المساعد الشخصي الرقمي

مشاهدة النسخة كاملة : حي الجواب اللي يشوق الصقاقير=من واحد ٍ داخل خفوقي مزاره..... رد على قصيدة ابو عبدالله


أبو فهد العيد
01/02/2010, 01:40 PM
السلام عليكم ورحمة الله وبركاته..
هذي ابيات رد على قصيدة ابو عبد الله اللي اتحفنا فيها الله يسلمه .. ..


اللي يقول في مطلعها..


مشتاق انا لوجيه بعض الصقاقير....اللي لهم عرفن بعلم الصقاره


أقول فيها


حي الجواب اللي يشوق الصقاقير
................................من واحد ٍ داخل خفوقي مزاره
يامرحبا وأهلين ما غرد الطير
..................................وعداد سكان الخلا والحضاره
قريت قافك يا عشير المناعير
.............................وقررت اصوغ القاف باجمل عباره
العذر يايوسف الى جاك تقصير
.................................والي مثل شرواك يفرض وقاره
راس ٍ مع العربان منتب معيثير
....................................بالرس عرفك شاهر ٍ كالمناره
حنا لهينا وقت حل المعابير
.....................................مابين دعو وبين قص وسباره
في ماقع ٍ ما دوجت به مظاهير
....................................بيض الخدود مفلطحات الفقاره
نمسي على خير ٍ ونصبح على خير
.......................................والرزق ربي كافل ٍ باختياره
نقنص على الحروة وناطى العثامير
....................................ونصبح على الجره جميع نتباره
نصيح بالكنود وكلن لها يسير
.......................................والي طلع طيره يرخّي وساره
نرقب مطير الطير وسط المناظير
............................................متعلّي بالجو مرهي طياره
حر ٍ وحش ما هوب من وارد الجير
.........................................طرح الشمال وشابكينه مهاره.
صافر ظهر واحمر يشوق النواظير
............................................قصير ساق ومنكبه كالعماره
عوق الخريش ملوع ٍ للمعاشير
.............................................عديم زايد بالجسر والظفاره
وجينا على الريشه سوات الطوابير
...........................................وشفنا مداوسهن وكثحة غباره
هذا العذر واقبل جميع المعاذير
..........................................يابو خليفة سعد من كنت جاره
هذا الهوى يا شوق بيض الغنادير
.........................................وخوتك مكسب لي واكبر تجاره


طلال بن فهد العيد
ذراع الذيب
01/02/2010, 05:00 PM
السلام عليكم ورحمة الله وبركاته,,
مسيت بالخير يابوفهد,,

وصح لسانك ولسان اوعبدالله يستاهل الرد الجزل وماهي غريبه عليك كفيت ووفيت,,
حر ٍ وحش ما هوب من وارد الجير
..........................................طرح الشعيبه شابكينه مهاره
طرح الشعيبه ابي اتطفل واسالك عن طرح الشعيبه ياليت تعطينا نبذه عنه,,
ومتى طرح يالغالي والله لايهينك تحياتي لك,,
يوسف الخليفة1
01/02/2010, 09:00 PM
حي الجواب وحي طير المزابير=وحي القصيد اللي تزاما مداره
يا مرحبا باكتابن ابين من النير=واشهر من المرقاب فوق السماره
ما جيت غير من الزحول المناعير=يابو فهد راجت عليك النداره
باللولو والمرجان تاتي على خير=ما هوب هجس القول مير بجداره
ما حال دونك عاليات المقاصير=الا يا كود طويق ميسور قاره
الدعوا مع سيد السريع اول عصير=تلين دونه كايدات الحجاره
تفوح باقدومك زهور النواوير=وايترنتي الرجال زاد انتشاره
تهون لاجلك مقبلات المعاسير=والذرب ما تطفا بالاجواد ناره
والا نروح لعاليات العناقير=ما ثار باسباب الهتايش غباره
فيها المذاري والوجيه المسافير=والمارد الصافي على اول نهاره
تلقا الحباري بالدعوب المشاجير=ملوبداتن بين صمدا وخفاره
والحر الاشقر صافي اللون شرير=لاشاف خرب الجول يقدح شراره
قد قالوا انه جالبينه صقاقير=وحش فلا راج بحراج التجاره
ولا عليه رقوم قوم المزاغير=مقيدينه بالختم واستماره
هذاك ديك مراح بين المجاحير=ما يرتفع يبني شحم بانثباره
ترا الصقاره كنها رياسة الحير=يهواها شبلن جايزله مساره
هذا الولع ما له ردايم وتسكير=ما هوب عشق البيض سلمى وساره
عشق الحرار اللي بخشم الدنانير=بافواه ذرفين الكفوف اشتهاره
هذا تمام القاف يا فلان ما غير=وترا حلاة العايده باختصاره




يوسف الخليفة ( أبو عبد الله )
بن بتال
02/02/2010, 06:53 AM
بسم الله الرحمن الرحيم

