( وش رايكم يالربع ) احد جرب الفورد اكسبلولر (في البر ) وخاصة الدبل حقه

[مناسب]

الله لايهينكم ابي معلومات الي جربها بالبر والا بالديرة

تراني مقبل على شرائها بإذن الله

النصيحة الله يطول بأعماركم

[كشات]

بسم الله

الاخ مناسب
السلام عليكم

بالنسبه للفورد

جربته قبل كذا ومشكلته كالتالي

اولا ان كان الدبل يعمل بالازرار فهو احيانا مايشبك على طول
وان شبك احيانا يعذبك ماتطفى اللمبه(نور الدبل بالطبلون)
يعني لازم تشغل الدبل قبل لا تدخل التغريز بمسافه حتى تشوف النور مولع


والسلبيه الثانيه
انه نازل شوي واحتمال انه يتعلق شي وارد لاني جربته وماكنت متوقع انه بيتعلق ولكن للاسف
من شاف الهلاش بدت تدور كفراته وهو واقف :(

[كاتم اللهب]

السلام عليكم ورحمة الله

اختصار القول يا اخي مناسب
ان الفورد اكسبلورر لك ماهو مناسب


(انحش)









تقديري.............

[جرناس]

مبروك مقدما
سياره مريحه وعمليه
:good2:

[مناسب]

شكرا للجميع بلا استثناء

تراني قررت الجيب الميركوري ....................................عسى جبتها والا اني من جنب القدة ............؟؟

[قتال]

السلام عليكم ورحمة الله وبركاته ،،،

أخوي مناسب .. أقولك مثل ماقال أخوي كاتم اللهب .. إنحش ..

أولاً .. الموتر زوين ورخيص مقارنة مع مثيله من الجمس والشفر .. حيث أنه لا يقارن مع سيارات الجيب حتى وإن كان فيه دبل ..

ثانياً .. الموديلات الجديدة فيها عيوب بالتصنيع وهذا الكلام موثق .. ففي هذا الموديل يوجد عيب تصنيع في الباككس الخلفي .. وفيه صوت بالجير .. وبعض السيارات تجي فيها فضاوه في عجلة القيادة ..

طبعاً ما هي كل السيارات .. لكن أغلبها .. والظاهر أنها مسألة وقت بالنسبة لعطل الباككس أو حسب الإستعمال ..

ومن ثلاث سنوات وحتى الآن لم تستطع الوكالة حل هذه المشكلة وكل اللي تسويه أنها تلتزم بالتصليح على الكفالة وكذلك تعطيك كفالة إضافية مجاناً بعد ما تنتهي كفالتك بـ 20 ألف كيلو بدل لهذا العطل .. على أمل في أي لحظة يجي التعديل من الشركة الأم ..

[وجيه 11]

أنحش ... :redcar: وانت كافخ
ترى دبلات الإكسبلورر دمار وغالبا ما تكذب تلقى اللمبة منورة لكن الدبل ما شبك :confused:
ولو تسمع النصيحة ترى هالمواتر ( الإكسبلورر ، الميركوري ) سيارات مدينة وتكشخ مالك ومالها عندك من الجيوب الياباني نيسان أو تويوتا كد ومد وتاصل أي مكان وانت مرتاح وقطع الغيار لو تبي لقيتها عند الخباز ياشيخ

[سنتافي]

