وش الحل مع ماطور الهواء هذا يامكشاتيين (توجد صور )

[ابو شكاع]

بسم الله الرحمن الرحيم

السلام عليكم ......... صبحكم الله بالخير يامشكاتيين ........ السالفة ياطويلين العمر ان هالماطور اللي بتشوفون صورته الحين عندي... يعتبر جديد مهوب قديم ... واستعمالي له مهوب كثير ....المهم يوم من الأيام وبسبب وجود قطعة بلاسيتك في سنته الداخليه اضطرينا اننا نخرب السنة علشان نعبي الكفرات هواء ....المهم بعدها صار ما يركب بالبلف مضبوط .... رحت لمحل وقام ورهم لي الحديدة اللي يدخل فيها بلف السيارة .... هي مرتين اللي استخدمتها تقرييا ...وخربت .... صارت تهرب هواء مع القفيز ....هذا غير ان الساعة حقت ضغط الهواء صارت غير دقيقة ......الظاهر انها صارت ساعة مهيب دقيقة :D<<< مهوب وقته .. السؤال الحين وش الحل ؟ انا سمعت انه اللي او الهوز لحاله يباع جديد هل هذا صحيح ...ووين الاقيه ؟ وبكم سعره ؟ ...

هذي الصور اللي بتعطيكم فكرة اكثر عن اللي ابقوله لكم

هذي صورة اللي او الهوز مثل ما يحبون اهل الخليج انهم يطلقونه عليه

http://www.mekshat.com/pix/upload/images6/mk2388_maa6or.JPG






وهذي صورة مقربة لرأس اللي او الهوز المرهم

http://www.mekshat.com/pix/upload/images6/mk2388_ma6or1.jpg



وش رايكم ؟!

[شايب الصمان]

ابو شكاع
وعليكم السلام ورحمه الله وبركاته
صباح النور
يوجد نوع ممتاز جدا وتستخدمه ارامكوا نفس فكرة الى موجود عندك وزياده عليه يوجد به ساعه القياس .
الى تبي موجود عند محلات التى تبيع الرافعات وكمبرسرات الهواء ومعدات تغير الزيوت . منها بالدمام شركه خشيم وشركه الحزام ودار المعدات الصناعيه .ولكن أبشر عطني عنوانك على الخاص وأرسلها لك .

[ابو شكاع]

الله يجزاك خير ياعمنا

السؤال اللي يطرح نفسه .... وين الاقي هالليات ؟ هل الاقيها بالمحلات اللي تقول اولا ؟

عموما ......... بياصلك العنوان على الخاص ان شاء الله والله يغفر لك ويسلمك

[ناصح]

عن اذنك يا أبو شكاع

لأن كثيرين يعانون من نفس المشكلة اللي عندك

نرجو من الاخ الكريم شايب الصمان ان يوضح لنا اكثر وخاصة لو كان مع صورة

[المري]

السلام عليكم

اخوي ابو شكاع


العام شريت اثنين من هذه المواطير اللي هوزها اصفر وكلها عطلانه وهي مازالت جديدة


بكرة على خير سوف ابحث عن اهوازها وان شاء الله اني القاها اذا لقيتها بأرسل لك واحد

بس ياليت ان تكلمنى بكرة بعد صلاة الجمعة ان شاء الله..


اخوك / المري

[ابو شكاع]

اخوي ناصح اهلا وسهلا بك ....

مثل ما تشوفون .... ليت شايبنا يصور لنا نوشف هالماصورة

حياك

[ابو شكاع]

المري

هلا وغلا

الله يسلمك ويجزاك خير

يامكشاتيين ....... ياكرماء ........... ياليت تفهمونن شوي .............. كرمكم سابق ............ والموضوع للبحث عن حل لهالمشكلة ....واذا لقيت عند واحد منكم هوز اوحل فالكثيرين ما يعرفونكم وممكن بعد يتصفحون فقط وماهم اعضاء

وانت يالمري يالغالي اذا الهوز عندك فتكفى ابيه ولكن كل شي بسعره الله يرضى عليك

ومشكوووور وما قصصصصرت

[مرهم مواطير]

أخوي ابو شكاع


انا ممكن افيدك وارسلك الي تبي ........ موجود بالرياض شارع يقال له شارع ((الريل )) كله عدد مصانع وادوت ورش واشياء كثيرة ......... بس اللي الي عندك ما ادري وش مقاسة الي يركب على الماطور

او ياليت تعطيني اسم ما طورك واشوفه عندنا وادور لك اللي

تحيات اخوك مرهم مواطير بيوك هيدروليك

[مرهم مواطير]

معليش الصورة ما طلعت معي من اول شي

اللي موجود معي ولا احتاجة

لأنه واحد من ربعي خرب ما طورة .... واخذت اللي منه


لكن ممكن ترسلي رسالة على الخاص بعنوانك او جوالك وابشر بسعدك

تحيات مرهم مواطير

[الحاتمي]