بيض الله وجيهكم جميع وصح الله لسانكم
شعّار كبّار ووافين
لا هنتو
جرير
02/02/2010, 10:23 AM
صحل لسا ن الجميع
مساجلا ت جميله من شعراء نعتز بمتابعة ابداعهم
اميرة الظلام
02/02/2010, 10:41 AM
صح السان الجميع
مجاراة فرسان الشعر تستحق المتابعه..,,
أبو فهد العيد
02/02/2010, 01:30 PM
السلام عليكم ورحمة الله وبركاته,,

مسيت بالخير يابوفهد,,


وصح لسانك ولسان اوعبدالله يستاهل الرد الجزل وماهي غريبه عليك كفيت ووفيت,,
حر ٍ وحش ما هوب من وارد الجير
..........................................طرح الشعيبه شابكينه مهاره
طرح الشعيبه ابي اتطفل واسالك عن طرح الشعيبه ياليت تعطينا نبذه عنه,,
ومتى طرح يالغالي والله لايهينك تحياتي لك,,



حياك الله اخوي ذراع الذيب..
وصح بدنك يالغالي..
بالنسبة للطير اللي استفسرت عنه ,
هو طير واحد من الربع ..واتصلت عليه عشان أأكد المعلومة اللي عندي وانقل لك كل شي عن الطير..
لكن الطير طلع طرح الدبدبه العام الماضي فرخ..
عشان كذا بغير البيت واقول.
: طرح الشمال وشابكينه مهاره..
واعتذر ان كاني استعجلت بالحكم على مكان طرح الطير,,
وبيض الله وجهك انك خليتني ارجع لراعي الطير,,
تخبر مالها داعي اسولف والا انقل خبر مهوب صدق,
شرفني مرورك
أبو فهد العيد
02/02/2010, 01:40 PM
حي الجواب وحي طير المزابير=وحي القصيد اللي تزاما مداره
يا مرحبا باكتابن ابين من النير=واشهر من المرقاب فوق السماره
ما جيت غير من الزحول المناعير=يابو فهد راجت عليك النداره
باللولو والمرجان تاتي على خير=ما هوب هجس القول مير بجداره
ما حال دونك عاليات المقاصير=الا يا كود طويق ميسور قاره
الدعوا مع سيد السريع اول عصير=تلين دونه كايدات الحجاره
تفوح باقدومك زهور النواوير=وايترنتي الرجال زاد انتشاره
تهون لاجلك مقبلات المعاسير=والذرب ما تطفا بالاجواد ناره
والا نروح لعاليات العناقير=ما ثار باسباب الهتايش غباره
فيها المذاري والوجيه المسافير=والمارد الصافي على اول نهاره
تلقا الحباري بالدعوب المشاجير=ملوبداتن بين صمدا وخفاره
والحر الاشقر صافي اللون شرير=لاشاف خرب الجول يقدح شراره
قد قالوا انه جالبينه صقاقير=وحش فلا راج بحراج التجاره
ولا عليه رقوم قوم المزاغير=مقيدينه بالختم واستماره
هذاك ديك مراح بين المجاحير=ما يرتفع يبني شحم بانثباره
ترا الصقاره كنها رياسة الحير=يهواها شبلن جايزله مساره
هذا الولع ما له ردايم وتسكير=ما هوب عشق البيض سلمى وساره
عشق الحرار اللي بخشم الدنانير=بافواه ذرفين الكفوف اشتهاره
هذا تمام القاف يا فلان ما غير=وترا حلاة العايده باختصاره





يوسف الخليفة ( أبو عبد الله )


صح لسانك يابو عبد الله ..
لاهنت ياجعل من خلفك في الجنة .
عز الله اننا فاقدينك وودنا بشوفتك.. بس تخبر هالايام الواحد مايقر..
وابشر باللي يدق عليك ويواعدك ان شاء الله ,,
اسعدني ردك لاعدمتك يالغالي
الحربي 777
03/02/2010, 09:58 AM
طلال بن فهد العيد ** يوسف الخليفة ( أبو عبد الله )
_____________


:good: :good:
بارك الله فيكما والله يعطيكم
1000 عافية
وصح لسان الجميع ولا هنتوا
:good:
شيهواب
07/02/2010, 04:00 PM
يعطيك العافيه ابوفهد حر ٍ وحش ما هوب من وارد الجير
..........................................طرح الشعيبه شابكينه مهاره
أبو يزيد 11
07/02/2010, 08:51 PM
صح لسان الجميع


يازين مجاراة الرجال المناعير

اللى لهم حشمة ومشيهم وقارة

ياهية يارجال ٍ من ماكر نوادير

الله يكفيكم شــر دنيا ٍ دوارة
فتى مرات
09/02/2010, 02:05 AM
باارك الله فيكم
يعطيكم الف عاافيه والله يديم المحبه .
قرناس صلا
09/02/2010, 04:18 AM
ابو فهد
ابو عبدالله

صح لسانكم وبيض الله وجيهكم ابدعتوا وامتعتونا بقافكم الجميل ومعانكيم الجزلة

تقبلو تحياتي واعجابي
مقدور
09/02/2010, 06:24 PM
ابو فهد
وابوعبدالله

حي والله هالوجيه الغانمه وحي والله هالابداع وحي والله هالمساجلات الجزله
a1Ruwais
10/02/2010, 02:34 PM
صح لسانك..
قصيدة جميلة..