اخوي انا مادري وش اقولك لأني ماجربتها لكن هذا هو التصنيف الامريكي الاخير
بين

2005 GMC Envoy SLT و 2004 Ford Explorer XLT و 2005 Jeep Grand Cherokee LIMEITED

و النتيجه الآتي

محرك الانفوي 4.2 سته سلندر خط 275 حصان اربع سرعات الاوتوماتك

محرك الاكسبلورر 4.6 v8 239 حصان خمس سرعات الاوتوماتيك

محرك الجراند 5.7 Hemi V8 330 حصان 5 سرعات الاوتوماتك

فا صاحب المركز الثالث هو الانفوي والثاني الاكسبلورر والاول للجراند

وبالنسبه لجودة الدفع الرباعي مدحه (للاكسبلورر طبعا ) وبنفس الوقت تكلموا عن التأخر في شبكته اما بالنسبه للارتفاع فاكانت المشكله هي الدعاسات فكانت نصيحتهم هي انك تفكها وانا انصحك كفرات اطول وخذها مني ولا احلى ارتفاع
اما بالنسبه للعمكليه بشكل عام فهو اصرف من الشفر مع اجترامي لمحبيه هو اكثر مصنع عنده غرابيل اما بالنسبه للجييب قطع غياره تتكلم عن نفسها فبرأيي الفورد هو اصرف الموجود على الاقل لا طرمبه تطفي ولا غيره واذا لقوا الحل اطمن بيدقون عليك وينادونك هذا الشيء معروف من قبل فورد
اما بالنسبه للياباني . . . مستحيل يوصل قوة شاصيه اي موتر اوجيب ياباني قوة جيوب الفورد وان وصل ما يتعداه (من فئته ) واعتقد ان احواض الموديلات الامريكيه للفورد تتحدث عن نفسها


اخوي اشتر وماعليك الله يطرحلك فيه البركه انشأء الله

[مناسب]

والله حيرتوني يالربع

انا على وشك شراء سيارة بس لعبتوا في راسي :dance:

الأخ وجيه 11

اما عن الميركوري ...............دقيت على الوتر الحساس .............ناويها تصدق !!

الرأي والمشورة وآخر كلام يا أخوان الله يوفقكم

[شبلان]

السلام عليكم
كيف الحال يالربع
الاخ مناسب
بالنسبة للفورد اكسبلورر انا شريت السيارة وهي عندي من سنتين ولااروع منها ماتركت مكان الا ورحت عليها ماقد خذلتني ابد ولا ازيدك من الشعر بيت تانكي البنزين 80 لتر يمشيك بالراحة 530 كم
بالنسبة للدبل الخفيف يمديك تشبكة وانت ماشي على اي سرعة
اما الدبل الثقيل يجب ان تتوقف وتضع القير على N وتدعس على البريك ثم تشبكة
واتحد اي سيارة ينشبك الدبل الثقيل حقها بدون توقف
تعشيق الدبل سلس جدا واشبك الدبل الخفيف واناوسط الرمل ولم اواجة اي مشكلة ابدا
بالنسبة للمكينة هي 4.0 في السعودية
تعليق السيارة مستقل
دخلت طين في الصمان وقطعتة وخلفي vxr بلقوة طلع (ياليت كان عندي كيمرة فيديو)
AWD يعني على الضع العادي يتوزع الدفع على الكفر الي علية ضغط اكثر (انا ادخل الرمل بدون حتى مااشبك الدبل)
انشاء الله سوف افيدك اكثر عن السيارة في المستقبل واضع لك بعض الصور


* ملاحظة
اي سؤال يجي بخاطرك قولة
مع الشكر للجميع

[حد السيف]

http://www.20inches.org/images/trucks/ford/franks24d.jpg
الغالي هذي شبية سيارتي
الحمد لله ما عليها خلاف بالبر
عيبها الوحيد مهناك سرعة على الريغى الرباضات اما غراز ولله الحمد مهناك غراز
وعلى فكرة دبلها الثقيل من اقوى الدبلات واقوى من دبل الجيب

محبك اخيك حد السيف

[شبلان]

http://www.mekshat.com/pix/upload/images6/mk11789_SWIDAN1.jpg
http://www.mekshat.com/pix/upload/images6/mk11789_SWIDAN2.jpg
يتبع

[شبلان]

^
^
^
الصور وصلتني عن طريق الايميل السيارة ماهيب لي لاكن سيارتي مطابقة لها حتى لونها
فية صورة عن قريب للسيارة ماقدرت احملها
المهم انا راح احط صور سيارتي في موضع سيارات الاعضاء

[السالمي]

انصحك فيه

دام الاخوان مدحوه

ولعلمك السيارات الامريكيه اقوى من اليابانيه في مراحل

ولاعليك من اللي يقولون قاطعو المنتجات الامريكيه

لو تقاطع بيديك ورجليك ما اثرت عليهم في شي

وبعدين مافيه مقاطعه الى بالسيارات

قاطعهم في اكلك وشربك ولبسك وفي بيتك

حبكت على السياره

[طير شلوى نجد]

يأخي شبلان ترى الفورد خفيف مقارنة بالفكس ار والطين الثقيل يهلش عالطول

[gihad]

نصحية مني صلي الإستخارة والخيرة في ما أختار الله

[الادعج]

