عالم الكواتم

[الحصاة الرقطا]

ما أتوقع فيه راعي بر يكشت بدون كاتم :no: ....... والسوق مليان بأنواع كثيرة منها..........
ومن فوائد الكاتم ما يلي :

1-تستوي اللحمة بسرعة...(جوني.. خضاري.. ضب ...يعني اعم المخلب :p )
2-توفير الوقت
3-توفير الغاز
4-توفير السنون..(لاتعلك اجرع جرع) :D
وغيرها من الفوائد......

(((ثلاثة كشتوا وقفوا عند مركز سألهم كم عددكم ؟قالوا أربعة.... استغرب وويق راسه قال :وين الرابع؟
قال السواق: الكاتم بالعزبة... وتراوه أرجلنا!!!! :D
[line]
لكن خلونا نطب بعزبة كل عضو من أعضاء مكشات...
ونشوف وش يستعمل وش يفضل وش يحب وش مزايا كل كاتم ...فعند جهينة الخبر( الشور) :light:
يالله كلن يصوع دلوه ;)
أما أنا إذا ماأتركى عليه وانا بالخط :heart: (سبحان الله.. يطيح!! يسرق!! شي!!)ولاما أكشت :no2:

[حد السيف]

البعرة تدل على البعير والاثر يدل على المسير
الغالي الحصاة الرقطا
عالم الكواتم مشابة الى حد كبير الى عالم ال......
والكواتم على وزن الكواسر تطبخ كل ما عصي على القدر العادي
الغالي لك تحياتي
وريحة ابو عباس ولا عدمة قدر كاتم هندي باكستاني ايراني فرنسي اهم شي الرقم واحد بالرحلة

محبك اخيك حد السيف

[وجيه 11]

صراحة جربت نوع هندي قديم ، ما عاد ينلقى في السوق الآن وكيله ما عاد جابه ، مهوب شين لكنه خفيف وممكن ينعفط لو يطيح منك ، ما أذكر أنه يلزق فيه الأكل يمكن عشاني طبيخ على كيفك :p
أما هالحين تطورت وصار معي قدر السيف صيني بس حليل وفيه ميزة الثقل لكن يلصق فيه الأكل ، شي خفيف في أسفل القدر ، وبعدين ما يجي مع السيف ملحقات مثل الهندي الي كان معه شبك للخضار إذا بتطبخها على البخار وشبك ثاني يعلق عليه الدجاج أو اللحم للطبخ على البخار أيضا ، يعني قاعدة للأكل ترفعه عن الماء :good:

[الاباتشي]

الكاتم وماأدراك ماالكاتم
اعنبوذا ماطلع كريشتي الا هو

بالنسبه لي انا ماأكشت الا والكاتم فوق راسي مهب جنبي : :p
15لترصيني وارد السيف تحط به فراخة حمام وتكبس عليهن رز ابوكاس :good:
ياويييييييييييييييييييييييييييل قلبك بس
وسلامتكم

[الفردوس]

وانا أشهد الكاتم ما مثله

لكن كاتم السيف فيه مشكلة وهي أن البلف حقه ثقيل ما يطربك
بخلاف الأنواع الثانية
عندي واحد مغربي ثقيل واذا طاح ما ينعفط والبلف حقه حفيف جدا وهذي صورة له .

http://www.mekshat.com/pix/upload/images6/mk2033_aa.jpg

[داورد]

يا شباب لا تنسون ( الديكور ) الاسباني تراة ممتاز مرة وهو ستيل وقوي وشبيه للسب و ( الاكس برس ) المغربي , لا ويجي معة إضافات داخلية للطبخ على البخار .
أكثر الموجود منه في السوق مقاس 12 لتر وهو قليل شوي .

وشكراً

[صقر]

الحصاة الرقطا

والله انك صادق .... الكاتم هو امير الرحلة.

بالنسبة لي استعملت الروسي والمغربي والفرنسي.