مساءالخير ابوشكاع الحل عندي لمشكلتك واناعانيت من نفس المشكله
الحل انك تكنسل اللي الاصفروتشتري لي عادي اللي يكون مغلف بقماش وهو خاص للهواء(لي البوجي)
خفيف ووذف
بس ينقصه شوي ترهيم وكبس حتي يشبك مع الماطور
امامن جهة البلف عليك انك تشتري الراس الخاص لتعبية الهواء مثل اللي يستخدمه البنشري وتركبه وتشده بقفيز
وبكذا تستغني عن اللي الاصفروبلاويه
والسلام

[ابو شكاع]

مرهم مواطير حياك الله يالغالي
تدري عاد شي .......... قبل شهر وانا ما خليت محل بشارع الريل ما لفيت به ....من محل لمحل من محل لمحل ابشري ماطور كهرب ......وما دريت انه ممكن الاقي لهالماطور حل هناك ........وبالنسبة للرسالة ...انتظرها ... وابفاضل بالسعر بينك وبين المري ....يعني بشوف الهوز اللي مع المري هو ماشي كم بنشر واللي عندك ماشي كم بنشر بعدين اقرر ايهن اشري ... :p
تسسسسسسسسلم ولاهنت

[ابو شكاع]

هلا هلا هلا بالحاتمي

هلا بالقطووووووووع ياخوي وين الناااااس ؟

ما لك حق ...... فعلا مير تركتنا فجأتن فجأة ........... وراك الله يرضى عليك !!

مشكوووووووووور وما قصرت على هالراي الطيب وشكرا لك وتكفى لاعاد تخلينا

[الكاسر23]

يا أبو شكاع مشكلتك صارت لي وحلها بسيط جدا .. !!

المشكلة اصلا ليست في ماطور الهواء، لان الماطور اذا شغلته يدفع هواء، وبالتالي المشكلة صارت بعد ما يخرج الهواء من الماطور باتجاه الليّ.
صارت لي هذه المشكلة وانا في النفود، يوم نويت الخروج منها وجيت اعبي الكفرات لقيت ان الماطور ما يعبي هواء والعداد يعطي قراءة خطأ، مرة صفر ومرة داق الطبلون.
فحصت دفع الهواء من اخر الليّ لقيت انه فيه هواء، لكن المشكلة ظهرت عندي في ابرة بلف الكفر. فمن كثر ما افك الابرة عشان انسم الكفرات عند دخول النفود واشدها بقوة بعد التنسيم، صارت السسته اللي في (البلف) شادة على الاخير، ويوم اني فكيت ابرة البلف بالكامل وعبيت بالماطور، مشت الامور على ما يرام، وبعدها ركبت الابرة في البلف لكن ظهر لي تنسيم بسيط، شديت بعدها الابرة ومشت الامور تمام.
ربما مشكلتك تشابه مشكلتي، والحل هو تغيير بلف الكفرات وخل معاك سبير كم من أبرة بلف لوقت الضرورة.
اخي أبو شكاع .. تأكد من ان المشكلة هي من البلف أولا بان تضغط عليه فاذا نسم فمعنى ذلك ان المشكلة من اللي، ولكن اذا لم ينسك فمعنى ذلك لازم تغير ابرة البلف.
ومعليش على الاطالة.. فاذا لم تكن هذه مشكلتك او حلها ، فلعل تجربتي تنفعكم مستقبلا.
أخوك
الكاسر 23

[ابو شكاع]

اخوي الكاسر 23

بارك الله فيك ........... المشكلة اللي عندي والتهريب حاصل من عند القفيز ...والمشكلة هذي ما كانت من البلف

عموما اشكر لك هذي المداخلة المفيدة

تسلم

ولاهنت

[الكاسر23]

عموما حصل خير يا أبو شكاع وكل واحد يصلح سيارته :bounce:
لكن تقدر تركيب ليّ بمقاس مناسب من شارع الريل وربما في شارع الغرابي قطع غيار لماطور الهواء خصوصا الليّ.
وتقبل تحياتي

[ابو شكاع]

ياجعلك تسلم وانا اخوك يالكاسر 23

الف شكر لك ....

[بركان]

السلام عليكم ورحمة الله وبركاته

طلباتكم متوفرة في بداية شارع الريل من جهة الغرابي وانت متجه شرقا , ليات البناشر المعروفه يبيعونها بالمتر هذي الله يسلمكم في المحلات اللي على اليمين وبدايات ونهايات الليات المصنوعة من النحاس موجوده في المحلات اللي على اليسار على مسافة 200 متر تقريبا. انا مريت عليها الاسبوع الماضي وشريت لي هوا بالمتر وركبت البدايات ولحمت مدخل اللي في فتحة الهواء بالماطور وبعد ركبته داخل الكبوت.

تحياتي.

[عزوز الليل]

ياالربع عندي مثل الماطور بس ضاعت القطعه السوداء الي تربط بينهم مدري هو فيوز او...... المهم ان الماطو منطول ان كان له حل. وشكرا لك على اثارت ذا الموضوع