سؤال عن مواطير الهواء للكفرات

[خيال الغلبا]

ياشباب جربت شواحن هواء الكفرات ومانفعت
ومره احتجت واسعفني واحد بلي هواء كان موجودا داخل الكبوت ولكني لاحضت انه يركب سير على بكرة داخل الكبوت فيخرج من اللي هواء قوي جدا يملأ الكفر خلال ثواني
فهل احد منكم عنده فكره عن هذه الطريقة ومايلزم لها

[هاوي نفود]

هذا الله يسلمك بستم هواء عادي ( زي اللي في البناشر بس حجم صغير ) يتم تثبيته بنفس طريقة تثبيت الدينمو اللي في الكبوت بمعنى أنه يمكن تحريكه ( شد - إرخاء ) ويكون مقابل لسير المكيف أو اللي تبي ( بصراحة مادري أي السيور ) والبستم هذا أكثر ما يركب في بريدة عند المطلق وكيل مواطير الهواء ( ولاني متأكد إن المطلق بنفسهم اللي يركبونه ) عموماً أنا مثلك شفت واحد مركبه على جيب شاص ورحت للمطلق بشارع الريل وطلبت منه نفس ال**** وقال إنه مايركبه ولكنها موجوده عنده وذكر لي الموظف إن فرعهم في بريدة يركب للجيوب هالبستم ...

((((((((((( :D والله ياهي طلعت قصة :D )))))))))))



وتقبل تحيات أخوك




http://www.mekshat.com/pix/upload/sign/images/mk9302.gif

[القناص]

السلام عليكم

طبعا ال ARB الاسترالي ممتاز وقوي وغالي ول900ريال
وبعده حبيب الشعب "ابو جمل" الاصلي ويتراوح سعره بين 240 ريال الى 330ريال حسب غش المحلات.

اما الظاغط اللي يركبونه على بكره على المكينه فتراه ما يسوى العزم اللي تضيعه هالبكره اللي تدور دايم على الفاضي.. :)
ناهيك عن الحربثه في بودي المكينه وما يسببه ذلك من اضرار علمها من علم وجهلها من جهل.

اذا اوصيك بالماطور الكهربائي ولا تركبه في مكان حار حتى لا ينقص عمره الافتراضي
واحرص على اللي يعطيك ضمان على الماطور.
وبالتوفيق

[ولد وايل]

السلام عليكم...


مواطير الهوا افضل شي ورخيص اسمه سوبر كمل (A30) امبير له فلتر سعره بالغرابي

180ريال بشنطه بلاستيك سودا مثل البكم القديمه



ولك تحياتي

[خيال الغلبا]

اخوي هاوي نفود الله يحفظك هل البكرة تستمر في الدوران مع المحرك على طول والا شغلها فقط عند شبك السير بها
وياليت تعطيني عنوان المطلق والا تلفونهم وشكرا لك

ولد وايل والقناص شكرا لكم ولكن اعجبني جدا قوة الهواء في الماطور

[raaayk]

وأنا احب افيدكم .... ومن اجود المواطير مواطير الهيدروليك البيوك

قوية ولا تحتمي بسرعة ...... قبل فتره اعلن واحد بالمنتدى عنها وتم الغائه

ارسل رساله خاصة اذا تبي رقم الرجال الي يبيعها....... وعلى ما أعرف ان المري احد اعضاء مكشات شراها
الي يبي زود تفاصيل عنها يسأله عنها

[بركان]

ماطور البيوك ما ينفع ولا ببيزه
ركبته وخسرت ولا نفخ كورة البزران

يوجد نوع اسمه ساكا الآصلي وسعره لا يقل عن 280 انت وشطارتك مع ضمان سنه قوي مثل قوة السوبر كمل وكلهم اخوان توم بس الاسماء تختلف.

عليك قبل شراء اي ماطور تجربته في المحل وذلك بسد فتحة الهواء باصبعك بكل قوتك فان غلبته فاتركه في مكانه وابحث عن غيره وان غلبك فلا تفرط فيه.
بعضها عندما تسد فتحة الهواء يطفي.!!!!!!

[خيال الغلبا]

اخوي هاوي نفود
ممكن توصف محلهم في بريدة وين هو فيه
علما بأني مااعرف في بريدة الا الشارع العام

[قتال]

السلام عليكم ورحمة الله وبركاته ،،،

والله يالربع .. ما شفت أزين من هالنوعية .. لها معي سنة ومن أروع ما يمكن ..

http://www.mekshat.com/pix/upload/images6/mk2426_truck_air.jpg


http://www.mekshat.com/pix/upload/images6/mk2426_truck_air_compressor.jpg

وسعرها عندنا بالكويت ما يقارب 160 ريال ..

[مغترب جيزان]

اخوي خيال الغلبا
فيه "لي" متصل ببلف خاص يوضع مكان أحد البواجي ويوصل للكفر وعند تشغيل السياره يقوم بدفع الهواء هو صحيح انه من أيام موديلات قبل الـ 85 بس تحصله وهوجيد
كذلك لقيت مع اللاندكروزر ماطور هواء صغير وانيق بشنطه ويفك أزمه
وسلامتك

[الضاري]

والله ياهي شغلة هالمواطير ..

كل يوم مركب ماطور ومن بكرا فاكة لأنة خربان..

عندي ماطور ثبتة في كبوت السيارة .. وأستعملتة كم مرة .. المهم صار نفخة ضعيف .. وبعدين قام يشتغل ولا ينفخ هواء .. المهم فكيتة لقيت الجلدة اللي تركب على بستم الهواء متقطعة .. حاولت أرهم لة جلدة .. ماقدرت ..

هل يوجد قطع غيار لمواطير الهواء اللي مثل هذة النوعية؟؟

على فكرة يجي معة لي لولبي أسود ولا يوجد فية بلف لقيلس ضغط الهواء ... البلف يوجد في نفس الماطور ... ويجي معة شنطة ... مكتوب عليها اسم وكيلة ( العوبثاني )