حلبه قصيميه بالسكر ( علاج الظهر ) بعد الله

[المنغولي]

السلام عليكم

من مايعرف الحلبه وخاصه القصيميه والتي تمتاز بكبر الحبه والرائحه الجيده وهذي طريقة تحضيرها

المكونات

1- حلبه قصيميه ( حب كبير ) عشان تاكلها
2-سكر
3-حليب السعودية
4-زنجبيل ( طازج )

بنجي لفوائد كل وحده على حده ........

نشوف الطريقه الآن

جب ابريق وسط وحط فيه أربع ملاعق حلبة وجب السكر وحط ثلاث الى أربع لأن الحلبه فيها مرورة ( حسب رغبتك ) وبعدين عبها مويه ولاتملاها عشان الحليب هم جب الزنجبيل وابشره (نصف حبه تكفي ) هم حطه على الحلبه.. حطها على النار الهاديه وخلها شوي الين تصير ( صفراء اللون ) ثم أول ماتقلب طلعها وجب كرتون حليب السعودية ابو (ريال) وشقه من فوق أو حط (المزاز) وصبها على الحلبة وعليكم بالعافية ..

نجي للفوائد

1- الحلبة .. غنيه بالحديد وتقوي المناعة وملينه للبطن ومدره للبول (الله يكرمكم ) ومفيده للأعصاب والعظلات والعظام وتعطي دفء
2- السكر .. سعرات حراريه مهمه في البر للدفئ والنشاط والحراره والدفئ ويعتبر الجلوكوز سريع الهضم مما يعطينا مصدر سريع للطاقة
3-الحليب .. مايحتاج نقول شي عن الحليب وخاصة المصدر الثالث من مصادر الطاقة وهو ( البروتين ) والذي يساعد في ترميم العظلات والأنسجه المتمزقه وخاصه للي يكرفون في البر شيل وحط وفلان مغرز أو متعلق يالله ندفه وآه يارجلي وآه ياظهري خخخخخخ .. غير كذا فيتامين أ واللي مع الشمس يعطينا عظام صحيه ويبعد عنا هشاشة العظام الله يعافيكم ..
4-الزنجبيل .. قاتل الجراثيم والبكتيريا وجالب الدفئ ومريح البال

بالنسبة لريحة الحلبة فماتشيل هم البرد يساعد في تخفيفها والزنجبيل يخفف منها أيضا

<<< تراه عزوبي

أخيرا عسى هالوصفة تحوز على إعجابكم وحلبة هنيه

[وجيه 11]

ياخوي الحلبة زينة خصوصا في هالبرد إذا يبست عضلاتك ومفاصلك ، لكن المشكلة ريحتها ، لو تدخل على عيالك وانت مجرب خلطة المنغولي أو مسير عليه أمرحت في الحوش :(
لكن على قولتك ، مع اني ما أدري وما جربت ، أن الزنجبيل يخفف من الريحة ، وبعدين إذا أنت عزوبي وما عندك حرمة تستنكر ريحتك ، وش السواة بالدوام ؟ خصوصا مع بعض الناس الي يدرس تربية رياضية ؟ :p

[عبدالله الصالح]

لا وزودك من الشعر بيت لو تحط .
1 -حلب
2- سكر حسب الرغبة
3 - نعناع
والله ينت تبي تذوق طعم :good2: :good2: من غير ريحة مع العلم ان الحلب بالشتاء مالة ريحة.
اخوك القصمنجي...

[المنغولي]

8
8
8

شهد شاهد(ن) من أهلها ... بنجرب النعناع وأكيد بيصير لذيذ المذاق

وجيه11

أنا من رأيي انك ماتصير أناني وتشربها بلحالك (وجه يغمز)

خل الدعوا حلبه في حلبه وبالنسبه للتربية البدنية فماعليك يارجال خل معك (قزازة)عطر (مغاسل) ورش من راسك لرجليك

مشكورين على إضافتكم

[الضاري]

1- الحلبة .. غنيه بالحديد وتقوي المناعة وملينه للبطن ومدره للبول (الله يكرمكم ) ومفيده للأعصاب والعظلات والعظام وتعطي دفء


الوكاد أنة فياجرا والا سنافي بس مشكلتة هالريحة..

آخر طلعة لنا واحد من الشباب شفط يما قال بس من حليب الحلبة ...


أخرتها نام لحالة برا الخيمة :D

[أبوالعيـال]

السلام عليكم

اقترح ان يستبدل السكر بالعسل فهو اكثر فائدة لكني لم اجربه


والسلام عليكم