما ازود على كلام الاخوان

انا صار معي نفس المشكله وقصرت على الطير بالعلف والحمد لله رجع لوضعه الاول

وان شاء الله مافيه الا العافيه

[al_sanea]

الله يعطيكم العافيه وجزاكم الله الف خير
وبيض الله وجيهكم جميعـــــــــــــــــا

[ذراع الذيب]

السلام عليكم ورحمة الله وبركاته,,
مسيت بالخير يالخوي,,

الشيهانه مابها خلاف لكن انت عودتها على هالطريقه ويجهلها البعض لاهد الواحد ,,
طيره على حمامه وماجابها الطير نعطيه وحده ثانيه خلاص الطيرمعاد يجزم على,,
الحمامه ويتعود كل ماطرد وشافها صعبه عليه بيرجع وينتظرتعطيه وحده والحل يالخوي,,
لاسوتها الشيهانه ورجعت ادعيهاوامسك الشيهانه وبرقعها ولاتعطيها شي ابد وهدها في اليوم ,,
الثاني وراح تشوف هدد ماشافته عيناك وارجو ان اكون افدتك يالنشمي وموفق يالغالي,,
تحياتي لك,,

[رأعي الخرشه]

إن شاء الله مافيها الا العافيه



اعتقد من حبك لها وفرحتك بصيدها :good:


سرت تكرمها فوق العادة .. والظاهر انها استصنعت



كلما في الأمر اقصر عنها في العلف وبتشوف كيف ترجع لعلومها الاوله بإذن الله :good2:


نعم هذا الكلام عين الصواب ان شاء الله مافيها الا العافيه
تفبل مروري

[ALAMIR]

أقصر عليها بالعلف وشووف

[نمر الصحراء]

اخوي اقصر عليها العلف
اوخبرني شيصير معكhttp://www.up-00.com/s2files/rpp43636.gif

[سعودي و افتخر]

اقصر عليه العلف وانا اخوك

[ابوناهض]

ياهلابك يخوي ابد اقصر عنها العلف وابشر بسعد يالذيب وشيهانك مابها خلاف ...

[شطب]

زي ماقالوا الاخوان اقصر عنها العلف بس مهوب مرره


وحاول ماتحرص واجد على الهدد بوجهة نظري الملواح افضل


وبالتوفيق

[بعيد الهقاوي1]

اقصر عنها العلف زي ماقالو الاخوان

لكن بضيف نقطه مهمه الشيهانه لاتنقلها كثير خل فيها وحشيه

ونصيحتي لك مادام اللي عندك شيهانه لازم تخلي فيها وحشيه 30 بالميه عشان تصمل بالطرد ماتعتمد على

السياره لان الشيهانه اذا خربت ودهلت مرّه تصير فاشله ابوي الله يطوّل عمره اذا كان عنده شيهانه لازم يخلي

فيها وحشيه ولا ينقلها كثير بس وقت الهدد يهدها ويبرقعها وخلاص ..

[عاشق التوام]

أخوي الطير لازم يكون على وزن واحد في أيام الهدد يعني أقصر على الطير لين يستهد مثل هداده الأول وإن هد مثل أول خله على هذا الوزن بوزن معين يعني اليوم الأول والثاني والثالث ثندوه فقط والرابع ثندوتين للحفاظ على الوزن اللي استهد فيه وعلى هذا المنوال في أيام الهدد فقط إذا كانت الشياهنه جبيليه أو مثلوثه بحريه أما إذا كانت تامه بحريه أو سوريه (تركيه) اليوم الأول ثندوه والثاني ثندوتين وخل حروة علفها وحده يعني في وقت واحد من كل يوم اللي هو وقت هددها ولاتقصر عليها بمعنى إضعافها لدرجة التسييف وإن شاء الله بتسرك وهذا من واقع تجربه بعد توجيه والاخوان مايقصرون

[al_sanea]

الله يجزاكم خير ويعطيكم العافية
ماقصرتوا يالنشامه وبيض الله وجهكم
وحياتي لكم جمعيـــــا
واشكركم على الاجابه والرد السريع وهذا ان دل يدل على حرصكم وتعاونكم مع الجميع
موفقين ان شاء الله.

[داااحم]

افاااااااادووك الاخوان وتقبل تحياتي