الله المستعاااااااان
يالربع الموضوع قدييييييييم >>>>كح كح ...لا بس فيه غبااار شوي
الموضوع عام 2004 ..
يعني تلقى الرجال شرى موتر وباعاه ومعه موتر غيره الحين

[اليكي]

؟؟؟؟ قديم؟؟؟؟

[فيصل العاني]

خلو الشباب يعبرون ويدورون في المنتدي عن المواضيع المميزة

[الادعج]

؟؟؟؟ قديم؟؟؟؟

ههههههههه
ياحليلك ..ياليكي ...
قعدت تنصح الرجال...الموتر زين وممتاز ...
ويم دريت ان الموضوع قدييييم ..عدلت مشاركتك ..وقلت قديييم
هههههههه ياحليلك..:D :D

[إكسبلورر]

صراحة ان انا معي إكسبلورر وصراحه عملي سواء بالبر ولا بالديرة وكويس وعلى قولة المثل
أسأل مجرب ولا تسأل طبيب

[أطلال نجد]

الأدعج
يا أخي أنا واحد من اللي مروا على الموضوع الآن ويشهد الله أنني استفدت كثير من ردود الأخوان
وبعدين عيب عليك تقول يا حليلك
أحشم الرجال .

[ابووليد 333]

توكل على الله فالسيارة انا مجربها وفعلا جديرة في البر

والمشكلة التي يذكرها الاخوة في القير هي مشكلة وقعت في موديلات 2005 فما تحت
اما 2006 فما فوق فلا مشاكل والحمدلله

[الادعج]

الأدعج
يا أخي أنا واحد من اللي مروا على الموضوع الآن ويشهد الله أنني استفدت كثير من ردود الأخوان
وبعدين عيب عليك تقول يا حليلك
أحشم الرجال .

ياخوي ...اذكر الله
يعلم الله ان قايلها من باب ود ومحبه ..ولا اقصد شي من اللي تقول الله يهديك ...
بعدين اسألك بالله وش فيها لو قلت ^ياحليلك ^
تبين اقول ^ياكرهك ^
يعني وشفيها الواحد مثلا او قال ...ياحليلك يابو محمد ..ياحليك يابو خالد ..ياحليلك يابو فلان ..
هاذي كلمه دايم اقولها ..واول واحد يعترض عليه انت ...
واذا في كلامي غلط رجائي لك ياأطلال نجد انك تبيلي الغلط ....
وبعدين انا كان تعليقي ..على ان الموضوع قديم ..والشباب قاعدين يعطون ارائهم ونصايحهم للرجال راعي الموضوع
بدون ماقاعد يسمعهم او يقراء مشاركاتهم

[الحبابي1]

عز الله انه موتر بس لو انه مرتفع من الارض كان يازينه
عيبه انه قريب من الارض فقط لاغير وهذي لها حل ترفيع

[الوموي2]

بالنسبة للاكسبلورر من واقع تجربتي ممتاز وآلية عمل الدبل فية جداً ممتازة وقوية بحيث يتوفر فية ميزات ما تلقاها بغيرة بس على شرط تكون ملم بطريقة القيادة الصحيحة بالطرق البرية والرملية .. وانصحك اخوي اذا جيت تخش رمل نزل الهواء واستعمل الدبل الثقيل ولاتخاف علية فمن الطبيعي راح تسمع اصوات طقة نتيجة توزيع العزم على الكفرات بواسطة نظام الثبات الذكي المتوفر بأكسبلورر . هذا من واقع تجربتي مع اكسبلورر 2007 سبورت ترك غمارتين وصدقني بتلعب على اهل التايوتا والنيسان !!!

[علي ابونواف]

صحيح ان الموضوع قديم بس الحقيقة انه موضوع جدير بالاهتمام وبنفس الوقت متجدد اعتبره لأن الجميع يتكلم عن تجربته وأتمنى ان الجميع يشارك ويعطينا تجاربه مع هالموتر لأني وبصراحة ناوي اشتري واحد ان الله وفق

جزاكم الله خير اتحفونا بتجاربكم يالربع

وشكراً للجميع وبالاخص كاتب الموضوع

[عقيل2009]

خلك بعيد عن الاكسبلور

لاتقربه ولا تفكر فيه

والله الموفق