وأخيرا صفيت على السيف ( سعره زين ويفي بالغرض)

[هواوي]

بسم الله الرحمن الرحيم
السلام عليكم ورحمه الله وبركاته

بالنسبه لي فانا استخدم التيربو الالماني 12 لتر صراحه ممتاز جدا جدا حتى احس انه هو الي يكشت وياخذني معه يعني يطالع فيني ويقول تبي تطلع معي البر

وعندي سب فرنسي 12 لتر وما اطبخ فيه وماخذه احتياط له سنه الان وهو جديد ما طبخت فيه اما التيربو فعز الله انه جرب كل انواع الحطب والافران واللحوم

ما فيه عيب رغم ان الطبخ في السب الذ على ما اعتقد
وجاني هديه واحد ايراني وصراحه اسوا شي جربته ما يجي من الرافضه شي زين حجمه كبير مره 34 وبغا ينفجر علينا رغم انا طابخين فيه دجاجتين فقط مقارنه مع حجمه الكبير جدا جدا وثانيا صعب ينوزن على النار لانه شبه بيضاوي

[الحصاة الرقطا]

ياملا العافية على هالمعلومات ياشباب
أخوي حد السيف كلامك...... صحيح بس الواحد يدور الأفضل........
بعدين وش جاب البعرة الله يهديك :eek: وحناننشد عن قدور الطبخ...... لك تحياتي
وجيه 11شكرا لمعلوماتك ....وصراحة أنا مثلك استعملت السيف
وجاز لي بس ما يحرق معي :good2: (لي نفس بالطبخ).....
وبعدين ترى القدور يطبخ به..... مايلعب به سبع الحجر :bounce:
أشكر مرورك
الأباتشي...... أجل انتبه لايطيح وينعفط........ وبعدين الكريشة ياخوي له حل .......اقصر يك...... واترك أبو كاس وجرب العنبر ....خفيف ولذيذ ........لك شكري
أخوي الأسعدي.... بسرعة حط ليمونة سودا على البخار :good2: ....
وبعدين وزن البلف للفائدة........ له علاقة بقوة الضغط بوسط القدر......
ولذلك يكون ضغط قدر السيف أقوى من ضغط قدر السب .........شكري
أخوي داورد ماأدري عن النوع اللي تقول..........
بس للفائدة القدر الستيل أنظر وأصح وأصبر....
بس يحرق الرز بسرعة .........وذلك لردائة توصيله للحرارة........
بعكس معدن الألمنيوم فهو موصل جيد للحرارة .........
فما يحرق الرز بسرعة مثل الستيل ......ولذلك قدور الستيل الجديدة تحفر من الأسفل بخطوط وتعبأ بمادة الألمنيوم..... لتوصيل الحرارة(سجل عندك فهمان) :)
أخوي صقر...... نفس الوضع معي
وبعدين قطع غياره متوفرة..... وعملي....
ونسبة ضغطه زينة ................أشكرك
أخوي هواوي عز الله أنك على اسمك........
التيربو لايعلى عليه ..........عز الله انه دوا القميري 20دقيقة بس.......
اعنبو هالألمان ما يجي منهم الا شي متقن ومدروس صح........
بس ياخوي سعره ماهوب معقول......... باخشوين مايسده المكسب الشوي........
والايراني تكفى راح زمانه......... دور لك اقرب برحة ودربه :mad:
والحصاة الرقطا تتمنى لكم طبخا لذيذا وبالهناء والعافية

[خشم الحصان]

الاخ الغالي
الحصاة الرقطا
السلام عليكم
جاب الله موضوعك انا استعمل الايراني هقوتي 15 لتر بس انه طاح الغطا من يدي الرفلا ونكسر لي يفر الاسود
مدري وش اسمه المهم اذا فريته يقفل الغطا وين ابلقاء له من يرهم فرار
وبعدين وش قصة (الجله والبعير يعني البعرة تدل على البعير والاثر يدل على المسير) كثرة هلايام علمونا
ياحد السيف
اخوكم
خشم الحصان

[حد السيف]

