افضل المواد للخيام الصغيرة و اكياس النوم

[AbuAnas]

السلام عليكم و رحمة الله و بركاته

يا شباب ايش رايكم في الخيام الشخصية الصغيرة و اكياس النوم المصنوعة من البوليستر؟

و ماهي افضل المواد في رايكم لمثل هالامور؟


أبوأنس

[المنغولي]

هلا اخوي

بالنسبه للخيام الصغيره أهم شي تفرش أرضيتها عشان ( الصقوعة ) ولو تفرشها بـ(كنبل) أزين وأدفى لك وإذا معك كيس نوم مايمنع بعد من فرشها وانتبه قبل كل شي ماتطقها يم الشمال عشان ماينفضك البرد وشف الخيمه الرهيفه أبعد عنها واللي تسمح بدخول الهواء بسهوله

كيس النوم ماعليه ان شاء الله اذا صارت خامته قويه و(جبره) وعندك حق السنيدي جيد والتنزاني معروف وماعليه كلام ولا أوصيك لاتسكر على عمرك لأن فيها خطورة الله يحفظك

عساني كفيت ان شاء الله

[( برى بحرى)]

الاخ ابوأنس خوش موضوع خل افيدك شويه
شوف انا شريت عدد 3 أكياس للنوم ( سليب باق ) من سوق السلاح كل واحد يقول الزود عندى ولكن مصيرهم
حشاكم الزباله ليش ؟؟؟؟ انا اقولك
اولا يمنع خروج ابخره الجسم يعنى تصير فرن
تصحى من النوم والله من عرق جسمك تحس انك والكل بكرامه انك متبول على روحك من العرق والرطوبه مالت جسمك
اذا حاشه ماء من داخل يخمر وتصير ريحته وخامته حشاكم عفنه

اشتر شىء شغل الخارج الفرق شاسع 10000% امريكى مثلا او الخام امريكى وشغل الصين الخ الخ
يسمح بخروج ابخره جسمك ولا يسمح بدخول اى شىء عليك من الخارج
يتحمل درجات حراره 20 تحت الصفر
اذا طويته يصير صغير والخام ماله ما ياكل ايدك وانت تطويه مثل الطربال ولا يأخذ حيّز بالسياره والتجربه خير برهان والله

[الموقر]

السلام عليكم ورحمة الله وبركاته ...

تعقيباً على رد الأخ بري بحري

الفراش الأمريكي ... ما يسوى التعب .

مرة كشت وكان معي نوع ونزل شركة أمريكية وكنت داخل الخيمة ولابس فروة وجبت كل الفرش والبسط اللي معنا وحطيته علي ووالله ما استفدة مت من البرد . بعد ما رجعت حلفت اني اشري فراش يسوى والحمد لله أخذت من شركة الدريويش . والله قمة . والحمد لله .

[محب الشمال]

حيرتونا كل واحد له رايي
ايش الافضل الامريكي
ولا التنزاني ولا الدريويش
وين افضل مكان يبيع اكياس النوم واحسنها

[عطارد]

السلام عليكم

خذوا العلم مني جربت كل الانواع
الامريكي صناعة الشرق زوين بس انه ضيق حتى الكبير منه واللي ناهي ولا غيرة شيء هو الامريكي الاصلي واسمه اكستريم كولد يعني برد يقص الحديد ومصنوع من زغب البط (الريش اللي يجي في مؤخرة البطن ريش صغير وناعم) والفراش إذا طويته صار حجمة مثل تكية السيارة صغير ووذيف بس المشكله انه ما يباع في السوق ولا حتى في امريكا هذا مخصوص للقطاعات العسكرية وان لقيت تراه مستعمل وفيه محلات تبيع اللوازم العسكرية المستعملة وبعضها جديد زايد عن الحاجة أو ما عاد يصنع وطلع بداله موديلات جديدة هناك

بس في ديرتنا مالك غير فراش خالد الدريويش وانا مجربه قماش وخامات وخياطه ممتازة وغيرة لا تتدور

[الكاسر23]

السلام عليكم ورحمة الله وبركاته

اشكر كل من أدلى بدلوه في هذا الموضوع، فكل منكم لديه خبره في شي جربه من قبل، مما جعل أخوننا أبو أنس والبنادر في حيرة، ما عاد يعرفون وش يشرون.
حسب علمي وتجربة الكثيرين ممن خاويتهم في طلعات البر (خصوصا أيام البرد)، ان التنزاني والسنيدي هي افضلها، صحيح أن أول ما تشريها يكون حجمها كبير اذا صفتها، لكن مع الوقت والاستعمال تصغر.
اتمنى اني وصلت المعلومة المفيدة باختصار.