السلام عليكم ورحمة الله وبركاتة

http://www.mekshat.com/pix/upload/images6/mk4544_Picture-034.jpg

الحصاة الرقطا وش رايك بها الاخويا
مع خالص التحية
خشم الحصان حياك الله واغفل الله يرحم والديك
محبكم اخيكم حد السيف

[خشم الحصان]

الاخ الغالي
والمتميز حتي في قدوره
حد السيف
السلام عليكم اخيي الله يغفر لنا ولك امين هذا مطبخ حنيذ ومندي متنقل لنل عاد عنديلك اسم وش رايك في
مطبخ حد فورد سيف للحنيذ والمندي الصماني :p
اقول اخوي حد السيف وشو الجله والبعير يعني البعرة تدل على البعير والاثر يدل على المسير
علموني وسكت الجله عرفناها بس باقي البعير منهو
اخوكم
خشم الحصان

[الحصاة الرقطا]

أخوي خشم الحصان
يمكن يركب لقدرك غطا من غطيان القدور الثانية
وبعدين لاتشري قدر إلا له قطع غيار
حتى ماتبلش :confused:
وبعدين مافهمت من صورة حد السيف؟؟؟؟؟؟؟؟؟؟ :D
الرجال مليان قدور ضغط تلقى عنده حاجك :D

أخوي حد السيف
سلم لي على هالخويا :p ........عز الله أنهم يطربونك ولا يزعجونك :D
وصلت التحايا :bounce:
وليته ياصل سؤالي أنا وخشم الحصان في القريب الغير مصيف
وترى علومي من فوقي ( يالفرتيق) :D

[المنغولي]

مشكور على الموضوع

والكاتم له شكلين
1-ستيل وهو الأفضل صحيا بس يلزق فيه الأكل وغالي
2-المونيوم غير صحي ومايلزق به الأكل ورخيص

عاد شف اللي يجوز لك

شكرا

[الحصاة الرقطا]

أرفعو الموضوع

[الحصاة الرقطا]

:d فوق!!!!!!!!!!!!!!!!!!!!!!!!!!!

[الحصاة الرقطا]

فوق!!!!!!!!!!!!!!!!!!!!!!!!!!!:d

[kotaibi]

اخواني انا استعملت السوري والايراني وعندي واحد لوتحط به تيس قالبه من كبره وهوايراني وهي جيدة خصوصي الايراني متين وسعرة مناسب شـــريته من سورياايام معرض دمشق الدولي ويجي معه اكسسوارات احتياطية.

[mar100]

ممكن طلب من الاداره انها تسوي جدول تصويت بنسبه لقدور الضغط يعني مثل الي موجوده في الجرايد من التصويت .

[تايتد]

استخدم ساب والسيف000000000

والكشته العاديه اللي مافيها ناس راعين عجله القدر الرملي

معروف حق البخاري 000

[مدمن فتك]

انا جربت السنيدي مستواه عادي ولايتحمل الطبخ على الحطب
وهمن جربت السيف انا اشهد انه شنب خخخ

[ونش]

الالمنيوم غير صحي ويتحفر القاع بسبب الليمون والطماط ويروح في الاكل من تجربه فالبديل الصحي الستيل

[راعي الغاليه]

انا الصراحه جربت كل الكواتم غير سب الفرنسي لا تدور وخصوصا الاستيل

[abufahd]

انا جربت الصيني مرة واحد انفجر بالمطبخ بغينا نروح فيها وما تشوف الا الكوسة والقرع لاصقة بالغما ولا تبت وشريت واحد ثاني صيني ونفس الشي خرب مع مكان الربط وباز المسمار
وآخيراً شيرت اكسبريس المغربي ستيل صراحة اكتشفت اني ضايع من زمان مع هالصيني المخور الطبخ طعمه غير مع هالقدر المحترم بس سعره غالي شوي بس لك وللزمن

[رياض السنباطي]

بالنسبة لي ماعجبني وماملى عيني من الكواتم غير الهندي

وعلى فكرة ماينزل من السيارة للبيت إلا بعملية قيصرية !!

[عايد الحربي]

السيف ولا تعداه